MSOLO 1
Bzomwe Bzimbathandauza Kufuna Mulungu
‘Pakuti kufuna Mulungu kumbathandauza kusunga bzakutonga bzace; ndipo bzakutonga bzacebzo mpsakulemera lini.’—1 JUWAU 5:3.
1, 2. Kodi n’ciyani cimbakucitisani kuti mufune Yahova?
KODI imwepo mumbafuna Mulungu? Penu mudabzipereka kale kwa Yahova Mulungu, ndiye kuti mtawiro wanu ni inde. Mpsabwino kuti ifepano timufune Yahova. Ifepano timbamufuna thangwe iye ndiye adatoma kutifuna. Bibliya limbati: ‘Ifepano timbalatiza lufoyi thangwe iye ndiye omwe adayamba kutifuna.’—1 Juwau 4:19.
2 Yahova ndiye omwe adayamba kutilatiza lufoyi lace. Iye adatipasa dziko lakudeka kuti likhale mui wathu. Iye ambatisamalira mwa kuthupi. (Mateu 5:43-48) Ndipo kuposa bzensebzi, iye ambatisamalira mwauzimu. Iye adatipasa Fala lace, Bibliya. Kuthumizira bzimwebzi, iye ambatiuza kuti timbamupembe na citsimikizo cakuti an’dzatibva, acitipasa mzimu wace wakucena kuti utithandize. (Psalymo 65:2; Luka 11:13) Ndipo kuposa bzense, iye adatumiza Mwana wace wakufunika kwene-kwene kuti adzatilombole ku pikado na infa. Imweyi ni njira ikulu yomwe Yahova adalatizira kuti ambatifuna!—Werengani Juwau 3:16; Waroma 5:8.
3. (a) Kodi tingacite ciyani kuti tipitirize kufunidwa na Mulungu? (b) Nguponi mbvunzo wakufunika kwene-kwene omwe tin’funika kubzibvunza, ndipo kodi mtawiro wace umbagumanika kuponi?
3 Yahova an’funa kuti tigumane phindu na lufoyi lace mpaka muyaya. Tsono penu tin’dzagumanadi phindulo ayai ne, bzina ifepano. Fala la Mulungu limbatiuza kuti: ‘Pitirizani kucita bzinthu bzomwe bzingacitise kuti Mulungu akufuneni . . . kuti mudzatambire moyo wakusaya kumala.’ (Juda 21) Fala lakuti ‘pitirizani’ limbalatiza kuti tin’funika kucita cinthu kuti tipitirize kufunidwa na Mulungu. Tenepo, mbvunzo wakufunika kwene-kwene kwa ifepano nguyu: ‘Kodi tingalatize tani lufoyi lathu kwa Mulungu?’ Mtawiro wace umbagumanika pa mafala ya mpostolo Juwau yomwe yambati: ‘Pakuti kufuna Mulungu kumbathandauza kusunga bzakutonga bzace; ndipo bzakutonga bzacebzo mpsakulemera lini.’ (1 Juwau 5:3) Tingacite bwino kubvesesa thandauzo la mafalaya, thangwe tin’funa kulatiza kwa Mulungu wathu momwe timbamufunira kwene-kwene.
BZOMWE BZIMBATHANDAUZA KUFUNA MULUNGU
4, 5. Fotokozani momwe lufoyi lanu kuna Mulungu lidayambira kukula mu mtima mwanu.
4 ‘Kodi mpostolo Juwau akhafuna kulewa ciyani na mafala yakuti ‘kufuna Mulungu’? Iye akhalewa bza lufoyi lakucokera pansi pa mtima lomwe munthu ali-wense angalatize kwa Mulungu. Kodi mungaikumbukire nthawe yomwe lufoyi lanu kwa Yahova lidayamba kukula mu mtima mwanu?
