PFUNZIRO 50
Kodi Banja Lanu Lingakhale Tani Lakukondwa?—Mbali 2
Wana ni mphaso yakucokera kwa Yahova. Ndipo iye ambafuna kuti abereki aikonkhobze bwino mphaso imweyi. Yahova ambapasa abereki malango yomwe yangawathandize kucita bzimwebzi. Ndipo malangoyo yangathandizembo wana kudziwa bzomwe angacite kuti pamui pakhale na mbverano.
1. Kodi Yahova ambapereka malango yaponi kwa abereki?
Yahova ambafuna kuti abereki ambafune wana wawo na kukhalambo na nthawe ya kumbaceza nawo. (Mimwani 1:8) Iye ambauza abereki kuti: “Mbawalerani [wana wanu] . . . na kuwapfunzisa mwakubverana na kufuna kwa Yahova.” (Werengani Aefezo 6:4.) Yahova ambakomedwa abereki akambateweza malango yace pakulera wana wawo ndipo ambafuna lini kuti apase basa limweri munthu munango.
2. Kodi Yahova ambafuna kuti wana ambacite ciyani?
Yahova ambauza wana kuti: “Mbabverani abereki wanu.” (Werengani Akolose 3:20.) Wana akambalemekeza na kubvera abareki wawo, ambakondwesa Yahova na abereki wawo kubodzi. (Mimwani 23:22-25) Jezu adacitambo bzibodzi-bodzibzi pomwe akhali mwana. Iye akhabvera na kulemekeza abereki wace napo kuti iwo akhali wakuperewera ndipo iye akhali wakulungama. — Luka 2:51, 52.
3. Kodi banja lanu lingakhale tani pa uxamwali na Mulungu?
Penu muna wana, imwepo mukufuna kuti wana wanuwo ambafunembo Yahova ninga imwepo. Tsono mungacite tani bzimwebzi? Mwa kucita bzomwe Bibliya limbalewa: “Umbawauzisise wana wako [mafala ya Yahova]. Umbayalewe kwa wana wako pakukhala pantsi m’nyumba mwako na pakufamba pa mseu.” (Bzakutonga 6:7) Fala lakuti ‘kuuzisisa’ lin’funa kulewa kumbauza munthu mwakubwerezera-bwerezera. Mpsibodzi-bzodzimbo, imwepo mun’funika kumbabwerezera cinthu kwa wana wanu kuti akwanise kumbacikumbukira. Vesiri lin’funa kulewa kuti imwepo mun’funika kumbanyang’ana nthawe yakuti mumbaceze na wana wanu bza Yahova. Mpsabwino kwene-kwene kumbapambula nthawe sumana iri-yentse kuti mumbacite Kunamata kwa pa Banja. Penu mulibe wana bzingakhale bwino basi kumbapambula nthawe kuti mumbapfunze fala la Mulungu sumana iri-yentse.
FUFUDZANI BZINANGO
Onani bzomwe mungacite kuti mukhale na banja lakukondwa na lakukhotcerereka.
4. Pfunzisani wana wanu mwa lufoyi
Kupfunzisa mwana kudanesa. Kodi Bibliya lingakuthandizeni tani? Werengani Tiyago 1:19, 20 ndipo mukamala cezeranani mibvunzo ikutewerayi:
-
Kodi abereki angalatize tani kuti ambafuna wana wawo pomwe akuceza nawo?
-
Thangwe ranyi m’bereki an’funika lini kulanga mwana wace pomwe iye adakalipa? a
5. Khotcererani wana wanu
Kuti mukhotcerere wana wanu mpsakufunika kwene-kwene kumbaceza na mwana ali-wentse nkhani ya malume ya pa mphasa. Pinango imwepo mungabve manyazi. Onani VIDIYO, ndipo mukamala cezeranani mibvunzo ikutewerayi.
-
Thangwe ranyi abereki winango bzimbawanesa kuceza na wana wawo nkhani ya malume ya pa mphasa?
-
Kodi abereki winango ambacita ciyani kuti afotokozere wana wawo nkhani ya malume ya pa mphasa?
Bibliya likhadalewa kale kuti dziko la Sathanili lingadadzaipiratu kwene-kwene. Werengani 2 Timotio 3:1, 13, ndipo mukamala cezeranani mbvunzo wakutewerayu:
-
Wanthu winango wakuipa omwe akugumidwa pa vesi 13 ambafuna kupswitha wana. Tsono, thangwe ranyi mpsakufunika kuti abereki ambaceze na wana wawo nkhani ya malume ya pa mphasa na momwe angabzikhotcerere wanthu akufuna kuwapswitha?
Kodi mukhadziwa?
