Yahova ambafuna kuti mwamuna na mkazi wakulowolana ambateweze lumbiro lawo lakukhala pabodzi. Pomwe Yahova adalowoza Adamu na Eva, iye adati: ‘Mwamuna . . . an’dzaphatana na mkazace, ndipo awiriwo an’dzakhala thupi libodzi.’ Patsogolo pace, Jezu Kristu adadzabwerezera mafalaya, acithumizira kuti: ‘Tenepo, comwe Mulungu wacimanga pabodzi, munthu aleke kucilekanisa.’ (Ciyambo 2:24; Mateu 19:3-6) Tenepo, Yahova na Jezu ambafuna kuti banja limbakhalise, licimala pokha-pokha akafa m’bodzi pa awiriwo. (1 Wakolinto 7:39)  Pakuti malowozi njakupambulika, wanthu an’funika lini kuipepusa nkhani ya kulambana. Yahova ambawenga kuti wanthu ambalambane na thangwe lomwe limbalewedwa lini m’Bibliya.—Malakiya 2:15, 16.

Kodi Bibliya limbalewa kuti wanthu angalambane na thangwe liponi? Yahova ambawenga upombo na unzazi. (Ciyambo 39:9; 2 Samuweri 11:26, 27; Psalymo 51:4) Iye ambaipidwa kwene-kwene na upombo, ndipo munthu akacita upombo, limwero limbakhala thangwe lakubveka lakuti mwanzace alambane naye. (Kuti mudziwe bza thandauzo la unzazi, onani m’bukhu lino Msolo 9, ndime 7) Yahova ambapasa munthu wakusaya kuphonyayo ufulu bwakusankhula kulambana ayai kupitiriza kukhala pabodzi na mwanzace wa m’banja omwe wacita upomboyo.   (Mateu 19:9) Tenepo, munthu wakusaya kuphonyayo akasankhula kulambana na mwanzaceyo, ankucita lini cinthu cakuipa. Tsono, nthawe zinango munthu wakusaya kuphonyayo angasankhule kupitiriza kukhala na mwanzace omwe wacita upomboyo, maka-maka penu iye wakungula mwakucokera pansi pa mtima. Wanthu omwe ana thangwe lakulambana na mwanzawo mwakubverana na thangwe lakulewedwa m’Bibliya, iwo an’funika kucita kusankhula wokha bzomwe angacite, acibvumambo bzakutewera bzomwe bzingawoneke thangwe ra cakusankhula cawoco.—Wagalata 6:5.

Tsono, nthawe zinango bzinthu bzimbaneseratu, mwakuti Akristau winango ambasankhula kupumirana ayai kulambana na mwanzawo napo kuti mwanzawoyo alibe kucita upombo. Bzimwebzo bzikacitika, Bibliya limbalewa kuti munthu omwe ankusiya mwanzaceyo ‘apitirize kukhala wakusaya kulowola, [ayai wakusaya kulowodwa]. Tsono penu an’kwanisa lini, abwererane na mwamuna [ayai mkazi] waceyo.’ (1 Wakolinto 7:11) Mkristau omwe an’cita bzimwebzi, an’funika lini kunyang’ana mwamuna ayai mkazi munango kuti amange naye banja. (Mateu 5:32) Mbatiwoneni bzinthu bzomwe bzingacitise kuti munthu asankhule kupumirana na bayace ayai mkazace.

Kusaya kusamalira banja. Banja lingabonere kwene-kwene, thangwe rakuti mwamuna ankusamalira lini mwa kuthupi banja lace, napo palibe comwe cingamutazise kucita bzimwebzo. Bibliya limbalewa kuti: ‘Penu munthu ambasamalira lini wanthu . . . wa m’banja lace, iye ambalamba cikhulupiro, ndipo ngwakuipa kuposa munthu omwe alibe cikhulupiro.’ (1 Timotio 5:8) Penu  mwamunayo ankulamba kucinja, mkazi waceyo angasankhule kusiyana naye mwakubverana na malamulo ya boma kuti akhotcerere moyo wace na wa wana wace. Ndipo, mkazi akadandaula kuti bayace omwe ni Mkristau ankulamba kusamalira banja lace, akulu an’funika kuiwona bwino nkhaniyo. Munthu angacosedwe m’gwere akalamba kumbasamalira banja lace mwakuthupi.

Ciwembo. Munthu wa ciwembo ambaboneresa mwanzace mwakuti angaikhe pa ngozi thanzi ayai moyo wa mwanzaceyo. Penu munthu omwe ambacita ciwemboyo ni Mkristau, akulu an’funika kuifufudza nkhaniyo kuti adziwe penu bziridi tenepoyo ayai nee. Munthu angacosedwe m’gwere akambacitira ciwembo anzace pabodzi na kumbacita bzinthu mwa ukali.—Wagalata 5:19-21.

Kuletsa mwanzace kunamata Yahova. Nthawe zinango, munthu angatazise mkazace ayai bayace kunamata Yahova ayai kumukakamiza kusaya kubvera bzakutonga bza Mulungu. Bzimwebzi bzikambacitika, munthu omwe ankucitiridwa bzimwebzoyo angasankhule kupumirana na mwanzaceyo mwakubverana na malamulo ya boma kuti abvere ‘Mulungu ninga mtongi, kuposa wanthu.’—Mabasa 5:29.

Bzikaneseratu, bzicifika ninga momwe tawoneramu, palibe omwe angafunikire kukamiza munthu omwe bzinkumucitikirayo kuti alekane ayai apitirize kukhala pabodzi na mwanzaceyo. Napo anzathu wakukhwima mwauzimu pabodzi na akulu wa m’gwere angafune kuthandiza na kuperekambo malango ya m’Bibliya, iwo angadziwe lini bzense bzomwe bzingakhale bzinkucitika pakati pa mwamuna na mkazi waceyo. Yahova yekha ndiye omwe angawone bzense bzomwe bzinkucitikabzo. Tsono, kungakhalembo lini kulemekeza Mulungu ayai malowoziyo penu mwamuna ayai mkazi omwe ni Mkristau an’fotokoza mabvutoyo mwakunyanyirira na cakulinga cakuti alekane basi na mwanzaceyo. Yahova ambadziwiratu thangwe liri-lense lomwe lingacitise kuti wanthu alekane, bziribe basa penu m’bodzi wa iwo aniyezera kubisa. ‘Bzinthu bzense bziri padeca, ndipo iye ambakwanisa kubziwona bwino-bwino. Ndipo, ifepano tin’dzatawira pa bzakucita bzathu kwa Mulungu omwe ambawona bzenseyo.’ (Wahebereu 4:13) Tsono, mabvuto makulu yakapitiriza, palibe omwe an’funika kutsutsa penu Mkristau omwe ankuwawidwayo an’sankhula kupumirana na mwanzaceyo. Tikumbukire kuti kutsogoloku, ‘tensenefe tin’dzaima patsogolo pa mpando wakuyeruzira mulandu wa Mulungu.’—Waroma 14:10-12.