Pomwe Jezu akhali ku Pereya adalewa kuti ‘azinji omwe mbakuyamba, an’dzakhala wakumalizira; ndipo wakumalizira, an’dzakhala wakuyamba.’ (Mateu 19:30) Iye adatsindika nfundo imweyi mwa kufotokoza there la kulewa bza wanthu omwe akhaphata basa m’munda wa mpesa.

‘Pakuti Umambo bwa Mulungu buli ninga mwenekaciro nyumba, omwe wacoka kumacibese-bese kuti akanyang’ane anyabasa kuti akaphate basa m’munda wace wa mpesa. Pambuyo pa kupangana na anyabasawo dinario ibodzi pa nsiku, adawatumiza ku munda wace wa mpesa. Pafupi-fupi nthawe zipfemba za ku macibese, iye adayenda pomwe kukanyang’ana wanthu winango, ndipo adawona winango omwe akhalibe cakucita atandoima pa msika. ndipo adawauza kuti: “Imwepo ndokonimbo ku munda wa mpesa, ndipo inepano ndin’dzakupasani comwe n’cakulungama.” Mwakuti iwo adayendadi. Iye adacoka pomwe pa nthawe pafupi-fupi khumi na ziwiri na nthawe zitatu za kumaulo, ndipo adacita bzibodzi-bodzi. Pakumalizira pace, pa nthawe ya pafupi-fupi zixanu zakumaulo, iye adacoka ndipo adawona pomwe wanthu winango omwe akhadandoima, ndipo iye adawabvunza kuti: “N’thangwe ranyi mwakhala pano nsiku yenseneyi ne kuphata basa?” Iwo adatawira kuti: “Thangwe palibe munthu omwe watinemba ganya.” Ndipo iye adawauza kuti: “Ndokonimbo kumunda wangu wa mpesa.”’—Mateu 20:1-7.

Pomwe Jezu adalewa bza Umambo bwa kudzulu pabodzi na mwenekaciro nyumba pinango wanthu omwe akhamutetekerawo adakumbuka bza Yahova Mulungu. Bzinembo bzimbandendemeza Yahova kuti ni mwenekaciro munda wa mpesa ndipo mundayo ukhaimira mtundu wa Ajirayeri. (Psalymo 80:8, 9; Zaiya 5:3, 4) Wanthu omwe akhali mu mpangano wa Cakutonga akhali ninga anyaganya wa m’munda wa mpesa. Pomwe Jezu akhafotokoza there lace akhalewa lini bzinthu bza m’mbuyo, koma iye akhalewa bzinthu bzomwe bzikhacitika nthawe imweyoletu.

Mwakundendemerana na Afarizeu omwe adayeza Jezu pa kumubvunza bza nkhani ya kulambana m’banja, atsogoleri wa cipembedzo akhawoneka ninga akhaphata basa na nyongo pakutumikira Mulungu. Atsogoleri wa cipembedzowo akhali ninga wanthu omwe akhaphata basa nsiku yense, ndipo akhadikhirira kutambira dinario ibodzi, yomwe ikhali malipo ya nsiku yathunthu.

Wansembe pabodzi na wanthu winango omwe akhali mu thimu la atsogoleri wa cipembedzowo, akhawona Ajuda wakunyozeka ninga kuti akhatumikira lini Mulungu mwakukwanira. Tenepo, Ajudawo akhali ninga anyaganya wa m’munda wa mpesa wa Mulungu. Mu there la Jezuli, Ajuda wakunyozekawo akhali ninga anyaganya omwe adanembedwa ganya nthawe ya 9 ora za ku macibese ayai omwe adayamba nthawe ya 12 ora, nthawe zitatu za kumaulo na nthawe zixanu za kumaulo.

