Yahova ni Mulungu omwe ambacita bzinthu mwa kulinganizika. (1 Akolinto 14:33) Ndipopa timbadikhira kuti wanthu wace an’cita bzinthu mwa kulinganizika. Kodi gwere lacikristau lidalinganizidwa tani? Kodi tingathandizirembo tani kuti bzinthu bzifambe bwino mu gwere?

1.Kodi msolo wa gwere ni mbani?

“Kristu ni msolo wa gwere.” (Aefezo 5:23) Kucokera kudzulu, Kristu ambanyang’anira mabasa yomwe wanthu wa Yahova akucita pa dziko la pantsi. Jezu adaikha “kapolo wakukhulupirika na wanzeru” komwe ni kagulu kang’ono ka akulu wakukhwima mwauzimu ndipo kambadziwikambo na dzina lakuti Bungwe Lakutonga. (Werengani Mateu 24:45-47.) Ninga apostolo wa magole dzana yakuyambirira na akulu wa ku Jeruzalemu, Bungwe Lakutonga limbatsogolera magwere yentse ya pa dziko la pantsi. (Mabasa 15:2) Tsono amuna amwewa mbatsogoleri lini wa gulu lathu. Iwo ambatsogoleredwa na Yahova pabodzi na Fala lace, ndipo ambabvera Jezu ninga msolo wa gwere.

2.Kodi akulu wa gwere ambaphata basa lanyi?

Akulu wa gwere ni Akristau wakukhwima mwauzimu omwe ambapfunzisa mwakuphatisa basa Fala la Mulungu ndipo ambausa wanthu wa Yahova mwa kuwathandiza na kuwalimbikisa. Iwo ambapagalidwi lini thangwe ra basa lomwe ambacitalo. Koma iwo ambatumikira, “pamaso pa Mulungu, sikuti thangwe ra kufuna kugumana phindu koma mwa kufuna kwawo.” (1 Pedru 5:1, 2) Akulu wa gwere ambathandizidwa mabasa yawo na atumiki wakuthandiza, ndipo iwo ambadzakhalambo akulu.

Bungwe Lakutonga limbaikha akulu winango kuti akhale anyakunyang’anira wa dera. Anyakunyang’anira wa derawo ambazungira magwere mazinji kuti ambayapase malango na kuyalimbikisa. Ndipo m’magweremo iwo ambaikha akulu wa gwere na atumiki wakuthandiza omwe akuteweza bzomwe Bzinembo bzimbalewa. — 1 Timotio 3:1-10, 12; Tito 1:5-9.

3.Kodi Mboni ya Yahova iri-yentse ina basa liponi?

Gwere lentse “litumbize dzina la Yahova” mwakugumanika pa mitsonkhano na kupalizira mafala yabwino mwakubverana na momwe bzinthu bziriri pa moyo wa munthu ali-wentse. — Werengani Salimo 148:12, 13.

 FUFUDZANI BZINANGO

4. Jezu ni mtsogoleri wabwino

Jezu akutipasa mcemo wakufunika kwene-kwene. Werengani Mateu 11:28-30, ndipo mukamala cezeranani mbvunzo wakutewerayu:

• Kodi Jezu akufuna kuti timbabzibve tani na utsogoleri bwace?

5. Akulu ambapfunzisa na ciratizo cawo

1. Akulu wa gwere ambalimbisa uzimu bwawo na bwa mabanja yawo

2. Akulu wa gwere ambathandiza gwere lentse

3.   Akulu wa gwere ambapalizira na nyongo

4. Akulu wa gwere mbapfunzisi. Iwo ­ambathandizambo pakucenesa. Nyumba ya Umambo na mabasa yanango

6. Tin’funika kumbabvera akulu wa gwere

Bibliya limbatiuza thangwe race tin’funika kumbabvera akulu wa gwere. Werengani Ahebereu 13:17, ndipo mukamala cezeranani mibvunzo ikutewerayu:

• Kodi mukuwona kuti tinʼfunika kucita bzomwe Bibliya limbalewa bza kuti timbabvere omwe akutsogolera pakati pathu? Thangwe ranyi? Ndipo penu munti ne thangwe ranyi?

Werengani Luka 16:10, ndipo mukamala cezeranani mbvunzo wakutewerayu:

• Thangwe ranyi mpsakufunika kumbabvera akulu wa m’gwere napo pa tubzinthu tung’ono-tung’ono?

 KODI MWAPFUNZA CIYANI?

Jezu ni msolo wa gwere. Timbabvera mwakukondwa akulu wa gwere, thangwe tikambaphata nawo basa iwo ambatitsangalaza ndipo ambatipfunzisa na ciratizo cawo.

Mibvunzo yakubwerezera

• Kodi msolo wa gwere ni mbani?

• Kodi akulu wa gwere ambathandiza tani gwere?

• Kodi Mboni ya Yahova iri-yentse ina basa liponi?