PFUNZIRO 46
Thangwe Ranyi Mun’funika Kubzipereka kwa Yahova Mucibatizidwa?
Imwepo mungabzipereke kwa Yahova mwa kumuuza mu mpembo kuti mun’dzatumikira iye yekha basi ndipo mun’dzaikha pa mbuto yakuyamba kufuna kwace pa moyo wanu. (Salimo 40:8) Patsogolo pace, imwepo mungadzabatizidwe. Kusankhula kubzipereka kwa Yahova ni cinthu cibodzi cakufunika kwene-kwene comwe tingacite. Kusankhula kucita bzimwebzi kungacinje kwene-kwene moyo wanu. Kodi n’ciyani comwe cingakuthandizeni kucita bzimwebzi?
1. Kodi n’ciyani comwe cimbacitisa munthu kufuna kubzipereka kwa Yahova?
Lufoyi ndiro limbaticitisa kufuna kubzipereka kwa Yahova. (1 Juwau 4:10, 19) Bibliya limbatiuza kuti: “Umbafune Yahova Mulungu wako na mtima wako wentse, moyo wako wentse, nzeru zako zentse na mphanvu zako zentse.” (Marko 12:30) Timbalatiza kuti timbafuna Mulungu na bzomwe timbacita sikuti na bzomwe timbalewa basi. Wanthu omwe ambafunana kwene-kwene ambadzafika pakulowolana, mpsibodzi-bodzimbo na lufoyi lathu kwa Yahova, iro limbaticitisa kuti tibzipereke kwa iye ticibatizidwa.
2. Kodi ni bzisimbo bziponi bzomwe Yahova ambapasa munthu akabatizidwa?
Imwepo mukabatizidwa, mun’dzacita mbali ya banja la Yahova. Mun’dzawona lufoyi lomwe iye analo kuna imwepo, ndipo mun’dzakhala naye pa uxamwali bwakulimba. (Werengani Malakiya 3:16-18.) Pakuti Yahova an’dzakhala pai wanu, imwepo mun’dzakhalambo na abale na mpfumakazi pa dziko lentse la pantsi, omwe ambafuna Yahovayo na imwepo kubodzi. (Werengani Marko 10:29, 30.) Tsono mukanati kubatizidwa mun’funika kucita bzinthu bzinango. Imwepo mun’funika kudziwa Yahova, kumufuna na kukhulupira Mwana wace. Mukamala kucita bzimwebzi, mungabzipereke kwa Yahova. Ndipo mukacita bzinthu bzimwebzi mucibatizidwa, bzin’dzakucitisani kukhala na moyo wamuyaya. Fala la Mulungu limbati: “Ubatizo . . . bukukupulumusani.” — 1 Pedru 3:21.
FUFUDZANI BZINANGO
Onani kuti n’thangwe ranyi mpsakufunika kwa imwepo kubzipereka kwa Yahova mucibatizidwa.
3. Munthu ali-wentse angasankhule omwe akufuna kumutumikira
Mu nthawe ya Ajirayeri, wanthu winango akhakumbuka kuti angatumikire Yahova na Baala kubodzi omwe akhali mulungu wakunama. Tsono Yahova adatumiza mpolofeta wace Eliya kuti akawathandize kucinja makumbukidwe yakuphonyekaya. Werengani 1 Amambo 18:21, ndipo mukamala cezeranani mbvunzo wakutewerayu:
-
Kodi Ajirayeri adasankhula kucita ciyani?
Ninga Ajirayeri, ifepano tingasankhule omwe tikufuna kumutumikira. Werengani Luka 16:13, ndipo mukamala cezeranani mibvunzo ikutewerayi:
-
Thangwe ranyi ifepano tin’funika kunamata Yahova basi sikuti munthu munango?
-
Kodi tingalatize tani kwa Yahova kuti tikufuna kunamata iye yekha?
4. Mbakumbukirani lufoyi lomwe Yahova analo kuna imwepo
Yahova adatipasa mphaso zizinji zabwino. Kodi ifepano tingam’pasembo ciyani? Onani VIDIYO.
