Pomwe Jezu akhali ku Pereya kummwera kwa Mkulo wa Joridano, iye adafotokoza bza there la bira na kobiri ya drakima yakutaika. Mathere mawiriya yankutipfunzisa kuti tin’funika kumbakondwa pomwe munthu omwe akhadacita pikado wakungula acibwerera kwa Mulungu. Koma Afarizeu na anembi adapasa mulandu Jezu thangwe rakuti Jezuyo akhabverana na wanthu wa pikado. Kodi Afarizeu na anembiwa adapfunzambo cinthu ciri-cense na mathere mawiri ya Jezuya? Kodi iwo adabvesesa momwe Baba wathu wa kudzulu ambabvera na wanthu wa pikado akakungula? Jezu adafotokoza there linango pakufuna kuwathandiza kubvesesa mathere mawiriya.

Therelo limbafotokoza bza baba omwe ana wana awiri wacimuna, koma iro limbalewa maka-maka bza mwana omwe ni mng’ono pa awiriwo. Afarizeu na anembi, pabodzi na wale omwe akhatetekera Jezu, akhafunika kupfunza na bzomwe iye akhalewa bza mwana mng’onoyo. Koma tin’funikambo kukumbukira bzomwe Jezu adalewa bza baba na mwana wace mkulu, pakuti tingapfunzembo cinthu cinango na bzomwe iwo adacita. Tenepo pomwe tinkucezerana bza there la Jezuli tin’funika kukumbukira bza wanthu atatuwa.

Jezu adayamba kufotokoza bza therelo mwa kulewa kuti: ‘Mng’ono pa awiriwo adakumbira baba wace kuti: “Baba, ndipaseni mbali yangu pa cuma canuci.” Pamwepo babayo adagawanisa wanawo cuma caceco.’ (Luka 15:11, 12) Onani kuti mwana mng’onoyo akhafuna kutambira utaka bwace nthawe imweyoletu napo kuti baba wace akhana moyo. Iye adacita bzimwebzi thangwe akhafuna kukhala payekha acimbacita bzomwe iye akufuna. Tsono n’ciyani comwe iye adacita?

Jezu adafotokoza kuti: ‘Zitandopita nsiku zakucepa, mwana mng’ono ule adakonkha bzinthu bzense, aciyenda ku dziko linango lakutali. Kumweko iye adakadzonga cuma cace cense na makhalidwe yakuipa.’ (Luka 15:13) M’mbuto mwa kukhala wakukhotcerereka pa muipo na baba wace omwe akhamusamalira bwino, mwanayo adayenda kukakhala ku dziko linango. Kumweko, iye adadzonga utaka bwace bwense ndipo adayamba kukhala na moyo wa unzazi. Ninga momwe Jezu adafotokozera, mwanayo adagumana na mabvuto mazinji.

 Iye adati: ‘Pomwe akhadadzonga bzense, mudawoneka njala ikulu m’dzikomo, ndipo iye adayamba kubonera kwene-kwene. Iye adayenda kukapita basa kwa munthu m’bodzi wa m’dzikomo, ndipo munthuyo adamutumiza ku munda kwace kuti ambakamufuwire nkhumba. Ndipo mwanayo akhambakhumba kudya cakudya ca nkhumbazo, tsono palibe omwe akhamupasa cinthu ciri-cense.’—Luka 15:14-16.

Cakutonga ca Mulungu cikhalewa kuti nkhumba zikhali zakupswipizidwa, koma mwanayu pomwe adabonera adaphata basa lakusamalira nkhumbazo. Ndipo adabonera na njala mpaka adayamba kusirira cakudya ca nkhumba zomwe akhasamalirazo. Iye adabonera kwene-kwene ndipo adasaya comwe angadacita, koma ‘nzeru zidamubwerera.’ Kodi n’ciyani comwe iye adacita? Iye adayamba kulewalewa yekha kuti: ‘Anyabasa azinji wa babangu ana cakudya cizinji, koma inepano ndinkufa kuno na njala! Basi, ndinkuyenda kwa babangu, ndicikawauza kuti: “Baba ndaphonyera kudzulu na imwepombo. Ndine lini pomwe wakuthemera kucemeredwa mwana wanu. Tsono mundiwone ninga m’bodzi wa anyabasa wanu.”’ Tenepo iye adalamuka aciyenda kuna baba wace.—Luka 15:17-20.

Kodi n’ciyani comwe baba wace adacita? Kodi iye adakalipa acimulanga mwanaceyo thangwe rakuti akhadacoka pa mui? Kodi babayo adamuumira mtima acilamba kuti akhale pa muipo? Penu imwepo ndimwe m’bereki, kodi mungadacita ciyani bzingadakhala kuti ni mwana wanu wacimuna ayai wacikazi?

Jezu adafotokoza momwe babayo adabvera na bzomwe adacita. Iye adati: ‘Pomwe baba waceyo adawona [mwanayo] na patali, adamubvera nsisi, adamuthamangira, acikamukolombexa na kumumpsompsona mwa lufoyi.’ (Luka 15:20) Napo kuti babayo adabva bzinthu bzakuipa bzomwe mwana waceyo akhacita, iye adamutambira na manja mawiri. Kodi bzimwebzi bzidathandiza Atsogoleri Wacijuda, omwe akhabziti ambadziwa ndipo ambanamata Yahova, kubvesesa momwe Baba wathu wa kudzulu ambabvera munthu wa pikado akakungula? Kodi iwo adazindikirambo kuti Jezu akhana mtima wakutambira wanthu omwe akungula ninga momwe Baba wace ambacitira?

