PFUNZIRO 37
Bzomwe Bibliya Limbalewa pa Nkhani ya Basa na Kobiri
Kodi mumbacitambo thupo pa nkhani ya basa ayai kobiri? Nthawe zinango bzimbakhala bzakunesa kukhala na nthawe ya kunyang’ana bzinthu bzakuthupi na nthawe yakunamata Yahova. Bibiya limbatipasa malango yomwe yangatithandize.
1. Kodi Bibliya limbalewa ciyani pa nkhani ya basa?
Mulungu ambafuna kuti timbakomedwe na basa lomwe timbacita. Bibliya limbalewa kuti: “Palibe comwe n’cabwino kwa munthu kuposa . . . kukondwesa mtima wace pa basa lace lomwe aphata na nyongo.” (Mpalizi 2:24) Yahova ambaphata basa na nyongo. Tikambamutewezera mwa kuphata basa na nyongo, timbamukondwesa ndipo ifepano timbakondwambo.
Kuphata basa n’kwakufunika. Koma basa lin’funika lini kukhala lakufunika kwene-kwene kuposa kunamata Yahova. (Juwau 6:27) Iye adalewa kuti tikaikha bzakufuna bzace patsogolo, an’dzatipasa bzomwe tikufunikira pa moyo.
2. Kodi kobiri tin’funika kumbayiwona tani?
Bibliya limbalewa kuti ‘kobiri zimbakhotcerera,’ tsono limbaticenjezambo kuti kobiri pazokha zingatikondwese lini. (Mpalizi 7:12) Tenepo, timbalimbikisidwa kuti tileke kumbafuna kwene-kwene kobiri koma ‘timbakomedwe na bzomwe tinabzo.’ (Werengani Ahebereu 13:5.) Tikambakomedwa na bzomwe tinabzo, tin’dzawawidwa lini msolo thangwe ra kufuna bzinthu bzizinji. Ndipo tin’dzatcenkha kugwa m’mangawa yakusaya kufunikira. (Mimwani 22:7) Ndipo tin’dzatcenkhambo kumbabetca ayai kunyang’ana bzinthu bzomwe bzingatibweresere kobiri kabodzi na kabodzi.
3. Kodi tingaphatise tani basa kobiri yathu kuti tithandize winango?
Yahova ni Mulungu wakupasa, ndipo timbamutewezera tikambakhala ‘wakupasa na wakukonzeka kugawana na anzathu bzomwe tinabzo.’ (1 Timotio 6:18) Tingacite bzimwebzo mwa kuthandiza gwere na kuthandizambo omwe an’funikira thandizo, maka-maka abale wathu. Kwa Yahova bziribe basa kuwanda kwa bzinthu bzomwe tinipereka koma thangwe lomwe lin’ticitisa kuperekako. Tikambapereka na mtima wentse, ifepano tin’dzakomedwa ndipo tin’dzakondwesambo Yahova. — Werengani Mabasa 20:35.
FUFUDZANI BZINANGO
Pfunzani phindu lomwe mungagumane thangwe ra kuikha basa pa mbuto yace na kukomedwa na bzomwe munabzo.
4. Tumbizani Yahova na momwe mumbaphatira basa lanu
Uxamwali bwathu na Yahova bumbaticitisa kuwona basa ninga momwe iye ambaliwonera. Onani VIDIYO, ndipo mukamala cezeranani mibvunzo ikutewerayi:
-
Mu vidiyoyi, kodi n’ciyani comwe cakudabwisani na bzomwe Juwau akhacita kubasa?
-
Kodi n’ciyani comwe iye adacita kuti ayikhe basa pa mbuto yace?
Werengani Akolose 3:23, 24, ndipo mukamala cezeranani mbvunzo wakutewerayu:
-
Thangwe ranyi tin’funika kuphata basa na nyongo?
Kuphata basa n’kwakufunika. Koma basa lin’funika lini kukhala lakufunika kwene-kwene kuposa kunamata Yahova
5. Timbagumana phindu tikambakomedwa na bzomwe tinabzo
Wanthu azinji ambalinga cuma cizinji. Tsono Bibliya limbatiuza bzinthu bzakusiyana na bzimwebzi. Werengani 1 Timotio 6:6-8, ndipo mukamala cezeranani mbvunzo wakutewerayu:
-
Kodi Bibliya limbatilimbikisa kucita ciyani?
