Pa nsiku yakumalizira ya Cikondweso ca Matsatsa, yomwe ikhali nsiku ya cinomwe, Jezu akhapfunzisa usiku mu templo, koma ku mbali yomwe ikhadziwika na dzina lakuti ‘mbuto ya bzakupereka.’ (Juwau 8:20; Luka 21:1) Bzinkuwoneka kuti mbutoyo ikhali mu Bwalo la Akazi, komwe wanthu akhambakacitira bzakupereka bzawo.

Usiku buli-bwense pa nthawe ya cikondwesoco, mbutoyo ikhakhala idangwerewera kwene-kwene thangwe kukhana mibvuniko minai mikulu-mikulu. Mbvuniko uli-wense ukhana basiya likulu lakudzala na mafuta, bzomwe bzikhacitisa kuti mibvunikoyo igake kwene-kwene, icingwereweresa mbuto yenseyo. Bzomwe Jezu adalewa patsogolo pace, pinango bzidacitisa wanthuwo kubveranisa kungwerewera kwa mbutoyo na bzomwe Jezu adalewabzo. Iye adati: ‘Inepano ndine ceza ca dziko. Omwe an’nditewera cipo acidzafamba mu mdima, koma an’dzakhala na ceza comwe cimbapasa moyo.’—Juwau 8:12.

Tsono Afarizeu adatsutsa bzomwe Jezu adalewabzo, mwakulewa kuti: ‘Iwepo unkubzicitira wekha umboni; umboni bwako si bwacadidi.’ Jezu adatawira kuti: ‘Napo penu inepano ndinkubzicitira ndekha umboni, umboni bwangubo n’bwacadidi, thangwe ndimbadziwa komwe ndidacokera na komwe ndinkuyenda. Tsono imwepo mumbadziwa lini komwe ndidacokera, ne komwe ndinkuyenda.’ Ndipo adathumizira kuti: ‘Mu Cakutonga canu mudanembedwa kuti: “Umboni bwa wanthu awiri ndibo bwacadidi.” Inepano ndine m’bodzi omwe ndinkubzicitira umboni, ndipo Baba wangu, omwe adandituma, ankundicitirambo umboni.’—Juwau 8:13-18.

Afarizeuwo pakufuna kulatiza kuti akhatawiriza lini bzomwe Jezuyo akhalewa, iwo adamubvunza kuti: ‘Ali kuponi Baba wakoyo?’ Jezu adawatawira kuti: ‘Imwepo mumbandidziwa lini, ndipo mumbadziwambo lini Baba wangu. Mungadandidziwa, mungadam’dziwambo Baba wanguyo.’ (Juwau 8:19) Tsono, napo Afarizeuwo akhafuna kumanga Jezu, palibe omwe adacita bzimwebzo.

Tenepo, Jezu adabwerezera bzomwe akhadalewa kale bzire kuti: ‘Inepano ndinkuyenda, ndipo imwepo mun’dzandinyang’ana, tsono mun’dzafa na pikado zanu. Komwe inepano ndinkuyenda, imwepo mungakuyende lini.’  Ajudawo alibe kubvesesa bzomwe Jezu akhafuna kulewa, tenepo adayamba kulewa kuti: ‘Kodi iye an’bzipha? Thangwe akulewa kuti: “Komwe inepano ndinkuyenda, imwepo mungakuyende lini.”’ Iwo akhabvesesa lini bzomwe Jezu akhathandauza thangwe rakuti akhadziwa lini komwe iye akhadacokera. Ndipopa Jezu adawauza kuti: ‘Imwepo ndimwe wa pansi pano, inepano ndine wa kudzulu. Imwepo ndimwe wa m’dzikoli, inepano ndine lini wa m’dzikoli.’—Juwau 8:21-23.

Na mafalaya, Jezu adalatiza kuti iye akhakhala kudzulu pomwe akhanati kubwera pansi pano, ndipo iye akhali Mesiya ayai Kristu, omwe atsogoleri wa cipembedzo akhamudikhirira. Tsono iwo adamubvunza mwa kumunyoza kuti: ‘Ndiwe yani iwepo?’—Juwau 8:25.

Pakutawira kutsutsa kwawoko, Jezu adati: ‘Kodi thangwe ranyi ndikulewalewa namwe?’ Tenepo iye adayamba kuwauza bza Babace pabodzi na thangwe lomwe Ajudawo akhafunikira kumbabvera Mwanayo. Iye adati: ‘Ule omwe adanditumiza ngwacadidi, ndipo bzomwe inepano ndidabva na iye ndimbabzifotokozambo ku dziko.’—Juwau 8:25, 26.

Mwakusiyana na Ajudawo omwe akhakhulupira lini Mulungu, Jezu adafotokoza bzinthu bzomwe bzidalatiza kuti iye akhakhulupira kwene-kwene Babace. Iye adati: ‘Pambuyo pakuti mwamumanika Mwana wa munthu, pamwepo ndipo mun’dzadziwa kuti ndinepano, na kuti ndinkucitambo lini bzinthu bza mu msolo mwangu; koma ninga momwe Baba adandipfunzisira, inepano ndimbalewambo bzinthu bzimwebzo. Ndipo Omwe adandituma ule ali pabodzi na inepano; iye alibe kundisiya ndekha thangwe inepano nthawe zense ndimbacita bzinthu bzomwe bzimbamudekera.’—Juwau 8:28, 29.

Tsono Ajuda winango akhakhulupira Jezu, tenepo iye adawauza kuti: ‘Munkukoya mafala yangu nthawe zense, ndiye kuti ndimwedi anyakupfunza wangu. Mun’dzacidziwa cadidi, ndipo cadidico cin’dzakutsudzulani.’—Juwau 8:31, 32.

Pomwe Jezu adawauza kuti cadidi cingadadzawatsudzula, iwo adadabwa, acimugaza, mwakulewa kuti: ‘Ifepano ndife mbadwo za Abalahamu ndipo tikanati kukhala akapolo wa munthu ali-wense. Tsono unkuleweranyi kuti “mun’dzatsudzulidwa”?’ Ajudawo akhadziwa kuti nthawe zinango iwo akhambatongedwa na wanthu wa mitundu inango, koma akhalamba basi kucemeredwa akapolo. Tsono Jezu adawauza mwakubveka bwino kuti pa nthaweyo iwo akhali akapolo basi. Ndipo adalewambo kuti: ‘Kulewa cadidi ndinkukuuzani kuti, munthu ali-wense omwe ambacita pikado ni kapolo wa pikadoyo.’—Juwau 8:33, 34.

Pakuti Ajuda akhalamba kuti iwo akhali akapolo wa pikado, Jezu adawauza bzomwe bzingadawacitikira. Iye adati: ‘Kapolo ambakhala lini pa mui mpaka kale-kale; mwana ndiye omwe ambakhala pa mui mpaka kale-kale.’ (Juwau 8:35) Kapolo alibe ufulu bwakutambira utaka, ndipo iye angacosedwe pa mui nthawe iri-yense. Tsono mwana wakucita kubadwira pa muipo ayai wakucita kufuwidwa, ndiye omwe ambakhala pa muipo moyo wace wense.

Tenepo, kudziwa cadidi cakulewa bza Mwanayo, ndiko kumbathandiza kuti wanthu atsudzulidwe ku infa yomwe idabwera thangwe ra pikado. Ndipopa Jezu adati: ‘Mwanayo akakutsudzulani, imwepo mun’dzakhaladi wakutsudzuka.’—Juwau 8:36.