1, 2. Kodi imwepo munkuphata basa lakulimbisa ciyani, ndipo thangwe ranyi mpsakufunika kwene-kwene kucita bzimwebzo?

YEZEZERANI kuti munkuphata basa lakumanga nyumba na nyongo kwene-kwene. Mwaphata kale basalo kwa nthawe itali, ndipo bzinkuwoneka kuti basalo lin’tenga magole mazinji kuti mumalize. Mwagumanambo na mabvuto mazinji pakuimangapo, tsono imwepo mumbalifuna kwene-kwene basa lakumanga nyumbayo. Ndipo, mwatsimikiza kuti bzinese bzitani mun’dzacita lini utofu, mucileka kumanga nyumbayo, pakuti munkuzindikira kuti moyo wanu pabodzi na tsogolo lanu lense bzin’themba kumanga na kulimbisa nyumbayo. Thangwe ranyi? Thangwe nyumba munkuimangayo ndimwepoletu.

² Juda, omwe akhali nyakupfunza wa Jezu, adalewa kufunika kwa kubzimanga tekha ninga momwe timbamangira nyumba. Pakulewa bzimwebzi, iye adauza Akristau kuti: ‘Pitirizani kucita bzinthu bzomwe bzingacitise kuti Mulungu akufuneni.’ Ndipo, adalewambo cinthu cakufunika kwene-kwene comwe cingatithandize kucita bzimwebzi. Iye adati: ‘Bzirimbiseni pa cikhulupiro canu cakucena.’ (Juda 20, 21) Kodi mpsiponi bzinthu bzomwe mungacite kuti mumbalimbise cikhulupiro canu na cakulinga cakuti Mulungu apitirize kumbakufunani? Mbaticezeraneni mbali zitatu za momwe mungalimbisire cikhulupiro canu.

3-5. (a) Kodi Sathani ambafuna kuti mumbaiwone tani mitemo ya Yahova? (b) Kodi bzin’funika mumbaiwone tani mitemo ya Mulungu, ndipo bzimwebzi bzingakuthandizeni tani? Perekani ciratizo.

³ Tin’funika kupitiriza kumbakhulupira kwene-kwene mitemo ya Mulungu. Pomwe mukhapfunza bukhu lino, mwadziwa mitemo mizinji yakulungama ya Yahova yakulewa bza makhalidwe. Kodi  mumbaiwona tani mitemo imweyi? Sathani an’funa kudzonga makumbukidwe yanu kuti mumbawone mitemo ya Yahova ninga yakupanikiza na yakupondereza. Iye adayamba kumbaphatisa basa njira imweyi kuyambira pomwe adawona kuti idamufambira bwino mu zunde la Edeni. (Ciyambo 3:1-6) Kodi iye angakwanise kukupumpsanimbo na njira imweyi? Penu angakwanise ayai ne, bzin’themba momwe imwepo mumbakumbukirira.

⁴ Mwa ciratizo: Yezezerani kuti munkufamba ku mbuto yakudeka kwene-kwene komwe wanthu ambasungira bzirombo, ndipo munkuwona kuti pana fenzi itali yomwe inkukutazisani kupita mkati mwa mbuto inango yomwe munkuwona kuti njakudeka kwene-kwene. Pakuyamba, pinango munkuwona lini phindu lomwe adaikhira fenziyo, mucikumbuka kuti inkukupherani ufulu. Tsono, mutanyang’anisisa mkati mwa fenzimo munkuwona mphondolo yomwe inkubendera nyama! Tsapano imwepo munkuzindikira kufunika kwa fenziyo. Kodi nsiku zino ciripo cirombo comwe cinkukubenderanimbo kuti cikuphateni? Fala la Mulungu limbaticenjeza kuti: ‘Pitirizani kukhala wakukumbuka bwino, khalani mudapenya. Nyamadulanthaka wanu, Dyabu, ankufamba-famba ninga mphondolo yomwe inkubangula, icimbalinga munthu ali-wense kuti imukhabvule.’—1 Pedru 5:8.

