PFUNZIRO 41
Kodi Bibliya Limbalewa Ciyani pa Nkhani ya Malume ya pa Mphasa?
Wanthu azinji ambatsudzuka lini kulewalewa nkhani za malume ya pa mphasa. Tsono Bibliya limbalewa nkhani ya malume ya pa mphasa mwakusaya kubisa na mwa ulemu. Bzomwe limbalewabzo bzimbatipasa phindu. Bzimwebzi mpsakubveka, thangwe Yahova ndiye mulengi wathu ndipo iye ambadziwa bzomwe mpsabwino kwa ifepano. Iye ambatiuza bzomwe tin’funika kucita kuti timukondwese na bzomwe bzingatithandize kuti tikhale wakukondwa mpaka muyaya.
1. Kodi Yahova ambaiwona tani nkhani ya malume ya pa mphasa?
Malume ya pa mphasa ni mphaso yakucokera kwa Yahova. Iye ambafuna kuti wanthu wakulowolana ambapfatse na makonzedwe yamweya. Mphaso imweyi imbacitisa lini kuti wanthu wakulowolana akhale na wana basi, koma imbacitisambo kuti iwo ambafunane. Ndipopa Fala la Mulungu limbalewa kuti: “Kondwa na mkazi wa pa utswaka bwako.” (Mimwani 5:18, 19) Yahova ambafuna kuti anyakulowolana akhale wakukhulupirika kwa mwanzawo wa m’banja, ndipopa Mkristau an’funika lini kucita malume ya pa mphasa na munthu omwe alibe kulowolana naye. — Werengani Ahebereu 13:4.
2. Kodi upombo ayai uputa n’ciyani?
Bibliya limbatiuza kuti “wale omwe ambacita upombo ayai uputa . . . an’dzapita lini mu Umambo bwa Mulungu.” (1 Akolinto 6:9, 10) Fala la Cigerego lomwe lidaphatisidwa basa m’Bibliya pakulewa bza upombo ayai uputa ni porneya. Falali li yakuphatanidza (1) kucita malume ya pa mphasa a kwa wanthu wakusaya kulowolana, (2) amuna ayai akazi okha-okha kucita malume ya pa mphasa na (3) kucita malume ya pa mphasa na bzirombo. ‘Tikambatcenkha upombo ayai uputa,’ timbakondwesa Yahova ndipo timbagumanambo phindu. — 1 Atesalonika 4:3.
FUFUDZANI BZINANGO
Onani momwe mungatcenkhere upombo ayai uputa ndipo onanimbo phindu lomwe mungakhale nalo mukapitiriza kukhala na makhalidwe yabwino.
3. Thawani upombo ayai uputa
Zuze omwe akhali munthu wakukhulupirika, adalamba kucita upombo na mkazi wa Potifari. Werengani Genesesi 39:1-12, ndipo mukamala cezeranani mibvunzo ikutewerayi:
-
N’ciyani cidacitisa Zuze kuthawa? — Onani vesi 9.
-
Kodi mukukumbuka kuti Zuze adacita bzinthu mwanzeru? Thangwe ranyi?
Kodi maswaka yangatewezere tani Zuze yacithawambo upombo ayai uputa? Onani VIDIYO.
Yahova an’funa kuti tentsenefe tileke kumbacita upombo ayai uputa. Werengani 1 Akolinto 6:18, ndipo mukamala cezeranani mibvunzo ikutewerayi:
-
Kodi ni bzinthu bziponi bzomwe bzingacitise munthu kucita upombo ayai uputa?
-
Kodi mungatcenkhe tani upombo ayai uputa?
4. Imwepo mungakunde mayezo
Kodi n’ciyani comwe cingacitise munthu kutazira kulimbika akayezedwa kucita upombo ayai uputa? Onani VIDIYO, ndipo mukamala cezeranani mbvunzo wakutewerayu.
-
Kodi n’ciyani comwe m’bale wa mu vidiyoyi wacita, pomwe wazindikira kuti makumbukidwe yace na bzicito bzace bzingadamucitisa kukhala wakusaya kukhulupirika kwa mkazace?
Nthawe zinango napo Akristau wakukhulupirika an’funikambo kucita nyongo kuti akunde makumbukidwe yakuipa. Kodi n’ciyani comwe cingakuthandizeni kupitiriza kutcenkha kumbakumbuka bzinthu bza upombo ayai uputa? Werengani Afilipi 4:8, ndipo mukamala cezeranani mibvunzo ikutewerayi:
-
Kodi ni bzinthu bziponi bzomwe tin’funika kumbakumbukira?
