PFUNZIRO 48
Mbasankhulani Axamwali Wanu Mwanzeru
Mpsabwino kukhala na axamwali kuti timbapfatse nawo pa nthawe zabwino, nakuti ambatilimbikise pa nthawe zakunesa. Tsono Bibliya limbaticenjezambo kuti ni wanthu lini wentse omwe angakhale axamwali wabwino. Kodi mungasankhule tani axamwali wabwino? Mbaticezeraneni mibvunzo yakutsogoloyi.
1. Kodi axamwali omwe timbasankhula angaticitise kucita ciyani?
Kawiri-kawiri ifepano timbatewezera makhalidwe yabwino ayai yakuipa ya wanthu omwe timbamala nawo nthawe izinji, napo bzicikhala kuti ni pa mbuto yakucezera ya pa interneti. Bibliya limbati: “Omwe an’famba na wanthu wanzeru, an’dzakhalambo wanzeru; koma omwe an’cita bzinthu na apsiru, [ayai wale omwe ambafuna lini Yahova] bzin’dzamumalira kuipa.” (Mimwani 13:20) Axamwali omwe ambafuna Yahova na kumunamata angakuthandizeni kupitiriza kukhala pa uxamwali na Yahovayo na kusankhulambo bzinthu mwanzeru. Tsono axamwali omwe ambafuna lini Yahova angaticitise kufunduka kwa Yahovayo. Ndipopa Bibliya limbatilimbikisa kusankhula axamwali mwanzeru! Axamwali wathu akakhala ni wanthu omwe ambafuna Mulungu, tentse timbagumana phindu. Mwa njira imweyi timbakwanisa “kumbalimbikisana na kumbapasana mphanvu.” — 1 Atesalonika 5:11.
2. Kodi Yahova ambabva tani na momwe mumbasankhulira axamwali wanu?
Yahova ambasankhula bwino axamwali wace. Pakuti “Iye ambafuna munthu wakulungama.” (Mimwani 3:32) Kodi Yahova angabve tani ifepano tikasankhula kukhala pa uxamwali na munthu omwe ambamutumikira lini? Iye angasuname kwene-kwene! (Werengani Tiyago 4:4.) Tsono tikatcenkha kucita uxamwali na wanthu wakuipa ticisankhula axamwali omwe ambafuna Yahova, iye an’dzakomedwa nafe. — Salimo 15:1-4.
FUFUDZANI BZINANGO
Pfunzani kuti muwone thangwe ranyi mpsakufunika kusankhula bwino axamwali, ndipo onanimbo momwe mungakhalire na axamwali omwe angakuthandizeni.
3. Mpholeni na axamwali wakuipa
Wanthu omwe ambafuna lini Mulungu na mitemo yace ni axamwali wakuipa. Onani VIDIYO, ndipo mukamala cezeranani mbvunzo wakutewerayu.
-
Kodi tingayambe tani kubverana na wanthu wakuipa mwakusaya kuzindikira?
Werengani 1 Akolinto 15:33, ndipo mukamala cezeranani mibvunzo ikutewerayi:
-
Kodi ni wanthu aponi omwe angakhale axamwali wakuipa kwa imwepo? Thangwe ranyi?
Werengani Salimo 119:63, ndipo mukamala cezeranani mbvunzo wakutewerayu:
-
Kodi n’ciyani cingalatize kuti munthuyu ni xamwali wabwino?
Maçã ibodzi yakubvunda ingabvundise maçã manango. Kodi xamwali m’bodzi wakuipa angadzonge tani makhalidwe yanu?
4. Axamwali wathu an’funika lini kukhala wakundendemerana na ifepano
Bibliya limbalewa bza Davide na Jonatani omwe akhali wa mtundu wa Jirayeri wakale-kale. Jonatani akhali mwana wa mambo ndipo akhali mkulu kwene-kwene kuposa Davide, napo bzikhali tenepo awiriwo akhali pa uxamwali bwa ponda ndipondembo. Werengani 1 Samuweri 18:1, ndipo mukamala cezeranani mbvunzo wakutewerayu:
-
Thangwe ranyi axamwali wathu an’funika lini kukhala wa msinkhu ubodzi-bodzi na ifepano?
Werengani Aroma 1:11, 12, ndipo mukamala cezeranani mbvunzo wakutewerayu:
-
Kodi axamwali omwe ambafuna Yahova ambalimbikisana tani?
Mu vidiyoyi, onani momwe tswaka linango lidagumanira axamwali komwe iye akhadikhirira lini. Onani VIDIYO, ndipo mukamala cezeranani mibvunzo ikutewerayi.
-
Mu vidiyoyi, thangwe ranyi abereki wa Akil akhacita thupo na axamwali wace wa ku xikola?
-
Kodi n’ciyani comwe cidacitisa Akil kuyamba kucita ntsantsa na anzace wa ku xikola?
-
Kodi iye adakwanisa tani kukunda kupswoma komwe akhabva?
5. Kodi mungakhale tani na axamwali wabwino?
Onani momwe mungagumanire axamwali wacadidi na bzomwe mungacite kuti mukhale xamwali wabwino. Onani VIDIYO.
Werengani Mimwani 18:24 na 27:17, ndipo mukamala cezeranani mibvunzo ikutewerayi:
-
Kodi axamwali wacadidi ambathandizana tani?
-
Kodi imwepo munawo axamwali wabwino ninga amwewa? Penu ne, n’ciyani comwe mungacite kuti mukhalembo na axamwali wacadidi?
Werengani Afilipi 2:4, ndipo mukamala cezeranani mbvunzo wakutewerayu:
-
Kuti mukhale na axamwali wabwino, imwepo mun’funikambo kukhala xamwali wabwino. Kodi mungacite tani bzimwebzi?
Kuti mukhale na axamwali wabwino, imwepo mun’funikambo kukhala xamwali wabwino
WANTHU WINANGO AMBALEWA KUTI: “Bziribe basa wanthu omwe tingasankhule kukhala nawo pa uxamwali, koma bzakufunika ni kukhala na axamwali basi.”
-
Kodi mungati tani?
KODI MWAPFUNZA CIYANI?
Tikasankhula bwino axamwali wathu, timbakondwesa Yahova ndipo ifepanombo timbagumana phindu.
Mibvunzo yakubwerezera
-
Thangwe ranyi momwe timbasankhulira axamwali wathu n’kwakufunika kwa Yahova?
-
Mba axamwali aponi omwe tin’funika kuwatcenkha?
-
Kodi mungakhale tani pa uxamwali bwakulimba na wanthu omwe ambafuna Yahova?
ONANI POMWE IBZI
Onani momwe axamwali wabwino angatithandizire pa nthawe ya mabvuto.
Onani bzinthu bzomwe mungacite kuti musankhule axamwali wabwino.
Kodi n’ciyani comwe mun’funika kudziwa mukakhala muna axamwali pa mbuto zakucezera za pa interneti?
Khalani Wakusamala Pomwe Mukuphatisa Basa Mbuto Zakucezera za pa Interneti (4:12)
Kuti muwone bzomwe bzidacitisa munthu munango kuwona penu axamwali omwe akhanawo mbabwino, werengani nkhani yakuti: “Ndikhafunisisa Kugumana Pai.”
“Bibliya Limbacinja Moyo wa Wanthu” (Ntsanza ya Mulindiri ya 1 Abril, 2012)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
