PFUNZIRO 56
Khalani Wakuphatana m’Gwere
Tikakhala tiri pakati pa abale wathu, timbabzibva ninga momwe adabvera Mambo Davide, iye adati: “Mpsabwino, ndipo mpsakudekeza Abale kukhala pabodzi mwakuphatana!” (Salimo 133:1) Ciphatano cathu cimbandobwerambo lini tenepoyo. Ali-wentse wa ifepano tin’funika kucita nyongo kuti tikhale wakuphatana.
1. N’ciyani cimbadabwisa mu gulu la Yahova?
Imwepo mucikatsonkhana ku dziko linango, mun’kabzibva kuti muli pamui, napo kuti mumbadziwa lini cirewedwe ca kumweko. Thangwe ranyi? Thangwe timbapfunza Bibliya mwakuphatisa basa mabukhu mabodzi-bodzi pa dziko lentse la pantsi. Ndipo ifepano timbacita nyongo ya kulatizana lufoyi cairo. Bziribe basa komwe timbakhala, tentsenefe “timbacemera dzina la Yahova, ticimutumikira mwakuphatana.” — Zefaniya 3:9.
2. Kodi n’ciyani comwe mungacite kuti mulimbikise ciphatano?
“Mbafunanani na mtima wentse.” (1 Pedru 1:22) Kodi mungacite tani bzimwebzi? Lekani kumbandowona bzakuphonya bza winango, koma mbakhalani tceru kuti muwone makhalidwe yawo yabwino. M’mbuto mwa kumbandoceza na wanthu omwe ambafuna bzomwe imwepo mumbafunambo, yezerani kudziwa abale omwe ambafuna bzinthu bzakusiyana na imwepo. Ifepano tin’funika kucita nyongo kuti timalise tsankhulo. — Werengani 1 Pedru 2:17. a
3. Kodi n’ciyani comwe mungacite mukaphonyerana na Mkristau mwanzanu?
Ifepano ndife wakuphatana, koma ndifembo wakuperewera. Nthawe zinango tingakalipisane. Tenepo, Bibliya limbatiuza kuti: “Pitirizani . . . kulekererana na mtima wentse,” limbalewambo kuti: “Ninga momwe Yahova adakulekererani na mtima wentse, imwepo mucitembo bzibodzi-bodzibzo.” (Werengani Akolose 3:13.) Ifepano takalipisa Yahova mwakubwereza-bwereza, ndipo iye ambatilekerera. Tenepo iye ambafuna kuti ifepanombo timbalekerere abale wathu. Mukazindikira kuti mwakalipisa munthu munango, yambani ndimwepo kucita ciri-centse kuti mukhazikise mtendere. — Werengani Mateu 5:23, 24. b
FUFUDZANI BZINANGO
Onani bzomwe mungacite kuti muthandizire mtendere na ciphatano m’gwere.
Kodi mun’dzacita ciyani kuti mukhazikise mtendere?
4. Kundani tsankhulo
Tin’funika kulatiza lufoyi kwa abale wathu wentse. Tsono bzingakhale lini bzakupusa kufuna munthu omwe tikuwona kuti ngwakusiyana na ifepano. N’ciyani cingatithandize? Werengani Mabasa 10:34, 35, ndipo mukamala cezeranani mibvunzo ikutewerayi:
-
Yahova ambabvuma wanthu wa mtundu uli-wentse kuti akhale Mboni zace. Kodi bzimwebzi bzikukucitisani kuwona tani wanthu omwe mbakusiyana na imwepo?
-
Kodi ni mtundu uponi wa tsankhulo omwe ulipo kwanuko omwe mun’funika kuutcenkha?
Werengani 2 Akolinto 6:11-13, ndipo mukamala cezeranani mbvunzo wakutewerayu:
-
Kodi mungapfunze tani kufuna abale na mpfumakazi zentse omwe mbakusiyana na imwepo?
5. Lekererani na mtima wentse ndipo khazikisani mtendere
Yahova ambatilekerera na mtima wentse napo kuti iye ambaphonya lini kuti ifepano timulekererembo. Werengani Salimo 86:5, ndipo mukamala cezeranani mibvunzo ikutewerayi:
-
Kodi Yahova ambalekerera mpaka paponi?
