Kodi imwepo mwasaikidwa wadzinza wanu? Thangwe ra kuwawidwa mu mtima, mungabzibvunze kuti: ‘N’ciyani cimbacitika munthu akafa? Kodi nin’dzamuwona pomwe?’ Mu pfunziro lino na lakutsogolo, tiniwona mitawiro ya mibvunzoyi.

1. Kodi n’ciyani cimbacitika munthu akafa?

Jezu adandendemezera infa na tulo. Munthu akakhala akugona ambadziwa lini bzomwe bzimbakhala bzikucitika. Tsono thangwe ranyi infa ikundendemezeredwa na tulo? Thangwe ndakuti munthu akafa ambabva lini kuwawa, ambabzibva lini kuti ali yekha napo kuti akhafuna kwene-kwene abale pabodzi na axamwali wace. Bibliya limbati: “Anyakufa ambadziwa lini cinthu na cibodzico.” — Werengani Mpalizi 9:5.

2. Kodi timbagumana phindu liponi thangwe ra kudziwa cadidi ca infa?

Wanthu azinji ambagopa kufa ndipo ambagopambo anyakufa. Tsono imwepo mungatsangalazidwe mukadziwa bzomwe Bibliya limbalewa pa nkhani ya infa. Jezu adati: “Cadidi cin’dzakutsudzulani.” (Juwau 8:32) Magereja manango yambapfunzisa kuti munthu akafa pana cinthu cinango comwe cimbapitiriza kukhala na moyo, tsono ndibzo lini bzomwe Bibliya limbapfunzisa. Cadidi n’cakuti munthu akafa ambabonera lini pomwe. Pakuti anyakufa ambadziwa lini ciri-centse, iwo angatibonerese lini. Tenepo tin’funika lini kunamata anyakufa, ayai kufuna kuwacitira cinthu ticikumbuka kuti tikasaya kucita iwo angakalipe.

Wanthu winango ambalewa kuti ambakwanisa kulewalewa na anyakufa. Tsono bzimwebzi n’cadidi lini. Ninga momwe Bibliya limbalewera, anyakufa “ambadziwa lini cinthu.” Wale omwe ambakumbuka kuti ambalewalewa na adzinza wawo omwe adafa angakhale akulewalewa na madimonyo yomwe yambayezera kucita bzinthu ninga wanthu omwe adafa. Tsono kudziwa cadidi cakulewa bza infa kumbatikhotcerera kwa madimonyo. Yahova ambaticenjeza kuti tileke kuyezera kulewalewa na anyakufa thangwe iye ambadziwa kuti kubverana na madimonyo kungatidzonge. — Werengani Deuteronomiyo 18:10-12.

3. Pfunzani bzomwe bzimbacitika munthu akafa

Pa dziko la pantsi, wanthu ana makumbukidwe yakusiyana-siyana pa nkhani ya bzomwe bzimbacitika munthu akafa. Tsono cadidi n’cakuti, ni bzentse lini bzomwe wanthu ambakhulupira mpsacadidi.

• Kodi komwe imwepo mumbakhala wanthu ambalewa ciyani bza anyakufa?

 4. Kudziwa bzomwe bzimbacitika munthu akafa kuna phindu kwa ifepano

Kudziwa cadidi ca infa kumbatithandiza kuleka kugopa anyakufa. Werengani Mpalizi 9:10, ndipo mukamala cezeranani mbvunzo wakutewerayu:

• Kodi anyakufa angatibonerese?

Tikakhulupira cadidi ca m’Bibliya cakulewa bza anyakufa tin’dzakhulupira lini gunkha lakuti anyakufa an’funika kunamatidwa ayai kuwacitira bzinthu kuti aleke kukalipa. Werengani Zaiya 8:19 na Apokalipse 4:11, ndipo mukamala cezeranani mbvunzo wakutewerayu:

• Kodi imwepo mukukumbuka kuti Yahova ambabva tani akawona munthu akunamata ayai akufuna kuthandiza munthu omwe adafa?

5. Kudziwa cadidi cakulewa bza anyakufa kumbatitsangalaza

Wanthu azinji ambapfunzisidwa kuti akadzafa an’dzaboneresedwa thangwe ra bzinthu bzakuipa bzomwe akhacita. Tsono timbatsagalazidwa kudziwa kuti palibe munthu omwe ambabonera akafa, napo kuti akhacita bzinthu bzakuipa. Werengani Aroma 6:7, ndipo mukamala cezeranani mbvunzo wakutewerayu:

• Bibliya limbalewa kuti munthu akafa Mulungu ambayebwa bzomwe iye akhaphonya, tsono kodi imwepo mukukumbuka kuti munthu akafa ambaboneresedwa thangwe ra bzakuphonya bzace?

Tikamudziwa bwino Yahova, bzimbatithandiza kudziwa kuti iye ambaboneresa lini anyakufa. Werengani Deuteronomiyo 32:4 na 1 Juwau 4:8, ndipo mukamala cezeranani mibvunzo ikutewerayi:

• Kodi Mulungu omwe akufotokozedwa m’mavesiya angaboneresedi anyakufa?

• Kodi kudziwa cadidi cakulewa bza anyakufa kwakutsangalazani? Thangwe ranyi?

 KODI MWAPFUNZA CIYANI?

Munthu akafa, ambadziwa lini cinthu ciri-centse. Anyakufa ambabonera lini, ndipo angabonerese lini munthu wa moyo.

Mibvunzo yakubwerezera

• Kodi n’ciyani cimbacitika munthu akafa?

• Kodi timbagumana phindu liponi thangwe ra kudziwa cadidi cakulewa bza anyakufa?

• Kodi kudziwa cadidi cakulewa bza anyakufa kumbatitsangalaza tani?