Pomwe Jezu akhali ku Judeya, Mfarizeu munango adamucemera kuti akadye kumui kwace. Bzinkuwoneka kuti cimweci cikhali cakudya ca ku masikati, ndipo iye adabvuma. (Luka 11:37, 38; yezezerani na Luka 14:12.) Akanati kuyamba kudya, Afarizeu akhana mwambo wa kumbasamba m’manja mpaka mu nkhono-kono. Tsono Jezu alibe kucita bzimwebzo. (Mateu 15:1, 2) Kucita mwambo umweyu kukhali lini kuswa cakutonga ca Mulungu, koma ndibzo lini bzomwe Mulunguyo adatonga kuti wanthu ambacite.

Mfarizeu ule adadabwa kuwona kuti Jezu alibe kucita mwambo umweyu. Tenepo, Jezu adazindikira bzomwe Mfarizeuyo akhakumbuka mu mtima mwace, ndipo adamuuza kuti: ‘Afarizeumwe mumbatsuka kunja kwa kopo na mbale, koma mkati mwanu mudadzala dyera na uipi. Apsirumwe! Omwe adakonza kunja adakonzambo mkati, ndibzo lini?’—Luka 11:39, 40.

Nkhani ikulu pamwepa ikhali lini ya kusamba m’manja munthu akanati kudya, koma cinyengo comwe cikhalipo mkati mwa cipembedzo. Afarizeu pabodzi na wanthu winango omwe akhasamba m’manja ninga mwambo, akhatazira kucenesa mitima yawo kuti aleke kucita bzinthu bzakuipa. Ndipopa Jezu adawauza kuti: ‘Pasani wanthu wakusauka bzinthu bzomwe bziri mu mtima, mukacita tenepo bzinthu bzense pakulewa bza imwepo bzin’dzakhala bzakucena.’ (Luka 11:41) Bzimwebzi n’cadidi, thangwe munthu an’funika kupereka mphaso thangwe ra lufoyi lomwe analo kuna omwe ankumupasayo, sikuti thangwe ra kufuna kubziwonesa ninga nyakulungama pakati pa wanthu.

Bzimwebzi bzinkuthandauza lini kuti Afarizeu akhapereka lini mphaso. Jezu adalewa kuti: ‘Imwepo mumbapereka cakhumi ca tumbeu twa minti, aruda na mbeu zinango za mtundu uli-wense, tsono mumbayebwa cirungamo na lufoyi la Mulungu! Bzinthu bzimwebzi mukhafunika kuti mumbacite, koma mucipitiriza kucita bzinthu bzinango.’ (Luka 11:42) Cakutonga ca Mulungu cikhalewa kuti wanthu ambapereke cakhumi (ayai mbali ibodzi ya bzigawo khumi) ya bzomwe akhabvuna m’munda. (Bzakutonga 14:22) Bzimwebzi bzikhaphatanidzambo minti na aruda, tomwe tukhali tumasamba twakukomesera ayai kununcirisa cakudya. Afarizeu akhapereka cakhumi ca tumasamba tumwetu, koma akhacita lini bzinthu bzakufunika kwene-kwene bzomwe Cakutonga cikhalewa ninga kucita cirungamo na kukhala wakubzicepswa kwa Mulungu.—Mikeya 6:8.

Jezu adapitiriza kulewa kuti: ‘Tsoka kwa imwe Afarizeu, thangwe mumbafuna mipando yakutsogolo m’masinagoga na kumusidwa mukakhala muli m’misika. Tsoka kwa imwe, thangwe muli ninga mathenje yomwe yambanesa kuwoneka, ndipo wanthu ambafamba mwemo mwakusaya kudziwa!’ (Luka 11:43, 44) Wanthu akhawonedwa ninga wakupswipa akafamba padzulu pa nthutu. Tenepo, Jezu adaphatisa basa nfundo imweyi pa kufuna kulatiza kuti Afarizeuwo akhacita bzinthu bza cinyengo mwa kubisa.—Mateu 23:27.

Munthu munango omwe akhadziwa bwino Cakutonga ca Mulungu adalewa kuti: ‘Mpfunzisi, pakulewa bzinthu bzimwebzi, imwepo munkutukwanambo ifepano.’ Jezu adalewa utowa bzimwebzi na cakulinga cakuti alatize kuti atsogoleriwa akhatazira kuthandiza wanthu. Iye adawatawira kuti: ‘Tsoka kwa imwe anyakudziwa Cakutonga, pakuti mumbapasa wanthu mitolo yakunesa kuinyamula, koma imwepo mumbaikhuya lini mitoloyo ne na cala cokha. Tsoka kwa imwepo, thangwe mumbakonza thenje la cikumbuso la apolofeta, koma abereki wanu ndiwo omwe adawapha!’—Luka 11:45-47.

Mitolo yakunesa kuinyamula yomwe Jezu akhalewa ikhali miyambo yomwe Afarizeu adakhazikisa okha pabodzi na bzinthu bzomwe iwo akhalewa pa kubvekesa Cakutonga. Afarizeuwa  akhacitisa moyo wa wanthu kukhala wakunesa kwene-kwene. Iwo akhakakamiza wanthu kuteweza mitemo yawo yomwe ikhali ninga mitolo yakulemera kuna wanthuwo. Azibereki wa Afarizeuwa adapha Apolofeta wa Mulungu kuyambira Abeli. Napo Afarizeuwa akhawoneka ninga kuti akhalemekeza Apolofeta pa kuwakonzera thenje, koma bzakukumbuka bzawo na bzakucita bzawo bzikhali bzakundendemerana na bza abereki wawo. Pa nthawe imweyo iwo akhafunambo kupha Mpolofeta Mkulu wa Mulungu. Jezu adalewa kuti Mulungu an’dzawalanga thangwe ra bzimwebzi. Ndipo iye adawalangadi m’gole la 70 EC, patapita magole 38.

Jezu adalewambo kuti: ‘Tsoka imwe anyakudziwa Cakutonga, thangwe mudacosa nfungulo wakuwathandiza kudziwa bzinthu. Imwe mulibe kupita ndipo anyakufuna kupita mudawaphingiza!’ (Luka 11:52) Afarizeu, omwe akhana udindo bwa kupfunzisa Fala la Mulungu, akhatazisa wanthuwo kudziwa na kubvesesa Falalo.

Kodi Afarizeu na anembi adacita ciyani atabva bzimwebzi? Pomwe Jezu akhafuna kucoka, Afarizeu na anembiwo, adakalipa kwene-kwene ndipo adayamba kumutsutsa na kumupanikiza na mibvunzo. Sikuti akhacita mibvunzoyo na cakulinga ca kufuna kudziwa, koma akhanyang’ana njira yakuti amumange kucokera pa mitawiro yace.