Jezu adapita na m’cigawo ca pereya pakuyenda ku Jeruzalemu. Pomwe akhali mu njira, adagumana na tswaka linango lomwe likhali lakudala. Tswakalo lidathamangira Jezu licikamugodamira. Munthuyo akhali ‘m’bodzi wa atsogoleri,’ ndipo pinango akhatumikira mu Sinagoga ayai akhali mtongi mu nyumba ya mphala ya Sinedriyo. Iye adabvunza Jezu kuti: ‘Mpfunzisi wabwino, kodi ndingacite ciyani kuti ndidzatambire moyo wakusaya kumala?’—Luka 8:41; 18:18; 24:20.

Pakutawira, Jezu adamubvunza kuti: ‘Thangwe ranyi unkundicemera wabwino? Palibe wabwino, koma Mulungu yekha.’ Tswakali lidacemera Jezu kuti ‘wabwino’ mwa mwambo basi. Iye adacita bzimwebzi pakutewezera apfunzisi wa Cijuda omwe akhacemerana mwakuphatisa basa madzina ya udindo. Napo kuti Jezu akhalidi mpfunzisi wa bwino, iye akhafuna kuti munthuyo adziwe kuti Mulungu yekha ndiye an’themera kucemeredwa kuti ‘wabwino.’

Jezu adauza munthuyo kuti: ‘Penu un’funa kudzatambira moyo, mbakoya malamulo nthawe zense.’ Tsono munthuyo adabvunza Jezu kuti: ‘Malamulo yaponi?’ Jezu adalewa malamulo maxanu yomwe yambagumanika mu Malamulo khumi, yakulewa bza kupha, kucita upombo, kuba, kupereka umboni bwakunama, pabodzi na kulemekeza abereki. Ndipo Jezu adamuuza pomwe lamulo linango lakufunika kwene-kwene lakuti: ‘Funa mwanzako ninga momwe umbabzifunira wekha.’—Mateu 19:17-19.

Munthuyo adatawira kuti: ‘Ndimbateweza kale bzensebzi, n’ciyani pomwe cinkusala?’ (Mateu 19:20) Pinango munthuyo akhakumbuka kuti akhafunika kucita bzinthu bzinango bzabwino na bzapadzulu kuti adzagumane moyo wakusaya kumala. Jezu adawona kuti munthuyo akhabvunza na mtima wense, tenepo iye ‘adamufuna kwene-kwene.’ (Marko 10:21) Tsono pakhana cinthu cinango comwe cikhamunesa.

Munthuyo akhafunisisa bzinthu bzace bza kuthupi, tenepo Jezu adamuuza kuti: ‘Cikusala cinthu cibodzi: Ndoko ndipo kagulise bzinthu bzomwe unabzo, ndipo kobiriyo ukagawanise anyakusauka, ndipo iwepo un’dzakhala na cuma kudzulu, ukamala ubwere ucidzakhala mteweri wangu.’ Iye angadagawira kobiri zace wanthu wakusauka omwe angadamubwezera lini, acikhala nyakupfunza wa Jezu. Munthuyo adasunama, thangwe akhafuna kwene-kwene cuma pabodzi na bzinthu ‘bzizinji bzomwe’ akhanabzo, na bzimwebzi adatazira kuwona cuma ca cadidi. (Marko 10:21, 22) Tenepo, Jezu adalewa kuti: ‘Bzin’dzakhala bzakunesa kuti wanthu wacuma adzapite mu Umambo bwa Mulungu!’—Luka 18:24.

Anyakupfunza wa Jezu adadabwa kwene-kwene pomwe adabva bza mafala yamweya pabodzi na bzomwe Jezuyo adadzalewa patsogolo pace kuti: ‘Mpsakupusa kuti ngamira ipite pakam’bowo ka nsingano yakusonera, kuposa kuti munthu wacuma adzapite mu Umambo bwa Mulungu.’ Bzimwebzi bzidacitisa anyakupfunzawo kubvunza kuti: ‘Tsono mbani omwe angadzapulumusidwe?’ Jezu adanyang’anisa anyakupfunza wacewo, aciwatawira kuti: ‘Bzinthu bzomwe mpsakukwanisika lini kwa wanthu, mpsakukwanisika kwa Mulungu.’—Luka 18:25-27.

