PFUNZIRO 16
Kodi n’Ciyani Comwe Jezu Adacita Pomwe Akhali pa Dziko la Pantsi?
Wanthu azinji ambakumbuka kuti Jezu akhali mwana wakusiyidwa, mpolofeta wanzeru ayai munthu wakutaika. Koma tingapfunze bzizinji tikafufudza bza moyo wace pomwe akhali pa dziko la pantsi. Mu pfunziro lino, tiniwona bzinthu bzinango bzakufunika kwene-kwene bzomwe Jezu adacita ndipo tiniwonambo momwe bzimwebzi bzingakuthandizireni pa moyo wanu.
1.Kodi basa lakufunika kwene-kwene kwa Jezu likhali liponi?
Basa lakufunika kwene-kwene kwa Jezu likhali la kupalizira “mafala yabwino ya Umambo bwa Mulungu.” (Werengani Luka 4:43.) Iye akhapalizira mafala yabwino yakuti Mulungu an’dzakhazikisa boma ayai utongi, bomwe bun’dzamalisa mabvuto yentse ya wanthu. a Kwa magole matatu na meya, Jezu adaphata basa mwa mphanvu kwene-kwene pa kuuza wanthu mafala yakulimbikisa. — Mateu 9:35.
2.Thangwe ranyi Jezu akhacita bzakudabwisa?
Bibliya limbalewa kuti “mwakuphatisa basa Jezu, Mulungu adacita bzakudabwisa, mabasa yamphanvu na bzizindikiro.” (Mabasa 2: 22) Na mphanvu ya Mulungu, Jezu adaimisa conzi, adadyesa wanthu azinji, adalimbisa atenda ndipo adalamusa anyakufa. (Mateu 8:23-27; 14:15-21; Marko 6:56; Luka 7:11-17) Bzakudabwisa bzomwe Jezu adacita bzidalatiza kuti iye akhadatumidwa na Mulungu. Ndipo bzidalatizambo kuti Yahova ana mphanvu yakumalisa mabvuto yathu yentse.
3.Kodi tingapfunze ciyani na momwe Jezu akhacitira bzinthu?
Jezu adabvera Yahova pa cinthu ciri-censte. (Werengani Juwau 8:29.) Jezu adacita bzentse bzomwe Pai wace adamuuza kuti acite. Iye adacita bzimwebzi pa moyo wace wentse, napo kuti wanthu azinji akhayezera kumuletsa. Bzomwe iye adacitabzi bzimbalatiza kuti wanthu angakwanise kutumikira Mulungu, napo akugumana na mabvuto. Na tenepo Jezu adatisiira “ciratizo kuti [titewere] nzayo zace mwakukhulupirika.” — 1 Pedru 2:21.
FUFUDZANI BZINANGO
Onani momwe Jezu adauzira wanthu mafala yabwino na kucita bzakudabwisa.
4. Jezu adauza wanthu mafala yabwino
Jezu akhafamba mtantho utali m’miseu yapfumbi, kuti apalizire wanthu mafala yabwino. Werengani Luka 8:1, ndipo mukamala cezeranani mibvunzo ikutewerayi:
-
Kodi Jezu akhandopalizira wanthu omwe akhabwera kuna iye kuti amubvesere?
-
Kodi Jezu akhacita tani kuti agumane wanthu kuti awapalizire?
Mulungu akhadalewa kale kuti Mesiya angadadzapalizira mafala yabwino. Werengani Zaiya 61:1, 2, ndipo mukamala cezeranani mibvunzo ikutewerayi:
-
Kodi Jezu adakwanirisa tani polofesiya imweyi?
-
Kodi mukukumbuka kuti wanthu ntsiku zino akufunikirambo kubva mafala yabwinoya?
5. Jezu adapfunzisa cadidi
Kuthumizira pa kupalizira mafala yabwino yakulewa bza Umambo bwa Mulungu, Jezu adapfunzisa bzinthu bzinango bzakuthandiza kwene-kwene. Onani pang’ono bziratizo bzakucokera pa Nkhani ya pa Phiri. Werengani Mateu 6:14, 34, na 7:12, ndipo mukamala cezeranani mibvunzo ikutewerayi:
-
Kodi ni malango yaponi yakufunika kwene-kwene yomwe Jezu adapereka m’mavesiya?
