1, 2. Kodi Mulungu adatipasa mphaso iponi, ndipo thangwe ranyi njakufunika kwene-kwene?

MULUNGU, omwe ni Baba wathu wa kudzulu, adatipasa mphaso yakufunika kwene-kwene yomwe ni moyo wathuyu. Ndipo moyowo umbatipasa nzeru zomwe zimbatithandiza kulatiza makhalidwe yace. (Ciyambo 1:27) Ndipo nzeruzo zimbatithandizambo kubvesesa mitemo ya m’Bibliya. Tikambaphatisa basa mitemoyo, ifepano tin’dzakhala wanthu wakukhwima mwauzimu, omwe ambafuna Yahova. Ndipo mwakuphatisa basa nzeru zathuzo, tin’dzakwanisa kuzipfunzisa kuti zimbasiyanise ‘cakuipa na cabwino.’—Wahebereu 5:14.

² Mpsakufunika kwene-kwene kubvesesa mitemo ya m’Bibliya, maka-maka m’nsiku zino, pakuti m’dzikoli muna mabvuto mazinji mwakuti mpsakukwanisika lini kukhala na bzakutonga bzomwe bzingatithandize kumalisa mabvuto yense yomwe tingagumane nayo. Umboni bwa bzimwebzi ni nkhani za mankhwala pabodzi na njira za ulapi zomwe zimbafunikira kuphatisa basa mulopa. Imweyi ni nkhani yakufunika kwene-kwene kwa wanthu wense omwe ambafuna kubvera Yahova. Tikabvesesa bwino-bwino mitemo ya m’Bibliya, ifepano tin’dzakwanisa kucita bzakusankhula mwa nzeru, bzomwe bzingatithandize kukhala na cikumbu-mtima cabwino, ticipitiriza kufunidwa na Yahova. (Mimwani 2:6-11) Mbatiwoneni mitemo inango yomwe iripo.

3, 4. Kodi ni nthawe iponi yomwe Mulungu adayamba kulewa kuti mulopa ukhali cinthu cakupambulika kwene-kwene? Nguponi mtemo omwe umbatsogolera bzimwebzo?

³ Pomwe Kaini adapha m’bale wace Abeli, pamwepo Yahova adayamba kulewa kuti moyo na mulopa ni bzinthu bzakupambulika,  ndipo bzidabverana. Mulungu adati kwa Kaini: ‘Tetekera! Mulopa wa m’bale wako ukundilirira kucokera pansipo.’ (Ciyambo 4:10) Kwa Yahova, mulopa wa Abeli ukhaimira moyo wace, omwe udacosedwa mwa ciwembo. Tenepo, tingalewe kuti mulopa wa Abeli ukhalirira Mulungu kuti Mulunguyo amucitire cirungamo.—Wahebereu 12:24.

⁴ Pambuyo pa cigumula ca madzi ca mu nsiku za Nowe, Mulungu adabvumiza wanthu kumbadya nyama. Tsono iye alibe kuwabvumiza kudya mulopa. Mulungu adati: ‘Lekani kudya nyama pabodzi na mulopa wace, omwe ni moyo wace. Ndipo kuthumizira bzimwebzi, ndin’dzasunda mulopa wa moyo wanu.’ (Ciyambo 9:4, 5) Cakutonga cimweci cikhafunika kutewezedwa na mibadwo yense ya Nowe mpaka mu nthawe zathu zino. Cakutongaci cimbatsimikizira bzomwe Mulungu adauza Kaini kuti mulopa umbaimira moyo wa munthu ayai cirombo. Ndipo cimbatsimikizirambo kuti Yahova, omwe ni mweneciro moyo, an’dzapfudza wanthu wense omwe ambalemekeza lini moyo na mulopa.—Psalymo 36:9.

5, 6. Kodi Cakutonga ca Mozeji cikhalatiza tani kuti mulopa ukhali cinthu cakupambulika kwene-kwene? (Onanimbo kwadru ya msolo wakuti “ Mbalemekezani Moyo wa Bzirombo.”)

