Jezu akhayezera kuphatisa basa njira zakusiyana-siyana kuti athandize Ajuda kukumbukira bza uxamwali bwawo na Mulungu. Ndipo mpata munango wakucita bzimwebzo udagumanika pambuyo pa iye kuceza na Ajudawo kunja kwa nyumba ya Mfarizeu m’bodzi.

Wanthu winango omwe akhali pamwepo adafotokozera Jezu bza ngozi yomwe ikhadacitika. Iwo adamufotokozera bza ‘Agalileya omwe mulopa wawo Pirato [Mtongi waciroma] akhadausanganiza na nsembe zawo.’ (Luka 13:1) Kodi iwo akhafuna kulewa ciyani na bzimwebzi?

Bzingacitike kuti Agalileya omwe adafawo, mbabodzi-bodzi na omwe adaphedwa pa nthawe yomwe Ajuda adamukira Pirato thangwe ra iye adaphatisa basa kobiri za mu templo kuti amangire nazo migero yakubweresera madzi mu mzinda wa Jeruzalemu. Pinango Piratoyo adakwanisa kobirizo mwakuthandizidwa na atsogoleri wa m’templomo. Ndipo, wale omwe akhafotokozera Jezu bza ngozi yomwe idacitikayo, akhawona ninga kuti Agalileya omwe adaphedwawo, adaphedwa thangwe ra bzicito bzawo bzakuipa. Tsono Jezu adawagaza.

Ndipo iye adawabvunza kuti: ‘Imwepo munkukumbuka kuti Agalileya amwewo akhali wapikado kwene-kwene kuposa Agalileya winango thangwe rakuti bzimwebzi bzidawacitikira?’ Jezu akhaiwona lini tenepoyo nkhaniyo. Tsono iye adaphatisa basa cakucitikaci kuti acenjeze Ajudawo. Iye adati: ‘Mukasaya kukungula, mwensenemwe mun’dzapfudzidwa mu njira ibodzi-bodziyi.’ (Luka 13:2, 3) Patsogolo pace, Jezu adafotokoza bza ngozi inango yomwe ikhadacitikambo m’mbuyomo, ndipo pinango ikhabveranambo na kumangidwa kwa migero ire.

Iye adabvunza kuti: ‘Tsono, tani bza wanthu khumi na asere wale, omwe nsanja idawagwera ku Sirowe, iciwapha? Mun’kumbuka kuti iwo akhali anyakuphonya pakulu kuposa winango wense omwe akhakhala mu Jeruzalemu?’ (Luka 13:4) Wanthuwo akhakumbuka kuti Agalileyawo adafa thangwe ra bzakuipa bzomwe akhacita. Tsono Jezu adawagaza pomwe, thangwe iye akhadziwa kuti ‘bzinthu bzakusaya kudikhirika bzimbagwera wanthu wense.’ (Mpalizi 9:11) Tsono, wanthuwo akhafunikira kupfunza cinthu na bzomwe bzikhadacitikabzo. Ndipopa Jezu adawauza kuti: ‘Imwepo mungasaya kukungula bzakuipa bzanu, mwense mun’dzafambo ninga iwo.’ (Luka 13:5) Kodi thangwe ranyi Jezu adabwerezera pomwe nfundo imweyi?

Thangwe Jezu akhali kuphampha kwa utumiki bwace, ndipo iye adaphatisa basa there libodzi kuti abvekese nkhaniyo. Iye adati: ‘Munthu munango akhana muti wace wa mkuyu m’munda wa mpesa, ndipo adayenda kukanyang’ana bzisapo m’muti wa mkuyuyo, koma alibe kugumana cinthu. Patsogolo pace, iye adauza munthu omwe akhanyang’anira munda wa mpesayo kuti: “Tsapano papita magole matatu ndikubwera kudzanyang’ana nkhuyu m’muti umweyu, koma ndikanati kuwona ne ibodzi. Mugwate muti umweyu! Thangwe ranyi unkundodzonga thaka?” Nyakunyang’anira mundayo adatawira kuti: “Mbuya wangu, tani muusiye pomwe gole lino lokha. Inepano ndicere mphepete mwacemu ndiciuikha manyowa. Ndipo kutsogoloku ukadzabereka bzisapo, bzin’dzakhala bwino, koma ukasaya kubereka, mungadzaugwate.”’—Luka 13:6-9.

Jezu akhadamala kale magole matatu acimbayezera kuthandiza Ajudawo kuti amukhulupire. Tsono, mbang’ono-ng’ono okha omwe adakhala anyakupfunza wa Jezu, ndipo iwo akhali ninga bzisapo bza basa lacero. Tsapano likhali gole lacinai la utumiki bwace, ndipo Jezu akhadathumizira nyongo  yace pa kuthandiza Ajudawo. Pomwe Jezu akhapalizira pabodzi na kupfunzisa wanthu ku Judeya na ku Pereya, bzikhali ninga kucera na kuikha manyowa mphepete mwa muti wa mkuyu, omwe ukhaimira Ajudawo. Kodi bzakutewera bzace bzidakhala bziponi? Ajuda ang’ono-ng’ono ndiwo adakhulupira Jezu. Tsono ninga gulu, Ajudawo adalamba kukungula, ndipo tsapano akhafunikira kupfudzidwa.

Umboni bunango pomwe bwakulatiza kuti Ajudawo akhafuna lini kukhulupira Mulungu, budawoneka pa nsiku ya Malinkhuma. Pa nsiku imweyi, Jezu akhapfunzisa mu sinagoga. Mu sinagogamo, Jezu adawona mkazi munango omwe dimonyo akhadamupundusa msana kwa magole 18. Jezu adamubvera nsisi mkaziyo, ndipo adamuuza kuti: ‘Mkaziwe, iwepo watsudzulidwa ku matenda yako.’ (Luka 13:12) Jezu adafuthula boko lace, acimuphata mkaziyo ndipo nthawe imweyoletu, iye adalimba, aciyamba kutumbiza Mulungu.

Bzimwebzi bzidakalipisa mtsogoleri wa pa sinagogapo, ndipo adalewa kuti: ‘Pana nsiku zitanthatu zomwe tingaphate basa; tenepo, bwerani mu nsiku zimwezi mudzapozedwe, sikuti pa nsiku ya malinkhuma.’ (Luka 13:14) Mtsogoleri wa ku sinagogayo akhakhulupira kuti Jezu akhanayo mphanvu yakupoza matenda; koma iye akhatsutsa wanthu omwe akhambabwera kudzapozedwa pa nsiku ya Malinkhuma! Tsono Jezu adamutawira mwakubveka bwino kuti: ‘Anyacinyengomwe! Ali-wense wa imwepo ambatsudzula lini ng’ombe yace ayai bulu wace m’thanga pa nsiku ya Malinkhuma, aciyenda kukaimwesa madzi? Kodi bzikhali lini bzakuthemera kuti mkaziyu omwe ni mwana wa Abalahamu, omwe Sathani adamumanga kwa magole 18, atsudzulidwe unyolobu pa nsiku ya Malinkhuma?’—Luka 13:15, 16.

Wathu omwe akhamuwenga Jezuyo, adacita manyazi, koma thimu likulu la wanthu, lidakondwa kwene-kwene na bzakudabwisa bzomwe Jezu akhacita. Patsogolo pace, Jezu adabwerezera pomwe mathere mawiri yakulewa bza Umambo bwa Mulungu, yomwe iye akhadayalewa kale pomwe akhali m’mwadiya ku nyanza ya ku Galileya.—Mateu 13:31-33; Luka 13:18-21.