Pa nthawe yomwe Mariya adacoka ku mui kwa Elizabeti, akhadapfitsa kale minyezi minai ana pathupi. Kumbukirani kuti atandokhala na pathupi, iye adayenda kwa m’bale wace Elizebeti omwe akhakhala kumapiri ya ku Judeya. Koma pomwe adabwerera kwawo ku Nazaleti, wanthu adazindikira mwakusaya kucedwa kuti akhana pathupi. Ndokumbukirani thupo lomwe Mariya akhanalo!

Nkhaniyi ikhali yakunesa kwene-kwene kwa Mariya thangwe iye akhali pa umakhadzi na nyakusema matabwa munango wakucemeredwa Zuze. Ndipo Mariyayo akhadziwa kuti cakutonga ca Mulungu kwa Ajirayeri cikhali cakuti munthu akakhala ali pa umakhadzi koma acicita upombo na munthu munango, akhafunikira kutemedwa na minyala mpaka kufa. (Bzakutonga 22:23, 24) Ndipopa, napo kuti Mariya akhalibe kucita upombo na munthu ali-wense, koma iye akhabzibvunza kuti angadamufotokozera tani Zuze bza nkhaniyo, ndipo n’ciyani cingadacitika patsogolo pace.

Mariya akhali kunja kwa mzinda wace kwa minyezi mitatu ndipopa tinkupenukira lini kuti Zuze akhafunisisa kumuwona. Pomwe iwo adawonana, Mariya adamufotokozera bzense bzomwe bzidacitika munjira yakubveka bwino, kuti akhana pathupi ndipo pathupipo adapatenga mwa mzimu wakucena wa Mulungu. Ndokumbukirani momwe bzikhaliri bzakunesa kuti Zuze abvesese na kukhulupira bzimwebzo.

Zuze akhadziwa kuti Mariya akhali mkazi wabwino ndipo akhana makhalidwe yabwino. Ndipo iye akhamufuna kwene-kwene. Napo Mariya adamufotokozera mwakubveka bwino, koma Zuze adapitiriza kukumbuka kuti mimbayo ikhali ya munthu munango. Zuze akhafuna lini kuti Mariya aphedwe na minyala, ne kumunyazisa pakati pa wanthu; tenepo iye adabzikoya mu mtima  mwace ndipo adakumbuka bza kumalisa umakhadzibo mwakabisira. Mu nthawe imweyo, wanthu omwe akhali pa umakhadzi, akhawonedwa ninga kuti alowolana kale ndipo bzikhafunika kulambana kuti amalise umakhadzibo.

Patsogolo pace, Zuze akali mkati mwa kukumbukira bza nkhani imweyi, iye adayenda kukagona. Tenepo, anjo wa Yahova adamubwerera kutulo, ndipo adamuuza kuti: ‘Leka kugopa kutenga mkazi wako Mariya uciyenda naye kumui kwako, thangwe pathupi pomwe anapo apatenga na mphanvu ya mzimu wakucena. Iye an’dzabereka mwana wacimuna, ndipo iwepo udzamupase dzina lakuti Jezu, pakuti iye an’dzapulumusa wanthu wace ku pikado zawo.’—Mateu 1:20, 21.

Pomwe Zuze adamuka kutulo, adakondwa kwene-kwene thangwe tsapano akhadabvesesa bza nkhaniyo! Iye alibe kucedwa kucita bzomwe anjoyo adamuuza. Iye adatenga Mariya aciyenda naye kumui kwace. Bzimwebzi bzikhali bzakubvumizika ndipo bzikhali ninga kuti acita msinda wa malowozi, acidziwisa wanthu wense kuti iwo, tsapano akhali banja. Napo bzikhali tenepo, Zuze alibe kugonana na Mariya mpaka pomwe Mariyayo adadzabereka Jezu.

Pambuyo pa minyezi ming’ono-ng’ono, Mariya omwe akhadasala pang’ono kubereka pabodzi na Zuze adakonzekera ulendo bwa kucoka pa mui pawo mu mzinda wa Nazaleti. Kodi iwo akhafuna kuyenda kuponi pomwe Mariya akhadasala pang’ono kubereka?