1. Kodi ni nfundo iponi yomwe Jezu adalatiza kuti ikhali yakufunika kwene-kwene?

USIKU bwakumalizira bwa moyo wa Jezu pa dziko la pansi pano, iye adalatiza kuti akhana thupo kwene-kwene na ateweri wace. Ndipo iye adawapembera kwa Baba wace, aciti: ‘Ndinkukukumbirani lini kuti muwacose m’dziko, koma kuti muwanyang’anire kugopera nyakuipayo. Iwo ambacita lini mbali ya dziko, ninga momwe ine ndimbacita lini mbali ya dziko.’ (Juwau 17:15, 16) Na mpembo wakucokera pansi pa mtimayu, Jezu adalatiziratu padeca kuti iye akhawafuna kwene-kwene ateweri wace, ndipo adalatizambo kufunika kwa mafala yomwe akhadauza kale anyakupfunza wace winango usiku bumwebule, kuti: ‘Mumbacita lini mbali ya dziko.’ (Juwau 15:19) Bzinkuwonekeratu padeca kuti Jezu akhafuna kwene-kwene kuti ateweri wace apitirize kukhala wakusaya kucita mbali ya dziko!

2. Kodi ‘dziko’ lomwe Jezu adalewa limbathandauza ciyani?

² ‘Dziko’ lomwe Jezu adalewa, limbathandauza wanthu wense wakutalikirana na Mulungu, omwe ambatongedwa na Sathani, ndipo ni akapolo wa mzimu wace wadyera na wakubzikuza. (Juwau 14:30; Wayefezo 2:2; 1 Juwau 5:19) Kulewa cadidi, kucita uxamwali na dzikoli n’kubzisandusa nyamadulanthaka wa Mulungu. (Tiyago 4:4) Tsono, bzingakwanisike kuti wanthu wense omwe an’funa kupitiriza kufunidwa na Mulungu aleke kucita mbali ya dziko, napo iwo ali m’dzikomo? Inde, mwa njira zixanuzi: mwa kuthandizira Umambo bwa Mulungu bwakutongedwa na Kristu, ticireka kupitira mu nkhani za ndale; mwa kutcenkha mzimu wa dzikoli; mwa kubvala na kubzidekesa mwakuthemera; mwa kukhala na moyo wakusaya kufuna bzinthu bzizinji; na mwa kubvala bzifuzo bzense bzakuphatisa basa pa nkhondo yathu yauzimu.

3. (a) Kodi Jezu adapitira nkhani za ndale za mu nthawe yace? (b) Thangwe ranyi tingalewe kuti ateweri wakudzozedwa wa Jezu ambatumikira ninga anyakumuimikira? (Onanimbo mafala ya m’nyansi.)

³ Jezu alibe kupitira nkhani za ndale za mu nthawe yace, koma iye adatsungira kupalizira bzipsa bzabwino bza Umambo bwa Mulungu, boma la kudzulu lomwe iye angadadzakhala Mambo. (Danyeri 7:13, 14; Luka 4:43; 17:20, 21) Ndipopa, Jezu adauza Ponsiyo Pirato, mtongi wa cigawo cibodzi ca Roma, kuti: ‘Umambo bwangu bumbacita lini mbali ya dzikoli.’ (Juwau 18:36) Ateweri wakukhulupirika wa Jezu ambamutewezera mwa kukhala wakukhulupirika kwa iye na Umambo bwace, na mwa kudziwisambo Umambobo kwa wanthu. (Mateu 24:14) Mpostolo Paulo adanemba kuti: ‘Ndife anyakuimikira wa Kristu. Ninga anyakukhala m’mbuto mwa Kristu, tinkukukumbirani kuti: “Yanjanani pomwe na Mulungu.”’ *—2 Wakolinto 5:20.

