PFUNZIRO 19
Kodi Mboni za Yahova ni Akristau Wacadidi?
Ifepano Mboni za Yahova, timbakhulupira kuti ndife Akristau wacadidi. Thangwe ranyi? Onani bzomwe timbakhulupira, dzina lomwe limbaticitisa kukhala wakusiyana na winango na lufoyi lomwe timbalatizana.
1.Kodi bzomwe Mboni za Yahova zimbakhulupira bzimbacokera kuponi?
Jezu adati: “Fala [la Mulungu] ni cadidi.” (Juwau 17:17) Ninga Jezu, nthawe zentse bzomwe Mboni za Yahova zimbakhulupira bzimbacokera m’Fala la Mulungu. Onani momwe timbacitira bzimwebzi kuyambira mu gole la 1870. Mu gole limweri, thimu la wanthu lidayamba kupfunza Bibliya pabodzi kuti lidziwe bzomwe Bibliyalo limbapfunzisa. Iwo akhakhulupira bzomwe Bibliya likhalewa, napo kuti bzomwe akhakhulupirabzo bzikhasiyana na bzomwe magereja yakhapfunzisa. Patsogolo pace iwo adayamba kuuzambo winango cadidi ca m’Bibliyaco. a
2.Thangwe ranyi timbacemeredwa kuti Mboni za Yahova?
Yahova ambacemera anamati wace kuti mboni zace thangwe rakuti iwo ambalewa cadidi pakulewa bza Yahovayo. (Ahebereu 11:4–12:1) Mwa ciratizo, kale-kale, Mulungu adauza wanthu wace kuti: “Imwepo ndimwe mboni zangu.” (Werengani Zaiya 43:10.) Jezu ambacemeredwa kuti “Mboni Yakukhulupirika.” (Apokalipse 1:5) Tsono mu 1931, tidayamba kudziwika na dzina lakuti Mboni za Yahova. Timbakomedwa kudziwika na dzina limweri.
3.Thangwe ranyi Mboni za Yahova zimbatewezera lufoyi la Jezu?
Jezu akhafuna kwene-kwene anyakupfunza wace ndipo kwa iye akhali ninga abale wace caiwo. (Werengani Marko 3:35.) Mpsibodzi-bodzimbo, Mboni za Yahova ziri ninga banja libodzi la pa dziko lentse la pantsi. Ndipopa timbacemerana m’bale na mpfumakazi. (Filimoni 1, 2) Timbabverambo lamulo lakuti: “Funani abale wanu wentse.” (1 Pedru 2:17) Mboni za Yahova zimbalatiza lufoyi limweri mu njira zakusiyana-siyana, mwa kuthandiza Mboni zinzawo pa dziko lentse la pantsi pa nthawe yomwe zikufunikira thandizo.
FUFUDZANI BZINANGO
Pfunzani bzizinji bza mbiri ya Mboni za Yahova ndipo onani umboni bomwe bukulatiza kuti ndifeAkristau wacadidi.
Bzomwe Akristau wacadidi ambakhulupira bzimbacokera m’Bibliya ndipo ambauzambo winango bzomwe iwo ambakhulupirabzo
4. Bzomwe timbakhulupira bzimbacokera m’Bibliya
Yahova akhadaleweratu kuti cadidi ca m’Bibliya cingadadzabveseseka pang’ono pang’ono. Werengani Daniyeli 12:4, ndipo mukamala cezeranani mbvunzo wakutewerayu:
-
Kodi “cidziwiso cacadidi” cingathumizirike tani pakati pa wanthu wa Mulungu akapitiriza kufufudza m’Bibliya?
Onani momwe thimu la anyakupfunza wa Bibliya, pabodzi na Charles Russell adapfunzira Fala la Mulungu. Onani VIDIYO., ndipo mukamala cezeranani mbvunzo wakutewerayu
-
Mu vidiyoyi, kodi Charles Russell pabodzi na anyakupfunza anzace adapfunza tani Bibliya?
Kodi mukhadziwa?
Nthawe zinango timbacinja kabvesesedwe ka bzinthu bzinango bzomwe timbakhulupira. Thangwe ranyi? Ninga momwe kucoka kwa dzuwa pang’ono-pang’ono kumbacitisira kuti bzinthu bziwoneke bwino, mpsibodzi-bodzimbo Mulungu ambafuna kuti Fala lace limbabveseseke pang’ono-pang’ono. (Werengani Mimwani 4:18.) Bibliya limbacinja lini, tsono tikalibvesesa bwino timbacinja kapfunzisidwe kathu.
