Pambuyo pa Jezu kupoza munthu omwe akhaduwala matenda yakugwera manja na minyendo, iye adapitiriza kukhala pa mui pa Mfarizeu ule. Ali pamuipo, Jezu adawona wanthu winango omwe akhadacemeredwambo akhasankhula mbuto zakulemekezeka kuti akhale, na bzimwebzi iye adawona kuti ukhali mpata wakuti apfunzise wanthuwo kufunika kwa kukhala wakubzicepswa.

Jezu adati: ‘Iwepo ukacemeredwa na munthu kuti uyende ku madyo ya pa malowozi, leka kukakhala pa mbuto yapadzulu. Thangwe pinango munthuyo wacemera pomwe munthu munango wakulemekezeka kwene-kwene kuposa iwepo. Ndipo munthu omwe akhadakucemeraniyo, angadzabwere, acidzakuuza kuti: “Coka pamwepa akhale munthu uyu.” Ndipo iwepo un’dzacoka na manyazi, ucikakhala pa mbuto yakumalizira.’—Luka 14:8, 9.

Patsogolo pace Jezu adalewa pomwe kuti: ‘Ukacemeredwa, ndokoletu ukakhale pa mbuto yakumalizirayo, kuti akafika munthu omwe adakucemerayo adzakuuze kuti: “Xamwali, ndoko ukakhale pa mbuto yapadzulu.” Tenepo, iwepo un’dzatumbizika pamaso pa wanthu wense omwe acemeredwambo.’ Ndipo adalewa pomwe kuti: ‘Thangwe munthu ali-wense wakubzikuza, an’dzacepswedwa, ndipo ali-wense wakubzicepswa, an’dzakuzidwa.’ (Luka 14:10, 11) Na tenepo, iye akhalimbisa wanthuwo kuti ambakhale wakubzicepswa.

Jezu adalewa pomwe nfundo inango yomwe idathandiza Mfarizeu omwe adamucemera ule. Nfundo yace ikhali yakuti Mfarizeuyo ambakumbukire wanthu omwe angawacemere kuti akadye na cakulinga cakuti Mulungu ambamufune. Iye adalewa kuti: ‘Iwepo ukacemera wanthu kuti adzadye cakudya ca masikati, ayai adzalalire, leka kucemera axamwali wako ne azibale wako, ne wadzinza, ne anyakufendererana nawo nyumba wakudala. Pakuti iwo an’dzakucemerambo, ndipo kucita bzimwebzi kwa iwepo bzin’dzakhala ninga kukubwezera. Koma, ukacita madyo, cemera anyakusauka, anyakulemala, anyakugwinthoma na azimola; ndipo un’dzakondwa, pakuti iwo alibe cinthu comwe angakubwezere naco.’—Luka 14:12-14.

Kawiri-kawiri wanthu ambafuna kucemera axamwali, adzinza na anyakufendererana nawo nyumba kuti akadye, ndipo Jezu alibe kulewa kuti bzimwebzi mpsakuphonyeka. Koma nfundo yace ikulu ikhali yakuti, penu munthu anicemera wanthu wakusauka, wakulemala na azimola, Mulungu angamusimbe kwene-kwene munthuyo. Jezu adauza Mfarizeu ule kuti: ‘Un’dzabwezeredwa pa kumuka kwa wanthu wakulungama.’ Nyakucemeredwa munango adatawiriza nfundo imweyi ndipo adati: ‘Ankondwa ngule omwe anidya cakudya mu Umambo bwa Mulungu.’ (Luka 14:15) Nyakucemeredwayu adawona kuti ukhali mwayi ukulu kudya mu Umambo bwa Mulungu. Tsono wanthu azinji alibe kutenda mwayi umweyu ninga momwe Jezu adalewera pa thereli.

Iye adati: ‘Munthu munango adakonza madyo makulu, ndipo adacemera wanthu azinji. Iye adatumiza kapolo wace kuti akauze anyakucemeredwawo kuti: “Bwerani thangwe bzense bzakonzeka kale.” Koma wense adayamba kupereka mathangwe. Wakuyamba adati: “Inepano ndagula munda, tenepo, ndin’funika kuyenda kuti ndikauwone. Ndinkukumbira kuti mundilekerere.” Ndipo munango adati: “Inepano ndagula ng’ombe khumi, tenepo, ndin’funika kuyenda kukaziyezera. Ndinkukumbira kuti mundilekerere.” Ndipo munango pomwe adati: “Ndalowola tsapanopa, ndipopa ndingayende lini.”’—Luka 14:16-20.

Mathangweya yakhali yakusaya kubveka. Munthu ambakawona munda ayai ng’ombe pomwe akanati kugula. Tenepo mpsakusaya kubveka kuti adayenda kukawona bzinthu bzimwebzi pambuyo pakubzigula. Munthu wacitatuyu akhakonzekera lini kuti alowole. Iye akhadalowola kale tenepo akhalibe thangwe lakulambira kuyenda. Mwenekaciro  madyoyo adakalipa kwene-kwene pomwe adabva bzimwebzi, ndipo adauza kapolo waceyo kuti:

‘Ndoko tsapanopapa m’miseu na m’njira za mu mzindamo ukatenge wanthu wakusauka, wakupunduka, azimola na wakulemala ubwere nawo.’ Kapoloyo adacitadi bzimwebzo koma mbuto zidasala basi, tenepo mbuyayo adauza kapolo waceyo kuti: ‘Ndoko m’miseu na mu njira ukawakakamize kuti adzapite muno kuti nyumba yanguyi idzale. Inepano ndikukuuzani kuti: Palibe ne na m’bodziyo wa wanthu omwe adacemeredwa wale omwe an’dzalawidza madyo yangu.’—Luka 14:21-24.

Bzomwe Jezu adalewabzi bzikhalatiza kuti Yahova Mulungu adamupasa udindo bwakucemera wanthu kuti adzapite mu Umambo bwa kudzulu. Ajuda maka-maka atsogoleri wa bzipembedzo akhali wakuyamba kucemeredwa. Tsono atsogoleri azinji adalamba mwayi umweyu pa nthawe yense yomwe Jezu akhapalizira. Tenepo iye adacemera wanthu winango. Bzomwe Jezu adalewa mu there lire, bzidalatiziratu kuti kutsogolo an’dzacemera pomwe wanthu kuti apite mu Umambo, Ajuda pabodzi na anyakutembenukira kucijuda. Ndipo patsogolo pace mwayi wacitatu na wakumaliza un’dzaperekedwa kwa wanthu omwe Ajuda akhawawona kuti mbakunyozeka pamaso pa Mulungu.—Mabasa 10:28-48.

Tsono bzomwe Jezu adafotokozabzi bzidalatiza kuti adabverana na bzomwe nyakucemeredwa ule adalewa kuti: ‘Ankondwa ngule omwe anidya cakudya mu Umambo bwa Mulungu.’