4. Kodi Akristau wense wacadidi ambalatiza tani kuti ambandothandiza Umambo bwa Mulungu bokha? (Onani kwadru ya msolo wakuti “ Akristau Wakuyambirira Akhapitira Lini Nkhani za Ndale.”)

⁴ Anyakuimikira ni wanthu omwe ambaimira boma ayai dziko lawo ku madziko manango, ndipo iwo ambapitira lini nkhani za ndale m’madziko yomwe ankuphatira basa lawolo, koma ambandopitira bzinthu bzakubverana na boma la ku dziko lawo. Bzimwebzi ndibzo bzomwe ateweri wakudzozedwa wa Kristu ambacita, pakukhala ‘nzika za kudzulu.’ (Wafiripo 3:20) Ndipo, thangwe ra basa lawo lakupalizira Umambo bwa Mulungu na nyongo, iwo ankuthandiza wanthu azinji omwe ni ‘mabira manango’ ya Kristu kuti ‘ayanjane pomwe na Mulungu.’ (Juwau 10:16; Mateu 25:31-40) Tingalewe kuti wanthu wakumalizirawa, omwe ni mabira manango ya Jezu, ambatumikirambo ninga anyakuimikira Kristu, pakuti ankuthandizana na abale wakudzozedwa wa Kristuyo. Mathimu mawiriya, yambaphata  basa ninga thimu libodzi. Yambacita basa lakuthandiza Umambo bwa Mesiya, yacitcenkha kupitira nkhani za ndale za dziko.—Werengani Zaiya 2:2-4.

5. Kodi Akristau ambasiyana tani na Ajirayeri wakale-kale, ndipo kusiyana kumweku kumbawonekera mu njira ziponi?

⁵ Kukhala wakukhulupirika kwa Kristu ndiro lini thangwe lokhalo  lomwe limbacitisa kuti Akristau wacadidi aleke kupitira nkhani za ndale. Ajirayeri wakale-kale, akhadapasidwa dziko lawo-lawo na Mulungu. Tsono ifepano ndife gulu libodzi la abale wa pa dziko lense la pansi. (Mateu 28:19; 1 Pedru 2:9) Tenepo, tikapitira nkhani za ndale, tingakhale lini wakutsudzuka kuti tipalizire bzipsa bzabwino bza Umambo bwa Mulungu, ndipo tingadzongembo ciphatano cathu. (1 Wakolinto 1:10) Ndipo, pa nthawe za nkhondo, tingadakakamizidwa kumenyana na abale wathu omwe timbauzidwa kuti timbawafune. (Juwau 13:34, 35; 1 Juwau 3:10-12) Ndipopa, Jezu adauza anyakupfunza wace kuti aleke kumbamenya nkhondo, aciwauzambo kuti ambafune anyamadulanthaka wawo.—Mateu 5:44; 26:52; onani kwadru yakuti: “ Kodi Ndinkupitiriza Kukhala Wakusaya Kupitira Ndale za Dziko?”

6. Napo ndife wakubzipereka kwa Mulungu, n’ciyani comwe timbacita na Sezare?

⁶ Ifepano ndife Akristau wacadidi, ndipo tidabzipereka kwa Mulungu, sikuti kwa munthu, magulu ya wanthu ayai dziko. Pa 1 Wakolinto 6:19, 20 pambati: ‘Ndimwe lini mwenekaciro wa thupi lanu, pakuti mudagulidwa.’ Tsono, ateweri wa Jezu ambapereka kwa ‘Sezare’ ulemu, mitsonkho na kubverambo pa bzinthu bzakusaya kutsutsana na Mulungu. Koma, iwo ambasiyambo lini kupereka kwa Mulungu bzinthu bzomwe mpsa Mulunguyo. (Marko 12:17; Waroma 13:1-7) Bzinthu bzimwebzi bzimbaphatanidza kumunamata, kumufuna na mtima wense na kumubvera. Bzikafunika, iwo ambabvuma kuluza moyo wawo kuti abvere Mulunguyo.—Luka 4:8; 10:27; werengani Mabasa 5:29; Waroma 14:8.