⁵ Nfundo ziwirizi zikhalewedwambo m’Cakutonga ca Mozeji. Pa Mwambo 17:10, 11 pambati: ‘Penu munthu ali-wense wa m’nyumba ya Jirayeri ayai mulendo wakukhala pakati panu anidya mulopa uli-wense, ndin’dzaikha nkhope yangu pa iye, ndipo ndin’dzapfudza munthu umweyo pakati pa wanthu wa mtundu wace. Thangwe moyo wa cirombo uli m’mulopa, ndipo ine ndakuikhirani mulopa pa mphatso ya nsembe kuti ukumpsinkhireni pikado, pakuti mulopa ndiwo umbampsinkha pikado, thangwe moyo uli m’mulopa.’ *—Onani kwadru yakuti “ Mulopa Una Mphanvu Yakumpsinkha Pikado”

⁶ Mulopa wa cirombo comwe caphedwa, penu ukhali lini kuti uikhidwe pa mphatso, mulopayo ukhafunikira kufuciridwa pansi. Kucita bzimwebzo, bzikhali ninga kubwezera moyo wa ciromboco kwa Mwenekaciro. (Bzakutonga 12:16; Zakiyeri 18:4) Dziwanimbo kuti Ajirayeri akapha nyama kuti adye, iwo akhafunikira lini  kucita kuwonesesa kuti mulopa wense wamala kucoka. Koma ciromboco cikaphedwa, cicicosedwa mulopa mu njira yakuthemera, Ajirayeriwo angadadya nyama yaceyo na cikumbu-mtima cabwino, pakuti kucita bzimwebzo kukhali kulemekeza Mulungu omwe adapasa moyo ciromboco.

7. Kodi Davide adalatiza tani kuti akhalemekeza mulopa?

⁷ Mambo Davide, omwe akhali munthu wakufunidwa kwene-kwene  na Mulungu, adabvesesa nfundo zomwe zikhatsogolera Cakutonga ca Mulungu cakuletsa kudya mulopa. (Mabasa 13:22) Pa nthawe inango Davide adabva nyota kwene-kwene, ndipo amuna atatu adaikha moyo wawo pa ngozi kuti akamutungire madzi m’tsasa la anyamadulanthaka wawo. Kodi Davide adatani na bzomwe iwo adacitabzo? Iye adati: ‘Ndingamwe inepano mulopa wa amunawa omwe aikha moyo wawo pa ngozi kuti akwanise kutunga madziya?’ Davideyo adawona kuti kumwa madziyo kukhali ninga kumwa mulopa wa amunawo. Tenepo, napo akhana nyota, iye ‘adapereka madziyo kwa Yahova mwa kuyathululira pansi.’—2 Samuweri 23:15-17.

8, 9. Kodi Mulungu adacinja momwe iye ambawonera moyo na mulopa pambuyo pakukhazikisa gwere Lacikristau? Fotokozani.

⁸ Patapita magole 2.400 kucokera pomwe Yahova adauza Nowe kuti aleke kumbadya mulopa, na pambuyo pa magole 1.500 kucokera pomwe ukhadakhazikisidwa mpangano wa Cakutonga, Yahova adauza bungwe lakutonga la Akristau wakuyambirira linembere magwere kuti: ‘Pakuti mzimu wakucena pabodzi na ife tawona kuti bziri bwino tileke kukusenzesani mtolo wakulemera, kupambula bzinthu bzokhabzi bzakufunika, bzomwe ni kupitiriza kutcenkha bzinthu bzakuperekedwa ninga nsembe kwa bzifanikiso, mulopa, bzakucita kuponyongoledwa, na upombo.’—Mabasa 15:28, 29.

⁹ Bzinkuwonekeratu padeca kuti bungwe lakutonga lakuyambirira lidazindikira kuti mulopa ni cinthu cakupambulika, ndipo kuuphatisa basa mwakuphonyeka ni pikado yakundendemerana na kunamata bzifanikiso ayai kucita upombo. Akristau wacadidi wa nsiku zino ambatewezambo nfundo imweyi. Ndipo, thangwe ra kutsogoleredwa na mitemo ya m’Bibliya, Yahova ambakomedwa nawo akambacita bzakusankhula bzabwino pa nkhani ya mulopa.

10, 11. (a) Kodi Mboni za Yahova zimbaiwona tani nkhani ya kucosa ayai kuikhidwa mulopa pabodzi na bzigawo bzinai bzakuyambirira bza mulopa? (b) Kodi ni mbali ziponi za mulopa zomwe Akristau angasankhule wokha kubvuma ayai kulamba?

¹⁰ Mboni za Yahova zimbazindikira kuti ‘kutcenkha . . . mulopa’ kumbathandauza kulamba kuikhidwa mulopayo, pabodzi na  kulamba kuucosa kuti ukoyedwe ayai kuti uikhidwe m’thupi mwa wanthu winango. Ndipo pakubvera cakutonga ca Mulungu pa nkhani imweyi, iwo ambabvuma lini kuikhidwa bzigawo bzinai bzakuyambirira bza mulopa, bzomwe ni maselula mafuira, maselula macena, maselula yakukhotesa mulopa na madzi ya m’mulopa.

