PFUNZIRO 14
Kodi n’Ciyani Comwe Tingacite Kuti Kunamata Kwathu Kukondwese Mulungu?
Mu pfunziro 13, tidawona kuti ni gereja lini iri-yentse yomwe imbakondwesa Mulungu. Koma ifepano tinganamate Mulengi wathu mu njira yomwe imbamudekera. Kodi ni njira iponi ya kanamatidwe [ayai gereja] yomwe imbamukondwesa? (Tiyago 1:27, mafala ya m’nyantsi) Mbatiwoneni bzomwe Bibliya limbapfunzisa.
1.Kodi kanamatidwe kathu kan’funika kutsogoleredwa na ciyani?
Kanamatidwe kathu kan’funika kutsogoleredwa na Bibliya. Jezu adati kwa Mulungu: “Fala lanu ni cadidi.” (Juwau 17:17) Magereja yanango yambapfunzisa lini cadidi cakugumanika m’Bibliya lomwe ni Fala la Mulungu. Ndipo yambacinjanisa cadidico na bzipfunziso na miyambo ya wanthu. Yahova ambakomedwa lini na wale omwe ambaikha “kumbali malamulo [yace].” (Werengani Marko 7:9.) Tsono timbakondwesa mtima wa Yahova tikambamunamata mwakutsogoleredwa na Bibliya na kumbabverambo malango yace.
2.Kodi tin’funika kumbanamata tani Yahova?
Tin’funika kunamata Yahova yekha, thangwe iye ni Mulengi wathu. (Apokalipse 4:11) Bzimwebzi bzikuthandauza kuti tin’funika kumufuna na kunamata iye basi, mwakusaya kuphatisa basa cifanikiso ciri-centse. — Werengani Zaiya 42:8.
Kunamata kwathu kun’funika kukhala ‘kwakucena na kwakubvumizika’ kwa Yahova. (Aroma 12:1) Bzomwe bzikuthandauza kuti tin’funika kumbabvera mitemo yace pa moyo wathu. Mwa ciratizo, wale omwe ambafuna Yahova ambabvera mtemo wace wakulewa bza malowozi. Ndipo ambatcenkhambo kucita bzinthu bzomwe bzingadzonge moyo wawo, ninga kufumali, kumwa mankhwala yakudzungulumwisa msolo na kumwa kwene-kwene. a
3.Thangwe ranyi tin’funika kumbanamata Yahova pa mitsonkhano?
Mitsonkhano yomwe timbakhala nayo sumana iri-yentse, imbatipasa mwayi “wakutumbiza Yahova . . . m’gwere.” (Salimo 111:1, 2) Njira ibodzi ya momwe timbacitira bzimwebzo ni mwa kuimba nyimbo zakutumbiza Mulungu. (Werengani Salimo 104:33.) Yahova ambafuna kuti timbakatsonkhane thangwe rakuti iye ambatifuna ndipo ambadziwambo kuti abale wathuwo angatithandize kukhala na moyo wakukondwa mpaka kale-kale. Pa mitsonkhano, timbalimbikisana.
FUFUDZANI BZINANGO
Pfunzani thangwe ranyi Yahova ambafuna lini kuti wanthu aphatise basa bzifanikiso pakumunamata. Pfunzanimbo momwe tingatumbizire Mulungu.
4. Thangwe ranyi tin’funika lini kuphatisa basa bzifanikiso pakunamata?
Kodi timbadziwa tani kuti kucita bzimwebzo kumbakondwesa lini Mulungu? Onani VIDIYO, ndipo mukamala cezeranani mibvunzo yakutewerayi.
-
Kodi n’ciyani comwe cidacitikira wanthu winango wa Mulungu kale-kale omwe adayezera kumunamata mwakuphatisa basa bzifanikiso?
