Jezu adapitiriza kupfunzisa nfundo za cadidi pomwe akhali ku Jeruzalemu ku cikondweso ca matsatsa (ayai ku Cikondweso ca kubvuna). Ajuda winango omwe akhalipombo pa cikondwesoco adati: ‘Ifepano ndife mbadwo za Abalahamu ndipo tikanati kukhala akapolo wa munthu ali-wense.’ Ndipo Jezu adawatawira kuti: ‘Ndin’dziwa kuti imwepo ndimwe mbadwo za Abalahamu. Tsono imwepo munkulinga kundipha, thangwe munkuyabvuma lini mafala yangu. Inepano ndinkulewa bzinthu bzomwe ndidawona pomwe ndikhali pabodzi na Baba wangu, tsono imwepo mumbacita bzinthu bzomwe mudabva na baba wanu.’—Juwau 8:33, 37, 38.

Pamwepa Jezu akhathandauza kuti Baba wace akhali wakusiyana na pai wa Ajudawo. Tsono Ajudawo akhabvesesa lini bzimwebzi ndipo iwo adapitiriza kulewa kuti: ‘Baba wathu ni Abalahamu.’ (Juwau 8:39; Zaiya 41:8) Ndipo iwo akhalidi mbadwo za Abalahamu. Tenepo, iwo akhakumbuka kuti akhana cikhulupiro cakundendemerana na ca xamwali wa Mulungu Abalahamuyo.

Tsono Jezu adawatawira na mafala yakudabwisa yakuti: ‘Mungadakhala kuti ndimwe wana wa Abalahamu, imwepo mungadacita mabasa ya Abalahamuyo.’ N’cadidi kuti mwana, ambatewezera pai wace. ‘Tsono imwepo munkulinga kundipha, munthu omwe ndakuuzani cadidi comwe ndidabva na Mulungu. Abalahamu alibe kucita bzimwebzi.’ Patsogolo pace, Jezu adalewa mafala yomwe Ajudawo akhabvesesa lini thandauzo lace. Iye adati: ‘Imwepo mumbacita mabasa ya baba wanu.’—Juwau 8:39-41.

Ajuda akhabvesesa lini kuti Jezu akhalewa bza mbani. Iwo adapitiriza basi kulewa kuti akhali wana wacadidi, mwa kulewa kuti: ‘Ifepano tiribe kubadwa mwa upombo. Tina Baba wathu m’bodzi yekha, Mulungu.’ Kodi n’cadidi kuti Mulungu akhalidi Baba wawo? Jezu adati: ‘Bzingadakhala kuti Mulungu ni Baba wanu, imwepo mungadandifuna, thangwe ndidacokera kwa Mulunguyo, ndipo ndiri pano. Inepano ndiribe kubwera mwa kufuna kwangu, koma iye ndiye omwe adandituma.’ Jezu adacita m’bvunzo ndipo adautawira pomwe yekha: ‘Kodi thangwe ranyi imwepo munkubvesesa lini bzomwe inepano ndinkulewabzi?’ Ni thangwe rakuti mumbakwanisa lini kubva mafala yangu.—Juwau 8:41-43.

Jezu adayeza kuwalatiza bzakutewera bzomwe bzingabwere thangwe ra kumulamba. Koma patsogolo pace adadzaleweratu mwakutsimikiza kuti: ‘Imwepo babanu ni Dyabu, ndipo mun’funa kucita bzomwe babanuyo an’khumba.’ Kodi timbadziwa ciyani pakulewa bza pai wawoyo? Jezu adathumbudzula mwakubveka bwino kuti pai wawoyo akhali mbani mwakulewa kuti: ‘Iye akhali wakupha pomwe adayamba, ndipo alibe kudimbirira m’cadidi.’ Ndipo iye adalewa pomwe kuti: ‘Munthu wa Mulungu ambatetekera bzomwe Mulungu ambalewa. Ndipopa imwepo mumbatetekera lini, thangwe ndimwe lini wanthu wa Mulungu.’—Juwau 8:44, 47.

