PFUNZIRO 01
Kodi Bibliya Lingakuthandizeni Tani Kukhala na Moyo Wabwino?
Tentsenefe timbakhala na mibvunzo pa moyo wathu yakulewa bza mabvuto, infa na tsogolo lathu. Ndipo tentsenefe timbacita thupo na bzinthu bza ntsiku na ntsiku, ninga momwe tingabzisamalirire na kukhala na banja lakukondwa. Wanthu azinji akuzindikira kuti Bibliya lina mitawiro ya mibvunzo yakufunika kwene-kwene. Kuthumizira bzimwebzi, iro lina malango yomwe yangatithandize kukhala na moyo wakukondwa. Kodi imwepo mukuwona kuti Bibliya lingathandize munthu munango omwe mumbamudziwa?
1. Kodi ni mibvunzo inango iponi yomwe Bibliya limbatawira?
Bibliya limbatawira mibvunzo yakufunika kwene-kwene. Mwa ciratizo, iro limbatawira mibvunzo ninga iyi: Kodi moyo udayamba tani? Thangwe ranyi tina moyo? Thangwe ranyi ifepano timbabonera? Kodi n’ciyani cimbacitika munthu akafa? Wanthu azinji ambafuna mtendere, tsono thangwe ranyi kukucitika nkhondo? Kodi n’ciyani cin’dzacitika na dziko la pantsi? N’kuphonyeka lini kucita mibvunzo ninga imweyi. Wanthu azinji azindikira kuti mitawiro ya m’Bibliya njakuthandiza.
2. Kodi Bibliya lingatithandize tani kukhala na moyo wakukondwa?
Bibliya lina malango yabwino. Mwa ciratizo, iro limbathandiza mabanja kukhala yakukondwa. Ndipo limbatiuza bzomwe tingacite tikakhala tasunama na momwe tingakhalire wakukondwa pa basa lathu. Bukhu limweri lin’kuthandizani kudziwa bzomwe Bibliya limbapfunzisa pakulewa bza nkhani zimwezi na zinango. Pinango imwepo mungatawirize kuti ‘mafala yentse [ayai Bibliya lentse] lina . . . phindu.’—2 Timotio 3:16.
Bukhu limweri ni Bibliya lini. Koma linkuthandizani kulidziwa bwino Bibliya. Ndipopa citani nyongo kuti muwerenge mavesi ya m’Bibliya yomwe yakugumanika m’bukhuli. Ndipo ndendemezerani na bzomwe Bibliya limbalewa na bzomwe mukupfunza.
FUFUDZANI BZINANGO
Onani momwe Bibliya limbathandizira wanthu, momwe imwepo mungakomedwere pakuwerenga Bibliyalo ndipo onanimbo thangwe lomwe imwepo mukufunikira thandizo kuti mubvesese bzomwe iro limbalewa.
3. Bibliya lingatitsogolere
Bibliya liri ninga ceza ca lanterna. Iro lingatithandize kucita bzinthu bzabwino ndipo limbalewa bzomwe bzin’dzacitika kutsogolo.
Werengani Psalymo 119:105, ndipo mukamala cezeranani mibvunzo yakutewerayi:
-
Kodi munembi wa vesi limweri akhaliwona tani Bibliya?
-
Kodi imwepo mumbaliwona tani Bibliya?
4. Bibliya limbatawira mibvunzo yomwe tingakhale nayo
Onani momwe Bibliya lidathandizira mpfunzisi munango kugumana mitawiro ya mibvunzo yomwe akhanayo kwa magole mazinji. Latizani VIDIYO, ndipo mukamala cezeranani mibvunzo yakutewerayi.
-
Mu vidiyo yomwe tawonayi, kodi mpfunzisiyu akhana mibvunzo iponi?
-
Kodi kupfunza Bibliya kudamuthandiza tani?
Bibliya limbatilimbikisa kuti timbafufudze mitawiro ya mibvunzo yomwe tingakhale nayo. Werengani Mateu 7:7, ndipo mukamala cezeranani mbvunzo wakutewerayu:
-
Kodi ni mibvunzo iponi yomwe mukufuna kuti Bibliya likutawireni?
5. Imwepo mungakomedwe mukambawerenga Bibliya
Wanthu azinji ambafuna kuwerenga Bibliya, ndipo akugumana phindu kwene-kwene. Latizani VIDIYO, ndipo mukamala cezeranani mibvunzo yakutewerayi:
-
Thangwe ranyi maswaka yomwe tayawona mu vidiyoyi, yakhafuna lini kumbawerenga Bibliya?
-
Tsono n’ciyani comwe iwo acita kuti ayambe kumbafuna kuwerenga Bibliya?
Mafala ya m’Bibliya yambatitsangalaza ndipo yambatipasa cidikhiro. Werengani Waroma 15:4, ndipo mukamala cezeranani mbvunzo wakutewerayu:
-
Kodi mungafune kudziwa bzizinji pa bzomwe Bibliya limbalewa pa nkhani ya mtsangalazo na cidikhiro?
6. Wanthu winango angatithandize kubvesesa Bibliya
Wanthu azinji azindikira kuti kumbaceza bza m’Bibliya na wanthu winango kumbathandiza kwene-kwene, m’mbuto mwakumbawerenga okha. Werengani Mabasa 8:26-31, ndipo mukamala cezeranani mbvunzo wakutewerayu:
-
Kodi tingacite tani kuti timbalibvesese Bibliya? —Onani vesi 30 na 31.
Mwamuna wa ku Etiyopiya akhafunikira thandizo kuti abvesese bzinembo. Wanthu azinji ntsiku zino, ambawonambo kuti mpsakuthandiza kwene-kwene kuceza bza m’Bibliya na wanthu winango
WANTHU WINANGO AMBALEWA KUTI: “Kupfunza Bibliya n’kundotaya nthawe.”
-
Kodi imwepo munti tani? Ndipo thangwe ranyi?
KODI MWAPFUNZA CIYANI?
Bibliya lina malango yomwe yambatithandiza ntsiku na ntsiku, limbatawira mibvunzo yakufunika kwene-kwene ndipo limbatipasambo mtsangalazo na cidikhiro.
Mibvunzo yakubwerezera
-
Kodi Bibliya limbapereka malango pa nkhani ziponi?
-
Kodi ni mibvunzo inango iponi yomwe Bibliya limbatawira?
-
Kodi ni nkhani ziponi za m’Bibliya zomwe imwepo mukufunisisa kuzipfunza?
ONANI POMWE IBZI
Onani momwe malango ya m’Bibliya njakuthandizira ntsiku zino.
Onani momwe malango ya m’Bibliya yadathandizira mwamuna munango, kulimbana na makumbukidwe yakuipa kuyambira pomwe akhali mwana.
Onani malango ya m’Bibliya yomwe yangakuthandizeni kukhala na banja lakukondwa.
“Bzinthu 12 Bzomwe Bzingathandize Kuti Banja Likhale Lakukondwa” (Mukani! N.º 2 2018)
Onani momwe Bibliya limbabvekesera bwino, kuti mbani omwe akutonga dzikoli.
Thangwe Ranyi Tin’funika Kupfunza Bibliya?—Vidiyo Yentse (3:14)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