-
Kodi mukukumbuka kuti malango yamweya yangathandizembo wanthu ntsiku zino?
6. Jezu adacita bzakudabwisa
Yahova adapasa mphanvu Jezu kuti acite bzakudabwisa bzizinji. Kuti muwone ciratizo cibodzi, werengani Marko 5:25-34 ayai onani VIDIYO. Ndipo mukamala cezeranani mibvunzo ikutewerayi.
-
Mu vidiyoyi, kodi mkazi wakuduwalayu akhakhulupira ciyani?
-
Kodi imwepo mwakomedwa na ciyani na cakudabwisaci?
Werengani Juwau 5:36, ndipo mukamala cezeranani mbvunzo wakutewerayu:
-
Kodi bzakudabwisa bzomwe Jezu adacita bzidalatiza ciyani pakulewa bza iye?
Kodi mukhadziwa?
Bzizinji bzomwe timbadziwa pakulewa bza Jezu bzimbacokera m’mabukhu manai ya m’Bibliya yomwe yambacemeredwa kuti Mavanjedyo. Mabukhuyo ni Mateu, Marko, Luka na Juwau. Mabukhuya yana nkhani zibodzi-bodzi zakulewa bza Jezu koma nkhanizo zimbafotokozedwa mwakusiyana. Munembi ali-wentse adafotokoza bzinthu bzinango mwakusiyana na momwe winango adafotokozera, tikambawerenga mabukhuya timbakwanisa kudziwa momwe moyo wa Jezu ukhaliri.
-
MATEU
ni bukhu lakuyamba ndipo iro limbatiuza bzomwe Jezu adapfunzisa, maka-maka bza Umambo bwa Mulungu.
-
MARKO
ni bukhu ling’ono. Napo iro nding’ono lina nkhani zizinji zabwino.
-
LUKA
ni bukhu lomwe limbatiuza momwe mpembo ukhaliri wakufunika kwene-kwene kwa Jezu na momwe adalatizira kudeka mtima kuna akazi.
-
JUWAU
ni bukhu lomwe limbatiuza bzinthu bzizinji bzomwe Jezu adalewalewa na axamwali wace na wanthu winango. Bzimwebzi bzimbatithandiza kudziwa makhalidwe yomwe Jezuyo akhanayo.
WANTHU WINANGO AMBALEWA KUTI: “Jezu akhali munthu wabwino, koma akhali lini Mesiya.”
-
Kodi munti tani?
KODI MWAPFUNZA CIYANI?
Jezu adapalizira bza Umambo bwa Mulungu, adacita bzakudabwisa ndipo adabvera Yahova pa cinthu ciri-centse.
Mibvunzo yakubwerezera
-
Pomwe Jezu akhali pa dziko la pantsi, kodi basa lakufunika kwene-kwene kwa iye likhali liponi?
-
Kodi bzakudabwisa bzomwe Jezu adacita bzidalatiza ciyani pakulewa bza iye?
-
Kodi ni bzinthu bziponi bzomwe Jezu adapfunzisa?
ONANI POMWE IBZI
Kodi ni nkhani iponi yomwe Jezu adailewa kwene-kwene kuposa nkhani zinango?
“Kodi Umambo bwa Mulungu Bumbathandauza Ciyani kwa Jezu?” (Ntsanza ya Mulindiri ya 1 Outubro, 2014)
Onani thangwe race tingakhulupire kuti bzakudabwisa bzomwe Jezu adacita bzidacitikadi.
Werengani kuti muwone momwe munthu munango adacinjira moyo wace pomwe adapfunza momwe Jezu akhacitira bzinthu na wanthu winango.
“Ndikhali Munthu Omwe Ndikhabzifuna Kwene-kwene” (Ntsanza ya Mulindiri ya 1 Outubro, 2014)
Onani ndandanda yomwe ikulatiza bzinthu bzomwe Jezu adacita pa utumiki bwace.
a Mu pfunziro 31-33 tin’dzacezerana bzinthu bzizinji bza Umambo bwa Mulungu.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