Kubzipereka na batismo n’ciyambi ca kubvera Yahova mwa lufoyi
5 Kumbukirani pomwe mudayamba kupfunza cadidi cakulewa bza Yahova na bzakulinga bzace, muciyamba kumukhulupira. Mudayamba kubvesesa kuti napo mudabadwa na pikado yomwe imbakutalikisani na Mulungu, Yahova mwakuphatisa basa Kristu, adafungula njira kuti imwepo mudzakhale na moyo wakulungamiratu omwe Adamu adauluza, mucidzakhalambo na moyo wakusaya kumala. (Mateu 20:28; Waroma 5:12, 18) Imwepo mudayamba kutenda bzomwe Yahova adacita mwa kutumiza Mwana wace wakufunidwa kwene-kwene kuti adzakufereni. Mudatokonyedwa mu mtima na bzimwebzi, muciyamba kumufuna Mulungu omwe adalatiza kuti ambakufunani kwene-kwene.—Werengani 1 Juwau 4:9, 10.
6. (a) Kodi lufoyi la cadidi limbalatizidwa tani? (b) Kodi lufoyi lanu kwa Mulungu lidakulimbisani kucita ciyani?
6 Cimweco cikhali ciyambi ca lufoyi lanu lacadidi kwa Mulungu. Tsono lufoyi la cadidi si kundolewa kokha kuti: “Inepano ndimbafuna Yahova.” Ninga momwe bziriri na cikhulupiro, lufoyi la cadidi limbalatizidwa na bzicito. (Tiyago 2:26) Lufoyi la kulatizidwa na bzicito ndiro lomwe limbakondwesa munthu omwe timbamufunayo. Tenepo, pomwe lufoyi lanu kuna Yahova lidakhazikika mu mtima mwanu, imwepo mudalimbisidwa kuti mufune kukhala na moyo wakukondwesa Baba wanu wa kudzulu. Kodi imwepo ndimwe Mboni yakubatizidwa? Penu mun’ti inde, ndiye kuti lufoyi lakucokera pansi pa mtima pabodzi na kukhulupirika kwanu kwa Mulungu, ndibzo bzidacitisa kuti mubzipereke kwa iye. Imwepo mudabzipereka kwa Yahova kuti mucite kufuna kwace, ndipo mudalatiza bzimwebzo mwa kubatizidwa. (Werengani Waroma 14:7, 8.) Kuteweza piciro lakufunikali kwa Yahova, bzimbaphatanidza kucita bzomwe mpostolo Juwau adalewa patsogolo pace.
‘KUSUNGA BZAKUTONGA BZACE’
7. (a) Kodi mpsiponi bzakutonga bzinango bza Mulungu? (b) Kodi bzimbaphatanidzambo ciyani kusunga bzakutonga bzimwebzi?
7 Mpostolo Juwau adafotokoza bzomwe bzimbathandauza kufuna Mulungu; iye adati: ‘Kufuna Mulungu kumbathandauza kusunga bzakutonga bzace.’ Kodi mpsiponi bzakutonga bza Mulungu? Yahova ambatipasa bzakutonga bzizinji m’Fala lace, Bibliya. Mwa ciratizo iye ambaletsa bzinthu ninga kuledzera, kucita bza unzazi, kupemba bzifanikiso, kuba na kunama. (1 Wakolinto 5:11; 6:18; 10:14; Wayefezo 4:28; Wakoloso 3:9) Kusunga bzakutonga bza Mulungu kumbaphatanidzambo kukhala na moyo wakubverana na mitemo ya m’Bibliya yakulewa bza makhalidwe yabwino.
8, 9. Kodi tingadziwe tani bzinthu bzomwe bzimbakondwesa Yahova napo penu m’Bibliya mulibe cakutonga cakuletsa ayai kubvumiza bzinthu bzimwebzo? Perekani ciratizo.
8 Tsono kuti tikondwese Yahova tin’funika lini kundobvera kokha bzakutonga bzomwe bzimbabvumiza ayai kuletsa cinthu padeca. Yahova ambatilemesa lini na bzakutonga kuti bzimbatitsogolere pa mbali zense za moyo wathu. Tenepo, pa moyo wathu wa nsiku na nsiku, ifepano tingagumane na bzinthu bzomwe mu Bibliya mulibe bzakutonga bzakuletsa ayai kubvumiza bzinthu bzimwebzo. Pa bzakucitika ninga bzimwebzo, kodi tingadziwe tani bzomwe tingacite kuti tikondwese Yahova? Bibliya limbalatiza padeca momwe Mulungu ambawonera bzinthu. Pomwe tinkupfunza Bibliya, tin’dzadziwa bzinthu bzomwe Yahova ambafuna na bzomwe iye ambawenga. (Werengani Psalymo 97:10; Mimwani 6:16-19) Tin’dzafikambo pakuyazindikira makhalidwe pabodzi na bzicito bzomwe iye ambafuna. Tikapfunza kwene-kwene bza makhalidwe na njira za Yahova, pamwepo tin’dzakwanisambo kulekerera kuti makumbukidwe yace yambatsogolere bzakusankhula na bzicito bzathu. Tenepo, napo pa bzinthu bzomwe bziribe cakutonga cace m’Bibliya, ifepano tingazindikire basi kuti ‘kufuna kwa Yahova’ n’kuponi.—Wayefezo 5:17.
