PFUNZIRO 49
Kodi Banja Lanu Lingakhale Tani Lakukondwa? — Mbali 1
Wanthu omwe alowolana tsapanopa, ambadikhirira kuti anikhala na banja lakukondwa mpaka kale-kale ninga momwe akhaliri pa ntsiku ya malowozi yawo. Bzimwebzi bzingakwanisikedi, ndipo akristau omwe ali pa banja kwa magole mazinji, omwe ambacita nyongo yakuphatisa basa malango ya m’Bibliya ambadziwa kuti bzimwebzi bzimbakwanisika.
1. Kodi ni malango yaponi yomwe Bibliya limbapereka kwa amuna?
Yahova adaikha mwamuna ninga msolo wa banja. (Werengani Aefezo 5:23.) Yahova ambafuna kuti mwamunayo ambacite bzinthu bzomwe bzingathandize banja lace. Bibliya limbauza amuna kuti: “Pitirizani kumbafuna akazanu.” (Aefezo 5:25) Kodi mafala yamweya yakuthandauza ciyani? Mwamuna wa lufoyi ambacitira bzinthu mkazi wace mwakudeka mtima kumui na pomwe pana wanthu winango. Iye ambacita nyongo kuti akhotcerere mkazi waceyo, kumukondwesa na kumupasa bzentse bzomwe iye akufunikira pa moyo wace. (1 Timotio 5:8) Tsono kuposa bzentse, iye ambathandiza mkazi wace kukhala pa uxamwali bwakulimba na Yahova. (Mateu 4:4) Mwa ciratizo, iye ambapemba na kuwerenga Bibliya pabodzi na mkazace. Mwamuna akambasamalira mkazi wace mwa lufoyi, uxamwali bwace na Yahova bumbakhala bwakulimba. — Werengani 1 Pedru 3:7.
2. Kodi ni malango yaponi yomwe Bibliya limbapereka kwa akazi?
Bibliya limbauza akazi kuti “ambalemekezembo kwene-kwene amuna wawo.” (Aefezo 5:33) Kodi iwo angacite tani bzimwebzi? Mwa kumbakumbukira makhalidwe yabwino yomwe amuna wawo anayo na nyongo yomwe ambaicita pakusamalira iwo na wana wawo. Akazi angalemekezembo azibayawo mwa kuwathandiza pa bzinthu bzomwe ambapangana kucita, kulewalewa nawo mwa ulemu na kumbaceza nawo bwino napo akakhala kuti ni mtumiki lini wa Mulungu.
3. Kodi mabanja yangalimbise tani malowozi yawo?
Kwa mabanja Bibliya limbati: “Awiriwo an’dzakhala thupi libodzi.” (Mateu 19:5) Mafalaya yakuthandauza kuti iwo an’funika kulimbana na cinthu ciri-centse comwe cingamalise lufoyi lawo. Iwo angacite bzimwebzi mwakumbamala nthawe ikulu pabodzi akuceza, acimbafotokozerana makumbukidwe yawo mwakutsudzuka na mwa lufoyi. Ndipo iwo an’funika lini kubvuma kuti cinthu ciri-centse ayai munthu ali-wentse, kupambula Yahova, akhale wakufunika kwene-kwene kuposa mwanzawo wa m’banja. Ndipo iwo an’funika kutcenkha kufuna kwene-kwene munthu munango kupambula mwanzawo wa m’banja.
FUFUDZANI BZINANGO
Onani momwe malango ya m’Bibliya yangalimbisire malowozi yanu.
4. Amuna mbafunani na kusamalira akazi wanu
Bibliya limbalewa kuti “amuna ambafune akazi wawo ninga momwe ambafunira thupi lawo.” (Aefezo 5:28, 29) Kodi mafalaya yakuthandauza ciyani? Onani VIDIYO, ndipo mukamala cezeranani mbvunzo wakutewerayu.
-
Kodi mwamuna angalatize tani kuti ambafuna na kulemekeza mkazi wace?
Werengani Akolose 3:12, ndipo mukamala cezeranani mbvunzo wakutewerayu:
-
Kodi mwamuna angalatize tani makhalidweya m’banja mwace?
