PFUNZIRO 05
Bibliya ni Fala la Mulungu
Yahova adatipasa mphaso yabwino kwene-kwene yomwe ni Bibliya ndipo lina mabukhu yakukwana 66. Tsono pinango mungabzibvunze kuti: ‘Kodi Bibliya lidacokera kuponi? Ndipo mwenekaciro ni mbani?’ Kuti titawire mibvunzo imweyi, cakuyamba mbaticezeraneni kuti mafala ya Mulungu yomwe ni Bibliya yadafika tani kwa ifepano.
1. Penu wanthu ndiwo adanemba Bibliya, kodi Mulungu akukhala tani mwenekaciro?
Bibliya lidamala magole yakupitirira 1.600 likunembedwa ndipo lidanembedwa na wanthu 40, kuyambira mu gole la 1513 AEC mpaka mu gole la 98 EC. Anembiwo akhakhala ku mbuto zakusiyana-siyana ndipo bzikhalidwe bzawo bzikhali bzakusiyanambo. Napo bzikhali tenepo, mafala yentse ya m’Bibliya ngakubverana. Kodi bzimwebzi bzidakwanisika tani? Bzidakwanisika thangwe Mulungu ndiye mwenekaciro. (Werengani 1 Atesalonika 2:13.) Anembiwo alibe kunemba nzeru zawo. Koma iwo “adalewalewa mafala ya Mulungu, mwakutsogoleredwa na mzimu wakucena.” a (2 Pedru 1:21) Mulungu adaphatisa basa mzimu wace wakucena kuti afulizire ayai acitise wanthu kunemba makumbukidwe yace.—2 Timotio 3:16.
2. Mbani angakhale na Bibliya?
“Mtundu uli-wentse, dzinza, cirewedwe na mbumba” angagumane phindu na mafala yabwino yomwe yali m’Bibliya. (Werengani Apokalipse 14:6.) Mulungu adatsimikiza kuti Bibliya lin’funika kugumanika mu bzirewedwe bzizinji kuposa bukhu liri-lentse. Munthu ali-wentse angakhale nalo Bibliya, bziribe basa komwe ambakhala ayai ambalewalewa cirewedwe ciponi.
3. Kodi Yahova adalikhotcerera tani Bibliya?
Bibliya lidanembedwa pa bzinthu bzakusaya kulimba, ninga makanda na nzire. Koma amuna omwe akhafuna Bibliyalo adalikopiyari mwakucita kunemba na manja. Napo bzikhali tenepo, amuna winango wamphanvu adayezera kufuna kulimalisa, koma wanthu winango adaikha pangozi moyo wawo kuti alikhotcerere. Yahova alibe kubvuma kuti munthu ali-wentse ayai cinthu ciri-centse cimutazise kulewalewa na ifepano. Bibliya limbati: “Fala la Mulungu lin’dzakhala mpaka muyaya.”—Zaiya 40:8.
FUFUDZANI BZINANGO
Pfunzani bzizinji kuti mudziwe bzomwe Mulungu adacita kuti wanthu anembe Bibliya, momwe adalikhotcererera na bzomwe adacita kuti wanthu azinji akhale nalo.
4. Bibliya limbalewa kuti mbani Mwenekaciro
Onani VIDIYO. Mukamala werengani 2 Timotio 3:16, ndipo cezeranani mibvunzo ikutewerayi.
-
Penu ni wanthu adanemba Bibliya, thangwe ranyi timbalewa kuti ni Mafala ya Mulungu?
-
Kodi imwepo mumbakhulupira kuti Mulungu adauza wanthu kuti anembe makumbukidwe yace m’Bibliya?