7, 8. Kodi ‘mzimu wa dziko’ n’ciyani, ndipo umbaphata tani basa mwa wanthu wakusaya kubvera?

⁷ Njira inango yomwe Akristau ambapitirizira kukhala wakusaya kucita mbali ya dziko, ni mwa kutcenkha mzimu wace wakuipa. Mpostolo Paulo adati: ‘Ifepano tidatambira mzimu wa Mulungu, sikuti mzimu wa dziko.’ (1 Wakolinto 2:12) Iye adawauzambo abale wa ku Efezo kuti: ‘Mukhafamba mwakubverana na . . . dzikoli na mwakubveranambo na mtongi wa mphuwe yomwe inkutonga pa bzakucita bza wanthu. Mphuwe  imweyi, tsapano inkuphata basa kwa wana wakusaya kubvera.’—Wayefezo 2:2, 3.

⁸ ‘Mphuwe’ ya dzikoli ayai mzimu wace, ni mphanvu yakusaya kuwoneka yomwe imbacitisa kuti wanthu aleke kubvera Mulungu, ndipo imbawalimbisambo kuti ambabvere ‘bzikhumbo bza thupi na bzikhumbo bza maso’ yawo. (1 Juwau 2:16; 1 Timotio 6:9, 10) Mzimu umweyu una ‘mphanvu’ kwene-kwene pa dzikoli, mwakuti umbakwanisa kukwewa thupi rathu lakuperewerali. Umbabwera mwakusaya kuwonekera, ndipo umbaneta lini, pakuti uli ninga mphepo yomwe iri kwense-kwense. Umbaphata basa mwa wanthu wakusaya kubvera mwa kucitisa kuti pang’ono na pang’ono iwo ayambe kukhala na makhalidwe yomwe Mulungu ambawenga ninga kubzifuna, kubzikuza, kufuna kubvekera, kusaya kufuna kuuzidwa bzakucita na kupanduka. * Tindolewe kuti mzimu wa dziko umbacitisa kuti pang’ono na pang’ono munthu ayambe kukhala na makhalidwe ya Sathani mu mtima mwace.—Juwau 8:44; Mabasa 13:10; 1 Juwau 3:8, 10.

9. Kodi mzimu wa dziko ungapite tani m’bzakukumbuka na mu mtima mwathu?

⁹ Kodi mzimu wa dziko ungapite mu bzakukumbuka na mu mtima mwanu? Inde, ungapite kokha mukaulekerera, mucisiya kubzikhotcerera. (Werengani Mimwani 4:23.) Kawiri-kawiri, bzimwebzi bzimbacitika mwa kusaya kuzindikirika, pinango mwa kumbaceza na wanthu omwe ambawoneka ninga wabwino, koma iwo ambafuna lini kubvera Yahova. (Mimwani 13:20; 1 Wakolinto 15:33) Mzimu wakuipa ungapite mu mtima mwanu mwa kumbawerenga mabukhu yakuipa, kuwona bzinthu bza maika, kuwerenga nkhani za pa interneti za wanthu wakupanduka na kusenzeka na bzinthu bzakuipa. Mzimuyo ungatibwerere kucokera kwa munthu ayai cinthu ciri-cense comwe cimbabverana na makumbukidwe ya Sathani ayai dziko laceri.

10. Kodi tingautcenkhe tani mzimu wa dzikoli?

¹⁰ Kodi tingatcenkhe tani mzimu wakuipa wa dzikoli, ticipitiriza kufunidwa na Mulungu? Tingatcenkhe kokha mwa kuphatisa basa mwakukwanira bzinthu bzauzimu bzomwe Yahova ambatipasa, ticimbamupembambo nthawe zense kuti atipase  mzimu wakucena. Yahova ngwamphanvu kwene-kwene kuposa Sathani pabodzi na dziko lakuipali. (1 Juwau 4:4) Tenepo, mpsakufunika kwene-kwene kumbapemba kwa Yahova kuti tikhale wakufendererana naye!

