Jezu adafotokoza kuti ‘kathimu ka mabira’ kokha ndiko komwe kana mbuto mu Umambo bwa kudzulu. (Luka 12:32) Tsono munthu omwe watambira mwayi wa kudzatonga mu Umambobo, an’funika kuwona kuti ni cinthu cakufunika kwene-kwene. Ndipo iye an’funikambo kumbawona bzinthu mwakuthemera.

Thangwe ra nfundo imweyi, Jezu adalimbisa anyakupfunza wace kuti ambakonzekere bza kubwera kwace. Iye adalewa kuti: ‘Bvalani ndipo khalani wakukonzeka, mibvuniko yanu ikhale yakugaka, khalani ninga amuna omwe ankudikhirira mbuya wawo abwerere kucokera ku malowozi, kuti akafika, acidzagogodza msuwo, adzamufungulire mwakamfulumize. Ankondwa ni akapolo omwe mbuya akadzabwera, an’dzawagumana ankudikhirira!’—Luka 12:35-37.

Pomwe Jezu adamala kufotokoza thereli, anyakupfunza wace adazindikira kuti akhafunikira kuwona bzinthu mwakuthemera. Akapolo omwe adalewedwa mu thereli akhali wakukonzeka ndipo akhadikhirira kuti mbuya wawo anibwera pa nthawe iri-yense. Jezu adalewa kuti: ‘[Mbuya] akadzawagumana ankudikhiriradi napo akadzafika pa ulindiri bwaciwiri, [bomwe bukhayamba pa nthawe zipfemba za usiku mpaka pa nthawe khumi na ziwiri za usiku] ayai bwacitatu, [bomwe bukhayamba pa nthawe khumi na ziwiri za usiku mpaka pa nthawe zitatu za madandakweca] amwewo ankondwa!’—Luka 12:38.

Pamwepa nfundo yace ikhali lini yakundolimbisa wanthu omwe ambaphata mabasa ya pa mui ayai omwe ambaphata basa liri-lense kuti ambakhale wakulimbikira pa basalo. Nfundo ya Jezu, omwe ni mwana wa Mulungu, idawonekera bwino pomwe adafotokoza kubverana komwe kukhalipo pakati pa iye na thereli. Iye adauza anyakupfunza wace kuti: ‘Imwepo khalanimbo wakukonzeka, thangwe Mwana wa Munthu an’dzafika pa nthawe yomwe imwepo munkuyidikhirira lini.’ (Luka 12:40) Na bzimwebzi adalatiza kuti pa nthawe inango Jezu an’dzabwera ndipo pa nthawe imweyo an’dzafuna kuti ateweri wace maka-maka wale wa mu ‘kathimu ka mabira’ adzakhale wakukonzeka.

Pedru adafuna kubvesesa bzomwe Jezu akhathandauza, tenepo, iye adamubvunza kuti: ‘Mbuya kodi there limweri munkuuza ifepano basi ayai wanthu wense?’ M’mbuto mwa kumutawiriratu, Jezu adafotokoza pomwe there linango lakundendemerana na lakuyamba lire. Iye adati: ‘Kodi ni mbani maka-maka nyakunyang’anira wakukhulupirika na wanzeru, omwe mbuya wace an’dzamuikha kukhala nyakunyang’anira gulu la atumiki wace, kuti ambawapase cakudya cakukwanira pa nthawe yace? Ankondwa ni kapolo, omwe mbuya wace akabwera, an’dzamugumana ankucita bzimwebzi! Ine ndinkukuzani kuti: Mbuya waceyo akabwera an’dzamuikha kuti akhale nyakunyang’anira bzinthu bzace bzense.’—Luka 12:41-44.

Mu there lakuyamba lire, ‘Mbuya’ ankuimira Jezu, omwe ni Mwana wa Mulungu. Tenepo, ‘nyakunyang’anira wakukhulupirika’ ambaphatanidza amuna omwe ali mu ‘kathimu ka mabira’ ndipo an’dzapasidwa Umambo. (Luka 12:32) Pamwepa Jezu akhathandauza kuti winango mwa amuna wa mu ‘kathimu ka mabirawo’ kangadadzanyang’anira ‘gulu la atumiki wace, kuti ambawapase cakudya cakukwanira pa nthawe yace.’ Tenepo Pedru pabodzi na anyakupfunza winango omwe Jezu akhawapfunzisa pabodzi na kuwapasa cakudya cauzimu, adazindikira kuti Jezuyo omwe ni Mwana wa Mulungu pa nthawe inango an’dzabwera pomwe. Ndipo pa nthawe imweyo pan’dzakhala na makonzedwe yakuti anyakutewera wa Jezu, omwe ni ‘gulu la atumiki’ wa Mbuya, ambadzatambire cakudya cauzimu.

Jezu adafotokoza nfundo inango yakulatiza momwe anyakupfunza wace akhafunikira kukhala wakukonzeka na wakusamala pa mkhalidwe wawo. Iye adalewa bzimwebzi thangwe bzingakwanisike munthu kuyamba kunyoza malango ya  Yahova, aciyamba kutsutsana na abale pabodzi na mpfumakazi. Jezu adalewa kuti: ‘Koma, penu kapoloyo aniyamba kulewa mu mtima mwace kuti: “Mbuya wangu ankucedwa kubwera,” aciyamba kumenya akapolo anzace wacimuna na wacikazi, ndipo acimwa na kudya, na kuledzera, mbuya wa kapoloyo an’dzabwera pa nsiku yomwe iye ankuyidikhira lini, na pa nthawe yomwe iye ankuidziwa lini, ndipo an’dzamupasa nyathwa ikulu kwene-kwene, acidzamupasa mbali ya wanthu wakusaya kukhulupirika.’—Luka 12:45, 46.

Jezu adalewa pomwe kuti adabwera ‘kudzagasa moto pa dziko la pansi.’ Ndipo bzimwebzi ni cadidi, thangwe Jezu akhafotokoza nkhani zomwe zikhacitisa kuti wanthu ambatsutsane, tsono nkhani zimwezo zikhathandiza wanthu kuzindikira bzipfunziso pabodzi na miyambo yakunama acisiya kuitewera. Ndipo nkhanizo zikhagawanisa wanthu omwe akhali wakuphatana, ninga ‘pai kumukira mwana wace ndipo mwana kumukira pai wace, mai kumukira mwana wace wacikazi ndipo mwana wacikazi kumukira mai wace, mibzala wacikazi kumukira mulowola wace ndipo mulowola kumukira mibzala wace wacikazi.’—Luka 12:49, 53.

Nfundo zimwezi adazilewa maka-maka kwa anyakupfunza wace. Patsogolo pace, Jezu adaceukira thimulo. Wanthu azinji adalambiratu kutawiriza kuti Jezu ni Mesiya napo kuti pakhana umboni bwakubveka bwino. Tenepo Jezuyo adalewa kuti: ‘Mukawona mtambo unkukwira kucokera kumadokero, mumbalewa kuti: “Kunkubwera cinvula,” ndipo cimbabweradi. Ndipo imwepo mukawona mphepo inkupepedza kucokera kummwera, mumbalewa kuti: “Lero kunipsa kwene-kwene,” ’ ndipo bzimwebzi bzimbacitikadi. Wacinyengomwe! Mumbakwanisa kuzindikira mawonekedwe ya dziko la pansi na ya kudzulu, kodi munkutazira tani kuzindikira thandauzo la bzomwe bzinkucitika pa nthawe ino?’ (Luka 12:54-56) Iwo adawonekeratu kuti akhalibe kukonzeka.