PFUNZIRO 11
Kodi Mungacite Tani Kuti Kuwerenga Bibliya Kumbakhale Kwakudekeza?
Kodi imwepo mudapasidwa kale basa likulu lomwe mukhabva nalo mantha kuti muniyamba tani kuliphata? Kuti muleke kuwona kuti ndakunesa kwene-kwene, imwepo mudaligawa basalo pang’ono-pang’ono kuti mukwanise kuliphata. Mungacitembo bzibodzi-bodzibzi pomwe mukuwerenga Bibliya. Pinango mungabzibvunze kuti, ‘Kodi ndiyambire paponi?’ Mu pfunziro lino, tiniwona bzinthu bzomwe bzingatithandize kukhala wakukondwa pakuwerenga na pakupfunza Bibliya.
1. Thangwe ranyi tin’funika kumbawerenga Bibliya ntsiku zentse?
Munthu omwe ambawerenga Bibliya ntsiku zentse, ayai “malamulo ya Yahova” ambakhala wakukondwa ndipo bzinthu bzimbamufambira bwino. (Werengani Salimo 1:1-3.) Pakuyamba, yezerani kumbawerenga mphindi zakucepa ntsiku zentse. Mukazerewerana na Fala la Mulungu, mun’dzakomedwa kwene-kwene pakuwerenga Bibliya.
2. Kodi n’ciyani cingakuthandizeni kuti mugumane phindu pakuwerenga Bibliya?
Kuti tigumane phindu pakuwerenga Bibliya, tin’funika kuima pang’ono ticikumbukira bzomwe tikuwerengabzo. Tin’funika kucita bzentse bziwiri, kuwerenga na “kumbabzikumbukira.” (Djoswa 1:8) Mukambawerenga, mbabzibvunzani kuti, ‘Kodi bzimwebzi bzikundipfunzisa ciyani pakulewa bza Yahova Mulungu? Kodi ningaphatise tani basa bzimwebzi pa moyo wangu? Kodi ningaphatise tani basa vesi limweri kuti ndithandize winango?’
3. Kodi mungacite tani kuti mugumane nthawe yakuwerenga Bibliya?
Kodi bzimbakunesani kugumana nthawe yakuwerenga Bibliya? Azinji bzimbatinesambo. Yezerani kuphatisa “bwino basa nthawe yanu.” (Aefezo 5:16) Mungacite bzimwebzi mwa kukhazikisa nthawe yakuwerenga Bibliya ntsiku zentse. Wanthu winango ambawerenga Bibliya kumacibese-bese. Ndipo winango ambawerenga masikati, pinango akamala kudya midiya. Tsono winango ambawerenga usiku pomwe akanati kugona. Kodi njiponi nthawe yomwe ingakhale yabwino kwa imwepo?
FUFUDZANI BZINANGO
Pfunzani momwe mungacitire kuti kuwerenga kwanu kwa Bibliya kukhale kwakudekeza. Onani momwe mungakonzekerere bwino kuti mugumane phindu pakupfunza Bibliya.
Ninga momwe tingapfunzire kudya cakudya cakusiyana-siyana, ifepano tingapfunze njira zakusiyana-siyana zomwe zingatithandize kuti timbakomedwe pakuwerenga Bibliya
4. Pfunzani kuti mumbakomedwe pakuwerenga Bibliya
Mpsakupusa lini kuyamba kuwerenga Bibliya. Tenepo tingakhale na cikhumbo cakucita bzimwebzi, ninga munthu omwe akufuna kupfunza kudya cakudya cipsa. Werengani 1 Pedru 2:2, ndipo mukamala cezeranani mbvunzo wakutewerayu:
-
Kodi mukukumbuka kuti kuwerenga Bibliya ntsiku zentse, kungakukondweseni mucifunambo kumbawerenga Bibliyalo?
Onani VIDIYO kuti muwone momwe wanthu winango adacitira kuti ayambe kukomedwa na kuwerenga Bibliya. Ndipo mukamala cezeranani mibvunzo yakutewerayi.
-
Mu vidiyo yomwe mwamala kuwonayi, kodi ni mabvuto yaponi yomwe maswaka ambagumana nayo?
-
N’ciyani cawathandiza kuti ambafune kuwerenga Bibliya?
-
Kodi n’ciyani comwe iwo acita kuti kuwerenga kwawo Bibliya kukhale kwakudekeza?