Munthu anganembe tsamba, koma mwenekaciro wa tsambalo ni munthu omwe an’lewa mafala yomwe yan’nembedwa mu tsambalo. Mpsibodzi-bodzimbo, wanthu ndiwo adanemba Bibliya, tsono mafala yomwe yali m’Bibliyamo nga Mulungu
5. Bibliya lidapulumuka kuna wanthu omwe akhalifuna lini
Penu Bibliya ndakucokera kwa Mulungu, timbatsimikiza kuti iye anilikhotcerera. Tsono mbiri imbalatiza kuti wanthu wamphanvu adayezera kucitisa kuti Bibliya lireke kugumanika. Atsogoleri wa magereja adayezera kulibisa. Koma wanthu azinji adaikha pangozi moyo wawo kuti akhotcerere Bibliya, napo kuti adagopswewa kuti angadaphewa. Kuti mudziwe m’bodzi wa wanthu amwewa, onani VIDIYO, ndipo mukamala cezeranani mibvunzo ikutewerayi.
-
Kodi kudziwa kuti Bibliya lidakhotcereredwa ku bzinthu bzomwe bzingadacitisa kuti lireke kugumanika kumbakucitisani kuti mufune kuliwerenga? Thangwe ranyi?
Werengani Salimo 119:97, ndipo mukamala cezeranani mbvunzo wakutewerayu:
-
Kodi n’ciyani cidacitisa wanthu azinji kuikha pangozi moyo wawo kuti asandulizire Bibliya kuti wanthu akhale nalo?
6. Bukhu la wanthu wentse
Bibliya ni bukhu lomwe limbasanduliziridwa na kugawidwa kwene-kwene kuposa bukhu liri-lentse. Werengani Mabasa 10:34, 35, ndipo mukamala cezeranani mibvunzo ikutewerayi:
-
Thangwe ranyi Mulungu akufuna kuti Fala lace lisanduliziridwe nakuti wanthu azinji akhale nalo?
-
N’ciyani cimbakucitisani kuti mufune Bibliya?
Bibliya ni bukhu lakudziwika pa dziko lentse
ndipo wanthu pafupi-fupi
100%
angaliwerenge mu cirewedwe comwe ambacibvesesa bwino
Likugumanika m’bzirewedwe
bzakupitirira
3000
lentse ayai cipande
5,000,000,000
Mbogo ya makopiya yakudindidwa,
njizinji kwene-kwene kuposa bukhu liri-lentse
WANTHU WINANGO AMBALEWA KUTI: “Bibliya ni bukhu lakale-kale ndipo ni wanthu omwe adanemba, tsono iro ni Fala lini la Mulungu.”
-
Imwepo munti tani?
-
Kodi n’ciyani cimbakutsimikizirani kuti Bibliya ni Fala la Mulungu?
KODI MWAPFUNZA CIYANI?
Bibliya ni Fala la Mulungu, ndipo iye adacitisa kuti wanthu wa mitundu yentse akhale nalo.
Mibvunzo yakubwerezera
-
Kodi bzikufuna kulewanyi tikalewa kuti Mulungu adauza wanthu kuti anembe Bibliya?
-
Kodi n’ciyani cimbakudabwisani mukakumbukira bza kupulumuka, kusanduliziridwa na kugawidwa kwa Bibliya?
-
Kodi imwepo mumbabzibva tani thangwe ra kudziwa kuti Mulungu adacita nyongo kuti alewelewe namwe?
ONANI POMWE IBZI
Werengani nkhani yakulewa bza Bibliya, kuyambira bzinembo bzakuyambirira mpaka mabibliya yomwe yakusanduliziridwa ntsiku zino.
“Kodi Bzidacitika Tani Kuti Tikhalembo Nalo Bibliya?” (Mukani!, Novembro 2007)
Pfunzani momwe Bibliya lidapulumukira ku bzinthu bzitatu bzakugopswa.
“Bibliya ni Bukhu Lomwe Lidapulumuka pa Bzinthu Bzizinji” (Ntsanza ya Mulindiri N.° 4 2016)
Onani ngozi yomwe wanthu omwe akhasandulizira Bibliya akhanayo.
Bibliya lidakopiyaridwi na kusanduliziridwa kazinji kentse. Kodi n’ciyani cimbakutsimikizani kuti lidakopiyaridwi na kusanduliziridwa ndendende ninga momwe likhaliri pakuyamba?
a Ninga momwe Pfunziro 07 lin’dzafotokozera, mzimu wakucena wa Mulungu ni mphanvu yomwe ambaiphatisa basa.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