Mboni za Yahova zimbakonza bzinthu bzizinji kuti bzithandize abereki kupfunzisa wana wawo nkhani ya malume ya pa mphasa na bzomwe angacite kuti abzikhotcerere. Bzinango mwa ibzo mpsibzi:
-
Khotcererani Wana Wanu (vidiyo)
-
Phunzirani kwa Mphunzitsi Waluso, msolo 10 na 32
-
“Pfunzisani Wana Wanu Nkhani ya Malume ya pa Mphasa” (Mukani! N.° 5 2016)
6. Mbalemekezani abereki wanu
Wana ambalatiza kuti ambalemekeza abereki wawo akambalalewa nawo bwino. Onani VIDIYO, ndipo mukamala cezeranani mibvunzo ikutewerayi.
-
Thangwe ranyi mpsakufunika kuti mwana ambalalewe na abereki wace mwaulemu?
-
Kodi mwana angalatize tani kuti akulemekeza abereki wace pomwe akulalewa nawo?
Werengani Mimwani 1:8, ndipo mukamala cezeranani mbvunzo wakutewerayu:
-
Kodi mwana an’funika kucita ciyani abereki wace akamuuza bzakucita?
7. Mbanamatani Yahova pabodzi m’banja mwanu
Mabanja ya Mboni za Yahova yambapambula nthawe sumana iri-yentse kuti yanamate pabodzi Yahova. Kodi kunamata kumweku kumbacitika tani? Onani VIDIYO, ndipo mukamala cezeranani mibvunzo ikutewerayi.
-
Kodi n’ciyani comwe banja lingacite kuti limbacite Kunamata kwa pa Banja sumana iri-yentse?
-
N’ciyani comwe msolo wa banja an’funika kucita kuti Kunamata kwa pa Banja kukhale kwakudekeza na kwa phindu? — Onani cithunzi-thunzi cakuyambirira ca pfunziro lino.
-
N’ciyani comwe cingatazise banja lanu kupfunza pabodzi?
Kale-kale Yahova akhafuna kuti Mabanja ya Ajirayeri yambakhale na nthawe yakupfunza Fala lace? Werengani Bzakutonga 6:6, 7, ndipo mukamala cezeranani mbvunzo wakutewerayu:
-
Kodi imwepo mungaphatise tani basa mafala ya mavesiya?
Bzomwe mungacite pa kunamata kwa pa Banja:
-
Konzekerani mitsonkhano ya gwere.
-
Werengani mucicezerana nkhani ya m’Bibliya yomwe banja lanu linikomedwa nayo.
-
Penu muna mwana mng’ono, mungabaxari ayai mungadinde bzinthu bzomwe mwanayo angaphatise basa. Bzinthubzo bziri pa jw.org.
-
Penu muna wana omwe ni maswaka pfunzani nawo nkhani za maswaka zomwe ziri pa jw.org.
-
Mbayezezerani nkhani za m’Bibliya na wana wanu.
-
Onani mavidiyo ya pa jw.org mucicezerana bzomwe mwapfunza.
WANTHU WINANGO AMBALEWA KUTI: “Bibliya lidanesa kuti wana alibvesese.”
-
Kodi mungati tani?
KODI MWAPFUNZA CIYANI?
Yahova ambafuna kuti abereki ambafune, ambapfunzise na kukhotcerera wana wawo. Ndipo ambafunambo kuti wana ambalemekeze, na kubvera abereki wawo na kuti mabanja yambamunamate pabodzi.
Mibvunzo yakubwerezera
-
Kodi abereki angacite ciyani kuti akhotcerere na kupfunzisa wana wawo?
-
Kodi wana angalatize tani kuti ambalemekeza abereki wawo?
-
Kodi banja limbagumana phindu liponi likambapambula nthawe sumana iri-yentse kuti limbanamate Mulungu pabodzi?
ONANI POMWE IBZI
Kodi n’ciyani comwe cingathandize wana wanu kuti bzinthu bzidzawafambire bwino akadzakula?
“Nfundo Zitanthatu Zomwe Wana An’funika Kupfunza” (Mukani! N.° 2 2019)
Onani malango ya m’Bibliya yomwe yangathandize wale omwe akuthandiza abereki wawo omwe mbakukalamba.
“Kodi Bibliya Limbati Tani pa Nkhani ya Kuthandiza Abereki Omwe Mbakukalamba?” (Nkhani ya pa jw.org)
Onani comwe cidathandiza pai omwe akhadziwa lini kuti angadalera tani wana wace, kukhala pai wabwino kwene-kwene.
Onani bzomwe abereki angacite kuti ambabverane kwene-kwene na wana wawo.
a Mu Bibliya fala lakuti “kulanga” limbalewa bza kupfunzisa, kutsogolera na kutsimula. Iro limbafuna lini kulewa bza kuboneresa ayai kucita gulungo. — Mimwani 4:1
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