11. Kodi mzimu wa dziko umbawonekera tani pa kabvalidwe ka wanthu?

¹¹ Penu munthu ankutsogoleredwa na mzimu wa dziko ayai ne, bzimbawonekera m’kabvalidwe kace, kubzidekesa kwace na  khonkho lace. M’madziko mazinji wanthu ankubvala lini mwakuthemera, mwakuti munthu munango wakumwaza nkhani za pa TV adalewa kuti mwakusaya kupita nthawe, ifepano tin’dzakwanisa lini kusiyanisa munthu omwe ni hule na omwe si hule. Jornal inango idalewa kuti napo atsikana omwe akanati kupfitsa magole 13 yakubadwa ankutewezerambo kabvalidwe kakusaya kuthemeraka, pakuti iwo ankumbabvala bzakubvala bzakusiya thupi padeca na bzakupasa manyazi. Cinango comwe cinkucitidwa kawiri-kawiri na wanthu, ni kubvala mwakubzilekerera bzomwe bzimbalatiza mzimu waupandu na wakusaya kubzilemekeza.

12, 13. Kodi ni mitemo iponi yomwe in’funika kutitsogolera pa nkhani ya kabvalidwe na kubzidekesa?

¹² Pakuti ndife atumiki wa Yahova, ifepano tin’funika kumbawoneka bwino. Bzimwebzi bzimbathandauza kuti tin’funika kukhala na khonkho, kukhala wakucena na kubvala bzakubvala bzakuthemerana na mbutoyo. Nthawe zense mawonekedwe yathu yan’funika kulatiza kuti ndife wanthu ‘wakubzicepswa na wakukumbuka bwino,’ na kuti ‘timbacita mabasa yabwino,’ yakuthemera kwa mkazi ayai mwamuna ali-wense omwe ngwakubzipereka kwa Mulungu. Cakulinga cathu si kubziwonesera, koma n’cakuti ‘tipitirize kucita bzinthu bzomwe bzingacitise kuti Mulungu atifune.’ (1 Timotio 2:9, 10; Juda 21) Comwe tin’funa ni kudekesa maka-maka ‘unthu [bwathu] bwakubisika bwa mu mtima . . . , bomwe n’bwakufunika kwene-kwene pamaso pa Mulungu.’—1 Pedru 3:3, 4.

¹³ Timbakumbukirembo kuti kabvalidwe kathu na kubzidekesa kwathu kambatokonya momwe wanthu winango ambawonera kunamata kwathu kwacadidi. Fala lacigerego lakusanduliziridwa kuti ‘kubzicepswa,’ likakhala linkulewa bza makhalidwe, limbathandauza kulemekeza makumbukidwe ya wanthu winango. M’mbuto mwa kukumbuka kuti tina ufulu bwakucita bzomwe tingafune, ifepano tin’funika kumbacita bzinthu mwa kumbakumbukira cikumbu-mtima ca anzathu. Ndipo, tin’funambo kulemekezesa Yahova pabodzi na wanthu wace, ticithemera kukhala atumiki wa Mulungu, mwa kucita ‘bzinthu bzense kuti tipase mbiri Mulunguyo.’—1 Wakolinto 4:9; 10:31; 2 Wakolinto 6:3, 4; 7:1.

14. Kodi tin’funika kubzibvunza ciyani pa nkhani ya mawonekedwe yathu?

 ¹⁴ Tin’funika kusamala kwene-kwene na kabvalidwe kathu, kubzidekesa kwathu pabodzi na kubzicenesa kwathu maka-maka pomwe tinkuyenda mu utumiki ayai ku mitsonkhano. Tenepo, tin’funika kubzibvunza kuti: ‘Kodi wanthu ambadabwa na momwe ndimbawonekera? Kodi mawonekedwe yangu yambacitisa manyazi wanthu winango? Kodi ndimbawona ufulu bwangu pa bzinthu bzimwebzi kukhala bwakufunika kwene-kwene kuposa kuthemera kukhala na maudindo m’gwere?’—Psalymo 68:6; Wafiripo 4:5; 1 Pedru 5:6.

