Pomwe Jezu adamaliza kufotokoza pomwe nkhani ya mpembo, padacoka nkhani zinango zomwe akhadazipfunzisa kale m’mbuyomo pomwe akhapalizira. Pomwe iye akhacita bzakudabwisa ku Galileya, wanthu winango adamumanga mulandu wakuti akhacita bzakudabwisabzo na mphanvu ya mtongi wa madimonyo. Tenepo, ku Judeya adagumanambo na wanthu omwe adamumangambo mulandu ubodzi-bodziyo.

Pomwe Jezu adacosa dimonyo omwe akhatazisa munthu munango kulewalewa, thimu la wanthu lidadabwa, kupambula wanthu omwe akhamuwenga. Iwo adamumangambo mulandu ninga momwe adacitira wanthu wa ku Galileya kuti: ‘Umweyu ambacosa madimonyo na mphanvu ya Belezebu, omwe ni mtongi wa madimonyo.’ (Luka 11:15) Ndipo winango akhafunisisa kudziwa kuti Jezuyo akhali mbani, iwo adamukumbira kuti awalatize cizindikiro cibodzi cakudzulu.

Pomwe Jezu adazindikira kuti iwo akhafuna kumuyeza, iye adawatawira ninga momwe adatawirira wanthu wa ku Galileya. Iye adalewa kuti umambo buli-bwense bukagawanika, bumbamala. Tenepo, adawabvunza kuti: ‘Penu Sathani wagawanika, kodi umambo bwace bungakhale tani bwakulimba?’ Patsogolo pace, Jezu adawauziratu kuti: ‘Penu inepano ndimbacosa madimonyo na cala ca Mulungu, ndiye kuti Umambo bwa Mulungu bwakufikirani.’—Luka 11:18-20.

Pomwe Jezu adalewa fala lakuti ‘cala ca Mulungu,’ mpsakukwanisika kuti akhafuna kukumbusa abveseri wace bzomwe bzidacitika kale-kale mu nthawe ya Ajirayeri. Wale omwe adawona Mozeji ankucita bzakudabwisa mu nyumba ya mphala ya Farawo adakuwa aciti: ‘Cimweci ni cala ca Mulungu!’ Ndipo cikhalimbo ‘cala ca Mulungu’ comwe cidanemba Bzakutonga Khumi pa tumatabwa tuwiri twa minyala. (Kufuluka 8:19; 31:18) Mwakundendemerana na bzimwebzi, ‘cala ca Mulungu,’ comwe ni mzimu wakucena ayai mphanvu zomwe Mulungu ambaphatisira basa, ndiwo omwe udathandizambo Jezu kuti akwanise kumbacosa madimonyo na kumbapoza atenda. Na tenepo, Umambo bwa Mulungu bukhadafikiradi anyakutsutsa wace, pakuti Jezu Mambo wakusankhulidwa wa Umambo bwa Mulungu, akhali pakati pawo acimbaphata mabasa yace.

Mwa kumbacosa madimonyo, Jezu adalatiza kuti akhana mphanvu kuposa Sathani, ninga momwe ambacitira munthu omwe an’funa kuba mu nyumba ya Mambo. Iye ambayamba kukunda mulindiri wa mphanvu omwe ambakhala na bzifuzo bzizinji. Jezu adafotokoza pomwe there lakulewa bzomwe bzimbacitika mzimu wakuipa ukacoka mwa munthu. Munthuyo akasaya kuikha bzinthu bzabwino mu mtima mwace, mzimu wakuipa ule umbabwera pomwe na mizimu inango yakukwana minomwe ndipo imbacitisa kuti munthuyo akhale wakuipa kwene-kwene kuposa momwe akhaliri pakuyamba. (Mateu 12:22, 25-29, 43-45) Bzimwebzi ndibzo bzomwe bzidacitika na mtundu wa Jirayeri.

Mkazi munango omwe akhabvesera bzomwe Jezu akhalewa, adatokonyedwa ndipo adalewa mwa kukuwa kuti: ‘Ankondwa ni munthu omwe mimba yace idakunyamulani na ule omwe mudamama masuku yace!’ Akazi wacijuda akhadikhirira kukhala mai wa mpolofeta, maka-maka kukhala mai wa Mesiya. Tenepo, mkaziyo pinango akhakumbuka kuti Mariya akhali wakukondwa kwene-kwene thangwe akhali mai wa mpfunzisi waluso. Tsono Jezu adathandiza mkaziyo kudziwa kuti njiponi nsansa ya cikondweso ca cadidi. Iye adati: ‘Nee, koma omwe an’kondwa ni wale omwe ambabva fala la Mulungu, acirisunga!’ (Luka 11:27, 28) Jezu alibe kulewa kuti Mariya akhafunikira kupasidwa ulemu bwakupambulika. Tenepo, munthu ali-wense angakhale wakukondwa akakhala mtumiki wakukhulupirika wa Mulungu, sikuti thangwe ra bzinthu bzomwe wakwanisa kucita ayai thangwe ra kukhala pa ubale na munthu munango.

Jezu adatawira pomwe wanthuwo ninga momwe adatawirira wanthu wa ku Galileya, thangwe ra kumukumbira kuti awawonese cizindikiro ca kudzulu. Iye adawauza kuti palibe cizindikiro comwe angadawapasa kupambula ‘cizindikiro ca Djona.’ Bzomwe bzidacitika pa moyo wa Djona bzidakhala ninga cizindikiro thangwe Djona adakhala m’mimba mwa cinsomba kwa nsiku zitatu, na kuti adapalizira mwa kulimba mtima, bzomwe bzidacitisa kuti wanthu wa ku Ninive akungule. Jezu adati: ‘Koma tsapano munthu mkulu wakuposa Djona ali pano.’ (Luka 11:29-32) Ndipo Jezu ni mkulu pomwe kuposa Salomau, omwe mambo-mkazi wa ku Xeba adabwera kuti adzabve bza nzeru zacezo.

Jezu adapitiriza kuti: ‘Munthu akagasa kandiyero ambayiikha lini pa m’buto yakubisala ndipo ambayigwanankhira lini na citundu, koma ambayiikha pa mbuto yakuikhira kandiyero.’ (Luka 11:33) Pinango Jezu akhathandauza kuti kupfunzisa pabodzi na kucita bzakudabwisa kuna wanthuwo, bzikhali ninga kuyiikha kandiyero m’buto yakubisala. Bzikhali tenepoyo thangwe rakuti iwo akhafuna lini kuwona cezaco, bzimwebzo bzidawacitisa kuti aleke kubvesesa thandauzo la bzomwe Jezuyo akhacita.

Pa nthawe imweyi Jezu akhadandomala kucosa dimonyo omwe akhatazisa munthu winango kulewalewa. Bzimwebzi bzingadacitisa kuti wanthu atumbize Mulungu na kuuzambo winango bzomwe Yahova akhacita. Tenepo Jezu adacenjeza wanthu omwe akhamumanga mulanduwo kuti: ‘Khala tceru kucitira kuti ceza comwe unaco cireke kusanduka m’dima. Tenepo, thupi lako lense likabvunikidwa bwino, licisaya mbali inango yomwe ina m’dima, thupi lensero lin’dzabvunika ninga momwe imbabvunikira kandiyero na ceza cace.’—Luka 11:35, 36.