Pomwe Jezu akhapitiriza kupfunzisa mu Judeya, iye adalewa bza cinthu comwe abveseri wace adacizindikira mwakusaya kunesa, comwe cikhali mabira na mathanga. Tsono iye adalewa bzimwebzi mwa kuphatisa basa there. Tenepo, Ajudawo adakumbukira bza mafala ya Davide yakuti: ‘Yahova ni M’busa wangu, ndin’dzasaya lini cinthu. Iye ambandigonesa m’mauswa yakupswipirira bwino.’ (Psalymo 23:1, 2) Mu psalymo linango, Davide adauza mtundu wa wanthu kuti: ‘Mbatigodameni pa maso pa Yahova Mulengi wathu. Pakuti iye ni Mulungu wathu, ndipo ifepano ndife wanthu wace.’ (Psalymo 95:6, 7) Ajirayeri omwe akhali pansi pa Cakutonga ca Mozeji kwa magole mazinji, akhandendemezedwa na thanga la mabira.

Ajirayeri akhali ninga ‘Mabira’ yomwe yakhali ‘mthanga’ thangwe akhatsogoleredwa na mpangano wa Cakutonga ca Mozeji. Cakutongaco cikhali ninga mpanda omwe ukhawasiyanisa na bzicito bzakuipa bzomwe wanthu omwe akhali lini pansi pa cakutongaco akhacita. Tsono Ajirayeri winango akhaboneresa mabira ya Mulungu. Tenepo, Jezu adati: ‘Ndinkukuuzani kuti: Munthu, omwe anipita m’thanga la mabira mwakucita kumoga na pa mbuto inango sikuti mwakupita na pa msuwo, umweyo ni mbava, ndipo ni kambowa. Koma omwe anipita na pa msuwo, umweyo ni makabusa wa mabirayo.’—Juwau 10:1, 2.

Na mafala yamweya, pinango abveseriwo akhakumbuka bza wanthu omwe akhabziti Mesiya ayai Kristu. Wanthu amwewo akhali ninga mbava na akambowa omwe akhafunika lini kuteweredwa. M’mbuto mwace, wanthu akhafunika kutewera ‘makabusa wa mabirayo,’ omwe Jezu adamulewa kuti:

‘Nyakunyang’anira pa msuwo ambamufungulira, ndipo mabirayo yambabvera fala lace. Iye ambacemera bira liri-lense na dzina lace ndipo ambayacosa panja. Akacosa panja mabira yace yense, iye ambayenda patsogolo pa mabirayo, ndipo iyo yambamutewera thangwe yambadziwa fala lace. Iyo cipo yacitewera munthu wakusaya kudziwika, m’mbuto mwace yambamuthawa thangwe yambadziwa lini fala lace.’—Juwau 10:3-5.

Pakuyambirira, Juwau Batista ninga nyakufungula msuwo, adalata Jezu ninga munthu omwe mabira yakuyezezera yomwe yali pansi pa cakutonga, yakhafunika kumutewera. Ndipo mabira manago yaku Galileya na ku Judeya, yakhazindikira fala la Jezu. Tsono kodi iye akhayatsogolera kuyenda kuponi? Ndipo kumutewerako kukhana phindu liponi? Wanthu winango omwe adabva there limweri, adadabwa thangwe iwo akhadziwa lini ‘thandauzo la bzomwe akhalewabzo.’—Juwau 10:6.

Jezu adalewa kuti: ‘Ndinkukuuzani cadidi kuti: Ine ndine msuwo wa mabira. Wense omwe abwera m’mbuto mwa ine, ni mbava ndipo mba akambowa, koma mabirayo yalibe kuwabvera. Ine ndine msuwo. Omwe anipita na pa inepano, an’dzapulumuka; an’dzakwanisa kupita na kubula, ndipo an’dzagumana mbuto yakudyera.’—Juwau 10:7-9.

Bzinkuwonekeratu kuti pamwepa Jezu akhalewa cinthu cacirendo. Abveseri wace akhadziwa kuti iye akhali lini msuwo wa mpangano wa cakutonga, omwe ukhalipo pafupi-fupi magole 100 m’mbuyomo. Tenepo, pinango Jezu akhathandauza kuti mabira yomwe ‘akhayatsogolerayo,’ yan’dzapita m’thanga munango. Kodi n’thangwe ranyi adalewa bzimwebzi?

Jezu adapitiriza kulewa bza udindo bwace kuti: ‘Ine ndabwera kuti yakhale na moyo, na kuti yakhale nawo uzinji. Inepano ndine m’busa wabwino; m’busa wabwino ambapereka moyo wace thangwe ra mabira yace.’ (Juwau 10:10, 11) Pa nthawe inango m’mbuyomo, Jezu adalimbisa anyakupfunza wace mwakuwauza kuti: ‘Lekani kugopa kathimu ka mabiramwe, thangwe Baba wanu wabvuma kukupasani Umambo.’ (Luka 12:32) Tenepo, wanthu omwe ankucita mbali ya ‘kathimu ka mabira,’ ndiwo omwe Jezu an’dzawatsogolera ku thanga linango ‘kuti yakhale na moyo, na kuti yakhale nawo uzinji.’ Ni cisimbo cikulu kucita mbali ya thimu limweri la mabira.

Tsono pa nkhani imweyi, Jezu alibe kuimira pamwepo. Iye adapitiriza kulewa kuti: ‘Ndina mabira yanango, yomwe ni ya thanga lini limweri, yamweyo ndiniyabweresambo, ndipo iyo yan’dzabva fala langu ndipo  yan’dzakhala thimu libodzi na m’busa m’bodzi.’ (Juwau 10:16) ‘Mabira yanangoyo,’ yankucita lini mbali ya ‘thanga limweri.’ Koma iwo mba thanga linango lakusiyana na thanga la ‘kathimu ka mabira’ komwe kan’dzatambira Umambo. Mathanga mawiri, ayai mathimu mawiri ya mabiraya, yana cidikhiro cakusiyana. Koma mabira ya mathanga mawiriya, yan’dzakondwa na bzomwe Jezu an’dzacita pakukwanirisa udindo bwace. Iye adati: ‘Ndipopa Babangu ambandifuna, thangwe ndinkupereka moyo wangu.’—Juwau 10:17.

Wanthu azinji pa thimulo adati: ‘Umweyu ni munthu omwe ana dimonyo, ndipo ankupenga.’ Koma winango adalatiza kuti akhamubvesera mwa tceru ndipo akhafunisisa kutewera Mbusa Wabwinoyo. Iwo adati: ‘Yamweya ni mafala lini ya munthu omwe ana dimonyo. Kodi dimonyo angakwanise kufungula maso ya azimola?’ (Juwau 10:20, 21) Bzinkuwonekeratu kuti iwo akhalewa bza munthu omwe akhadabadwa zimola, omwe Jezu akhadamupoza.