Amuna na akazi omwe akhatewera Jezu akhawonedwa kuti ‘mbakutembereredwa.’ (Juwau 7:49) Kwa nthawe itali wanthu amwewa akhali akhombwe ndipo akhaphatambo maganya yakusiyana-siyana. Tsono pakufika outubro mu gole la 29 EC, ‘mwenekaciro mundayo’ adatuma Jezu kuti akacemere wanthu wakunyozekawo kuti adzaphate basa la Mulungu ninga anyakupfunza wa Jezu. Amwewa akhali anyaganya ‘wakumalizira’ wakulewedwa na Jezu, omwe adayamba kuphata basa m’munda wa mpesa nthawe zixanu za kumaulo.

Jezu adamaliza thereli pakulewa bzomwe bzidacitika pakumala kwa nsikuyo. Iye adati: ‘Pomwe kukhadoka, mwenekaciro mundayo adauza nyakunyang’anira wace kuti: “Cemera anyabasa ndipo uwapase kobiri zawo, kuyambira anyakumalizira ucidzamalizira na anyakuyambirira.” Pomwe adafika wanthu omwe adayamba basa pa nthawe zixanu zakumaulo wale, ali-wense wa iwo adatambira dinario ibodzi. Tsono pomwe wakuyambirira wale adafika, akhakumbuka kuti angadatambira zizinji, koma ali-wense wa iwo adatambirambo dinario ibodzi-ibodzi. Pambuyo pa kutambira, iwo adayamba kudandaulira nyakunyang’anirayo acimuuza kuti: “Wanthu wakumalizirawa, aphata basa  kwa ora ibodzi yokha, napo bziri tenepo, imwepo mwawapasa malipo yakundendemera na ifepano, omwe taphata basa kwene-kwene nsiku yense pa dzuwa!” Koma iye adatawira m’bodzi wa iwo kuti: “Xamwali ndiribe kukucitira cinthu mwakusaya cirungamo. Kodi tiribe kupangana dinario ibodzi? Tambira malipo yako uyende. Ndin’funa kupasambo munthu wakumalizirayu malipo yace yakundendemerana na yakoya. Kodi ndiribe ugo bwa kucita bzomwe ndin’funa na bzinthu bzangu? Ayai diso lako linkuipidwa thangwe ndine wa bwino?” Mu njira imweyi, wakumalizira an’dzakhala wakuyamba, ndipo wakuyamba an’dzakhala wakumalizira.’—Mateu 20:8-16.

Pinango anyakupfunza wa Jezu akhafuna kudziwa bzomwe mbali yakumalizira ya there la Jezu imbathandauza. Kodi atsogoleri wacipembedzo Wacijuda omwe akhabziwona ninga ‘wakuyamba’ adadzakhala tani ‘wakumalizira’? Ndipo anyakupfunza wa Jezu adadzakhala tani ‘wakuyamba’?

Anyakupfunza wa Jezu, omwe Afarizeu akhawawona ninga ‘wakumalizira’ adadzakhala ‘wakuyamba’ kutambira malipo yawo. Pomwe Jezu adafa, Mulungu adasiya kuwona mzinda wa Jeruzalemu ninga wakupambulika ndipo adasankhula mtundu upsa, ‘omwe ni Jirayeri wa Mulungu.’ (Wagalata 6:16; Mateu 23:38) Juwau Batista akhalewa bza mtundu umweyu pomwe adafotokoza bza kubatizidwa na mzimu wakucena. Wanthu omwe adakhala ‘wakumalizira,’ adadzakhala wakuyamba kubatizidwa na mzimu wakucena ndipo adakhala pomwe na mwayi wakucitira umboni bza Jezu ‘mpaka kumalekezero ya dziko la pansi.’ (Mabasa 1:5, 8; Mateu 3:11) Pomwe anyakupfunzawo adabvesesa bza kucinja komwe Jezu adakufotokoza iwo adadziwa kuti angadadzawengedwa na atsogoleri wacipembedzo omwe adadzakhala ‘wakumalizira.’