15. Thangwe ranyi m’Fala la Mulungu mulibe kunembedwa cinthu cibodzi na cibodzi cakulewa bza momwe Akristau an’funikira kubvala, kubzidekesera na momwe angakhalire wa khonkho?

¹⁵ M’Bibliya mulibe kunembedwa cinthu cibodzi na cibodzi cakulewa bza momwe Akristau an’funikira kubvala, kubzidekesera na momwe angakhalire wa khonkho. Yahova an’funa lini kuticosera ufulu bwathu bwakusankhula ayai bwa kuphatisa basa mphanvu yathu yakukumbuka. M’mbuto mwace, iye ambafuna kuti tikhale wanthu wakukhwima omwe tingakumbukire mitemo ya m’Bibliya, ticiphatisa basa mphanvu zathu zakuzindikira na kuzipfunzisa kuti tikwanise ‘kusiyanisa cabwino na cakuipa.’ (Wahebereu 5:14) Kuposa bzensebzi, Mulungu an’funa kuti timbatsogoleredwe na lufoyi kuna iye na anzathu. (Werengani Marko 12:30, 31.) Tikambateweza mitemoyi, tin’dzawona kuti tingambabvale na kubzidekesa  mu njira zakusiyana-siyana. Tingacitire umboni bzimwebzi pa mitsonkhano ya wanthu wa Yahova. Timbawona mitundu yakusiyana-siyana ya bzakubvala bzawo bzakudeka, kuli-kwense komwe iwo ali.

16. Kodi mzimu wa dzikoli umbatsutsana tani na bzomwe Jezu adapfunzisa, ndipo tin’funika kubzibvunza ciyani?

¹⁶ Mzimu wa dziko umbapumpsa wanthu azinji kukumbuka kuti kobiri na bzinthu bza kuthupi bzingawabweresere cikondweso. Tsono, Jezu adalewa kuti: ‘Napo munthu akhale na bzinthu bzizinji, moyo wace umbacokera lini ku bzinthu bzomwe anabzo.’ (Luka 12:15) Jezu akhalimbisa lini wanthu kukhala na moyo wakubzisaukisa. Iye akhandopfunzisa kuti wanthu omwe ambazindikira ‘bzakusaya bzawo bzauzimu’ na wale omwe ambakhala na moyo wakusaya kufuna bzinthu bzizinji kuti aikhe patsogolo bzinthu bzauzimu, ndiwo ambakhala na moyo wacikondweso cacadidi. (Mateu 5:3; 6:22) Tenepo, tin’funika  kubzibvunza kuti: ‘Kodi ndimbakhulupiradi bzomwe Jezu adapfunzisabzi, ayai ndimbabvuma kupumpsidwa na Sathani? (Juwau 8:44) Kodi bzinthu bzomwe ndimbalewa, bzakulinga bzangu, bzinthu bzomwe ndimbaikha patsogolo pabodzi na bzomwe ndimbacita pa moyo wangu, bzimbalatiza kuti ndine munthu wa mtundu wanyi?’—Luka 6:45; 21:34-36; 2 Juwau 6.