Patsogolo pace, Pedru adauza Jezu kuti iye pabodzi na anyakupfunza winangowo adacita bzakusiyana na bzomwe munthu wakudala ule adacita. Tenepo, iye adati: ‘Onani! Ifepano tasiya bzinthu bzense ndipo takutewerani; kodi n’ciyani comwe tin’dzagumana?’ Jezu adawauza bzisimbo bzomwe an’dzabzigumana thangwe ra kucita cakusankhula ca bwino, iye adati: ‘Pa nthawe yakulenga papsa, Mwana wa Munthu akadzakhala pa mpando wace wa Umambo, imwepo omwe mwanditeweramwe mun’dzakhala m’mipando 12 ndipo mun’dzayeruza mitundu 12 ya Jirayeri.’—Mateu 19:27, 28.

Bzinkuwonekeratu kuti Jezu akhakumbukira bzinthu bza kutsogolo, pa nthawe ya kulenga papsa bzinthu bza pa dziko lapansili kuti bzidzakhale ninga momwe bzikhaliri mu zunde la Edeni. Pedru pabodzi na anyakupfunza winangowo an’dzasimbidwa mwa kupasidwa mwayi wakudzatonga pabodzi na Jezu pa dziko lapansi la Paraizo, umweyu ni mwayi ukulu kwene-kwene pakundendemezera na bzinthu bzomwe adasiya.

Tsono anyakupfunzawo akhadikhira lini kuti angadadzatambira bzisimbo bzense kutsogolo. Iwo adatambiriratu bzisimbo bzinango nthawe imweyo. Jezu adalewa kuti: ‘Palibe munthu omwe adasiya nyumba, mkazi, abale, abereki ayai wana thangwe ra Umambo bwa Mulungu acisaya kutambira bzizinji mu nthawe ino, ndipo mu nthawe yakutsogolo acidzatambira moyo wakusaya kumala.’—Luka 18:29, 30.

Kulikwense komwe anyakupfunza wa Jezuwo akhayenda akhadekedwa na ubale bomwe akhanabo pabodzi na anyakukhulupira anzawo. Bzimwebzi bzikhawacitisa kukhala wakuphatana kwene-kwene kuposa momwe bzimbakhalira na wanthu wa m’banja libodzi. Mpsakupasa nsisi kuti mtongi wacitswaka omwe akhali wakudala ule adataya mwayi umweyu pabodzi na mwayi wakukatonga mu Umambo bwa Mulungu.

Jezu adathumizira kuti: ‘Koma azinji omwe mbakuyamba, an’dzakhala wakumalizira; ndipo wakumalizira, an’dzakhala wakuyamba.’ (Mateu 19:30) Kodi iye akhafuna kuthandauza ciyani?

Mtongi wacipswaka ule akhali mu thimu la wanthu ‘wakuyamba’ thangwe akhali m’bodzi mwa atsogoleri Wacijuda. Iye akhadikhirira kutambira mabai-bai mazinji ndipo akhadikhirira kucita bzinthu bzizinji thangwe akhateweza malamulo ya Mulungu. Tsono munthu umweyu akhafuna kwene-kwene cuma pabodzi na bzinthu bzinango kuposa cinthu ciri-cense pa moyo wace. Mwakusiyana na munthu umweyu, wanthu wakunyozeka akhawona kuti bzomwe Jezu akhapfunzisa bzikhali bzacadidi na kuti bzingadawathandiza kugumana moyo wakusaya kumala. Wanthu amwewa akhali ‘wakumalizira’ koma patsogolo pace adadzakhala ‘wakuyamba.’ Tenepo iwo akhadikhirira kudzakhala pa mipando ya umambo kudzulu pabodzi na Jezu Kristu, kuti adzatonge dziko lapansi la Paraizo.