5. Timbacita bzinthu mwakubverana na dzina lathu
Thangwe ranyi timbacemeredwa kuti Mboni za Yahova? Onani VIDIYO, ndipo mukamala cezeranani mbvunzo wakutewerayu.
-
Thangwe ranyi dzina lakuti Mboni za Yahova ndakuthemera?
Thangwe ranyi Yahova adasankhula wanthu kuti akhale mboni zace? Thangwe iwo ambamuzindikirisa kuti ni Mulungu wacadidi, pakuti iye ambanamiziridwa bzinthu bzizinji. Onani bzinthu bziwiri basi bzomwe iye ambanamiziridwa.
Magereja yanango yambapfunzisa wanthu wawo kuti Mulungu ambafuna kuti iwo ambaphatise basa bzifanikiso pa kumunamata. Werengani Levitiko 26:1, ndipo mukamala cezeranani mibvunzo ikutewerayi:
-
Kodi cadidi n’ciponi? Kodi Yahova ambawona tani bzifanikiso?
Atsogoleri wa magereja yanango ambapfunzisa kuti Jezu ni Mulungu. Werengani Juwau 20:17, ndipo mukamala cezeranani mibvunzo ikutewerayi:
-
Kodi cadidi n’ciponi? Kodi Mulungu na Jezu ni munthu m’bodzi?
-
Kodi imwepo mumbabva tani mukadziwa kuti Yahova adatumiza Mboni zace kuti zikupalizireni bza iye na bza Mwana wace?
6. Ifepano timbafunana
Bibliya limbandendendemezera Akristau na bziwalo bzakusiyana-siyana bza thupi la munthu. Werengani 1 Akolinto 12:25, 26, ndipo mukamala cezeranani mibvunzo ikutewerayi:
-
Kodi Akristau wacadidi ambacita ciyani, Akristau anzawo akakhala akubonera?
-
Kodi imwepo mumbawona kuti Mboni za Yahova zimbalatizana lufoyi? Fotokozani.
Mboni za Yahova za m’madziko yanango zikambabonera, Mboni zinango za pa dziko lentse zimbapereka thandizo mwakamfulumize. Kuti muwone ciratizo cibodzi, Onani VIDIYO. Ndipo mukamala cezeranani mbvunzo wakutewerayu.
-
Kodi thandizo lomwe Mboni za Yahova zimbapereka limbalatiza tani lufoyi?
Akristau wacadidi ambalatiza lufoyi kuna Akristau anzawo
WANTHU WINANGO AMBALEWA KUTI: “Mboni za Yahova ni gereja ipsa.”
-
Kodi ni lini pomwe Yahova adayamba kucemera anamati wace kuti mboni zace?
KODI MWAPFUNZA CIYANI?
Mboni za Yahova ni Akristau wacadidi. Ndife wanthu wa m’banja libodzi la pa dziko lentse la pantsi, bzomwe timbakhulupira bzimbacokera m’Bibliya ndipo timbadziwisa cadidi cakulewa bza Yahova.
Mibvunzo yakubwerezera
-
Thangwe ranyi timbadziwika na dzina lakuti Mboni za Yahova?
-
Kodi timbalatiza tani kuti timbafunana?
-
Kodi imwepo mumbakumbuka kuti Mboni za Yahova ni Akristau wacadidi?
ONANI POMWE IBZI
Pfunzani bzizinji bza mbiri yathu.
Mboni za Yahova Zidalatiza Cikhulupiro—Mbali 1: Kucoka mu Mdima (1:00:53)
Onani ciratizo cinango ca momwe Mboni za Yahova zidazimbulira bzipfunziso bzakunama.
Gumanani mitawiro ya mibvunzo yomwe mungakhale nayo pakulewa bza Mboni za Yahova.
“Mibvunzo Yakubvunzidwa Kawiri-kawiri Yakulewa bza Mboni za Yahova”(nkhani ya pa jw.org)
Stephen akhawenga wanthu wa mitundu inango ndipopa iye akhawacitira ciwembo. Bzomwe bzidamucitisa kucinja ni bzomwe iye adawona pakati pa Mboni za Yahova.
“Moyo Wangu Ukhayenda Uciipiratu” (Ntsanza ya Mulindiri ya 1 Julho, 2015)
a Kuyambira mu 1879, wanthu wa Yahova adayamba kunemba revista ya Ntsanza ya Mulindiri yomwe imbafotokoza bzomwe Bibliya limbalewa.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
