PFUNZIRO 09
Fendererani Mulungu mu Mpembo
Kodi imwepo mudabzibvambo kale kuti mun’funika kutsogoleredwa pa moyo wanu? Kodi imwepo muna mibvunzo yakufunika yomwe mun’funa kudziwa mitawiro yace? Kodi imwepo mun’funa kutsangalazidwa? Kodi mun’funa kubzibva kuti ndimwe xamwali wa Yahova? Mpembo ungakuthandizeni kugumana bzentsenebzi. Tsono kodi njiponi njira yakubvumizika yakucitira mpembo? Kodi Mulungu ambatetekera mipembo yentse? N’ciyani comwe munʼfunika kucita kuti iye atetekere mipembo yanu? Mbatiwoneni.
1. Kodi tingapembe kwa mbani ndipo tingapembe pa bzinthu bziponi?
Jezu adatipfunzisa kuti tin’funika kumbapemba kokha kwa Baba wathu wa kudzulu. Jezu caiyeyo adapemba kwa Yahova. Iye adati: “Mbapembani tenepa: ‘Baba wathu omwe muli kudzulu . . .’” (Mateu 6:9) Tikambapemba kwa Yahova, timbakhala tikulimbikisa uxamwali bwathu na iye.
Tingapempherere cinthu ciri-centse. Tsono kuti Mulunguyo atitetekere, mipembo yathu in’funika kukhala yakubverana na kufuna kwace. “Bziribe basa bzomwe tikumbirebzo, tikakumbira mwakubverana na kufuna kwace, [Mulungu] an’dzatibva.” (1 Juwau 5:14) Jezu adapereka ciratizo cabwino pa nkhani ya bzinthu bzomwe tingapempherere. (Werengani Mateu 6:9-13.) Kuthumizira pa kupemphererera bzomwe tikufuna, tin’funikambo lini kuyebwa kutenda Mulungu thangwe ra bzomwe ambaticitira na kukumbirambo kuti athandize wanthu winango.
2. Kodi tin’funika kumbapemba tani?
Bibliya limbatilimbikisa kuti tin’funika kukhuthulira Mulungu bza mu mtima mwathu. (Salimo 62:8) Tenepo, tin’funika kumbapemba na mtima wentse. Ndipo ifepano tingapembe mwakucita kukuwa ayai ca mu mtima koma ticilatiza ulemu. Tingapembe pa nthawe iri-yentse na pa mbuto iri-yentse.
3. Kodi Mulungu ambatawira tani mipembo yathu?
Iye ambacita bzimwebzi mu njira zakusiyana-siyana. Yahova adatipasa Fala lace Bibliya lomwe kawiri-kawiri timbagumana mitawiro ya mibvunzo yathu. Kuwerenga Bibliya kungacitise munthu kukhala wanzeru. (Salimo 19:7; werengani Tiyago 1:5.) Iye angatipase mtendere wa mu mtima tikakhala kuti tikugumana na mabvuto. Iye agacitise atumiki wace kutithandiza tikakhala kuti tikufunikira thandizo.
FUFUDZANI BZINANGO
Onani momwe mungacitire mipembo na mtima wentse, momwe mungatumbizire Mulungu na mpembo, ndipo onanimbo momwe mipemboyo ingakuthandizireni.
4. Mulungu ambafuna kuti timbapembe mu njira yakuthemera
N’ciyani cingacitise kuti Mulungu abve mipembo yathu ayai ne?
VIDIYO: Kodi Mulungu Ambatetekera Mipembo Yentse?—Cipande (2:42)
-
Yahova ambafuna kuti timbapembe kwa iye. Werengani Salimo 65:2, ndipo mukamala cezeranani mibvunzo ikutewerayi:
• Kodi mukukumbuka kuti “Mbveseri wa mpembo” ambafuna kuti timbapembe kwa iye? Penu munti inde thangwe ranyi, ndipo penu munti ne thangwe ranyi?
-
Penu tin’funa kuti Mulungu ambatetekere mipembo yathu, tin’funika kucita nyongo yakumbateweza mitemo yace pa moyo wathu. Werengani Mikeya 3:4 na 1 Pedru 3:12, ndipo mukamala cezeranani mbvunzo wakutewerayu:
• Kodi ifepano tingatsimikize tani kuti Mulungu an’dzatetekera mipembo yathu?
