Sezare Agusto, omwe akhali mambo wa umambo bwa Roma, adatonga kuti munthu ali-wense akabzinembese ku boma. Tenepo Zuze na Mariya adafunika kuyenda ku dziko la Beremu, ku mmwera kwa Jeruzalemu, komwe Zuzeyo adabadwira.

Mzinda wa Beremu ukhadadzala na wanthu omwe akhayenda kuti akabzinembese. Na kudzala kwa wanthuko, bzikhali bzakunesa kugumana mbuto yakugona kumweko. Na tenepo, mbuto yomwe Zuze na Mariya angadakhala mukhali mu thanga la mabulu na bzifuwo bzinango. Jezu adabadwira m’thangamo, ndipo Mariya adamufunikiza na nguwo, acimutula pa mbuto yomwe bzifuwobzo bzikhadyera.

Mpsakupenukisa lini kuti ni Mulungu omwe adacitisa kuti Sezare Augusto apereke lamulo lakuti wanthu wense akabzinembese ku boma. Thangwe ranyi? Thangwe bzimwebzi bzidacitisa kuti Jezu akabadwire ku Beremu omwe ukhali mzinda wa mambo Davide, nyamuya wace. Ndipo bzinembo bzikhadaleweratu kwa magole mazinji m’mbuyomu kuti Mambo wakupiciridwa angadadzabadwira mu mzinda umweyu.—Mikeya 5:2.

Bumwebu bukhali usiku bwakupambulika kwene-kwene! Mwadzidzidzi, kubusa kudawoneka ceza camphanvu comwe cikhabvunika amakabusa wense. Bumwebu bukhali umbiri bwa Yahova. M’bodzi wa anjo wa Mulungu adauza amakabusawo kuti: ‘Lekani kugopa! Ndiri pano kuti ndikudziwiseni bzipsa bzabwino bza cikondweso cikulu comwe wanthu wense an’dzakhala naco. Pakuti lero, wakubadwirani mpulumusi mu mzinda wa Davide, omwe ni Kristu Mbuya. Ndipo ici ndico cizindikiro kwa imwepo: Mun’kagumana katcece kadafunikizidwa na nguwo, kadagonesedwa mwakudyera bzifuwo.’ Pa nthawe imweyo, wanjo azinji wakudzulu adatawirambo kuti: ‘Mbiri kuna Mulungu Kudzulu, ndipo, pansi pano, mtendere pakati pa wanthu, omwe Iye ambawafuna.’—Luka 2:10-14.

Pomwe anjo wale adandocoka pakati pawo, amakabusa wale adauzana winango na mwanzace kuti: ‘Tiyendenidi ku Beremuko tikawone bzomwe bzacitikabzo, bzomwe Yahova watidziwisabzi.’ (Luka 2:15) Iwo adayenda mwakamfulumize kukanyang’ana tcece Jezu ndipo adakaligumanadi komwe anjo ule akhadawauza. Pomwe amakabusawo adafotokoza bzomwe anjo akhadawauza, wense omwe adabva nkhaniyo adadabwa kwene-kwene. Mariya adabva bzensenebzi ndipo adabzikoya mu mtima mwace.

Wanthu azinji ambakhulupira kuti Jezu adabadwa pa 25 Dezembro. Koma ku Beremu mwezi wa Dezembro ukhali mwezi omwe ukhabvumba, ndipo kukhacita mphepo mpaka nthawe zinango kukhacita gelo. Mu nthawe imweyo bzikhali bzakunesa kuti amakabusa ambakadyese mabira yawo kuthengo mpaka kumbagoneratu kumweko. Ndipo mambo wa Umambo bwa Roma angadacemeresambo lini wanthu omwe akhakomedwa lini kale na utongi bwace kuti akanembese ku boma mu nthawe yomwe ikhabvumba na kucita mphepo. Bzinkuwonekeratu kuti pinango Jezu adabadwa mu outubro.