17. Kodi wanthu omwe ambakhala na moyo wakusaya kufuna bzizinji ambagumana phindu liponi?

¹⁷ Jezu adati: ‘Nzeru imbadziwika kuti njakulungama thangwe ra mabasa yace.’ (Mateu 11:19) Wanthu omwe ambakhala na moyo wakusaya kufuna bzinthu bzizinji ambagumana phindu likulu kwene-kwene. Iwo ambakondwa kwene-kwene pakucita basa lakudziwisa Umambo bwa Mulungu. (Mateu 11:29, 30) Ambacita lini thupo na kacinthu kali-kense, ndipo ambakhotcereredwa ku mabvuto mazinji. (Werengani 1 Timotio 6:9, 10.) Pakuti ambakhala wakukomedwa na bzomwe anabzo, iwo ambakhala na nthawe izinji yakusamalira mabanja yawo na kuceza na azixamwali wawo. Iwo ambagona tulo twabwino. (Mpalizi 5:12) Ambakhala wakukondwa kwene-kwene thangwe ra kupasa bzinthu anzawo, ndipo ambacita bzimwebzo nthawe zense zomwe angakwanise. (Mabasa 20:35) Iwo ambakhala na ‘cidikhiro camphanvu,’ pabodzi na mtendere wa mu mtima. (Waroma 15:13; Mateu 6:31, 32) Kulewa cadidi, bzimwebzi ni bzisimbo bzomwe tingakwanise lini kubzigula!

18. Kodi Bibliya limbafotokoza ciyani bza nyamadulanthaka wathu, bza njira zomwe ambaziphatisa basa pabodzi na mtundu wa ‘nkhondo’ yathu?

¹⁸ Wanthu omwe ambacita bzinthu kuti apitirize kuthemera kufunidwa na Mulungu ambakhotcereredwambo kwa Sathani omwe ambafuna kuwadzongera uxamwali bwawo na Yahova kuti aleke kukhala wakukondwa na kuti adzasaye kutambira moyo wakusaya kumala. (1 Pedru 5:8) Mpostolo Paulo adati: ‘Tinkumenyana sikuti na wanthu wa thupi la mulopa na mnonfu, koma na maboma, na utongi, na atongi wa dziko lense la m’mdimayu, na mphanvu ya mizimu yakuipa m’mbuto za kudzulu.’ (Wayefezo 6:12) Fala lakuti ‘tinkumenyana,’ linkulatiza kuti nkhondo yathu njakumenyana lini na patali ningati tiri  pa mbuto yakubisika, koma njapafupi na pafupi, ninga ndewo ya mafaiti. Kuthumizira bzimwebzi, mafala yakuti ‘maboma,’ ‘utongi’ na ‘atongi wa dziko’ yambalatiza kuti madimonyo yambakhala yakukonzekera bwino, ndipo yambacita bzinthu ninga gulu yakafuna kutimukira.

19. Mpsiponi bzifuzo bza nkhondo yauzimu bzomwe Akristau an’funika kubvala?

¹⁹ Ifepano tingakunde nkhondoyi napo ndife wakutepa, ndipo timbatazirambo kucita bzinthu bzinango. Tsono tingakunde tani? Mwa ‘kubvala bzifuzo bzense bza nkhondo bzakucokera kwa Mulungu.’ (Wayefezo 6:13) Pakufotokoza bzida bzimwebzi, pa Wayefezo 6:14-18 pambati: ‘Tenepo, khalani wakulimba, mucimanga bwino cadidi m’ciuno mwanu, mucibvala cakubzikhotcerera pa cifuwa ca cirungamo, ndipo nzayo zanu zibvale nsapato zakukonzekera bzipsa bzabwino bza mtendere. Kuposa bzense, tengani mkhotco mkulu wa cikhulupiro omwe mun’dzathimisira misewe yakugaka ya nyakuipayo. Ndipo ibvumenimbo kapaseti ya cipulumuso pabodzi na mphanga ya mzimu, yomwe ni Fala la Mulungu. Pomwe munkucita tenepo, mwa mtundu uli-wense wa mpembo na dandaulo mumbapembe pa cakucitika ciri-cense mu mzimu’.