Pomwe babayo adawona kusunama kwa mwana waceyo, adazindikira kuti iye akhadacinjadi khalidwe lacero. Tenepo, babayo adamutambira mwa lufoyi, bzomwe bzidacitisa kuti mwanayo atsudzuke acimufotokozera bza pikado yace. Jezu adati: ‘Mwanayo adawauza kuti: “Baba, ndaphonyera kudzulu ndipo ndaphonyerambo imwepo. Ndin’themera lini pomwe kucemeredwa mwana wanu.”’—Luka 15:21.

Babayo adauza anyabasa wace kuti: ‘Fulumizani! Bweresani mkanjo wabwinoletu mudzamubvazike, ndipo mumubvazikembo mphete ku boko lace, na xango ku nzayo zace. Ndipo bweresanimbo kamphulu kakunenepa, mucikapha kuti tidye ticikondwa, thangwe mwana wanguyu akhadafa, tsono wakhala pomwe na moyo; iye akhadatayika tsono wawoneka. Tenepo adayamba kucita madyoyo.’—Luka 15:22-24.

Pomwe bzimwebzi bzikhacitika, mwana mkulu wa babayo akhali ku munda. Pakulewa bza mwanayo Jezu adati: ‘Pomwe adabwerera, acifika pafupi na pamuipo iye adabva nyimbo na kubzina. Tenepo, iye adacemera m’bodzi wa akapolo ndipo adamubvunza kuti n’ciyani comwe cikhacitikaco. Iye adamuuza kuti: “M’bale wanu wabwera, ndipo pai wanu amuphera kamphulu kakunenepa thangwe iye abwerera na moyo.” Tsono iye adakalipa kwene-kwene ndipo adalamba kupita m’nyumbamo. Tenepo, baba wace adabula panjapo, acikamudandaulira kuti apite. Pakutawira, iye adauza baba wacewo kuti: “Ndakuphatirani basa kwa magole mazinji ninga kapolo ndipo ndiribe  kuphonyesa malamulo yanu. Napo bziri tenepo, mulibe kundipasambo mbuzi ne kabodzi kokha kuti ndicite madyo na axamwali wangu. Tsono, pomwe wandofika mwana wanuyu, omwe wadzonga cuma canu na mahule, imwepo mwamuphera kamphulu kakunenepa.”’—Luka 15:25-30.

Afarizeu na anembi akhali ninga mwana mkulu ule, thangwe iwo akhapasa mulandu Jezu pakuti iye akhabvera nsisi na kuceza na wanthu wakunyozeka na anyapikado. Bzimwebzi ndibzo bzomwe bzidacitisa Jezu kulewa bza thereli. Ndipo munthu ali-wense omwe ambapasa mulandu Mulungu thangwe ra kucitira nsisi wanthu, an’funikambo kupfunza na there limweri.

Jezu adamaliza there lace na mcenjezo omwe baba adapereka kwa mwana wace mkulu ule wakuti: ‘Mwanangu, iwepo wakhala nande nthawe zense ndipo bzinthu bzense bziri m’manja mwako. Koma ifepano tandocita madyo ticikondwa, thangwe m’bale wakoyu akhadafa tsono wakhala pomwe na moyo, akhadatayika tsono wawoneka.’—Luka 15:31, 32.

Jezu alibe kufotokoza bzomwe mwana mkulu ule adadzacita. Ndipo pomwe Jezu adafa acilamusidwa, ‘wansembe azinji adayambambo kukhulupira.’ (Mabasa 6:7) Pinango winango mwa wansembewo akhalipombo pomwe Jezu akhafotokoza bza there la mwana wakutaika lomwe likhana nfundo zamphanvu. Ndipo mwakusaya kupenukira, iwo adazindikira bzakuphonya bzawo, adakungula acibwerera kwa Mulungu.

Kuyambira nsiku imweyire mpaka kutsogolo, anyakupfunza wa Jezu akhafunika kumbakumbukira nfundo zikulu-zikulu zomwe iye adazifotokoza mu thereli. Nfundo yakuyamba yomwe tinkupfunza mu thereli njakuti, ni nzeru kupitiriza kukhala mu thimu lakukhotcerereka la wanthu wa Mulungu, lomwe linkusamaliridwa na Baba wathu wa lufoyi omwe ambatipasa bzinthu bzense bzomwe tinkufunikira pa moyo wathu, m’mbuto mwa kuyenda ku ‘dziko lakutali’ kukanyang’ana bzinthu bzomwe wanthu azinji ambabziwona kuti mpsakudekeza.

Nfundo yaciwiri yomwe tinkupfunza njakuti, tikayamba kupambuka pa njira ya Mulungu, tin’funika kukhala wakubzicepswa kuti tibwerere kwa Baba wathu ticipitiriza kukhala wakufunidwa na iye.

Nfundo yacitatu yomwe tinkupfunza mu thereli ni kusiyana pakati pa khalidwe labwino na lakukhululukira lomwe baba ule adalilatiza na khalidwe lakusaya kukhululuka na kuuma mtima kwa m’bale wace mkulu. Kulewa cadidi, atumiki wa Mulungu an’funika kumbakhululukira na kumbatambira na manja mawiri wale omwe akhadapambuka pa njira ya Mulungu, akakungula na mtima wense acibwerera pomwe ku ‘nyumba ya Baba.’ Tenepo, bwerani timbakondwe na abale wathu omwe ‘akhadafa tsono akhala pomwe na moyo, akhadatayika tsono awoneka.’