9 Mwa ciratizo, Bibliya liribe bzakutonga bzakuletsa ayai kubvumiza mafilime ayai programa za pa TV zomwe zimbalatiza wanthu ankumenyana ayai kugonana. Tsono, kodi tin’funikiradi cakutonga cakubvumiza ayai cakuletsa kuwona bzinthu bzimwebzi? Ifepano tin’dziwa momwe Yahova ambawonera bzinthu bzimwebzi. Fala lace limbatiuziratu padeca kuti: ‘[Yahova] ambawenga kwene-kwene ali-wense omwe ambafuna ciwembo.’ (Psalymo 11:5) Iro limbalewambo kuti: ‘Mulungu an’dzayeruza amzazi na anyaupombo.’ (Wahebereu 13:4) Mwa kukumbukira mafala yakufuliziridwa na Mulunguya, ifepano tingazindikire bwino-bwino kuti kufuna kwa Yahova n’kuponi. Tenepo ifepano tin’dzasankhula lini kusenzeka na bzithunzi-thunzi bzakulatiza bzinthu bzomwe Mulungu wathu ambawenga. Ifepano timbadziwa kuti Yahova ambakomedwa tikambatcenkha makhalidwe yakuipa yomwe dzikoli limbawona ningati si masenzeka yomwe yambadzonga. *
10, 11. Thangwe ranyi timbasankhula kubvera Yahova, ndipo timbamubvera pa bzinthu bziponi?
10 Kodi ndiponi thangwe lakuyamba lomwe limbacitisa kuti tifune kubvera bzakutonga bza Mulungu? Thangwe ranyi nsiku zense timbafuna kukhala na moyo wakubverana na makumbukidwe ya Mulungu? Timbasankhula lini kucita bzimwebzi kuti tisaye kulangidwa ayai kuti titcenkhe mabvuto yomwe yambabwera thangwe ra kusaya kucita kufuna kwa Mulungu. (Wagalata 6:7) M’mbuto mwace, ifepano timbawona kuti kubvera Mulungu ni mpata ukulu wakulatiza kuti timbamufuna. Ninga momwe mwana wakulungama ambafunira kukondwesa baba wace, ifepano timbafunambo kuti Yahova akomedwe nafe. (Psalymo 5:12) Iye ni Baba wathu, ndipo ifepano timbamufuna. Palibe comwe cimbatikondwesa kwene-kwene kuposa kudziwa kuti tinkukhala na moyo omwe Mulungu ‘ambakomedwa naye.’—Mimwani 12:2.
11 Ifepano timbabvera nthawe zense mwakusaya kung’ung’udzika; ndipo timbasankhula lini kubvera bzomwe bzin’tidekera, ticireka kubvera bzomwe bzin’tidekera lini. * Koma ifepano timbabvera ‘mwakucokera pansi pa mtima.’ (Waroma 6:17) Timbabva ninga momwe munembi wa psalymo adabvera pakunemba kuti: ‘Ndin’dzakondwa na bzakutonga bzanu, inde, ndimbabzifuna.’ (Psalymo 119:47) Inde, ifepano timbafuna kubvera Yahova. Timbazindikira kuti iye adathemera, ndipo an’funa kuti timubvere na mtima wathu wense. (Bzakutonga 12:32) Tin’funa kuti Yahova alewe bza ifepano, mafala mabodzi-bodzi yomwe Bibliya limbalewa bza Nowe. Pakulewa bza munthu wakukhulupirikayu, omwe adalatiza kuti akhafuna Mulungu mwa kumubvera kwa magole mazinji, Bibliya limbati: ‘Ndipo Nowe adacita bzense ninga momwe Mulungu adamuuzira. Adacitadi tenepoyo.’—Ciyambo 6:22.