5. Tin’funika kumbapemba na mtima wentse
Wanthu winango adapfunzisidwa kuti an’funika kumbabwerezera mafala mabodzi-bodzi pakucita mipembo. Tsono kodi Mulungu ambafuna kuti timbapembe tenepoyo? Werengani Mateu 6:7, ndipo mukamala cezeranani mbvunzo wakutewerayu:
-
Kodi tingacite ciyani kuti tileke “kumbabwerezera-bwerezera” mafala pomwe tikucita mpembo?
Ntsiku zentse mbakumbukirani bzinthu bzabwino bzomwe bzakucitikirani pa moyo wanu ndipo mbamutendani Mulungu thangwe ra bzimwebzo. Imwepo mucimbakwanisa kupempherera cinthu cibodzi ntsiku iri yentse, ndiye kuti pa sumana mun’khala mwapemba kwa Yahova nkhani 7 zakusiyana-siyana.
Pai wabwino ambafuna kuti mwana wace ambalalewe naye na mtima wentse. Mpsibodzi-bodzimbo, Yahova ambafuna kuti timbapembe kwa iye na mtima wentse
6. Mpembo ni mphaso yakucokera kwa Mulungu
Kodi mpembo umbatipasa tani mphanvu pa nthawe zakunesa na zabwino? Onani VIDIYO.
Bibliya limbalewa kuti mpembo ungatithandize kukhala na mtendere wa mu mtima. Werengani Afilipi 4:6, 7, ndipo mukamala cezeranani mibvunzo ikutewerayi:
-
Napo kuti kawiri-kawiri mpembo umbamalisa lini mabvuto yathu, kodi mpemboyo umbatithandiza tani?
-
Kodi ni bzinthu bziponi bzomwe mungafune kukumbira mu mpembo?
Kodi mukhadziwa?
Fala lakuti “ameni” limbathandauza “bzikhale tenepo” ayai “n’cadidi.” Mu nthawe za m’Bibliya, “ameni” akhambalewedwa kuphampha kwa mpembo.—1 Nkhani 16:36.
7. Mbakhalani na nthawe yakupemba
Nthawe zinango tingakhale na bzakucita bzizinji mwakuti tingayebwe kupemba. Kodi Jezu akhakuwona tani kufunika kwa mpembo? Werengani Mateu 14:23 na Marko 1:35, ndipo mukamala cezeranani mibvunzo ikutewerayi:
-
Kodi Jezu adacita ciyani kuti akhale na nthawe ya kupemba?
-
Kodi mumbapemba nthawe iponi?
WANTHU WINANGO AMBALEWA KUTI: “Kucita mpembo nkundotaya nthawe, thangwe palibe omwe ambatetekera.”
-
Kodi imwepo mumbawonambo tani?
KODI MWAPFUNZA CIYANI?
Kupemba na mtima wentse kubatithandiza kukhala pa uxamwali na Mulungu, kumbatipasa mtendere wa mu mtima na mphanvu zomwe tikufunikira kuti tikondwese Yahova.
Mibvunzo yakubwerezera
-
Kodi tin’funika kumbapemba kwa mbani?
-
Kodi tin’funika kumbapemba tani?
-
Kodi timbagumana phindu liponi tikambapemba?
ONANI POMWE IBZI
Gumanani mitawiro ya mibvunzo yomwe wanthu ambaibvunza pa nkhani ya mpembo.
“Mfundo 7 Zimene Muyenera Kudziwa pa Nkhani ya Pemphero” (Nsanja ya Olonda ya 1 Outubro, 2010)
Pfunzani momwe mungacitire mipembo yabwino.
Pfunzani bzomwe Bibliya limbalewa pa nkhani ya kwa omwe tin’funika kupemba.
“Kodi Nin’funika Kumbapemba kwa Anyakucena?” (Nkhani ya pa jw.org)
Mu nyimboyi, onani kuti tingapembe pa nkhani ziponi na pa nthawe iponi.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