¹¹ Nsiku zino, bzimbakwanisikambo kuti bzigawo bzinaibzi, bzigawidwe pomwe m’tumagawo tung’ono-tung’ono tomwe tungaphatisidwe basa mu njira zakusiyana-siyana. Kodi Mkristau angabvume kuikhidwa tumagawo tumweto? Kodi angafunikire kutuwona ninga “mulopa”? Mkristau ali-wense an’funika kusankhula yekha bzomwe angacite pa nkhani imweyi. Ndipo an’funikambo kusankhula yekha kubvuma njira zaulapi zomwe zimbafunikira kuphatisa basa mulopa wa munthuyo mwakusaya kuukoya pa mbali. Njira zimwezo ni kusefa mulopa, kusungunusa mulopayo na kupulumusa maselula ya mulopa.—Onani Nkhani Zakuthumizira pa msolo wakui “Bzigawo bza Mulopa na Njira Zakucitira Operasau.”

12. Kodi tin’funika kucita ciyani pa nkhani zomwe zimbafunikira kuphatisa basa cikumbu-mtima cathu kuti ticite cakusankhula?

 ¹² Kodi kukhala na ufulu bwakusankhula tekha cinthu, n’kulewa kuti cinthuco n’cakufunika lini kwene-kwene pamaso pa Yahova? Nee, pakuti iye anabzo basa bzakukumbuka bzathu pabodzi na bzomwe bziri mu mtima mwathu. (Werengani Mimwani 17:3; 24:12.) Tenepo, pambuyo pa kupemba na kufufudza mankhwala pabodzi na mtundu wa ulapi uli-wense, ifepano tin’dzafunikira kubvera cikumbu-mtima cathu cakupfunzisidwa na Bibliya. (Waroma 14:2, 22, 23) Wanthu winango an’dzafunikira lini kutiuza bzomwe iwo ambakumbuka, ndipo ifepano tin’dzawabvunzambo lini kuti: “Mungadakhala imwepo mungadacita tani?” Pa nkhani ninga zimwezi, Mkristau ali-wense an’funika ‘kunyamula yekha mtolo wace.’ *—Wagalata 6:5; Waroma 14:12; onani kwadru yakuti “ Kodi Ndimbawona Mulopa Kukhala Wakupambulika?”

13. Kodi Mitemo na bzakutonga bzakugumanika m’Bibliya bzimbalatiza ciyani pakulewa bza Yahova? Perekani ciratizo.

¹³ Mitemo na Bzakutonga bza Yahova bzakugumanika m’Bibliya bzimbalatiza kuti iye ambapereka bzakutonga bzanzeru, nakuti iyembo ni Baba wa lufoyi omwe ambacita thupo na ubwino bwa wana wace. (Psalymo 19:7-11) N’cadidi kuti cakutonga cakuti titcenkhe mulopa, ciribe kuperekedwa pa nthaweyo kuti citonge nkhani za ulapi. Tsono, kucibvera kumbatithandiza kutcenkha matenda yakusiyana-siyana yomwe yangabwere thangwe ra kuikhidwa mulopa. (Mabasa 15:20) Ndipo, adotolo azinji ambalewa kuti kucita operasau mwakusaya kuphatisa basa mulopa, ndiyo njira yabwino kwene-kwene nsiku zino kuti athandizire nayo atenda. Nfundo imweyi imbatsimikizira Akristau wacadidi kuti Yahova ni Mulungu wanzeru zakusaya malire na Baba wa lufoyi.—Werengani Zaiya 55:9; Juwau 14:21, 23.

14, 15. (a) Kodi mpsiponi bzakutonga bzomwe bzimbalatiza kuti Mulungu akhacita thupo na moyo wa wanthu wace? (b) Kodi mungaphatise tani basa mitemo yomwe ikhatsogolera bzakutonga bzimwebzi?