12. Kodi Yahova ambakomedwa na kubvera kwa mtundu uponi?
12 Kodi Yahova ambabva tani tikambamubvera mwakucita kufuna? Fala lace limbalewa kuti bzimwebzi ‘bzimbakondwesa mtima wace’. (Mimwani 27:11) Kodi kubvera kwathu kumbakondwesadi mtima wa Mbuya wathu wa cirengedwe cense? Inde kumbamukondwesa, ndipo na manthagwe yabwino! Yahova adatilenga kuti tikhale na ufulu bwa kusankhula. Bzimwebzi bzimbathandauza kuti tingasankhule kubvera Mulungu ayai ne. (Bzakutonga 30:15, 16, 19, 20) Tsono, tikasankhula kubvera Yahova mwakucita kufuna, ndipo penu tin’cita bzimwebzo na lufoyi lakucokera pansi pa mtima, Baba wathu wa kudzulu an’dzakondwa kwene-kwene. (Mimwani 11:20) Tikambacita bzimwebzi, timbakhalambo tinkusankhula njira yabwino pa moyo wathu.
‘BZAKUTONGA BZACEBZO MPSAKULEMERA LINI’
13, 14. Thangwe ranyi tingalewe kuti ‘bzakutonga bza Mulungu mpsakulemera lini’, ndipo tingayezeze tani bzimwebzi?
13 Mpostolo Juwau adalewa nfundo yakulimbisa kwene-kwene yakulewa bzomwe Yahova an’funa. Iye adati: ‘Bzakutonga bzacebzo mpsakulemera lini.’ * Bzakutonga bza Yahova si bzakulemera ayai bzakupondereza. Wanthu wakuperewerafe tingakwanise kubvera bzakutonga bza Mulungu.
14 Tingandendemezere tenepa. Tiyezezere kuti xamwali wanu ankufuluka, ndipo ankukukumbirani kuti mumunyamuze mitolo. Iye ana mitolo mizinji kuti anyamule. Pana mitolo yomwe njakulula ndipo inganyamulidwe na munthu m’bodzi, tsono mitolo minango njakulemera, ndipo pangafunike wanthu awiri kuti anyamule. Ndipo xamwali wanuyo ankusankhula mitolo kuti imwepo mumuthandize kunyamula. Kodi iye angakukumbireni kuti munyamule mitolo yomwe an’dziwa kuti njakulemera kwene-kwene? Ne. Iye angafune lini kuti imwepo mubzitcole pakuyeza kunyamula mwekha mitoloyo. Bzibodzi-bodzimbo, Mulungu wathu wabwino na wa lufoyi ambatikumbira lini kubvera bzakutonga bzomwe mpsakunesa kuteweza. (Bzakutonga 30:11-14) Iye cipo acidzatipasa mtolo omwe tingakwanise lini kunyamula. Yahova ambadziwa malire yathu, pakuti ‘iye ambadziwa bwino kaumbidwe kathu, ambakumbukira kuti ndife pfumbi.’—Psalymo 103:14.
15. Thangwe ranyi tingakhulupire kuti bzakutonga bza Yahova mpsabwino kwa ifepano?
15 Bzakutonga bza Yahova bzimbalemera lini na pang’onopo; koma bzimbatipasa phindu kwene-kwene. (Werengani Zaiya 48:17.) Ndipopa Mozeji adauza Ajirayeri kuti: ‘Yahova adatitonga kuti timbateweze malango yenseya, timbagope Yahova Mulungu wathu, ticigumana phindu nthawe zense, kuti tikhale na moyo ninga momwe bziriri lero.’ (Bzakutonga 6:24) Ifepanombo tingakhulupire kuti Yahova ambatipasa bzakutonga bzace, thangwe iye an’funa kuti bzinthu bzitifambire bwino. Kodi ndibzo lini bzomwe tingadikirire kwa iye? Yahova ni Mulungu wa nzeru zakusaya malire. (Waroma 11:33) Tenepo, iye ambadziwa bzomwe mpsabwino kwa ifepano. Ndipombo Yahova ni lufoyi. (1 Juwau 4:8) Bzense bzomwe iye ambacita na kulewa, bzimbatsogoledwa na lufoyi. Lufoyiro ndiro limbatsogolera bzakutonga bzomwe iye ambapereka kwa atumiki wace.
