PFUNZIRO 15
Kodi Jezu ni Mbani?
Jezu ni m’bodzi mwa wanthu wakubvekera pa dziko la pantsi. Tsono wanthu azinji ambandodziwa dzina laceri, koma ambamudziwa lini bwino-bwino ndipo winango ambakhala na makumbukidwe yakusiyana-siyana yakulewa bza Jezuyo kuti iye ni mbani. Kodi Bibliya limbalewa ciyani bza iye?
1.Kodi Jezu ni Mbani?
Jezu ni anjo ndipo ambakhala kudzulu. Iye adalengedwa na Yahova Mulungu pomwe akhanati kulenga cinthu ciri-centse. Ndipopa iye ambacemeredwa kuti ni “wakuyamba kubadwa m’cirengedwe centse.” (Akolose 1:15) Bibliya limbalewa kuti Jezu ni “Mwana m’bodzi yekha” thangwe ndiye yekha omwe adalengedweratu na Yahova. (Juwau 3:16) Jezu adaphata basa na Baba wace Yahova pakumuthandiza kulenga bzinthu bzentse. (Werengani Mimwani 8:30.) Jezu ambakondwa thangwe ra kukhala pa uxamwali bwakulimba na Yahova. Iye ambatumikira mwakukhulupirika ninga “Fala” ndipo ambayendesa mafala na malango ya Mulungu kuna bzakulengedwa bzakudzulu na bza pa dziko la pantsi. — Juwau 1:14.
2.Thangwe ranyi Jezu adabwera pa dziko la pantsi?
Magole 2000 m’mbuyomu, Yahova mwakudabwisa adaphatisa basa mzimu wace wakucena kuti afuluse moyo wa Jezu kucokera kudzulu aciuikha m’mimba mwa dende lakucemeredwa Mariya. Mwa njira imweyi, Jezu adabadwa ninga munthu. (Werengani Luka 1:34, 35.) Jezu adabwera pa dziko la pantsi pano kuti akhale Mesiya ayai Kristu omwe akhadalewedwa kale nakuti adzapulumuse wanthu. a Mapolofesiya yentse yakulewa bza Mesiya yadakwanisika mwa iye, bzimwebzi bzidacitisa wanthu kudziwa kuti Jezu ni “Kristu, Mwana wa Mulungu wamoyo.”— Mateu 16:16.
3.Kodi Jezu ali kuponi tsapano?
Pomwe Jezu adafa, iye adalamusidwa ninga mzimu ndipo adabwerera kudzulu. Kudzuluko, “Mulungu adamupasa udindo bwa padzulu kwene-kwene.” (Afilipi 2:9) Tsapano Jezu ana udindo bukulu kwene-kwene ndipo na Yahova iye ngwaciwiri.
FUFUDZANI BZINANGO
Onani bzizinji bzakuti Jezu ni mbani maka-maka ndipo thangwe ranyi kupfunza bza iye n’kwakufunika.
4. Jezu ni Mulungu lini
Napo kuti Bibliya limbapfunzisa kuti Jezu ni cakulengedwa cauzimu ndipo ali kudzulu, iye ambabvera Mulungu omwe ni Baba wace, Yahova. Thangwe ranyi tikulewa tenepoyo? Onani VIDIYO kuti muwone bzomwe Bibliya limbapfunzisa pakulewa bza kusiyana komwe kulipo pakati pa Jezu na Mulungu wa mphanvu-zentse.
Bzinembo bzomwe bziri m’nyantsibzi bzin’tithandiza kubvesesa kusiyana komwe kulipo pakati pa Yahova na Jezu. Werengani cinembo cibodzi na cibodzi ndipo mukamala cezeranani mibvunzo ikutewerayi:
Werengani Luka 1:30-32.
-
Kodi anjo adalatiza tani kusiyana komwe kulipo pakati pa Jezu na Yahova Mulungu?
Werengani Mateu 3:16, 17.
-
Kodi fala lakucokera kudzulu lidalewa ciyani pomwe Jezu adamala kubatizidwa?
-
Kodi mukukumbuka kuti falalo likhali la mbani?
Werengani Juwau 14:28.
-
Kodi pai na mwana mbani mkulu?
-
Kodi Jezu akhathandauza ciyani pomwe adalewa kuti Yahova ni Baba wace?