⁵ Sathani ni cirombo cakulusa kwene-kwene. Yahova an’funa lini kuti Sathani atikhabvule, ndipopa iye adatipasa mitemo kuti imbatikhotcerere ku ‘bzicito bzacinyengo’ bza nyakuipayo. (Wayefezo 6:11) Tenepo, nthawe zense tikambaikumbukira bwino-bwino mitemo ya Mulungu, timbaiwone ninga umboni bwakuti Baba wathu wa kudzulu ambatifuna kwene-kwene. Tikambaiwona tenepoyo mitemo ya Mulungu, ifepano tin’dzakhotcereredwa nayo, ndipo tin’dzakhala wanthu wakukondwa. Tiyago, omwe akhali nyakupfunza wa Jezu, adanemba kuti: ‘Ule omwe an’cinyang’anisisa na pafupi cakutonga cakulungamiratu cakubweresa ufulu, acilimbikira m’bzimwebzo, iye an’dzakondwa pakumbalicita thangwe iye si nyakundobva, aciyebweratu, koma ni nyakulicita.’—Tiyago 1:25.

6. Kodi n’ciyani cingakuthandizeni kuti mumbakhulupire kwene-kwene mitemo yakulungama ya Mulungu? Perekani ciratizo.

⁶ Kuti timbakhulupire kwene-kwene Mulungu, omwe ambatipasa mitemo na kukhulupirambo kuti mitemo yaceyo imbatithandiza, tin’funika kumbaiphatisa basa pa moyo wathu. Mwa ciratizo, mu ‘cakutonga ca Kristu’ muna mtemo wakuti timbapfunzise wanthu ‘bzinthu bzense bzomwe iye adatiuza.’ (Wagalata 6:2;  Mateu 28:19, 20) Tenepo, Akristau ambauwona lini mwakupepuka mtemo wakuti timbatsonkhane pabodzi na cakulinga cakuti tinamate Mulungu na kumbalimbisana. (Wahebereu 10:24, 25) Ulipombo mtemo wakuti timbapembe kwa Yahova nthawe zense, mwa kucokera pansi pa mtima, ticimbacitambo bzimwebzo mwa pafupi-pafupi. (Mateu 6:5-8; 1 Watesalonika 5:17) Tikambateweza mitemo imweyi, timbabvesesa kuti Mulungu adatipasa mitemoyo thangwe ra kutifuna kwene-kwene. Kubvera mitemoyi kumbatipasa cikondweso comwe tingacigumane lini ku mbuto iri-yense m’dziko lakuipali. Ndipo, kukumbukirambo momwe mwagumanira phindu thangwe ra kuteweza mitemo ya Mulungu, bzingacitise kuti mumbaikhulupire kwene-kwene.

7, 8. Kodi Fala la Mulungu limbalimbisa tani wanthu omwe ambawona kuti angakwanise lini kumbacita bzinthu bzakulungama nthawe zense?

⁷ Wanthu winango ambagopa kuteweza mitemo ya Yahova pa moyo wawo, ndipo ambawona kuti angakwanise lini kumbacita bzinthu bzakulungama nthawe zense. Penu mudakumbukambo kale tenepoyo, kumbukirani mafalaya: ‘Ibzi ni bzomwe Yahova walewa, Mpulumusi wako, Wakucena wa Jirayeri kuti: “Ine Yahova, ndine Mulungu wako, Omwe ndimbakupfunzisa kuti ugumane phindu, ule Omwe ndimbakutsogolera mu njira yomwe un’funika kufamba. Ucindotetekera mitemo yangu! Mtendere wako un’dzakhala ninga mkulo, Ndipo cirungamo cako cin’dzakhala ninga mabimbi ya m’nyanza.’ (Zaiya 48:17, 18) Kodi mukhadayakumbukirambo kale mafalaya yomwe njakulimbisa kwene-kwene?

 ⁸ Pamwepa Yahova ankutikumbusa kuti tikambamubvera, ifepano ndife omwe timbagumana phindu. Ndipo iye ankulewa kuti tin’dzagumana phindu mu njira ziwiri. Njira yakuyamba, njakuti mtendere wathu un’dzakhala ninga mkulo omwe madzi yace yambakhala mazinji, yambafamba mwakuderekha, ndipo umbauma lini. Njira yaciwiri, njakuti cirungamo cathu cin’dzakhala ninga mabimbi ya m’nyanza. Mukaima m’phepete mwa nyanza mucimbawona mabimbi, mun’dzawona kuti nyanzayo imbakhala tenepoyo nthawe zense. Mun’dzazindikira kuti mabimbi yaceyo yan’dzasiya lini kumbafika m’phepete mwa nyanzamo mpaka kale-kale. Tenepo, comwe Yahova ankukuuzani n’cakuti imwepo mungakwanise kumbacita bzinthu bzakulungama, ayai kumbacita bzinthu bzabwino pa moyo wanu mpaka kale-kale. Mukambalimbikira kukhala wakukhulupirika, Yahova an’dzakulekererani lini kukundidwa na bzineso bzomwe mungagumane nabzo. (Werengani Psalymo 55:22.) Mapiciro yakulimbisaya yangakuthandizeni kwene-kwene kukhulupira Yahova pabodzi na mitemo yace yakulungama.

