PFUNZIRO 38
Mbatendani Mphaso ya Moyo
Pana bzinthu bzizinji bzabwino bzomwe tingacite thangwe rakuti tina moyo. Napo timbagumana na mabvuto, pana bzinthu bzabwino bzomwe tingakomedwe nabzo. Kodi tingacite tani kuti tilatize kuti timbatenda mphaso ya moyo? Ndipo thangwe ranyi mpsakufunika kwene-kwene kucita bzimwebzo?
1. Thangwe ranyi tin’funika kumbatenda moyo omwe tinawoyu?
Tin’funika kumbatenda moyo thangwe ni mphaso yakucokera kwa Baba wathu, Yahova, omwe ambatifuna. Iye ni mwenekaciro wa “moyo” thangwe ndiye adalenga bzinthu bzentse. (Salimo 36:9) “Ndiye omwe ambapasa moyo wanthu wentse, mphuwe pabodzi na bzinthu bzentse.” (Mabasa 17:25, 28) Yahova ambatipasa bzomwe tikufunikira kuti tipitirize kukhala na moyo. Ndipo iye ambacitisambo kuti tikomedwe na moyo. — Werengani Mabasa 14:17.
2. Kodi tingalatize tani kwa Yahova kuti timbatenda mphaso ya moyo?
Yahova akhakuwonani kuyambira pomwe mukhali m’mimba mwa mai wanu. Davide omwe akhali mtumiki wa Mulungu adapemba kwa Yahova kuti: “Maso yanu yadandiwona pomwe ndikhali m’mimba.” (Salimo 139:16) Moyo wanu ngwakufunika kwene-kwene. (Werengani Mateu 10:29-31.) Yahova bzimbamuwawa kwene-kwene munthu akapha mwanzace ayai akabzipha yekha. a (Kufuluka 20:13) Ndipo bzimbamuwawambo akawona kuti tikucita cinthu comwe cingacitise moyo wathu kukhala pa ngozi ayai akawona kuti tikukhotcerera lini moyo wa anzathu. Tikambakhotcerera moyo wathu na kulemekeza moyo wa anzathu, timbalatiza kuti timbatenda mphaso ya moyo.
FUFUDZANI BZINANGO
Kumbukirani bzinthu bzomwe mungacite kuti mulatize kuti mumbalemekeza moyo.
3. Lekani kudzonga thupi Lanu
Akristau omwe adabzipereka kwa Yahova ambaphatisa basa moyo wawo wentse kuti amutumikire. Bzimbakhala ninga akupereka mathupi yawo kwa Mulungu kuti yakhale ntsembe. Werengani Aroma 12:1, 2, ndipo mukamala cezeranani mibvunzo ikutewerayi:
-
Thangwe ranyi mun’funika lini kudzonga thupi lanu?
-
Kodi mungatcenkhe tani kucita bzimwebzi?
4. Mbacitani mphole kuti muleke kupweteka ayai kupha munthu
Bibliya limbatiuza kuti titcenkhe kucita bzinthu bzomwe bzingaikhe moyo pa ngozi. Onani VIDIYO kuti mudziwe bzomwe mungacite kuti mutcenkhe ngozi.
Werengani Mimwani 22:3, ndipo mukamala cezeranani bzomwe mungacite kuti mutcenkhe ngozi . . .
-
pamui panu.
-
mukakhala mukuphata basa.
-
mukakhala mukucita masenzeka yakulimbisa thupi.
-
mukakhala mukufambisa karo ayai muli pa ulendo.
5. Lemekezani moyo wa mwana omwe akanati kubadwa
Davide adalewa kuti Yahova ambawona mwana akambakula m’mimba mwa mwai wace. Werengani Salimo 139:13-17, ndipo mukamala cezeranani mbvunzo wakutewerayu:
-
Kodi kwa Yahova, moyo wa munthu umbayamba pomwe mai wace atenga pathupi ayai pomwe iye abadwa?