Bzomwe Jezu adalewabzo bzidakalipisa kwene-kwene Ajudawo, ndipo iwo adatawira kuti: ‘Kodi tinkuphonya kulewa kuti iwepo ndiwe Msamariya ndipo una dimonyo?’ Mwakucemera Jezu kuti ‘Msamariya,’ iwo adalatiza kuti akhamuwenga kwene-kwene. Koma Jezu adapulumbudza ndipo adalewa kuti: ‘Inepano ndiribe dimonyo, koma ndimbalemekeza Baba wangu, tsono imwepo mumbandilemekeza lini.’ Timbazindikira kuti nkhani imweyi ikhali ikulu kwene-kwene kucokera pa bzomwe Jezu adalewa kuti: ‘Munthu ali-wense akabvera mafala yangu, an’dzawona lini infa.’ Kodi pamwepa Jezu akhathandauza kuti apostolo na wanthu omwe akhamutewerawo angadadzafa lini? Nee. Koma akhathandauza kuti iwo an’dzawona lini infa ya muyaya, ‘infa yaciwiri’ yomwe pan’dzakhala palibe pomwe cidikhiro ca kudzalamusidwa.—Juwau 8:48-51; Cibvumbulutso 21:8.

Koma Ajuda akhakumbuka kuti Jezu akhathandauza kuti wanthuwo angadafa lini ndipo Ajudawo adalewa kuti: ‘Tsapano ifepano tadziwa kuti iwepo una dimonyo. Abalahamu na apolofeta adafa, tsono iwepo unkulewa kuti: “Munthu ali-wense akabvera mafala yangu, an’dzawona lini infa.” Kodi iwepo ndiwe mkulu kuposa baba wathu Abalahamu omwe  adafa? . . . Kodi iwepo umbabziti ndiwe yani?’—Juwau 8:52, 53.

Koma bzikhali bzakubveka kuti Jezu akhathandauza kuti iye ni Mesiya. Koma m’mbuto mwa kuleweratu padeca kuti iye akhali mbani, Jezu adawatawira kuti: ‘Inepano ndikabzitumbiza ndekha, umbiri bwangubo n’cinthu lini. Ni Baba wangu omwe ambanditumbiza, ule omwe imwepo mumbalewa kuti ni Mulungu wanu. Na tenepo, imwepo mumbamudziwa lini, koma inepano ndimbamudziwa. Ndipo, ndicirewa kuti ndimbamudziwa lini, ndingakhale nyakunama ninga imwepo.’—Juwau 8:54, 55.

Patsogolo pace, Jezu adalewa pomwe bza ciratizo ca baba wawo Abalahamu omwe akhali wakukhulupirika kuti: ‘Baba wanu Abalahamu, akhakondwa kwene-kwene pakudikhirira kudzawona nsiku yangu, ndipo iye adaiwonadi acikomedwa.’ Abalahamu akhakhulupira bzomwe Mulungu akhalewa ndipo akhadikhira na mtima wense kubwera kwa Mesiya. Koma Ajudawo akhakhulupira lini ndipo adati: ‘Imwepo mulibe ne magole 50 yakubadwa, tsono munkulewa kuti mudamuwona Abalahamu?’ Jezu adawatawira kuti: ‘Ndinkukuuzani na citsimikizo cense kuti: Pomwe Abalahamu akhanati kubadwa, inepano ndikhalipo kale.’ Iye akhathandauza kuti pomwe akhanati kubadwa ninga munthu pa dziko lapansi pano, Jezu akhalipo kale ninga anjo wamphanvu kwene-kwene kudzulu.—Juwau 8:56-58.

Ajuda adakalipa kwene-kwene pomwe Jezu adalewa kuti akhalipo kale pomwe Abalahamu akhanati kubadwa, ndipo akhafuna kumuboma na minyala. Koma alibe kukwanisa kumuboma mwakuti Jezu adacoka pakati pawo bwino-bwino.