9, 10. (a) Thangwe ranyi Mkristau an’funika kucita nyongo yakukhala munthu wakukhwima mwauzimu? (b) Kodi kuikha makumbukidwe yathu pa bzinthu bzauzimu kungatithandize tani kukhala wanthu wakukondwa kwene-kwene?

⁹ Mbali inango ya basa lanu lakumanga lire, imbafotokozedwa m’mafala ya m’Bibliya yakuti: ‘Mbaticiteni nyongo yakukhala wakukhwima mwauzimu.’ (Wahebereu 6:1) Cakulinga cikulu ca Mkristau ni kukhala wakukhwima mwauzimu. N’cadidi kuti ifepano tingacite lini bzinthu mwakulungamiratu, koma tingakhale wanthu wakukhwima mwauzimu. Ndipo, Akristau wakukhwima mwauzimu, ndiwo omwe ambakondwa kwene-kwene pakutumikira Yahova. Thangwe ranyi bzimbakhala tenepoyo?

¹⁰ Mkristau wakukhwima mwauzimu ni munthu omwe ambawona bzinthu ninga momwe Yahova ambawonera. (Juwau 4:23) Mpostolo Paulo adanemba kuti: ‘Omwe ambacita bzinthu mwakubverana na thupi ambaikha makumbukidwe yawo pa bzinthu bza kuthupi, tsono omwe ambateweza bzinthu bzauzimu ambaikha makumbukidwe yawo pa bzinthu bzauzimu.’ (Waroma 8:5) Munthu omwe ambaikha makumbukidwe yace pa bzinthu bza kuthupi ambakhala lini wakukondwa kwene-kwene, pakuti  iye ambakumbukira lini anzace, ambakumbukira lini bza kutsogolo, ndipo ambafuna kwene-kwene cuma. Tsono, munthu omwe ambaikha makumbukidwe yace pa bzinthu bzauzimu ambakhala wakukondwa, pakuti makumbukidwe yace yambakhala pa Yahova, omwe ni ‘Mulungu wakukondwa.’ (1 Timotio 1:11) Munthu wauzimu ambafunisisambo kukondwesa Yahova, ndipo ambapitiriza kukhala wakukondwa napo akagumana na bzineso. Thangwe ranyi? Thangwe bzinesobzo bzimbamupasa mpata wakulatiza kuti Sathani ni nyamagunkha na kulatizambo kuti iye ni munthu wakukhulupirika. Bzimwebzi bzimbakondwesa kwene-kwene Yahova, Baba wathu wa kudzulu.—Mimwani 27:11; werengani Tiyago 1:2, 3.

11, 12. (a) Kodi mpostolo Paulo adalewa ciyani bza ‘mphanvu zakuzindikira’ za Mkristau, ndipo fala lakuti ‘kupfunzisa’ limbathandauza ciyani? (b) Kodi bzimbafunika ciyani kuti thupi likhale lakulimba na lakuzolowera kumbacita bzinthu?

¹¹ Munthu ambacita kupfunza kuti akhale wakukhwima mwauzimu. Onani mafala ya m’vesiri: ‘Cakudya cakutanfuna n’ca wanthu wakukhwima mwauzimu, omwe pakuphatisa basa mphanvu zawo zakuzindikira, apfunzisa mphanvuzo kusiyanisa cabwino na cakuipa.’ (Wahebereu 5:14) M’Cigerego, fala lakuti ‘kupfunzisa’ lomwe mpostolo Paulo adaphatisa basa pa vesiri, likhambalewedwa pa masenzeka yakulimbisa thupi ku dziko la Grécia. Falali lingasanduliziridwembo kuti ‘kupfunzisa munthu kukhala misiri wa masenzeka yakulimbisa thupi.’ Kodi n’ciyani comwe cimbafunika kuti munthu apfunze mpaka kukhala misiri wa masenzeka yamweya?