Malamulo yomwe Mulungu adapasa Ajirayeri yakhakhotcerera azimayi na wana omwe ali m’mimba. Werengani Kufuluka 21:22, 23, ndipo mukamala cezeranani mibvunzo ikutewerayi:
-
Kodi Yahova akhamuwona tani munthu omwe akhapha mwangozi mwana omwe ali m’mimba?
-
Tsono iye akhabva tani munthu akacita bzimwebzi utowa? b
-
Kodi imwepo mukuwonambo tani bzomwe Mulungu akhacitabzi?
Napo mkazi omwe ambalemekeza moyo, nthawe zinango angawone ninga kuti bziri bwino kucosa mimba. Werengani Zaiya 41:10, ndipo mukamala cezeranani mibvunzo ikutewerayi:
-
Mkazi akakhala akungingimizidwa kuti acose mimba, kodi an’funika kukumbira thandizo kuna yani? Ndipo thangwe ranyi?
WANTHU WINANGO AMBALEWA KUTI: “Mkazi ana ufulu bwakucosa mimba thangwe ana mimbayo ndiye.”
-
Kodi n’ciyani cimbakutsimikizirani kuti moyo wa mai na wa mwana omwe ali m’mimba mwace ngwakufunika?
KODI MWAPFUNZA CIYANI?
Bibliya limbatipfunzisa kuti timbafune, timbalemekeze na kukhotcerera moyo omwe ni mphaso yakucokera kwa Yahova. Bzimwebzi bzin’funa kulewa moyo wathu na moyo anzathu.
Mibvunzo yakubwerezera
-
Thangwe ranyi moyo wa munthu ngwakufunika kwa Yahova?
-
Kodi Yahova ambabva tani munthu akapha mwanzace utowa?
-
Thangwe ranyi mumbatenda moyo omwe ni mphaso yomwe Mulungu adakupasani?
ONANI POMWE IBZI
Kodi tingatende tani Yahova thangwe ra kutipasa moyo?
Gumanani mtawiro wa mbvunzo wakuti, kodi Mulungu an’dzalekerera mkazi omwe adacosa mimba?
“Kodi Bibliya Limbati Tani pa Nkhani ya Kucosa Mimba?”(Nkhani ya pa jw.org)
Onani kuti kupfunza momwe Mulungu ambawonera moyo kungatithandize tani kutcenkha masenzeka yomwe yangaikhe moyo wanthu pa ngozi.
“Kodi Mungaikhe Moyo Wanu pa Ngozi ‘Thangwe ra Masenzeka?’” (Mukani! wa 8 Outubro, 2000)
Tsono tani penu munthu akufuna kubzipha? Onani kuti Bibliya lingamuthandize tani.
“Kodi Bibliya Lingandithandize Ndikakhala na Nzeru Zakufuna Kubzipha?” (Nkhani ya pa jw.org)
a Yahova ambacita thupo kwene-kwene na wanthu omwe akuwawidwa mu mtima. (Salimo 34:18) Iye ambadziwa kuti tingawawidwe mu mtima mwakuti tingafune kufa, ndipopa iye akufuna kutithandiza. Kuti muwone kuti iye ambatithandiza tani onani nkhani yomwe ikugumanika pa mbali yakuti Onani Pomwe Ibzi ya pfunziro lino. Nkhaniyo ina msolo wakuti: “Kodi Bibliya Lingandithandize Ndikakhala na Nzeru Zakufuna Kubzipha?”
b Wanthu omwe akhacosa mimba an’funika lini kupitiriza kubzipasa mulandu, thangwe Yahova angawalekerere. Kuti mudziwe bzizinji onani nkhani ya msolo wakuti “Kodi Bibliya Limbati Tani pa Nkhani ya Kucosa Mimba?” yomwe iri pa mbali yakuti Onani Pomwe Ibzi ya pfunziro lino.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
