Pomwe Jezu ‘adayambuka Joridano,’ adakhala mu cigawo ca Pereya kwa kanthawe kakucepa. (Juwau 10:40) Patsogolo pace adayenda ku mmwera kwa mzinda wa Jeruzalemu.

Jezu akhali lini yekha. Akhali pabodzi na anyakupfunza wace, ndipo pakhana ‘thimu likulu la wanthu’, kuphatanidza anyakukhomesa mtsonkho pabodzi na anyapikado. (Luka 14:25; 15:1) Afarizeu na anembi omwe akhatsutsa bzomwe Jezu akhalewa na kucita, akhalipombo pa thimulo. Anembi na Afarizeuwa akhakumbuka bzinthu bzizinji pomwe Jezu adawafotokozera there la bira wakutayika, mwana wakutayika, pabodzi na there la munthu wa cuma na Lazaro.—Luka 15:2; 16:14.

Pakukumbukira bzomwe wanthu akhamutsutsa na kumunyaza, Jezu adayamba kulewa-lewa na anyakupfunza wace. Iye adawafotokozera nfundo zinango zomwe adawapfunzisa pomwe akhali ku Galileya.

Mwa ciratizo, Jezu adati: ‘Mpsakunesa kutcenkha bzinthu bzakukhumudwisa. Koma tsoka kwa munthu omwe bzakukhumudwisabzo bzimbacokera kwa iye! . . . Samalani na imwe mwekha. M’bale wako akaphonya, mutsimule ndipo iye akakungula, mulekerere. Napo akuphonyere kanomwe kense pa nsiku, acibwerambo kwa iwepo kanomweko, kudzakuuza kuti: ‘Ndakungula,’ iwepo umulekerere.’ (Luka 17:1-4) Mafala yakumaliziraya, yadakumbusa Pedru bza mbvunzo omwe adaucita wakulewa bza kulekerera m’mbale wace kanomwe kense.—Mateu 18:21.

Kodi anyakupfunzawo adacitadi mwakubverana na bzomwe Jezu adalewa? Pomwe iwo adalewa kuti: ‘Tithumizireni cikhulupiro.’ Iye adawatsimikizira kuti: ‘Mungadakhala na cikhulupiro cakucepa ninga kanjere ka mpiru, mungadauza mutiyu kuti: ‘Zuka pano, kabzibzale mu nyanzamo!’ ndipo ungadakubverani.’ (Luka 17:5, 6) N’cadidi, napo munthu acikhala na cikhulupiro cakucepa tenepa, angakwanise kucita bzinthu bzikulu-bzikulu.

Jezu adapitiriza kupfunzisa apostolo wace kufunika kwa kukhala wakubzicepswa na kuti aleke kumbabziwona kuti mbakufunika kwene-kwene. Iye adati: ‘Mbani wa imwepo, acikhala na kapolo omwe ankulima ayai ankuusa bzifuwo, ndipo akabwera kucokera ku mundako angamuuze kuti: “Bwereratu pa citawo pano kuti tidzadye?” M’mbuto mwace, kodi an’dzamuuza lini kuti: “Ndikonzere cakudya ca maulo, ubvale vintala ucinditumikira kufikira pomwe ndinimaliza kudya na kumwa, patsogolo pace iwepo un’dzadyambo na kumwa?” Ndipo munthuyo angamutende lini kapoloyo thangwe bzomwe wacitabzo ni basa lace, kodi n’tenepo lini? Mpsibodzi-bodzimbo na imwepo, mukamala kucita bzinthu bzense bzomwe mukhadauzidwa kuti mucite, mbalewani kuti: “Ndife akapolo wapezi-pezi. Tandocita bzomwe tikhafunikira kucita.”’—Luka 17:7-10.

Mtumiki wa Mulungu ali-wense an’funika kubvesesa kufunika kwa kuikha bzinthu bza Mulungu pa mbuto yakuyamba. An’funikambo kukumbukira kuti ana mwayi wakupambulika wakunamata Mulungu ninga wanthu wa m’banja lace.

Pomwe Jezu adamaliza kulewa mafala yamweya, padafika munthu munango omwe akhadatumidwa na Mariya pabodzi Marta. Amwewa akhali azibale wace wa Lazaro, ndipo akhakhala ku Betanya wa ku Judeya. Munthuyo adabwera na mafala yakuti: ‘Mbuya! munthu omwe mumbamufuna ule, ankuduwala.’—Juwau 11:1-3.

Napo kuti Jezu adabva kuti xamwali wace Lazaro akhaduwala, iye alibe kusiya kupfunzisa thangwe ra msunamo. M’mbuto mwace, iye adati: ‘Kuduwala kumweku kunibweresa lini infa, koma kunipasa mbiri Mulungu, kuti Mwana wa Mulungu  alemekezedwe.’ Jezu adapitiriza kukhala kumweko kwa nsiku ziwiri, ndipo patsogolo pace adauza anyakupfunza wace kuti: ‘Mbatiyendeni pomwe ku Judeya.’ Tsono anyakupfunzawo alibe kubverana nabzo ndipo adamubvunza kuti: ‘Rabi, tsapanopapa Ajuda akhafuna kukubomani na minyala, tsono imwepo mun’funa kuyenda pomwe kumwekule?’—Juwau 11:4, 7, 8.

Jezu adatawira kuti: ‘Kodi masikati yalibe maora 12? Munthu akafamba masikati ambakhukhumudwa lini, thangwe ambawona ceza ca dzikoli. Tsono munthu akafamba usiku, angakhukhumudwe, thangwe alibe ceza.’ (Juwau 11:9, 10) Pakulewa bzimwebzi iye akhafuna kulewa kuti nthawe yomwe Mulungu adamupasa kuti acite utumiki bwace ikhanati kumala. Na tenepo Jezu akhafunika kuphatisa basa bwino nthawe yakucepa yomwe akhadasala nayo.

Jezu adathumizira kuti: ‘Lazaro xamwali wathu, adagona, tsono ndiniyenda kumweko kuti ndikam’muse ku tulo.’ Pakuti anyakupfunzawo akhakumbuka kuti Lazaro wagona kuti apume ndipo anilimba, iwo adalewa kuti: ‘Mbuya, penu iye adagona, an’dzakhala bwino.’ Koma Jezu adawauziratu kuti: ‘Lazaro wafa . . . Tsono mbatiyendeni kuna iyeko.’—Juwau 11:11-15.

Thomasi akhadziwa kuti Jezu angadakaphedwa ku Judeya, tsono pakufuna kumulimbisa, Thomasiyo adauza anyakupfunza anzacewo kuti: ‘Mbatiyendenimbo, kuti tikafe nawo pabodzi.’—Juwau 11:16.