PFUNZIRO 44
Kodi Mulungu Ambakomendwa na Mafesta Yentse?
Yahova ambafuna kuti tikhale na moyo wabwino ndipo timbacitembo festa nthawe zino. Tsono kodi iye ambakomendwa na mafesta yentse? Kodi tingalatize tani kuti timbafuna Yahova pa nkhani ninga imweyi?
1. Thangwe ranyi Yahova ambakomedwa lini na mafesta mazinji?
Imwepo mungadabwe kwene-kwene mukadziwa kuti mafesta mazinji yambacokera ku bzipfunziso bzakunama ayai yadacokera pa bzomwe wanthu ambapfunzisa. Ndipo mafesta ninga yamweya yambabverana na magereja yakunama. Mafestayo yambabverana na bzamizimu ayai nzeru yakuti moyo umbafa lini. Ndipo mafesta yanango yambaphatanidza kukhulupira malodza ayai bzakuvima-vima. (Zaiya 65:11) Yahova ambalewa kuti: “Musiyane nawo . . . ndipo lekani kukhuya cinthu cakupswipa.” — 2 Akolinto 6:17. a
2. Kodi Yahova ambabzibva tani na mafesta yomwe yambatumbizisa wanthu?
Yahova ambaticenjeza kuti tileke “kumbakhulupira munthu ali-wentse wakucokera kupfumbi.” (Werengani Jeremiya 17:5.) Mafesta yanango yambatumbiza atongi na acikunda. Mafesta yanango yambakhala kusekerera ntsiku yomwe dziko lidatambira ufulu. (1 Juwau 5:21) Ndipo mafesta yanango yambakhala yakulimbikisa nkhani za ndale na ciphatano ca wanthu. Kodi Yahova ambabzibva tani tikambalemekeza munthu ayai thimu la wanthu omwe ambalimbikisa nzeru zomwe zimbasiyana na kufuna kwace?
3. Kodi ni bzinthu bziponi bzomwe bzimbacitisa kuti mafesta yanango yaleke kubvumidwa?
Bibliya limbaletsa “madyo yakusaya kuthemera [na] kumwa kwene-kwene.” (1 Pedru 4:3) M’mafesta yanango, wanthu ambacita bzinthu bzomwe bzimbadekera lini anzawo ndipo ambacitambo bzinthu bzakuipa. Kuti tipitirize kukhala pa uxamwali na Yahova, tin’funika kutcenkha kucita mafesta ninga yamweya.
FUFUDZANI BZINANGO
Onani bzomwe mungacite kuti mukondwese Yahova mwakumbacita bzinthu mwanzeru pa nkhani ya mafesta.
4. Lekani kumbacita mafesta yomwe Yahova ambakomedwa lini nayo
Werengani Aefezo 5:10, ndipo mukamala cezeranani mibvunzo ikutewerayi:
-
Kodi n’ciyani comwe cingatithandize kudziwa mafesta yakuthemera na yakusaya kuthemera?
-
Kodi komwe mumbakhala ni mafesta yaponi yomwe yambacitika kawiri-kawiri?
-
Kodi mukukumbuka kuti Yahova ambakomedwa na mafesta yamweya?
Mwa ciratizo, kodi imwepo mudabzibvunza kale kuti mudziwe penu Yahova ambakomedwa na kusekerera ntsiku yakubadwa? Bibliya limbalimbikisa lini kuti atumiki wa Yahova ambasekerere ntsiku yakubadwa, koma limbafotokoza mafesta mawiri yakusekerera ntsiku ya kubadwa yomwe yadacitidwa na wanthu omwe akhatumikira lini Yahovayo. Werengani Genesesi 40:20-22 na Mateu 14:6-10. Mukamala cezeranani mibvunzo ikutewerayi:
-
Kodi ni bzinthu bziponi bzomwe bzikundendemerana m’mafesta mawiriya?
-
Mwakubverana na mavesiya, kodi mukukumbuka kuti Yahova ambabzibva tani na mafesta yakusekerera ntsiku ya kubadwa?
Pinango imwepo mungabzibvunze kuti, ‘Kodi Yahova ambakomedwa inepano ndikayenda ku festa yakusekerera ntsiku ya kubadwa ayai ku festa zomwe zimbabverana lini na Bibliya?’ Werengani Ekisodo 32:1-8. Mukamala, onani VIDIYO ndipo cezeranani mibvunzo ikutewerayi.
-
Thangwe ranyi tin’funika kudziwa mtundu wa mafesta yomwe Yahova ambakomedwa nayo?
-
Kodi tingacite tani bzimwebzi?
Dziwani mafesta yomwe Mulungu ambakomedwa lini nayo
-
Kodi mafestayo yambabverana na bzomwe Bibliya limbapfunzisa? Kuti mudziwe mtawiro wace, fufudzani momwe mafestayo yadayambira.