¹² Wanthufe tikabadwa, thupi lathu limbakhala likanati lapfunzisidwa kumbacita bzinthu. Mwa ciratizo, tcece limbadziwa lini komwe iri minyendo na manja yace. Ndipopa tcecero limbandovunga-vunga manja na minyendo yace, ndipo nthawe zinango limbabzimenya lokha ku nkhope mwakuti limbadzidzimuka, liciyamba kulira. Tsono, pang’ono na pang’ono, tcecero limbapfunza kuphatisa basa manja na minyendo yace mpaka kuzolowera kumbacita bzinthu bzakusiyana-siyana. Ndipo limbadzayamba kukwawa, kufamba na kuthamanga. * Tsono, tani bza misiri wa masenzeka yakulimbisa thupi? Mukamuwona ankumoga, acizungunuka  mpaka kuponda pansi mwakusaya kugwa, imwepo mumbazindikira kuti iye adacita kupfunza kucita bzimwebzo. Luso lacero liribe kucita kubwera lokha, koma adafunika kulipfunza kwa nthawe itali. Bibliya limbalewa kuti kucita masenzeka yakulimbisa thupi kumbabweresa ‘phindu pang’ono.’ Tenepo, penu Bibliya limbalewa kuti bzimwebzi bzina phindu lace, ndiye kuti mpsakufunika kwene-kwene kupfunzisa mphanvu zathu kuti timbakwanise kuzindikira bzinthu mwauzimu!—1 Timotio 4:8.

13. Kodi tingapfunzise tani mphanvu zathu zakuzindikira?

¹³ M’bukhu lino, tacezerana bzinthu bzizinji bzomwe bzingakuthandizeni kupfunzisa mphanvu zanu zakuzindikira kuti mupitirize kukhala wakukhulupirika kwa Yahova na kukhalambo munthu wakukhwima mwauzimu. Mukambafuna kusankhula bzakucita pa moyo wanu wa nsiku na nsiku, mbakumbukirani mitemo ya m’Fala la Mulungu, mucimbapembambo kuti mukwanise kuiphatisa basa. Pomwe mukanati kucita cinthu ciri-cense, mbabzibvunzani kuti: ‘Kodi njiponi mitemo ya m’Bibliya yomwe imbabverana na nkhaniyi? Kodi ndingaiphatise tani basa mitemo imweyi? Kodi Baba wangu wa kudzulu angakomedwe nande ndikasankhula kucita bzimwebzi pa nkhaniyi?’ (Werengani Mimwani 3:5, 6; Tiyago 1:5.) Kumbacita mibvunzo imweyi pa cinthu ciri-cense comwe mungafune kucita, kungakuthandizeni kupitiriza kumbapfunzisa mphanvu zanu zakuzindikira. Kubzipfunzisa mu njira imweyi kungakuthandizeni kukhala munthu wakukhwima mwauzimu.

14. Kodi tin’funika kukhala na njala ya ciyani kuti tikule mwauzimu, ndipo tin’funikambo kutcenkha ciyani?

¹⁴ Munthu ana malire pa nkhani yakukula mwa kuthupi, tsono kukula mwauzimu kulibe malire. Ndipo, kuti munthu akule ambafunikira cakudya. Ndipopa mpostolo Paulo adalewa kuti: ‘Cakudya cakutanfuna n’ca wanthu wakukhwima mwauzimu.’ Tenepo, cinthu cakufunika kwene-kwene kucita kuti mulimbise cikhulupiro  canu ni kupitiriza kumbadya cakudya cauzimu cakucita kutanfuna. Mukambaphatisa basa bwino bzinthu bzomwe mumbapfunza, mun’dzalatiza kuti muna nzeru, ndipo Bibliya limbalewa kuti: ‘Nzeru ni cinthu cakufunika kwene-kwene.’ Tenepo, tin’funika kumbakhala na njala yauzimu, comwe ni kufuna cakudya cakufunika kwene-kwene comwe Baba wathu wa kudzulu ambatipasa. (Mimwani 4:5-7; 1 Pedru 2:2) Tsono, tin’funika lini kubzikuza thangwe ra kukhala na nzeru zakucokera kwa Mulungu ayai thangwe ra kudziwa bzinthu bzizinji. Nthawe na nthawe tin’funika kumbabzipenda tekha kuti tidziwe penu tayamba kale kukhala na mtima wakubzikuzayo ayai penu makhalidwe yakuipa yayamba kukula mu mtima mwathu. Mpostolo Paulo adanemba kuti: ‘Pitirizani kumbabzipenda kuti muwone penu mukana cikhulupiro cakulimba; pitirizani kumbabzipenda kuti mudziwe bzomwe muli.’—2 Wakolinto 13:5.

