PFUNZIRO 07
Kodi Yahova Adakhala Tani?
Mukambabva bza Yahova Mulungu, n’ciyani comwe mumbakumbuka? Wanthu winango ambakumbuka kuti Mulungu ni mkulu kwene-kwene, ni mzimu wakupasa mantha ndipo mpsakukwanisika lini kubverana naye. Kodi imwepo mumbakumbuka kuti iye ngwamphanvu tsono alibe unthu ninga ciphaliwali? Kodi Yahova adakhala tani maka-maka? Mwakuphatisa basa Fala lace, Bibliya, Yahova adalewa makhalidwe yace yanango yomwe yangakudekereni imwepo.
1. Thangwe ranyi Mulungu tingakwanise lini kumuwona?
“Mulungu ni mzimu.” (Juwau 4:24) Yahova alibe thupi ninga lathuli. Iye ni mzimu ndipo ambakhala kudzulu, mbuto yomwe tingakwanise lini kuiwona.
2. Kodi ni makhalidwe yanango yaponi yomwe Mulungu anayo?
Napo timbakwanisa lini kumuwona Yahova, iye ni munthu caiye ndipo ana makhalidwe yabwino yomwe yambacitisa kuti timudziwe. Bibliya limbati: “Yahova ambafuna cirungamo, ndipo iye an’dzasiya lini wanthu wace wakukhulupirika.” (Salimo 37:28) Iye “ngwa lufoyi likulu na wantsisi” kwene-kwene kwa wanthu omwe akubonera. (Tiyago 5:11) “Yahova ali pafupi na wale omwe adasweka mtima; Iye ambapulumusa wale omwe adawofoka.” (Salimo 34:18) Kodi imwepo mumbadziwa momwe Yahova ambabvera na momwe timbacita bzinthu? Munthu omwe ambacita bzinthu bzakuipa ambamusunamisa na kumukalipisa. (Salimo 78:40, 41) Koma munthu omwe ambacita bzinthu bzabwino ambamukondwesa.—Werengani Mimwani 27:11.
3. Kodi Yahova ambalatiza tani kuti ambatifuna?
Khalidwe likulu la Yahova ni lufoyi. Ndipopa, “Mulungu ni lufoyi.” (1 Juwau 4:8) Yahova ambalatiza lufoyi lace, sikuti na Bibliya lokha koma na bzinthu bzomwe iye adalenga. (Werengani Mabasa 14:17.) Mwa ciratizo, onani momwe iye adatikonzera. Iye adatipasa luso lakuti timbawone kore zakudeka, kubva nyimbo zabwino na kubva goso la cakudya. Bzimwebzi bzikulatiza kuti iye ambafuna tikondwe na moyo.
FUFUDZANI BZINANGO
Pfunzani bzomwe Yahova adaphatisa basa kuti akonze bzinthu bzakudabwisa. Patsogolo pace pfunzanimbo momwe iye ambafotokozera makhalidwe yace yabwino.
4. Mzimu wakucena ni mphanvu yomwe Mulungu ambaiphatisa basa
Ninga momwe timbaphatisira basa manja yathu kuti tiphate basa, Yahova ambaphatisa basa mzimu wace wakucena. Bibliya limbalewa kuti mzimu wakucena ni munthu lini, koma ni mphanvu yomwe Mulungu ambaiphatisa basa. Werengani Luka 11:13 na Mabasa 2:17, ndipo mukamala cezeranani mibvunzo ikutewerayi:
-
Mulungu ambapereka mzimu wace wakucena kuna wale omwe ambamukumbira. Tenepo, kodi mukukumbuka kuti mzimu wakucena ni munthu, ayai ni mphanvu yomwe Mulungu ambaiphatisa basa? Thangwe ranyi mukulewa tenepo?
Yahova ambaphatisa basa mzimu wace wakucena kuti akonze bzinthu bzakudabwisa. Werengani Salimo 33:6 na 2 Pedru 1:20, 21, ndipo mukamala cezeranani mbvunzo wakutewerayu:
-
Kodi ni mwa njira zinango ziponi zomwe Yahova adaphatisa basa mzimu wace wakucena?
5. Yahova ana makhalidwe yabwino
Mozeji akhatumikira Mulungu mwakukhulupirika, napo bzikhali tenepo, iye akhafuna kumudziwa bwino Mulengi wace. Na tenepo Mozeji adamukumbira kuti: “Ndidziwiseni njira zanu, kuti ndikudziweni.” (Ekisodo 33:13) Pakumutawira, Yahova adauza Mozeji makhalidwe yace yanango. Werengani Ekisodo 34:4-6, ndipo mukamala cezeranani mibvunzo ikutewerayi:
-
Kodi ni makhalidwe yaponi yomwe Yahova adauza Mozeji?
-
Kodi ni makhalidwe yaponi ya Yahova yomwe imwepo mumbakomedwa nayo?
6. Yahova ambathandiza wanthu wace
Ahebereu omwe akhali wanthu wa Mulungu, akhali ku ukapolo ku Edjipito. Kodi Yahova adabva tani na kubonera kwawo? Bvani AUDIYO, ayai werengani Ekisodo 3:1-10. Ndipo mukamala cezeranani mibvunzo ikutewerayi.
-
Mu audiyo yomwe mwabvayi, mwakwanisa kubva kuti Yahova ambabzibva tani wanthu akambabonera?—Onani vesi 7 na 8.
-
Kodi mukukumbuka kuti Yahova an’funadi kutithandiza ndipo iye angakwanise kucita bzimwebzo? Thangwe ranyi? penu munti ne thangwe ranyi?
7. Cirengedwe cimbalatiza makhalidwe ya Yahova
Yahova ambalatiza makhalidwe yace mu bzinthu bzomwe iye adalenga. Onani VIDIYO.Mukamala werengani Aroma 1:20, ndipo cezeranani mbvunzo wakutewerayu.
-
Kodi ni makhalidwe yaponi ya Yahova yomwe imwepo mumbayawona pa bzinthu bzomwe iye adalenga?
WANTHU WINANGO AMBALEWA KUTI: “Mulungu ni munthu lini, iye ni mphanvu yomwe imbandogumanika kuli-kwentse.”
-
Kodi imwepo mukukumbuka tani?
-
Thangwe ranyi mukukumbuka tenepo?
KODI MWAPFUNZA CIYANI?
Yahova ni Mzimu omwe umbawoneka lini, iye ana makhalidwe mazinji yabwino, maka-maka lufoyi.
Mibvunzo yakubwerezera
-
Thangwe ranyi tingakwanise lini kumuwona Yahova?
-
Kodi mzimu wakucena n’ciyani?
-
Kodi ni makhalidwe yanango yaponi yomwe Yahova anayo?
ONANI POMWE IBZI
Pitirizani kumudziwa Yahova mwakupfunza makhalidwe yace manai yabwino.
“Kodi Mulungu Adakhala Tani?”(Ntsanza ya Mulindiri N.° 1 2019)
Onani umboni bomwe bukulatiza kuti Yahova ali lini pentse-pentse.
Onani thangwe race Bibliya limbalewa kuti mzimu wakucena uli ninga manja ya Mulungu.
Zimola omwe akhakhulupira lini kuti Mulungu akhamusamalira. Onani bzomwe bzidamuthandiza kucinja makumbukidwe yace.
“Tsapano Nimbawona Kuti Ningakwanise Kuthandiza Winango” (Ntsanza ya Mulindiri ya 1 Outubro, 2015)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