Bzomwe bzingakuthandizeni kuti muyambe kuwerenga Bibliya:
-
Sankhulani Bibliya lomwe lidasanduliziridwa mwakubverana na cirewedwe ca ntsiku na ntsiku. Yezerani kuphatisa basa Bibliya Lakusanduliziridwa la Dziko Lipsa penu liripo mu cirewedwe canu.
-
Cakuyamba werengani mbali yomwe mukuwona kuti ingakudekereni kwene-kwene. Ninga thandizo, onani kwadru yakuti “Yambani Kuwerenga Bibliya.”
-
Kwalani bzomwe mwawerenga. Phatisani basa kwadru yakuti “Onani Momwe Kuwerenga Kwanu Bibliya Kukufambira” m’bukhu lino.
-
Phatisani basa JW Library®. Na aplikativo imweyi, imwepo mungakwanise kuwerenga na kubvesera Bibliya ku mbuto kuli-kwentse komwe muli, mwakuphatisa basa telefone ayai mtcini uli-wentse wanzeru.
-
Phatisani basa nkhani zakuthumizira za mu Bibliya Lakusanduliziridwa la Dziko Lipsa. Bzimwebzi bzikuphatanidza mapa, kwadru na Kafotokozedwe ka Mafala Manango bzomwe bzingacitise kuti kuwerenga kwanu kwa Bibliya kukhale kwakudekeza.
5. Konzekerani pfunziro lanu la Bibliya
Werengani Salimo 119:34, ndipo mukamala cezeranani mibvunzo yakutewerayi:
-
Thangwe ranyi mpsakufunika kucita mpembo pomwe mukanati kuyamba kuwerenga Bibliya ayai kukonzekera pfunziro la Bibliya?
Kodi mungacite ciyani kuti mugumane phindu na mbali iri-yentse ya pfunziro la Bibliya? Mukambakonzekera pfunziro liri-lentse, yezerani kucita ibzi:
-
Mbawerengani ndime zakuyambirira za pfunzirolo.
-
Mbawerengani mavesi, ndipo yezerani kubvesesa momwe mavesiyo yakubveranira na nkhaniyo.
-
Kwalani mtawiro wa mbvunzo uli-wentse, bzimwebzi bzin’dzakuthandizani pomwe mukucezerana na mpfunzisi wanu.
Kodi mukhadziwa?
Mboni za Yahova zimbaphatisa basa Mabibliya yakusiyana-siyana. Koma maka-maka timbaphatisa basa Bibliya Lakusanduliziridwa la Dziko Lipsa thangwe iro ndakulondoza, lina mafala yakubveseseka ndipo limbaphatisa basa dzina la Mulungu.—Onani pa Webusaite nkhani yakuti “Kodi Mboni za Yahova Zina Bibliya Lawo-lawo?”
WANTHU WINANGO AMBALEWA KUTI: “Kupfunza Bibliya ni basa likulu kwene-kwene.Ndiribe nthawe yakucita bzimwebzi.”
-
Kodi imwepo munti tani?
KODI MWAPFUNZA CIYANI?
Kuti mugumane phindu pakuwerenga Bibliya, konzani ndandanda, mbapembani kuti mumbabvesese bzomwe muniwerenga ndipo mbakonzekerani mbali iri-yentse ya pfunziro lanu la Bibliya.
Mibvunzo yakubwerezera
-
Kodi n’ciyani cin’dzakuthandizani kuti mugumane phindu pakuwerenga Bibliya?
-
Kodi ni nthawe iponi yomwe mungasankhule kuti mumbawerenge na kupfunza Bibliya?
-
Thangwe ranyi mpsakufunika kukonzekera mbali iri-yentse ya pfunziro lanu la Bibliya?
ONANI POMWE IBZI
Onani bzinthu bzinango bzomwe bzingakuthandizeni kugumana phindu pakuwerenga Bibliya.
“Kodi Mungatani Kuti Kuwerenga Baibulo Kuzikusangalatsani?” (Nsanza ya Olonda N.° 1 2017)
Onani njira zitatu zomwe zingakuthandizeni pakuwerenga Bibliya.
Onani bzinthu bzomwe bzingakuthandizeni kuti kuwerenga Bibliya kumbakhale kwakudekeza.
Pfunzani bzinthu bzinango na wanthu omwe amala nthawe itali akuwerenga Bibliya.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
