PFUNZIRO 36
Khalani Wakukhulupirika m’Bzinthu Bzentse
Munthu ali-wentse ambafuna kukhala na xamwali omwe ngwakukhulupirika. Yahova ambafunambo kuti axamwali wace akhale wakukhulupirika. Tsono bzimwebzi bziribe kupusa mu dziko lino lomwe wanthu azinji mbakusaya kukhulupirika. Kodi ni phindu liponi lomwe tin’dzagumana tikakhala wakukhulupirika?
1. Thangwe ranyi tin’funika kukhala wakukhulupirika?
Tikakhala wakukhulupirika kwa winango, timbalatiza Yahova kuti timbamufuna na kumulemekeza. Kumbukirani ibzi: Yahova ambadziwa bzentse bzomwe timbakumbuka na kucita. (Ahebereu 4:13) Iye ambawona tikakhala wakukhulupirika ndipo bzimwebzi bzimbamukondwesa. Fala lace limbati: “Munthu wakunama Yahova ambaipidwa naye, tsono Iye ambafuna munthu wakulungama.” — Mimwani 3:32.
2. Kodi tingakhale tani wakukhulupirika?
Yahova ambafuna kuti “mumbalewe cadidi” kwa winango. (Zakariya 8:16, 17) Kodi bzimwebzi bzin’funa kulewa ciyani? Bzin’funa kulewa kuti tin’funika kumbalewa cadidi kwa adzinza wathu, anzathu wa kubasa, abale wa m’gwere na ku boma. Munthu wakukhulupirika ambaba lini ne kukhulukha wanthu. (Werengani Mimwani 24:28 na Aefezo 4:28.) Ndipo iye ambapagali mtsonkho. (Aroma 13:5-7) Kulewa kwinango tingalewe kuti tin’funika “kucita bzinthu bzentse mwakukhulupirika.” — Ahebereu 13:18.
3. Thangwe ranyi mpsabwino kukhala wakukhulupirika?
Tikakhala wakukhulupirika, wanthu winango ambatikhulupira. Bzimwebzi bzimbathandiza kuti abale m’gwere ambakhulupirane. Timbakhalambo na mtima wakucena. Kukhulupirika kwathu kumbadekesambo “cipfunziso ca Mulungu Mpulumusi wathu” ndipo kumbacitisambo wanthu winango kufuna kupfunza bza Yahova. — Tito 2:10.
FUFUDZANI BZINANGO
Pfunzani momwe imwepo mungagumanire phindu thangwe ra kukhala wakukhulupirika na momwe Yahova ambabvera na bzimwebzi, ndipo pfunzanimbo momwe mungakhalire wakukhulupirika nthawe zentse pa moyo wanu.
4. Kukhulupirika kumbakondwesa Yahova
Werengani Salimo 44:21 na Malakiya 3:16, ndipo mukamala cezeranani mibvunzo ikutewerayi:
-
Thangwe ranyi n’kusaya nzeru kumbawona kuti tingabisire cinthu Yahova?
-
Kodi mukuwona kuti Yahova ambabva tani mukambalewa cadidi napo penu mpsakunesa kucita bzimwebzo?
Wana akambalewa cadidi abereki wawo ambakomedwa. Ifepanombo tikambalewa cadidi timbakondwesa Yahova
5. Mbacitani bzinthu mwakukhulupirika nthawe zentse
Wanthu azinji ambakumbuka kuti mpsakukwanisika lini kukhala wakukhulupirika nthawe zentse. Tsono onani thangwe ranyi tin’funika kukhala wakukhulupirika nthawe zentse. Onani VIDIYO.
Werengani Ahebereu 13:18, mukamala cezeranani momwe tingakhalire wakukhulupirika . . .
-
kwa wanthu wa m’banja mwathu.
-
kwa anzathu wa kubasa ayai wa ku xikola.
-
pa nkhani zinango.
6. Kukhala wakukhulupirika kumbatipasa phindu
Bzingawoneke ninga kuti kukhala wakukhulupirika kungatibweresere mabvuto. Tsono kukhala wakukhulupirika ni cinthu cabwino kwene-kwene. Werengani Salimo 34:12-16, ndipo mukamala cezeranani mbvunzo wakutewerayu:
-
Kodi kukhala wakukhulupirika kumbatithandiza tani kukhala na moyo wabwino?
-
Amuna na akazi akakhala wakukhulupirika, mabanja yawo yambakhala yakulimba
-
Anyabasa wakukhulupirika ambathembedwa na azipatrau wawo
-
Nzika zakukhulupirika zimbakhala na mbiri yabwino ku boma lawo
WANTHU WINANGO AMBALEWA KUTI: “Nthawe zinango kunama kulibe kuipa.”
-
Thangwe ranyi mukuwona kuti Mulungu ambawenga kunama kuli-kwentse?
KODI MWAPFUNZA CIYANI?
Yahova ambafuna kuti axamwali wace akhale wakukhulupirika pa bzinthu bzentse, bzomwe timbalewa na kucita.
Mibvunzo yakubwerezera
-
Kodi tingakhale wakukhulupirika pa bzinthu bziponi?
-
Thangwe ranyi n’kusaya nzeru kumbawona kuti tingabisire cinthu Yahova?
-
Thangwe ranyi imwepo mun’funa kukhala wakukhulupirika nthawe zentse?
ONANI POMWE IBZI
Kodi abereki angapfunzise tani wana wawo kukhala wakukhulupirika?
Thangwe ranyi mpsabwino kukwanirisa bzomwe talewa?
Mbakwanirisani Bzomwe Mumbalewa, Ndipo Mun’dzasimbidwa (9:09)
Onani thangwe ranyi tin’funika kumbapagali mitsonkho napo kuti imbaphatisidwa lini basa bwino.
“Kodi Mun’funika Kumbapagali Mitsonkho?”(Ntsanza ya Mulindiri ya 1 Setembro, 2011)
Kodi n’ciyani comwe cidathandiza mwamuna munango kucinja pomwe akhacita bzinthu mwakusaya kukhulupirika, aciyamba kucita bzinthu mwakukhulupirika?
“Ndidapfunza Kuti Yahova Ngwantsisi Ndipo Ambalekerera”(Ntsanza ya Mulindiri ya 1 Maio, 2015)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