¹⁴ Bzakutonga bzizinji bza Mulungu bzimbalatiza kuti iye  akhacita thupo na moyo wa wanthu wace, Ajirayeri. Mwa ciratizo, iye akhafuna kuti Ajirayeri ambamange mpanda wakuzungulira mtsodzi za nyumba zawo kuti atcenkhe ngozi, thangwe iwo akhambacitira mabasa yakusiyana-siyana pa mtsodzipo. (Bzakutonga 22:8; 1 Samuweri 9:25, 26; Nehemiya 8:16; Mabasa 10:9) Mulungu akhadawauzambo kuti ng’ombe zaukali zikhafunikira kumbanyang’niridwa bwino. (Kufuluka 21:28, 29) Munthu akasaya kubvera cakutonga cimweci, akhalatiza kuti akhalemekeza lini moyo wa anzace, ndipo bzikhacitisa kuti akhale na mulandu wa mulopa.

¹⁵ Kodi mungaphatise tani basa mitemo yomwe ikhatsogolera bzakutonga bzimwebzi? Mungacite bwino kwene-kwene kukumbukira momwe mumbafambisira kanderendere wanu, momwe bziriri bzifuwo bzanu, momwe iriri nyumba yanu, momwe iriri mbuto yanu ya basa pabodzi na mtundu wa bzinthu bzomwe mumbafuna kusenzeka nabzo. M’madziko manango, maswaka yambafa pa ngozi zakusiyana-siyana. Bzimwebzi bzimbacitika kawiri-kawiri thangwe maswakayo yambacita bzinthu mwakusaya kusamala. Tsono, maswaka yomwe yambafuna kupitiriza kufunidwa na Mulungu yambalemekeza moyo, ndipo yambacita lini bzinthu bzomwe bzingaikhe moyo wawo pa ngozi. Tenepo, iyo yambasamala, yacitcenkha kucita bzinthu bzomwe bzingawabweresere mabvuto.—Mpalizi 11:9, 10.

16. Kodi nguponi mtemo wa m’Bibliya omwe ungaphatisidwe basa pa nkhani ya kucosa mimba? (Onanimbo mafala ya m’nyansi.)

¹⁶ Napo moyo wa mwana omwe akanati kubadwa ngwakufunika kwene-kwene kwa Mulungu. Mu Jirayeri wakale, munthu akapweteka mkazi omwe akhana pathupi, akafa mkaziyo ayai mwana omwe akhali m’mimbayo, Mulungu akhawona kuti munthuyo ni nyakupha, ndipo akhafunikirambo kuphedwa kuti alipire moyo omwe waluzidwayo. * (Werengani Kufuluka 21:22, 23.) Penu bzinthu  bzikhali tenepoyo, tsono kumbukirani momwe Yahova ambabvera akambawona wana azinji ankuphedwa thangwe ra akazi omwe ambacosa mimba pa gole liri-lense! Ndipo azinji wa iwo ambacita bzimwebzi thangwe ra kukhala wanthu wakubzifuna wokha na wakufunambo kucita bza unzazi.

17. Kodi mungatsangalaze tani munthu omwe adacosa mimba pomwe akhanati kupfunza Bibliya?

 ¹⁷ Tsono, tani bza munthu omwe adacosa mimba pomwe akhanati kupfunza Bibliya? Kodi tingalewe kuti munthu umweyo alibe kuthemera kulekereredwa na Mulungu? Nee! Penu munthuyo ambadandaula na bzomwe adacitabzo, Yahova angamulekerere thangwe ra mulopa wa Jezu. (Psalymo 103:8-14; Wayefezo 1:7) Ndipopa Jezuyo adati: ‘Ndabwera kudzacemera sikuti wanthu wakulungama, koma anyakuphonya kuti akungule.’—Luka 5:32.

18. Kodi mwakubverana na Bibliya, n’ciyani cimbacitisa kuti wanthu aphane?

¹⁸ Yahova ambandofuna lini kuti timbatcenkhe kupweteka anzathu, koma ambafunambo ticose ciwengo mu mtima mwathu thangwe ciwengoco cimbacitisa kuti wanthu azinji aphe anzawo. Mpostolo Juwau adati: ‘Ali-wense omwe ambawenga m’bale wace, ngwakupha munthu.’ (1 Juwau 3:15) Munthu umweyo ambandomuwenga lini m’bale waceyo, koma ambafunambo kuti iye aferetu. Ciwengo caceco cingacitise kuti iye amulewere mwanzaceyo magunkha ayai kumunamizira bzinthu mwakuti bzicikhala bzacadidi, nyakunamiziridwayo angathemere kulangidwa na Mulungu. (Mwambo 19:16; Bzakutonga 19:18-21; Mateu 5:22) Tenepo, mpsakufunika kwene-kwene kuti ticoseretu ciwengo ciri-cense mu mtima mwathu!—Tiyago 1:14, 15; 4:1-3.

