Jezu adapfunzisa nfundo zikulu-zikulu pomwe akhadya kumui kwa mtsogoleri wa Afarizeu. Patsogolo pace, Jezu adapitiriza ulendo bwace bwakuyenda ku Jeruzalemu, ndipo thimu la wanthu lidayenda naye pabodzi. Thangwe ranyi? Kodi iwo akhafunisisadi kukhala ateweri wace wacadidi? Kodi iwo angadakwanisa kucita bzense bzomwe ateweri wa Jezu akhafunikira kucita?

Pomwe akhali pakati pa ulendobo, Jezu adalewa cinthu cinango comwe cidadabwisa winango wa iwo. Iye adati: ‘Penu munthu anibwera kwa ine, koma acisaya kuwenga pai wace, mai wace, mkazace, wana wace, azibale wace, mpfumakazi zace, napo moyo wace caiwo, iye angakhale lini nyakupfunza wangu.’ (Luka 14:26) Kodi Jezu akhathandauza ciyani pakulewa bzimwebzi?

Jezu akhathandauza lini kuti ali-wense omwe anikhala nyakupfunza wace an’funika kuwengadi adzinza wace. Koma akhathandauza kuti ambafune kwene-kwene Jezu kuposa adzinza wacewo, sikuti ninga munthu wa mu there lire omwe adacemeredwa koma alibe kuyenda thangwe akhadalowola tsapanopa. (Luka 14:20) Bibliya limbalewa kuti Djakobi baba wa Ajudawo, ‘akhawenga’ Leya ndipo akhafuna kwene-kwene Rakeli, bzomwe bzimbathandauza kuti iye akhafuna kwene-kwene Rakeli kuposa Leya.—Ciyambo 29:31; Buku Lopatulika Ndilo Mawu a Mulungu.

Onani Jezu adalewa kuti nyakupfunza wace an’funika kuwenga napo ‘moyo wace caiwo.’ Bzimwebzi bzinkuthandauza kuti nyakupfunza wacadidi wa Jezu, an’funikira kumufuna kwene-kwene kuposa momwe angafunire moyo wace caiwo, ndipo bzikakwanisika mpaka kuluza moyo waceyo thangwe ra Jezuyo. Bzinkuwonekeratu kuti kukhala nyakupfunza wa Jezu ni udindo bukulu. Tenepo, munthu omwe an’funa kukhala nyakupfunza wa Jezu, an’funika kuyamba waikumbukira bwino nkhani imweyi.

Munthu akasankhula kukhala nyakupfunza wa Jezu, ambagumana na mazunzo, ndipopa Jezu adati: ‘Omwe ambanyamula lini muti wace wakuzunzikira, acinditewera, angakhale lini nyakupfunza wangu.’ (Luka 14:27) Tenepo, anyakupfunza wacadidi wa Jezu, an’funika kukhala wakukonzeka kunyozedwa ninga momwe bzidacitikira na Jezuyo. Ndipo Jezuyo adalewambo kuti angadadzafera m’manja mwa anyamadulanthaka wace.

Tenepo, thimu la wanthu lomwe likhayenda naye pabodzilo, likhafunika kukumbukira mwakusamala bzomwe bzimbathandauza kukhala nyakupfunza wa Kristu. Jezu adatsindika bwino nfundo imweyi mwakufotokoza there linango. ‘Mwa ciratizo,’ iye adati: ‘Mbani wa imwepo akafuna kumanga nsanza ambayamba lini wakhala pansi na kulewenga kobiri zomwe adzonge, kuti awone penu anazo kobiri zakukwanira za kumalizira nsanzayo? Thangwe iye angaikhe maziko yace, koma acisaya kukwanisa kuimaliza.’ (Luka 14:28, 29) Na tenepo, pomwe akhanati kusankhula kukhala anyakupfunza wa Jezu, thimu la wanthu lomwe likhacita ulendo bwakuyenda ku Jeruzalemu pabodzi na Jezuyo, likhafunika kutsimikiza kuti lingadzakwanise kusamalira udindo bwawo bukulubu. Jezu adapitiriza kutsindika nfundo imweyi mwakulewa there linango.

Iye adati: ‘Kodi ni mambo uponi omwe akafuna kukamenya nkhondo na mambo munango, ambakhala lini pansi, aciyamba kuwona penu na acikunda 10.000, angakwanise kulimbana na mambo omwe ankubwera kudzamenyana naye na acikunda 20.000? Tsono akawona kuti an’kwanisa lini kulimbana nawo, iye an’tumiza wanthu kuti akamukumbirire mtendere, pomwe mwanzaceyo akali kutali.’ Pakufuna kubvekesa bwino nfundo imweyi, Jezu adati: ‘Mu njira ibodzi-bodziyi, dziwani kuti munthu omwe angakwanise lini kusiya cuma cace, angadzakhalembo lini nyakupfunza wangu.’—Luka 14:31-33.

Apa Jezu akhalewa lini mafalaya kwa thimu la wanthu lomwe likhamutewera lire basi, koma wense omwe ambapfunza bza iye an’funika kukhala wakukonzeka kucita ciri-cense comwe Jezu walewa. Bzimwebzi bzinkunthandauza kuti iwo an’funika kukhala wakukonzeka kusiya cinthu ciri-cense mpaka moyo wawo caiwo, penu an’funa kukhala anyakupfunza wa Jezu. Ndipo an’funikambo kumbapemba na kukumbukira bwino nkhani imweyi.

Jezu adafotokoza nfundo inango yomwe akhadailewa kale pa Nkhani yace ya pa Phiri pomwe iye adalewa kuti anyakupfunza wace ni ‘munyu wa dziko la pansi.’ (Mateu 5:13) Pakulewa nfundo imweyi pinango akhathandauza kuti ninga momwe munyu umbacitisira kuti cakudya cireke kudzongeka, tenepo anyakupfunza wace akhana mphanvu yakukhotcerera wanthu kuti apitirize kukhala pa uxamwali bwa bwino na Mulungu na kuti ambakhale na makhalidwe yabwino. Pa nthawe imweyi Jezu akhadasala pang’ono kumaliza utumiki bwace bomwe akhadabwerera pa dziko lapansi, ndipo adalewa kuti: ‘Munyu ngwabwino kwene-kwene. Koma munyuyo ukamala mphanvu yace, kodi goso lace lingabwezeresedwe tani?’ (Luka 14:34) Abveseri wace akhadziwa kuti pakhana munyu unango omwe ukhali lini wa bwino thangwe ukhadasanganizana na mataka ndipo ukhalibe mphanvu.

Pamwepa Jezu akhalatiza kuti wanthu omwe akhala anyakupfunza kwa nthawe itali an’funika kusamala kuti aleke kuyamba kutepa. Penu bzimwebzi bzingacitike anyakupfunzawo angakhale wakusaya basa ninga momwe munyu umbakhalira ukamala mphanvu. Ndipo wanthu angambawanyoze. Na tenepo angathemere lini kutumikira Mulungu ndipo anganyozesembo dzina la Mulunguyo. Tenepo Jezu adalatiza kufunika kwa kukhala wakusamala kuti munthu aleke kuyamba kutepa, pomwe adalewa kuti: ‘Omwe ana makutu yakubva, abve.’—Luka 14:35.