5. Akazi mbafunani na kulemekeza amuna wanu
Bibliya limbalimbikisa akazi kuti ambalemekeze amuna wawo napo kuti amunawo ambatumikira lini Mulungu. Werengani 1 Pedru 3:1, 2, ndipo mukamala cezeranani mibvunzo ikutewerayi:
-
Penu imwepo muna mwamuna omwe ambatumikira lini Mulungu, tikupenukira lini kuti mukufuna kuti iye atumikirembo Mulungu. Kodi mungamuthandize tani? Pinango mungakumbuke bza kumbacoka naye pabodzi mu utumiki, kumucitira bzinthu bza bwino na kukhala mkazi wa ulemu. Thangwe ranyi?
Mwamuna na mkazi angasankhule kucita bzinthu pabodzi. Tsono nthawe zinango mkazi angalambe kubverana na makumbukidweya mwamuna wace. Tsono iye angalewe makumbukidwe yace mwakugwa mpfuwa na mwa ulemu, acikumbukirambo kuti Yahova adapasa mwamuna udindo bwakusamalira banja lace. Mkaziyo angacite bzomwe angakwanise kuti athandizire makumbukidwe ya bayaceyo. Kucita bzimwebzi kun’dzacitisa kuti banja lawo likhale lakukondwa. Werengani 1 Pedru 3:3-5, ndipo mukamala cezeranani mbvunzo wakutewerayu:
-
Kodi Yahova ambabva tani akambawona kuti mkazi akulemekeza mwamuna wace?
6. Imwepo mungamalise mabvuto m’banja mwanu
Palibe banja lakulungama. Tenepo banja lingacite bzinthu pabodzi kuti limalise mabvuto. Onani VIDIYO, ndipo mukamala cezeranani mibvunzo ikutewerayi.
-
Kodi vidiyoyi yalatiza tani kuti banjali likhayamba kutalikirana?
-
Kodi n’ciyani comwe iwo acita kuti alimbise malowozi yawo?
Werengani 1 Akolinto 10:24 na Akolose 3:13. Mukamala cezeranani mbvunzo wakutewerayu:
-
Thangwe ranyi kuphatisa basa malangoya kungalimbise malowozi?
Bibliya limbalewa kuti timbalemekezane ndipo timbadekerane mtima. Werengani Aroma 12:10, ndipo mukamala cezeranani mibvunzo ikutewerayi:
-
Kodi mwamuna ayai mkazi an’funika kudikhirira mwanzace wa banja kuti ayambe ndiye kumbamulemekeza? Penu munti inde, thangwe ranyi? Ndipo penu munti ne, thangwe ranyi?
WANTHU WINANGO AMBALEWA KUTI: “Ine na mwanzangu wa m’banja tsapano timbabverana lini ninga momwe tikhaliri pakuyamba.”
-
Kodi imwepo mungawathandize tani wanthu amwewa mwakuphatisa basa Bibliya?
KODI MWAPFUNZA CIYANI?
Mwamuna na mkazi angakhale wakukondwa akambafunana, akambalemekezana na kuphatisa basa nfundo za m’Bibliya.
Mibvunzo yakubwerezera
-
Kodi mwamuna angacite tani kuti banja lace likhale lakukondwa?
-
Kodi mkazi angathandizire tani kuti banja lace likhale lakukondwa?
-
Penu imwepo muli pa banja, kodi ni mtemo uponi wa m’Bibliya omwe ungakuthandizeni kulimbisa banja lanu?
ONANI POMWE IBZI
Onani nfundo zomwe zingakuthandizeni kukhala na banja lakukondwa.
Onani vidiyo ya nyimbo yomwe ikulewa bza bzisimbo bzomwe mungatambire thangwe ra kuphatisa basa malango ya Mulungu m’banja mwanu.
Onani bzomwe bzimbathandauza kulemekeza mwamuna ninga msolo wa banja.
Onani momwe malango ya m’Bibliya yakulewa bza malowozi yangathandizire mabanja.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