19. Kodi munthu omwe ambatsogoleredwa na mitemo ya m’Bibliya ambaziwona tani nfundo zakulewedwa pa Psalymo 11:5 na Wafiripo 4:8, 9?

¹⁹ Wanthu omwe ambalemekeza moyo ninga momwe Yahova ambacitira, na omwe ambafuna kuti apitirize kufunidwa na iye, ambatcenkha ciwembo ca mtundu uli-wense. Pa Psalymo 11:5 pambati: ‘[Mulungu] ambawenga kwene-kwene ali-wense omwe ambafuna ciwembo.’ Mafalaya yakundolewa lini bza khalidwe la Mulungu basi, koma ni mtemombo omwe un’funika kutitsogolera, omwe ungacitise kuti munthu omwe ambafuna Mulungu awenge kusenzeka na bzinthu bza ciwembo. Ndipo kudziwambo kuti Yahova ni ‘Mulungu wa mtendere’ bzimbathandiza atumiki wace kudzaza mitima yawo na bzinthu bzabwino bzomwe bzimbabweresa mtendere.—Werengani Wafiripo 4:8, 9.

20-22. Kodi Akristau ambawona tani bzinthu bzomwe bzimbacitika m’dzikoli, ndipo thangwe ranyi?

²⁰ Pamaso pa Mulungu, dziko lense la Sathaniri lina mulandu wa mulopa. Maboma mazinji yomwe m’Bibliya yambaimiridwa na bzirombo bzakulusa, yadapha wanthu azinjisa, kuphatanidzambo atumiki wa Yahova. (Danyeri 8:3, 4, 20-22; Cibvumbulutso 13:1, 2, 7, 8) Wanthu omwe ambacita malonda pabodzi na omwe ambapfunza bza siyensiya, ambaphata basa pabodzi na maboma mwa kukonza na kuwagulisira bzifuzo bza nkhondo bzamphanvu kwene-kwene, acicita nabzo kobiri zizinji. Ndipopa, n’kunama lini kuti ‘dziko lense liri m’manja mwa nyakuipayo.’—1 Juwau 5:19.

²¹ Pakuti anyakupfunza wa Jezu ambacita lini ‘mbali ya dziko,’ iwo ambatcenkha kupitira nkhani za ndale na nkhondo, pabodzi na kutcenkha kucita mbali m’gulu liri-lense lomwe lina mulandu wa mulopa. * (Juwau 15:19; 17:16) Ndipo, mwa kutewezera Jezu,  iwo ambabwezera lini wanthu omwe ambawazunza, koma ambalatiza lufoyi kwa anyamadulanthaka wawo, aciwapemberambo kwa Mulungu.—Mateu 5:44; Waroma 12:17-21.

²² Kuthumizira bzimwebzi, Akristau wacadidi ambalamba kubverana na ‘Babulo Mkulu,’ omwe ni bzipembedzo bzense bzakunama thangwe bzina mulandu wa mulopa. Fala la Mulungu limbati: ‘Mwa iye [Babulo Mkulu] mwagumanika mulopa wa apolofeta, wa wanthu wakucena na wa wense omwe adaphedwa pa dziko la pansi.’ Ndipopa, ifepano timbauzidwa kuti: ‘Cokani m’mwemo mbumba yangu.’—Cibvumbulutso 17:6; 18:2, 4, 24.

23. Kodi bzimbathandauza ciyani kucoka mu Babulo Mkulu?

²³ Kucoka mu Babulo Mkulu kumbandothandauza lini kupfudzisa dzina m’cipembedzo, koma kumbathandauzambo kuwenga bzinthu bzense bzomwe cipembedzoco cimbalimbisa wanthu kuti acite ninga unzazi, kucita mbali mu ndale na kufuna kwene-kwene cuma. (Werengani Psalymo 97:10; Cibvumbulutso 18:7, 9, 11-17) Kawiri-kawiri, bzimwebzi ndibzo bzomwe bzimbacitisa kuti wanthu aphane!

24, 25. Ifepano tikhana mulandu wa mulopa, tsono n’ciyani cidacitisa kuti Mulungu atilekerere? Kodi bzimwebzi bzingandendemezedwe na makonzedwe yaponi yomwe yambafotokozedwa m’Bibliya?