Napo ticikhala na bzinthu bzing’ono-ng’ono tingakhale wakukondwa. Onani VIDIYO, ndipo mukamala cezeranani mbvunzo wakutewerayu.
-
Kodi n’ciyani comwe cimbacitisa mabanjaya kukhala yakukondwa, napo kuti yana bzinthu bzing’ono-ng’ono?
Tsono tani penu tinabzo kale bzinthu bzizinji koma tikufuna bzinango? Jezu adalewa ciratizo comwe cimbalewa bza ngozi imweyi. Werengani Luka 12:15-21, ndipo mukamala cezeranani mbvunzo wakutewerayu:
-
Kodi mwapfunza ciyani na ciratizo ca Jezu? — Onani vesi 15.
Werengani ndipo ndendemezerani Mimwani 10:22 na 1 Timotio 6:10. Ndipo mukamala cezeranani mibvunzo ikutewerayi:
-
Kodi mukuwona kuti cinthu cakufunika kwene-kwene n’ciponi? Kukhala pa uxamwali na Yahova ayai kukhala na kobiri zizinji? Thangwe ranyi?
-
Kodi munthu angagumane na mabvuto yaponi akambafuna kobiri kwene-kwene?
6. Yahova an’dzatipasa bzomwe tikufunikira
Kusaya basa na kobiri kungayeze kukhulupirika kwathu kwa Yahova. Onani VIDIYO kuti muwone momwe mungacitire mukagumana na mabvuto yamweya, ndipo mukamala cezeranani mibvunzo ikutewerayi.
-
Mu vidiyoyi, kodi m’baleyu adagumana na bvuto liponi?
-
Kodi n’ciyani comwe iye adacita kuti alimbane na bvutolo?
Werengani Mateu 6:25-34, ndipo mukamala cezeranani mbvunzo wakutewerayu:
-
Kodi n’ciyani comwe Yahova adalewa kuti an’dzacitira wale omwe ambamuikha pa mbuto yakuyamba?
WANTHU WINANGO AMBALEWA KUTI: “Nimbaphanta basa na nyongo kuti ndisamalire banja langu. Tsono nthawe yakumbagumanika pa mitsonkhano sumana iri-yentse ndiribe.”
-
Kodi ni cinembo ciponi comwe cimbakutsimikizirani kuti kuikha kunamata Yahova pa mbuto yakuyamba ni cinthu cabwino kucicita?
KODI MWAPFUNZA CIYANI?
Kobiri na kuphata basa mpsakufunika, koma tileke kubvuma kuti bzimwebzi bzititazise kutumikira bwino-bwino Yahova.
Mibvunzo yakubwerezera
-
Kodi n’ciyani cin’dzakuthandizani kumbawona basa mwakuthemera?
-
Kodi tin’dzagumana phindu liponi bzinthu bzomwe tinabzo bzikambatikwanira?
-
Kodi mungalatize tani kuti mumbakhulupira mafala yomwe Yahova adalewa yakuti an’dzasamalira wanthu wace?
ONANI POMWE IBZI
Kodi Bibliya limbalewa kuti kobiri zidaipa?
“Kodi Kobiri ni Muzi wa Bzakuipa Bzentse?” (Nkhani ya pa jw.org)
Pfunzani momwe tingaphatisire basa kobiri zathu kuti tikondwese Mulungu.
“Kodi Bibliya Limbalewa Ciyani pa Nkhani Yakupasa?” (Nkhani ya pa jw.org)
Kodi ndunge ni masenzeka basi?
“Bzomwe Bibliya Limbalewa pa Nkhani ya Njuga” (Mukani! wa Março, 2015)
Onani bzomwe bzidacitisa nyakubzina njuga winango kucinja moyo wace.
“Ndikhafuna Mapici ya Makavalo” (Ntsanza ya Mulindiri ya 1 Novembro, 2011)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