16. Napo timbalimbana na mapumpso ya m’dziko lakuipali pabodzi na thupi rathu lakuperewera, thangwe ranyi tingakwanise basi kukhala wanthu wakubvera?
16 Tsono bzimwebzi bzin’funa lini kulewa kuti mpsakupusa kubvera Yahova. Ifepano timbalimbana na mapumpso ya m’dziko lakuipali lomwe ‘liri m’manja mwa nyakuipayo’. (1 Juwau 5:19) Ndipo timbalimbanambo na thupi rathu lakuperewera lomwe limbacitisa kuti tifune kuphonya bzakutonga bza Mulungu. (Waroma 7:21-25) Tsono lufoyi lathu kwa Mulungu lingakunde. Yahova ambasimba wanthu omwe ambalatiza kuti ambamufuna mwa kumubvera. Iye ambapereka mzimu wace wakucena ‘kwa wanthu womwe ambamubvera ninga mtongi.’ (Mabasa 5:32) Mzimu umweyu umbabala bzisapo bzabwino mwa ifepano, bzomwe ni makhalidwe yakufunika kwene-kwene yomwe ingatithandize kukhala wanthu wakubvera.—Wagalata 5:22, 23.
17, 18. (a) Kodi tin’cezerana ciyani mu bukhu lino, ndipo tin’funika kukumbukira bzinthu bziponi? (b) Kodi tin’dzacezerana ciyani mu msolo wakutsogoloyu?
17 Mu bukhu lino, tinicezerana mitemo ya Yahova na bzakutonga bzace, pabodzi na bzinthu bzinango bzomwe bzingatinthandize kuzindikira bzomwe Yahova ambafuna. Pomwe tinkupfunza bzimwebzo, tin’funika kukumbukira bzinthu bzinango bzakufunika kwene-kwene. Tikumbukire kuti Yahova ambatikakamiza lini kubvera bzakutonga bzace pabodzi na mitemo yace; iye ambafuna kuti timbamubvere mwakucita kufuna, kucokera pansi pa mtima. Tireke kuyebwa kuti bzomwe Yahova ambatiuza bzin’dzatibweresera bzisimbo bzizinji nsiku zino, na moyo wakusaya kumala kutsogoloku. Ndipo timbawonembo kuti kubvera Yahova na mtima wense ni mpata ukulu kwene-kwene wakulatiza kuti timbamufuna na mtima wathu wense.
18 Kuti atithandize kusiyanisa cabwino na cakuipa, Yahova mwa lufoyi adatipasa cikumbu-mtima. Tsono kuti cikumbu-mtima cathu cimbatitsogolere bwino, tin’funika kumbacipfunzisa, ninga momwe msolo wakutsogoloyu unifotokozera.
^ ndi. 9 Onani Msolo 6 wa bukhu lino kuti mudziwe bza momwe tingasankhulire masenzeka yabwino.
^ ndi. 11 Napo madimonyo caiyo yangabvere Mulungu mwakung’ung’udzika. Pomwe Jezu adauza madimonyo kuti yacoke m’thupi mwa wanthu winango, madimonyoyo yadaumirizidwa kuzindikira mphanvu ya Jezu, yacimubvera, napo yakhafuna lini.—Marko 1:27; 5:7-13.
^ ndi. 13 Pa Mateu 23:4, fala limweri limbaphatisidwa basa pakulewa bza ‘mitolo,’ yomwe ni mitemo na miyambo yomwe anembi na Afalizeu akhapereka kwa mbumba. Pa Mabasa 20:29, 30, fala libodzi-bodziri lidanembedwa kuti ‘kupondereza’, lomwe limbalewa bza anyakupanduka womwe akhambapondereza anzawo mwa kulewalewa bzinthu bzakubendeka, acimbalinga kusoceresa anzawo.
