PFUNZIRO 24
Kodi Anjo ni Mbani Ndipo Iwo Ambaphata Basa Lanyi?
Yahova an’funa kuti tidziwe bza banja lace lakudzulu. Banja limweri limbaphatanidzambo anjo omwe ambacemeredwa kuti “wana wa Mulungu.” (Djobi 38:7) Kodi Bibliya limbati ciyani pakulewa bza anjo? Kodi wanthu ambagumana phindu liponi na bzomwe anjo ambacita? Ndipo, kodi anjo wentse ambacita mbali m’banja la Mulungu?
1. Kodi Anjo ni mbani?
Yahova akanati kulenga dziko la pantsi adayamba kulenga anjo. Ninga Yahovayo, anjo ambakhala kudzulu ndipo ni mzimu wakusaya kuwoneka. (Ahebereu 1:14) Kudzuluko kuna anjo azinji kwene-kwene, ndipo anjo ali-wentse ngwakusiyana na mwanzace. (Apokalipse 5:11) Iwo “ambateweza fala la [Yahova] mwa kucita bzomwe iye ambalewa.” (Salimo 103:20) Kale-kale, Yahova akhatuma anjo kuti akadziwise wanthu mafala yace, akawathandize na kuwapulumusa. Ntsiku zino, anjo ambatsogolera Akristau komwe kuna wanthu omwe an’funa kupfunza bza Mulungu.
2. Kodi Sathani na madimonyo yace ni mbani?
Anjo winango alibe kupitiriza kukhala wakukhulupirika kwa Yahova. Anjo wakuyamba omwe alibe kubvera ni “Sathani Dyabu, omwe akupumpsa dziko lentse la pantsi.” (Apokalipse 12:9) Sathani akhafuna kutonga wanthu, tenepo iye adapumpsa Adamu na Eva, ndipo na kupita kwa nthawe anjo winango adapandukirambo Mulungu. Anjo wentse omwe adapandukira Mulungu ambacemeredwa madimonyo. Yahova adathotha madimonyoyo kudzulu yacibwera pa dziko la pantsi, ndipo yan’dzapfudzidwa. — Werengani Apokalipse 12:9, 12.
3. Kodi Sathani pabodzi na madimonyo ambayezera tani kutipumpsa?
Sathani pabodzi na madimonyo yace ambapumpsa wanthu azinji mwa kuphatisa basa bza mizimu, comwe ni cinthu cakuipa kwene-kwene kuyezera kulewa-lewa na mizimuyo. Mwa ciratizo, wanthu winango ambabvunza bzinthu anyakukhulupira nyenyezi, anyakulewa bzakutsogolo, anyamatsenga na anyabezi. Wanthu winango akaduwala ambayenda kwa anyabezi. Ndipo winango ambapumpsidwa aciyamba kukhulupira kuti angakwanise kulewalewa na wanthu omwe adafa. Tsono Yahova ambatiuza kuti: “Lekani kukumbira thandizo omwe ambakhulupira bza mizimu ndipo lekani kubvunza anyakulewa bzakutsogolo.” (Levitiko 19:31) Iye ambaticenjeza kuti atikhotcerere kuna Sathani pabodzi na madimonyo, thangwe iwo ni anyamadulanthaka wa Mulungu ndipo akufuna kutidzonga.
FUFUDZANI BZINANGO
Pfunzani bzinthu bzabwino bzomwe anjo ambacita, ngozi ya kukhulupira bza mizimu na momwe tingabzikhotcerere kwa Sathani pabodzi na madimonyo.
4. Anjo ambathandiza wanthu kupfunza bza Yahova
Anjo wa Mulungu ambapalizira lini wanthu maso na maso. Koma iwo ambatsogolera atumiki wa Mulungu kwa wanthu omwe akufuna kupfunza bza Mulunguyo. Werengani Apokalipse 14:6, 7, ndipo mukamala cezeranani mibvunzo ikutewerayi:
-
Thangwe ranyi timbafunikira thandizo la anjo pakupalizira?
-
Kodi mumbalimbikisidwa mukadziwa kuti anjo ambakutsogolerani kwa wanthu omwe akufuna kubva mafala ya m’Bibliya? Thangwe ranyi?