Wanthu winango ambaphatisa basa bzifanikiso pakunamata kuti abzibve kuti ali pafupi na Mulungu. Kodi kucita bzimwebzo kungacitise lini kuti titalikirane naye? Werengani Ekisodo 20:4-6 na Salimo 106:35, 36, ndipo mukamala cezeranani mibvunzo ikutewerayi:
-
Kodi ni bzifanikiso bziponi bzomwe mudawona kale wanthu akuphatisa basa pakunamata?
-
Kodi Yahova ambaiwona tani nkhani yakuphatisa basa bzifanikiso?
-
Kodi imwepo mumbaiwonambo tani nkhani ya kuphatisa basa bzifanikiso?
5. Kunamata Yahova kumbatitsudzula ku bzipfunziso bzakunama
Onani momwe kunamata Yahova mu njira yakubvumizika kungakutsudzuleni ku bzipfunziso bzakunama. Onani VIDIYO.
Werengani Salimo 91:14, ndipo mukamala cezeranani mbvunzo wakutewerayu:
-
Kodi Yahova akulewa kuti an’dzaticitira ciyani tikalatiza kuti timbamufuna mwa kunamata iye yekha basi?
6. Timbanamata Mulungu pa mitsonkhano ya gwere
Timbatumbiza Yahova na kumbalimbikisana mwa kuimba nyimbo na kupereka mitawiro pa mitsonkhano ya gwere. Werengani Salimo 22:22, ndipo mukamala cezeranani mibvunzo ikutewerayi:
-
Kodi imwepo mumbakomedwa kubva mitawiro pa mitsonkhano?
-
Kodi mungakonzekere kuti mukaperekembo mtawiro?
7. Yahova ambakomedwa tikambauzambo wanthu winango bzomwe tikupfunza
Pana njira zizinji za momwe tingauzire wanthu winango cadidi ca m’Bibliya. Werengani Masalimo 9:1; 34:1, ndipo mukamala cezeranani mbvunzo wakutewerayu:
-
Kodi ni bzinthu bziponi bzomwe mwapfunza m’Bibliya bzomwe mukufuna kuuzambo winango?
WANTHU WINANGO AMBALEWA KUTI: “Mpsakukwanisika lini kukondwesa Mulungu.”
-
Kodi imwepo mumbawonambo tani?
KODI MWAPFUNZA CIYANI?
Ifepano timbakondwesa Mulengi wathu mwa kumbanamata iye yekha basi, kumbamutumbiza pa mitsonkhano ya gwere na kumbauzambo wanthu winango bzomwe timbapfunza.
Mibvunzo yakubwerezera
-
Kodi Yahova ambaphatisa basa ciyani kuti atiuze momwe tingamunamatire?
-
Thangwe ranyi tin’funika kunamata Yahova yekha basi?
-
Thangwe ranyi tin’funika kunamata Mulungu pabodzi na wanthu omwe ambafunambo kumukondwesa?
ONANI POMWE IBZI
Mu nkhani yakuti “Ndidasiya Kunamata Bzifanikiso,” werengani kuti mudziwe bzomwe mkazi munango adacita kuti asiye kunamata bzifanikisobzo.
“Bibliya Limbacinja Moyo wa Wanthu” (Ntsanza ya Mulindiri ya 1 Julho, 2011)
Pfunzani bzomwe bzingakuthandizeni kupereka mitawiro pa mitsonkhano.
“Momwe Tingatumbizirire Yahova pa Mitsonkhano ya Gwere” (Ntsanza ya Mulindiri, ya Janeiro 2019)
Onani momwe tswaka linango lidagumanira phindu na mitsonkhano ya gwere napo kuti bzikhali bzakunesa kuti limbagumanike pa mitsonkhanopo.
Wanthu azinji ambakhulupira kuti munthu akabvala mtanda ayai kruju ni cizindikiro cakuti ni Mkristau, tsono kodi mpsakufunika kumbaiphatisa basa pa kunamata kwathu?
a Nkhani imweyi in’dzafotokozedwa kutsogoloku.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
