Mzinda wa Betanya ukhali kumabvadzuwa kwa phiri la Mioliva ndipo ukhacita ntantho wa makilometro matatu kucokera ku Jeruzalemu. (Juwau 11:18) Jezu adayenda ku Betanya ndipo adafikira pamui pa Marta na Mariya. Jezuyo akhali xamwali wa pamtima wa Marta, Mariya na m’bale wawo Lazaro. Pomwe adafika kumweko iwo adamutambira na manja mawiri.

Ukhali mwayi ukulu kwene-kwene kuzungiridwa na Mesiya. Tenepo, Marta pakufuna kulatiza kuti adatambiradi Jezu na manja mawiri, iye adayamba kumukonzera cakudya ca bwino kwene-kwene. Pomwe Marta akhakonza cakudyaco, Mariya akhadakhala pansi acimbabvesera bzomwe Jezu akhalewa. Patapita nthawe, Marta adauza Jezu kuti: ‘Mbuya, kodi mukulekerera m’bale wanguyu kundisiya ndiciphata basali ndekha? Muuzeni kuti adzandithandizembo.’—Luka 10:40.

M’mbuto mwa kutsimula Mariya, Jezu adapasa malango Marta thangwe akhacita thupo na bzinthu bzakuthupi. Iye adamuuza kuti: ‘Marta, Marta, unkucita thupo na kutanganidwa na bzinthu bzizinji kwene-kwene. Tsono, bzinthu bzin’gono-ng’ono mpsakufunika, ayai cinthu cibodzi cokha. Ku mbali yace, Mariya wasankhula cinthu cabwino kwene-kwene, ndipo an’dzatengeredwa lini cinthu cimweci.’ (Luka 10:41, 42) Pamwepa, Jezu adalatiza kuti bzikhali lini bzakufunika kwene-kwene kuti Marta amale nthawe itali acimbaphika cakudya cizinji thangwe cakudya cakusaya kunesa kukonza cikhali cakukwanira.

Marta akhana makumbukidwe ya bwino. Thangwe iye akhafuna kulatiza kuti amutambiradi Jezu na manja mawiri. Tsono thangwe ra kukhala na thupo kwene-kwene na bzinthu bza kuthupi, iye adatazira kupfunza bzinthu bzakufunika kwene-kwene bzakucokera kwa Mwana wa Mulungu. Jezu adatsimikiza kuti Mariya adacita cakusankhula ca nzeru thangwe adasankhula bzinthu bzakukhalisa, ndipo bzimwebzi bzinkutipfunzisa nfundo yakufunika kwene-kwene.

Pa nthawe inango Jezu adalewa nfundo yakundendemerana na imweyi. Nyakupfunza wace m’bodzi adamukumbira kuti: ‘Mbuya tipfunziseni kupemba, ninga momwe Juwau adapfunzisira anyakupfunza wace.’ (Luka 11:1) Pafupi-fupi gole libodzi na meya mbuyomo, Jezu akhadapfunzisa kale anyakupfunza wace momwe angambapemberere pa nkhani yace ya pa Phiri. (Mateu 6:9-13) Bzinkuwoneka kuti pomwe iye akhapfunzisa pa phiri pale, nyakupfunza waceyu pakhalibe, tenepo Jezu adabwerezera nfundo zikulu-zikulu zomwe adapfunzisazo. Patsogolo pace, Jezu adawafotokozera there pakufuna kuthandiza anyakupfunza wacewo, kuti abvesese kufunika kwa kucita nyongo ya kupemba.

Iye adati: ‘Tiyezeze kuti m‘bodzi wa imwepo ana xamwali wace ndipo ankumuyendera kumui kwace pakati pa usiku acikamuuza kuti: “Xamwali ndikumbizembo mikate mitatu, thangwe xamwali wangu wafika tsapanopapa kucokera pa ulendo, koma inepano ndiribe cakumupasa.” Tsono iye ankutawira ali m’katimo kuti: “Leka kundinesa. Ndafunga kale msuwo ndipo ine pabodzi na wana wangu tagona kale. Ningamuke lini kuti ndikupase cinthu.” Inepano ndinkukuuzani kuti: Iye an’dzamuka acimupasa bzense bzomwe an’funabzo, sikuti thangwe ni xamwali wace, koma thangwe ra kupitiriza kwace kukumbira.’—Luka 11:5-8.

Pamwepa Jezu akhathandauza lini kuti Yahova ambacita kukakamizika kuti atawire mipembo yathu ninga momwe adacitira munthu wa mu thereli. Koma iye akhathandauza kuti penu munthu wa mu there ule adathandiza mwanzaceyo thangwe adamudandaulira kazinji kense, tenepo Baba wathu wakudzulu omwe ambatifuna, an’dzatawira mipembo yakucokera pansi pa mtima ya atumiki wace wakukhulupirika. Jezu adalewa pomwe kuti: ‘Tenepo ine ndinkukuuzani kuti: Pitirizani kukumbira, ndipo mun’dzapasidwa; pitirizani kupsaga ndipo mun’dzagumana; pitirizani kugogodza ndipo an’dzakufungulirani. Pakuti ali-wense omwe an’pitiriza kukumbira an’dzapasidwa, ali-wense omwe an’pitiriza kunyang’ana an’dzagumana, ndipo ali-wense omwe an’pitiriza kugogodza an’dzafunguliridwa.’—Luka 11:9, 10.

Patsogolo pace, Jezu pakufuna kuthandiza anyakupfunza  wacewo kubvesesa nfundo imweyi, adandendemezera Mulungu na bzomwe baba omwe ana wana ambacita. Iye adati: ‘Kodi pakati panu alipo baba omwe mwana wace acim’kumbira nsomba, angam’pase nyoka m’mbuto mwa nsomba? Ayai acim’kumbira dzai angamupase nyankalize? Tenepo, penu imwepo napo ndimwe wakuipa, mumbadziwa kupasa wana wanu mphaso zabwino, ndiye tani Baba kudzulu, an’dzapereka mzimu wakucena kwa wense omwe animukumbira!’ (Luka 11:11-13) Mpsakulimbisa kwene-kwene kudziwa kuti Baba wathu ambatetekera mipembo yathu ndipo ambafunisisa kutipasa bzomwe tamukumbira!