-
Kodi mafestayo yambatumbiza wanthu, thimu la wanthu, ayai dziko? Ifepano timbatumbiza Yahova kuposa wentse ndipo timbakhulupira kuti ndiye an’dzamalisa mabvuto pa dziko la pantsi.
-
Kodi bzomwe bzimbacitika pa mafestayo bzimbapitana na bzomwe Bibliya limbapfunzisa? Ifepano tin’funika kupitiriza kukhala wakucena.
5. Thandizani winango kuti ambalemekeze bzomwe mumbakhulupira
Penu bzimbakunesani kulamba wanthu akakungingimizani kuti mugumanike pa mafesta yomwe Yahova ambakomedwa lini nayo, mwa kupirira afotokozereni bwino-bwino bzomwe mumbakhulupira. Kuti muwone ciratizo cibodzi ca momwe mungacitire bzimwebzi, onani VIDIYO.
Werengani Mateu 7:12, ndipo mukamala cezeranani mibvunzo ikutewerayi:
-
Mwakubverana na vesiri, kodi imwepo mungafotokozere tani adzinza wanu omwe ni Mboni lini kuti aleke kumbagumanika pa mafesta yomwe Mulungu ambakomedwa lini nayo?
-
Kodi mungacite tani kuti mulatize kuna adzinza wanuwo kuti mumbawafuna ndipo mumbakomedwa nawo, napo mumbacita lini nawo mafestayo?
6. Yahova ambafuna kuti tikhale wakukondwa
Yahova ambafuna kuti timbakondwe na adzinza pabodzi na axamwali wathu. Werengani Mpalizi 8:15, ndipo mukamala cezeranani mbvunzo wakutewerayu:
-
Kodi vesiri likulatiza tani kuti Yahova ambafuna kuti ifepano tikhale wakukondwa?
Yahova ambafuna kuti wanthu wace ambakhale na nthawe yakuceza pabodzi. Onani VIDIYO kuti muwone momwe bzimwebzi bzimbakhalira bzakudekeza pa mitsonkhano ya madziko.
Werengani Agalatiya 6:10, ndipo mukamala cezeranani mibvunzo ikutewerayi:
-
Kodi tin’funika kumbagumanika m’mafesta kuti tikondwese wanthu winango?
-
Kodi imwepo mumbakomedwa kupasa munthu cinthu mwakucita kungingimizidwa thangwe ni ntsiku ya festa ayai kumupasa munthuyo thangwe ra kufuna kwanu?
-
Nthawe zinango Mboni za Yahova zimbacitira mafesta wana wawo ndipo ambawapasambo mphaso. Penu imwepo muna wana, kodi ni cinthu ciponi cabwino comwe mungawacitire?
WANTHU WINANGO AMBALEWA KUTI: “Kudziwa kuti festa idayamba tani bziribe basa, koma cakufunika ni kupfatsa na adzinza pabodzi na axamwali wathu.”
-
Kodi imwepo munti tani?
KODI MWAPFUNZA CIYANI?
Yahova ambafuna kuti tikhale na nthawe yakuceza na adzinza na axamwali wathu. Tsono ambafuna kuti timbatcenkhe mafesta yomwe iye ambakomedwa lini nayo.
Mibvunzo yakubwerezera
-
Kodi tingabzicite mibvunzo iponi kuti tidziwe mafesta yomwe Yahova ambakomedwa lini nayo?
-
Kodi tingathandize tani adzinza na axamwali wathu kuti abvesese thangwe ranyi timbagumanika lini pa mafesta yanango?
-
Kodi timbadziwa tani kuti Yahova ambafuna kuti tikhale wakukondwa na wakupfatsa?
ONANI POMWE IBZI
Onani mafesta yanango yomwe Akristau an’funika lini kumbayacita.
“Thangwe Ranyi Mboni za Yahova Zimbacita Lini Mafesta Yanango?” (Nkhani ya pa jw.org)
Onani mathangwe manai yomwe yambaticitisa kukhulupira kuti Mulungu ambakomedwa lini na mafesta yakusekerera ntsiku yakubadwa.
“Thangwe Ranyi Mboni za Yahova Zimbasekerera Lini Ntsiku Yakubadwa?” (Nkhani ya pa jw.org)
Onani momwe wana omwe ambafuna Yahova angamukondwesere pa nthawe za mafesta.
Akristau azinji ambasekerera lini Natale. Kodi iwo ambabzibva tani thangwe ra bzimwebzi?
“Iwo Adagumana Cinthu Cabwino” (Ntsanza ya Mulindiri ya 1 Dezembro, 2012)
a Onani Mafala Yakuthumizira 5 kuti muwone bzomwe mungacite wanthu akakucemerani pa festa.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