20. Kodi ifepano tidasiyana tani na acikunda wacadidi?

²⁰ Pakuti bzifuzo bza nkhondo yathu yauzimu bzimbacokera kwa Mulungu, ifepano tingakhale wakukhotcereredwa tikambabzibvala nthawe zense. Mwa kusiyana na acikunda wacadidi omwe nthawe zinango ambamala nthawe ne kumenya nkhondo, Akristaufe tiri pa nkhondo yadzawoneni yomwe in’mala lini kufikira Mulungu atapfudza dziko la Sathaniri pabodzi na kuthusa madimonyo yace yense ku ciphompho. (Cibvumbulutso 12:17; 20:1-3) Tenepo, penu munkulimbana na kutepa kwanu ayai na bzikhumbo bzakuipa, lekani kubwerera m’mbuyo, pakuti tensenefe timbafunikambo kumbalimenya thupi lathu kuti tipitirize kukhala wakukhulupirika kwa Yahova. (1 Wakorinto 9:27) Kulewa cadidi, ifepano tin’funika kucita thupo kwene-kwene tikakhala tinkumenya lini nkhondoyo!

21. Kodi tin’funika kucita ciyani kuti tikunde nkhondo yathu yauzimu?

²¹ Tsono, ifepano tingakwanise lini kukunda nkhondoyi mwa  mphanvu zathu zokha. Ndipopa mpostolo Paulo adatikumbusa kuti timbapembe kwa Yahova pa ‘cakucitika ciri-cense mwa mzimu.’ Ndipo tin’funikambo kumbabvera Yahova mwa kupfunza Fala lace na kumbatsonkhana nthawe zense na wale omwe tingalewe kuti ni acikunda anzathu, pakuti tinkumenya lini tekha nkhondoyi! (Filemoni 2; Wahebereu 10:24, 25) Wanthu omwe ambacita bzimwebzi mwakukhulupirika an’dzakunda nkhondoyi, ndipo an’dzakwanisambo kukhotcerera cikhulupiro cawo cikadzakhala cinkutsutsidwa.

22, 23. (a) Thangwe ranyi tin’funika kukhala wakukonzeka kuti timbakhotcerere cikhulupiro cathu, ndipo tingabzibvunze ciyani pa nkhani imweyi? (b) Kodi msolo unkubwerayu un’fofotokoza nkhani iponi?

²² Jezu adati: ‘Mumbacita lini mbali ya dziko, . . . ndipopa dzikoli limbakuwengani.’ (Juwau 15:19) Bzimwebzi bzinkuwonesa kuti Akristau an’funika kukhala wakukonzekera kuti ambakhotcerere cikhulupiro cawo, acicita bzimwebzo mwa ulemu na mwakufatsa. (Werengani 1 Pedru 3:15.) Tin’funika kubzibvunza kuti: ‘Kodi inepano ndimbabvesesa thangwe lomwe limbacitisa kuti nthawe zinango Mboni za Yahova zisankhule kucita bzinthu bzakusiyana na bzomwe wanthu azinji ambacita? Pakulimbana na cineso, kodi ndimbakhulupira kuti bzomwe Bibliya na kapolo wakukhulupirika na wanzeru ambalewa ni bzinthu bzakulungama? (Mateu 24:45; Juwau 17:17) Kodi ndidakonzeka kucita bzomwe Yahova ambadekedwa nabzo napo ni bzinthu bzakusiyana na bzomwe wanthu azinji ambacita?’—Psalymo 34:2; Mateu 10:32, 33.

²³ Napo cakulinga cathu n’cakukhala wakusaya kucita mbali ya dziko, ifepano timbayezedwa kazinji-kense thangwe ra nkhani imweyi mu njira zakusaya kuzindikirika. Mwa ciratizo, ninga momwe talewera kale m’mbuyomu, Sathani ambaphatisa basa masenzeka yakuipa kuti akwanise kupumpsa atumiki wa Yahova. Kodi tingasankhule tani kusenzeka na bzinthu bzomwe bzingatisiye na cikumbu-mtima cabwino? Msolo unkubwerayu un’fotokoza nkhani imweyi.