Kodi Yahova ambalatiza tani kuti ambakufunani? Werengani Salimo 104:14, 15 na 1 Juwau 4:9, 10, ndipo mukamala cezeranani mibvunzo ikutewerayi:
-
Kodi ni mphaso ziponi za Yahova zomwe imwepo mumbakomedwa nazo kwene-kwene?
-
Kodi mumbabzibva tani na mphasozo pakulewa bza iye?
Wanthufe tikapasiwa mphaso yomwe timbaifuna, timbatenda kwene-kwene munthu omwe watipasayo. Werengani Deuteronomiyo 16:17, ndipo mukamala cezeranani mbvunzo wakutewerayu:
-
Imwepo mukakumbukira bzinthu bzentse bzomwe Yahova adakucitirani, kodi mumbafuna kum’pasambo ciyani?
5. Mukabzipereka kwa Yahova iye an’dzakusimbani kwene-kwene
Wanthu azinji ambakhulupira kuti akakhala na basa labwino, kobiri zizinji na wakubvekera an’dzakhala wakukondwa. Kodi bzimwebzi mpsacadidi? Onani VIDIYO, ndipo mukamala cezeranani mibvunzo ikutewerayi.
-
Munthu omwe wawonesedwa mu vidiyoyi akhafuna kwene-kwene kumenya bola, kodi n’ciyani comwe cidamucitisa kuti asiye?
-
Iye adasiya kumenya bola acibzipereka kwa Yahova. Kodi imwepo mukukumbuka kuti iye adacita bwino kusiya kumenya bolako? Thangwe ranyi?
Mpostolo Paulo akanati kukhala Mkristau akhana bzentse bzomwe bzingadamucitisa kukhala wakubvekera. Iye akhadapfunzisidwa malamulo ya Cidjuda na mpfunzisi wakudziwika kwene-kwene. Tsono iye adasiya bzentsenebzo kuti akhale Mkristau. Kodi Paulo adakhumbula? Werengani Afilipi 3:8, ndipo mukamala cezeranani mibvunzo ikutewerayi:
-
Thangwe ranyi Paulo adalewa kuti bzomwe akhacita akanati kukhala Mkristau bzikhali ninga “lixo?”
-
Kodi iye adaganyari ciyani thangwe ra kusiya moyo omwe akhanawo kale-kale?
-
Kodi imwepo mukuwona kuti moyo wanu ukhali bwino kale-kale ayai ntsiku zino pomwe mukutumira Yahova?
Pomwe Paulo adakhala Mkristau, adagumana bzisimbo bzizinji kuposa bzomwe adabzisiya
WANTHU WINANGO AMBALEWA KUTI: “Ndikudziwa kuti cimweci n’cadidi, koma bzin’funika lini kucita kubzipereka kwa Mulungu.”
-
Thangwe ranyi mukuwona kuti kubzipereka kwa Yahova n’kwakufunika?
KODI MWAPFUNZA CIYANI?
Lufoyi limbaticitisa kuti tibzipereke kwa Yahova ticibatizidwa.
Mibvunzo yakubwerezera
-
Thangwe ranyi tin’funika kumbanamata Yahova na kumufuna na mtima wathu wentse?
-
Kodi Yahova ambasimba tani munthu akabatizidwa?
-
Kodi imwepo mukufuna kubzipereka kwa Yahova?
ONANI POMWE IBZI
Onani bzomwe adacita muimbi na omwe akhacita mapici yakuthamanga munango kuti abzipereke kwa Yahova
Onani mathangwe manango yomwe yangakuthandizeni kuti mubzipereke kwa Yahova.
“Thangwe Ranyi Kubzipereka kwa Yahova n’Kwakufunika?” (Ntsanza ya Mulindiri ya 15 Janeiro, 2010)
Mu vidiyo ya nyimbo yakundobva, onani kukomedwa komwe wanthu adacita thangwe ra kubzipereka kwa Yahova.
Werengani nkhani ya moyo wangu ya msolo wakuti “Inepano Ndikhabzibvunza, ‘Thangwe Ranyi Tiri Pano?’” kuti muwone bzomwe bzidathandiza mkazi munango kuzindikira bzomwe akhafunika kuikha pa mbuto yakuyamba.
“Bibliya Limbacinja Moyo wa Wanthu” (Ntsanza ya Mulindiri ya 1 Novembro, 2012)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