²⁴ Pomwe tikhanati kuyamba kunamata kwacadidi, ifepano tikhacita mbali ya dziko la Sathaniri, ndipo tikhanawombo mulandu wa mulopa. Tsono, Mulungu adaticitira nsisi, acitilekerera thangwe tidacinja njira zathu. Ndipo pakuti tidakhulupira nsembe ya cakulombolera ya Jezu, ticibziperekambo na mtima wense kwa iye, ifepano timbakhotcereredwa mwauzimu. (Mabasa 3:19) Kukhotcereredwako kumbatikumbusa bza makonzedwe ya mizinda yakupulumukira yakale-kale yomwe imbalewedwa m’Bibliya.—Mirewengo 35:11-15; Bzakutonga 21:1-9.

²⁵ Kodi makonzedwe yamweya yakhafamba tani? Mu nthawe imweyire, Mjirayeri akapha mwanzace mwa ngozi, iye akhafunikira kuthawira mu mzinda m’bodzi wakupulumukirayo kuti aleke kuphedwa. Pambuyo pa ayeruzi wakuthemera kumala kutonga nkhaniyo, munthu wakupha mwanzace mwa ngoziyo akhafunikira kukhala mu mzinda wakupulumukirayo mpaka kufa kwa mkulu wa ansembe. Pambuyo pa kufa kwa mkulu wa ansembeyo, iye angadadzakhala na ufulu bwa kukhala kuli kwense komwe iye angadafuna. Makonzedwe yamweya yambalatiza bwino-bwino  kuti Mulungu ngwansisi, ndipo ambalemekeza moyo wa munthu! Lerombo, makonzedwe ya cakulombolera ya nsembe ya Jezu yali ninga mizinda yakupulumukira ya mu nthawe ya Ajirayeri pakuti imbatipulumusa pa infa thangwe ra bzinthu bzomwe timbaphonyera Mulungu mwakusaya kudziwa pa nkhani ya kulemekeza moyo na mulopa. Kodi mumbayatenda makonzedweya? Mungalatize tani kuti mumbayatenda? Njira ibodzi, ndiyo yakucemera wanthu winango kuti adzapitembo mu mzinda wakupulumukira wakuyezezerayu, maka-maka pa nthawe ino pomwe cinkufendera ‘citsautso cikulu.’—Mateu 24:21; 2 Wakolinto 6:1, 2.

26-28. Kodi momwe bzinthu bziriri nsiku zino bzinkundendemerana tani na momwe bzinthu bzikhaliri nsiku za mpolofeta Zakiyeri? Kodi tin’funika pomwe kucita ciyani kuti tipitirize kufunidwa na Mulungu?

²⁶ Momwe bzinthu bziriri nsiku zino na atumiki wa Mulungu, bzinkutikumbusa momwe bzinthu bzikhaliri mu nthawe za mpolofeta Zakiyeri. Yahova adamupasa basa lakumbacenjeza Ajirayeri, acimuuzambo kuti: ‘Umbabve mafala yakucokera pa kamwa pangu, ucindicenjezera wanthuwo.’ Bzingadakhala kuti Zakiyeriyo alibe kulitengera mwa mphanvu basa lacero, iye angadakhala na mulandu wa mulopa pakupfudzidwa kwa mzinda wa Jeruzalemu. (Zakiyeri 33:7-9) Tsono Zakiyeri adabvera Mulungu, ndipo alibe kukhala na mulandu wa mulopa.

²⁷ Lerombo, dziko la Sathaniri lasala pang’ono kupfudzidwa. Ndipopa, Mboni za Yahova zimbawona kuti mpsakufunika kupalizira bzipsa bzabwino bza Umambo bwa Mulungu, ndipo ni mwayi ukulu kudziwisa wanthu bza ‘nsiku yakubwezera’ ya Mulungu. (Zaiya 61:2; Mateu 24:14) Kodi munkucitambo mbali pa basa lakufunikali? Mpostolo Paulo adalitenga mwa mphanvu basa la kupalizira. Ndipopa, iye adati: ‘Ndine wakucena pa mulandu wa mulopa wa wanthu wense, pakuti ndiribe kukubisirani cinthu na cibodzico, koma ndidakuuzani malango yense ya Mulungu.’ (Mabasa 20:26, 27) Cimweci ni ciratizo cabwino kwene-kwene kuti ifepano titewezere!

²⁸ Tsono, kuti tipitirize kufunidwa na Baba wathu, Yahova, pana bzinango bzomwe tin’funikambo kucita kuthumizira pa nkhani ya kulemekeza moyo na mulopa ninga momwe iye ambacitira. Tin’funikambo kupitiriza kukhala wakucena pamaso pa Yahova ninga momwe tiwonere mu msolo unkutewerayu.