Werengani Juwau 12:49.
-
Kodi Jezu ambakumbuka kuti iye na Baba wace mbabodzi-bodzi? Kodi imwepo mukukumbuka tani?
5. Kodi n’ciyani cidalatiza kuti Jezu akhali Mesiya?
Bibliya lina mapolofesiya mazinji yomwe yangadathandiza wanthu kuzindikira Mesiya, ule omwe adasankhulidwa na Mulungu kuti apulumuse wanthu. Onani VIDIYO kuti mupfunze bza mapolofesiya yomwe yadakwanirisidwa pomwe Jezu adabwera pa dziko la pantsi.
Werengani mapolofesiya ya m’Bibliyaya ndipo mukamala cezeranani mibvunzo ikutewerayi:
Werengani Mika 5:2 kuti mudziwe komwe Mesiya adabadwira. b
-
Kodi kubadwa kwa Jezu kudakwanirisadi polofesiya imweyi? — Mateu 2:1.
Werengani Salimo 34:20 na Zakariya 12:10 kuti muwone mapolofesiya yomwe yakhalewa bza kufa kwa Jezu.
-
Kodi mapolofesiya yamweya yadakwanisika tani? — Juwau 19:33-37.
-
Kodi imwepo mukukumbuka kuti Jezu angadacitisa bzinthu bzimwebzi kuti bzikwanisike?
-
Kodi bzimwebzi bzimbakutsimikizirani ciyani pakulewa bza Jezu?
6. Timbagumana phindu tikapfunza bza Jezu
Bibliya limbalewa kuti mpsakufunika kwene-kwene kupfunza bza Jezu na bzomwe Mulungu ambafuna kuti iye acite. Werengani Juwau 14:6 na 17:3, ndipo mukamala cezeranani mbvunzo wakutewerayu:
-
Thangwe ranyi mpsakufunika kupfunza bza Jezu?
Jezu adafungula njira kuti tikhale axamwali wa Mulungu. Iye adapfunzisa cadidi ca Yahova ndipo thangwe ra iye tin’dzakhala na moyo wakusaya kumala
WANTHU WINANGO AMBALEWA KUTI: “Mboni za Yahova zimbakhulupira lini Jezu.”
-
Kodi imwepo munti tani?
KODI MWAPFUNZA CIYANI?
Jezu ni cakulengedwa cauzimu. Iye ni Mwana wa Mulungu ndipo ni Mesiya.
Mibvunzo yakubwerezera
-
Thangwe ranyi Jezu ambacemeredwa kuti “wakuyamba kubadwa m’cirengedwe centse”?
-
Kodi n’ciyani comwe Jezu akhacita pomwe akhanati kubwera pa dziko la pantsi?
-
Kodi timbadziwa tani kuti Jezu ni Mesiya?
ONANI POMWE IBZI
Pfunzani bzinthu bzizinji bzomwe Jezu adacita ninga Mesiya.
“Kodi Mapolofesiya Yambalatiza Kuti Jezu Akhalidi Mesiya?” (Nkhani ya pa jw.org)
Onani penu bzomwe Bibliya limbapfunzisa pakulewa bza Mulungu kuti ni baba wa Jezu mpsakundendemerana na momwe abereki ambakhalirambo na wana.
“Thangwe ranyi Jezu Ambacemeredwa Kuti Mwana wa Mulungu?” (Nkhani ya pa jw.org)
Onani thangwe ranyi cipfunziso ca mirungu mitatu cimbacokera lini m’Bibliya.
“Kodi Jezu ni Mulungu?” (Ntsanza ya Mulindiri ya 1 Abril, 2009)
Werengani momwe moyo wa mkazi munango udacinjira pomwe adafufudza bzomwe Bibliya limbalewa pa nkhani ya Jezu.
“Mkazi Wacidjuda Adafufudzambo Bzomwe Akhakhulupirira” (Mukani! wa Maio 2013)
a Mupfunziro 26 na 27 tin’dzawona thangwe ranyi wanthu akhafunikira kupulumusidwa na momwe Jezu adatipulumusira.
b Onani Mafala Yakuthumizira 2 kuti muwone momwe polofesiya ikhadaleweratu bza nthawe yomwe Jezu angadabwera pa dziko la pantsi.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