-
Thangwe ranyi imwepo mumbatenda kulekerera kwa Yahova?
-
Kodi ni bzinthu bziponi bzomwe bzingaticitise kutazira kubverana na wanthu winango?
Kodi tingatewezere tani Yahova ticipitiriza kukhala wakuphatana na abale pabodzi na mpfumakazi zathu? Werengani Mimwani 19:11, ndipo mukamala cezeranani mbvunzo wakutewerayu:
-
Kodi munthu munango akakuphonyerani ayai kukukalipisani, n’ciyani comwe mungacite kuti nkhaniyo ileke kukula?
Nthawe zinango timbaphonyera winango. Bzimwebzi bzikacitika, n’ciyani comwe tingacite? Onani VIDIYO, ndipo mukamala cezeranani mbvunzo wakutewerayu.
-
Mu vidiyoyi, n’ciyani comwe mpfumakaziyi yacita kuti ikhazikise mtendere?
6. Mbawonani makhalidwe yabwino ya abale na mpfumakazi
Tikambamala nthawe itali na abale pabodzi na mpfumakazi zathu, timbafika pa kudziwa makhalidwe yawo yabwino na kuwofoka kwawo. Kodi tingakwanise tani kumbawona makhalidwe yawo yabwino? Onani VIDIYO, ndipo mukamala cezeranani mbvunzo wakutewerayu.
-
Kodi n’ciyani cingakuthandizeni kuti mumbakwanise kuwona makhalidwe yabwino ya abale na mpfumakazi?
Yahova ambanyang’anisa makhalidwe yathu yabwino. Werengani 2 Nkhani 16:9a, ndipo mukamala cezeranani mbvunzo wakutewerayu:
-
Kodi mumbabva tani mukadziwa kuti Yahova ambanyang’anisa makhadwe yanu yabwino?
Diyamante yakudeka imbakhalambo na mbuto zinango zomwe ziri lini bwino-bwinoletu, napo bziri tenepo ni mwala wakufunika basi. Mpsibodzi-bodzimbo, abale wanthu wentse mbakuperewera, koma iwo mbakufunika kwene-kwene kwa Yahova
WANTHU WINANGO AMBALEWA KUTI: “Kuti munthu ndimulekerere cakuyamba iye an’funika kundikumbira diskulupa.”
-
Thangwe ranyi tinʼfunika lini kumbakumbuka tenepoyo?
KODI MWAPFUNZA CIYANI?
Imwepo mungathandizire ciphatano m’gwere mwa kumbalekerera na kulatiza lufoyi kwa abale na mpfumakazi.
Mibvunzo yakubwerezera
-
Kodi imwepo mungakunde tani tsankhulo?
-
Kodi n’ciyani comwe mungacite mukakhala mwaphonyerana na Mkristau mwanzanu?
-
Thangwe ranyi imwepo mukufuna kutewezera ciratizo ca Yahova cakulekerera winango?
ONANI POMWE IBZI
Pfunzani momwe ciratizo ca Jezu cingakuthandizireni kutcenkha kumbawona kuipa winango.
Kodi tin’funikira kupepesa napo tikuwona kuti tiribe kuphonya cinthu?
“Kupepesa Kumbathandiza Kuti Tikhazikise Mtendere” (Ntsanza ya Mulindiri ya 1 Novembro, 2002)
Onani momwe amuna awiri omwe akhanesana thangwe ra tsankhulo adacinjira acikhala wakubverana.
Johny na Gideon: Pakuyamba Akhali Anyamadulanthaka, Tsapano ni Axamwali (6:42)
Onani momwe mungamalisire kusaya kubvesesana na munthu pomwe bzimwebzi bzikanati kudzonga mtendere m’gwere.
“Kumalisa Kusaya Kubvesesana na Mzimu wa Lufoyi” (Ntsanza ya Mulindiri ya Maio, 2016)
a Mafala Yakuthumizira 6 lufoyi limbacitisa Akristau kucita thupo na thanzi la winango, bzimwebzi bzimbaphatanidza kucita mphole kuti aleke kupasira anzawo matenda yakupasirana.
b Mafala Yakuthumizira 7 cezeranani bzomwe mungacite pakakhala pana mulandu wa malonda ayai nkhani zomwe zingafunikire kutongedwa pakati pa abale.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