-
Kodi kuwerenga Bibliya na kucita bzinthu bzizinji pa kutumikira Yahova bzingatithandize tani kutcenkha kucita pikado?
5. Mitemo ya Yahova imbatipasa phindu
Yahova ambadziwa bzomwe mpsabwino kwa ifepano. Iye ambatiuza momwe tingakhalire na makhalidwe yakucena na phindu lomwe tingagumane tikacita bzimwebzo. Werengani Mimwani 7:7-27 ayai onani VIDIYO, ndipo mukamala cezeranani mibvunzo ikutewerayi.
-
Kodi tswaka lomwe lalewedwa mu cinemboci lidabziikha tani pa mayezo yakucita pikado? — Onani Mimwani 7:8, 9.
-
Mwakubverana na Mimwani 7:23, 26, kucita upombo ayai uputa kungatibweresere mabvuto mazinji. Kodi tin’dzatcenkha mabvuto yaponi tikapitiriza kukhala na makhalidwe yakucena?
-
Kodi kukhala na makhalidwe yakucena kun’dzatithandiza tani kukhala na moyo wakukondwa mpaka muyaya?
Wanthu winango ambakumbuka kuti Mulungu ngwakuuma mtima thangwe ambaletsa kulowolana kwa amuna ayai akazi okha-okha. Tsono Yahova, ni Mulungu wa lufoyi ndipo ambafuna kuti munthu ali-wentse akondwe na moyo mpaka muyaya. Kuti bzimwebzi bzikwanisike tin’funika kumbacita bzinthu mwakubverana na mitemo yace. Werengani 1 Akolinto 6:9-11, ndipo mukamala cezeranani mbvunzo wakutewerayu:
-
Kodi Mulungu ambawona kuti amuna ayai akazi omwe ambacita malume ya pa mphasa okha-okha, ndiwo basi omwe ambacita bzakuipa?
Kuti tikondwese Mulungu tentsenefe tin’funika kucinja bzinthu bzinango. Kodi kucinjako kuna phindu? Werengani Salimo 19:8, 11, ndipo mukamala cezeranani mibvunzo ikutewerayi:
-
Kodi mitemo ya Yahova yakulewa bza makhalidwe yabwino, njakuthandiza? Penu munti inde thangwe ranyi? Penu munti ne thangwe ranyi?
Yahova adathandiza wanthu azinji kuti abvere malamulo yace yakulewa bza makhalidwe yabwino. Iye angakuthandizenimbo
WANTHU WINANGO AMBALEWA KUTI: “Bziribe mulandu munthu kucita malume ya pa mphasa na munthu ali-wentse, malinge wanthuwo akafunana.”
-
Kodi mungati tani?
KODI MWAPFUNZA CIYANI?
Kucita malume ya pa mphasa ni mphaso yomwe Yahova adapasa mwamuna na mkazi wakulowolana.
Mibvunzo yakubwerezera
-
Kodi upombo ayai uputa bumbaphatanidza ciyani?
-
Kodi n’ciyani cingatithandize kutcenkha upombo ayai uputa?
-
Kodi timbagumana phindu liponi tikateweza mitemo yakulewa bza makhalidwe yabwino ya Yahova?
ONANI POMWE IBZI
Onani thangwe ranyi Mulungu ambafuna kuti mwamuna na mkazi omwe akufuna kukhala pabodzi cakuyamba akanembese ku boma.
Napo Bibliya limbalewa kuti kucita malume ya pa mphasa kwa amuna ayai akazi okha-okha n’kwakuphonyeka, onani kuti thangwe ranyi bzimwebzi bzin’funa lini kulewa kuti tin’funika kuwawenga wanthu omwe ambacita bzimwebzi.
Pfunzani kuti mudziwe momwe malamulo ya Mulungu yakulewa bza malume ya pa mphasa yambatikhotcererera.
Werengani nkhani yakuti “Iwo Adacita Nande Bzinthu mwa Ulemu” kuti muwone bzomwe bzidacitisa munthu munango omwe akhacita malume ya pa mphasa na amuna anzace kucinja kuti akondwese Mulungu.
“Bibliya Limbacinja Moyo wa Wanthu” (Ntsanza ya Mulindiri ya 1 Abril, 2011)
a Kucita malume ya pa mphasa kwakusaya kubvumizidwa kumbaphatanidza m’kamwa, kumatako, kusenzeka na cidzo ca munthu munango mu njira iri-yentse.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