5. Lekani kumbakhulupira bza mizimu
Sathani pabodzi na madimonyo ni anyamadulanthaka wa Yahova. Ndipo iwo ni anyamadulanthakambo wathu. Werengani Luka 9:38-42, ndipo mukamala cezeranani mbvunzo wakutewerayu:
-
Kodi n’ciyani comwe madimonyo yambacita kuna wanthu?
Tin’funika lini kubvuma kuti madimonyo yambacite mbali pa moyo wathu. Werengani Deuteronomiyo 18:10-12, ndipo mukamala cezeranani mibvunzo ikutewerayi:
-
Kodi madimonyo yambayeza tani kulewalewa nafe na kucita mbali pa moyo wathu? Kodi ni bzinthu bziponi bzakubverana na mizimu bzomwe bzimbacitika komwe mumbakhala?
-
Kodi imwepo mumbawona kuti Yahova adacita bwino kuletsa kukhulupira bza mizimu? Thangwe ranyi?
Onani VIDIYO, ndipo mukamala cezeranani mibvunzo ikutewerayi.
-
Kodi mukukumbuka kuti kubvazika cithumwa mwana komwe Palesa adacita kukhali kwakuphonyeka? Thangwe ranyi?
-
Kodi n’ciyani comwe Palesa akhafunika kucita kuti akhotcereredwe ku madimonyo?
Akristau wacadidi ambawenga madimonyo. Werengani Mabasa 19:19 na 1 Akolinto 10:21, ndipo mukamala cezeranani mbvunzo wakutewerayu:
-
Thangwe ranyi mun’funika kutaya cinthu ciri-centse comwe n’cakubverana na kukhulupira bza mizimu?
6. Kundani pa nkhondo yakumenyana na Sathani pabodzi na madimonyo yace
Madimonyo yambatongedwa na Sathani. Tsono anjo wakukhulupirika ambatsogoleredwa na mkulu wa anjo, Migeli, omwe ni Jezu. Kodi timbadziwa tani kuti Migeliyo ngwamphanvu kwene-kwene? Werengani Apokalipse 12:7-9, ndipo mukamala cezeranani mibvunzo ikutewerayi:
-
Kodi mbani omwe ana mphanvu kwene-kwene, Migeli na anjo wace ayai Sathani na madimonyo yace?
-
Kodi mukukumbuka kuti ateweri wa Jezu an’funika kugopa Sathani na madimonyo yace?
Imwepo mungaganyari pa nkhondo yakumenyana na Sathani na madimonyo yace. Werengani Tiyago 4:7, ndipo mukamala cezeranani mbvunzo wakutewerayu:
-
Kodi mungabzikhotcerere tani kwa Sathani na madimonyo yace?
WANTHU WINANGO AMBALEWA KUTI: “Bziribe kuipa kujogari games ayai kuwona filme zomwe zikulatiza bza mizimu. Izo zimbadekeza!”
-
Thangwe ranyi bziri lini bwino kukumbuka tenepayi?
KODI MWAPFUNZA CIYANI?
Anjo wakukhulupirika ambatithandiza. Sathani na madimonyo yace ni anyamadulanthaka wa Yahova, ndipo iwo ambaphatisa basa bzinthu bza mizimu kuti apumpse wanthu.
Mibvunzo yakubwerezera
-
Kodi anjo wa Yahova ambathandiza tani wanthu kuti apfunze bza Yahovayo?
-
Kodi Sathani na madimonyo yace ni mbani?
-
Thangwe ranyi imwepo mun’funika lini kukhala na cinthu ciri-centse cakubverana na kukhulupira bza mizimu?
ONANI POMWE IBZI
Onani bzomwe bzimbalatiza kuti Jezu ni Migeli Mkulu wa anjo.
Onani bzomwe bzimbalatiza kuti Dyabu ni munthu caiye.
Onani bzomwe mkazi munango adacita kuti asiye kuphatisa basa bzinthu bza mizimu.
“Iye Adagumana Thandauzo la Moyo” (Ntsanza ya Mulindiri ya 1 Julho, 1993)
Onani momwe Sathani ambaphatisira basa bzinthu bza mizimu kuti apumpse wanthu.
“Cadidi ca Kulewa bza Matsenga na Ufiti” (Njira ya ku Moyo Wakusaya Kumala, mbali 5)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
