Ikhafendera nthawe yakuti Elizabeti akhale na mwana. M’bale wace Mariya akhali pabodzi na iye kwa minyezi mitatu. Patsogolo pace, Mariya adagoneka kuti afambe mtantho utali wa kubwerera ku mui kwace ku Nazaleti. Ndipo ikhadasala minyezi mitanthatu kuti iye akhalembo na mwana.

Mariya atandoyenda, Elizabeti adabereka mwana. Bzikhali bzakudekeza kuti Elizabeti adabereka bwino ndipo iye pabodzi na mwanayo wense akhana thanzi la bwino. Pomwe Elizabeti adawonesa tcecero, adzinza na wanthu winango adakondwa naye pabodzi.

Mwakubverana na cakutonga ca Mulungu kwa Ajirayeri, mwana wacimuna akabadwa, akhafunika kugwatidwa pa nsiku ya cisere, patsogolo pace acipasidwa dzina. (Mwambo 12:2, 3) Wanthu winango akhakumbuka kuti mwanayo angadakhala na dzina ninga la pai wace, Zakariya. Koma Elizabeti adalewa kuti: ‘Ne! Iye an’dzacemeredwa Juwau.’ (Luka 1:60) Kumbukirani kuti anjo Gabriyeli akhadaleweratu kuti mwanayo an’dzacemeredwa Juwau.

Adzinza pabodzi na wanthu winango akhabverana lini nabzo ndipo adati: ‘Palibe wadzinza wako ali-wense omwe ambacemeredwa na dzina limweri.’ (Luka 1:61) Mwakuphatisa basa cirewedwe ca manja, iwo adabvunza Zakariya dzina lomwe an’funa kuti apase mwana wace. Zakariya adakumbira katabwa, acinemba kuti: ‘Dzina lace ni Juwau.’—Luka 1:63.

Na bzimwebzi, Zakariya mwakudabwisa adayamba pomwe kulewalewa. Kumbukirani kuti iye adakhala bewewe pomwe alibe kukhulupira bzomwe anjo adalewa kuti Elizabeti an’dzakhala na mwana wacimuna. Tsono pomwe Zakariya adayamba kulewalewa, wanthu wense adadabwa kwene-kwene, acimbabzibvunza kuti: ‘Kodi mwana umweyu an’dzakhala wa mtundu wanyi maka-maka?’ (Luka 1:66) Iwo adawona boko la  Mulungu pakuwona bzomwe bzidacitika pa kupasidwa dzina kwa mwanayo.

Patsogolo pace, mwakudzazidwa na mzimu wakucena, Zakariya adalewa kuti: ‘Atumbizike Yahova Mulungu wa Jirayeri, thangwe waceukira wanthu wace ndipo awapulumusa.’ Ndipo iye watipasa mpulumusi wamphanvu, m’nyumba ya mtumiki wace Davide. (Luka 1:68, 69) Omwe ankulewedwa kuti ‘mpulumusi wamphanvu’ ni mbuya Jezu omwe angadadzabadwa. Zakariya adalewa kuti mwakuphatisa basa mpulumusiyu, Mulungu ‘pambuyo pakuti tapulumusidwa m’manja mwa anyamadulanthaka, atipase mwayi wakucita utumiki bwakupambulika kwa iye mwakusaya mantha, mwakukhulupirika na mwacirungamo pamaso pace nsiku zense.’—Luka 1:74, 75.

Pakulewa bza mwana wace, Zakariya adaleweratu bzomwe an’dzacita kuti: ‘Pakulewa bza iwepo mwanawe, un’dzacemeredwa mpolofeta wa ule omwe ni mkululetu, pakuti un’dzakhala patsogolo pa Yahova kuti ukakonzeretu njira zace kuti ukadziwise wanthu wace bza cipulumuso mwa kulekereredwa pikado zawo. Thangwe ra nsisi zikulu za Mulungu wathu. Na nsisi zimwezi, ceza ca macibese cin’dzatifikira kucokera kudzulu, ndipo cin’dzabvunikira omwe ali mu mdima na mu mthunzi wa infa, na kutsogolera bwino-bwino minyendo yathu mu njira yamtendere.’ (Luka 1:76-79) Ni polofesiya yakulimbisa, nandi?

Pa nthawe imweyo, Mariya omwe akhanati kulowodwa, akhadafika ku Nazaleti. Kodi n’ciyani comwe cidacitika pomwe wanthu adadziwa kuti iye akhana pathupi?