15. Thangwe ranyi lufoyi ndakufunika kwene-kwene kuti tikwanise kukula na kukhwima mwauzimu?

¹⁵ Basa lakumanga nyumba limbamala, tsono basa lakusamalira nyumbayo limbamala lini, pakuti bzimbafunika kukonza-konza mbuto zakudzongeka, ndipo nthawe zinango bzingafunikire kuthumizira bzipinda bzinango. Kodi tingafunikire kucita ciyani kuti tipitirize kukula na kukhwima mwauzimu? Cikulu kuposa bzense ni kukhala na lufoyi. Tin’funika kupitiriza kumufuna kwene-kwene Yahova na kufunambo abale wathu wauzimu. Tikasaya kuwafuna, bzense bzomwe timbadziwa na bzomwe timbacita bzingakhale bziribe phindu na libodzilo ninga momwe bzimbakhalira na ng’oma yakuboka. (1 Wakolinto 13:1-3) Lufoyi lingatithandize kupitiriza kukhwima mwauzimu.

16. Kodi Sathani ambafuna kuti wanthu akhale na makumbukidwe yaponi? Kodi Yahova watipasa ciyani kuti timbabzikhotcerere?

¹⁶ Mbatiwoneni mbali yakumalizira pa nkhani ya kulimbisa cikhulupiro canu. Kuti mufike pakukhala mteweri wacadidi wa Kristu, imwepo mun’funika kumbakhotcerera makumbukidwe yanu. Sathani omwe ni mtongi wa dzikoli, ni misiri pa nkhani ya kudzonga makumbukidwe ya wanthu. Iye an’funa kuti wanthu ambakumbuke bzinthu bzakuipa, ambapenukire bzinthu na kukhalambo wakusaya cidikhiro. (Wayefezo 2:2) Makumbukidwe yamweya njakuipa kwene-kwene kwa Mkristau, thangwe yali ninga nyumba ya matabwa yomwe matabwa yaceyo yankuyamba kubvunda. Tsono,  nkhani yabwino njakuti Yahova adatipasa cinthu comwe cingatithandize kubzikhotcerera. Cinthuco ni cidikhiro.

17. Kodi Fala la Mulungu limbalatiza tani kuti cidikhiro n’cakufunika kwene-kwene kwa ifepano?

¹⁷ Bibliya limbafotokoza bzinthu bzakusiyana-siyana bzomwe tin’funika kumbabziphatisa basa kuti tibzikhotcerere pa nkhondo yathu yauzimu yakulimbana na Sathani pabodzi na dzikoli. Cinthu cibodzi cakufunika kwene-kwene ni kapaseti, yomwe imbaimira ‘cidikhiro ca cipulumuso.’ (1 Watesalonika 5:8) Kale-kale, mcikunda akhadziwiratu kuti angadakwanisa lini kupulumuka ku nkhondo akasaya kubvala kapaseti. Kapaseti zizinji zikhakhala za bzitsulo, ndipo mkati mwace mukhana nguwo. Kapasetiyo ikhathandiza kuti uta buli-bwense bukathusiridwa ku msolo bumbagwe pansi mwakusaya kupweteka kwene-kwene mcikundayo. Ninga momwe kapaseti imbakhotcerera msolo wa mcikunda, cidikhiro cingakhotcererembo makumbukidwe yathu.

18, 19. Kodi Jezu adapereka ciratizo ciponi pa nkhani ya kupitiriza kukhala na cidikhiro, ndipo ifepano tingamutewezere tani?

¹⁸ Jezu adapereka ciratizo cabwino pa nkhani ya kupitiriza kukhala na cidikhiro. Kumbukirani bzomwe iye adagumana nabzo usiku bwakumalizira bwa moyo wace pansi pano. Thangwe ra dyera na kobiri, mwanzace wa pa mtima adamuphindukira, acimupereka kwa anyamadulanthaka wace. Mwanzace munango adalamba kuti akhamudziwa, ndipo winango adathawa, acimusiya yekha. Wanthu wa mtundu wace, adamumukira, acingingimira kuti acikunda wa Aroma amuphe. Palibe munthu omwe angagaze bzakuti bzineso bzomwe Jezu adagumana nabzo bzikhali bzakuipa kwene-kwene kuposa cineso ciri-cense comwe tingagumane naco. Tsono, n’ciyani cidamuthandiza kupirira? Pa Wahebereu 12:2 pambati: ‘Thangwe ra cikondweso comwe adamuikhira patsogolo pace, iye adapirira muti wakuzunzikira, iye alibe kucita thupo na manyazi, ndipo tsapano wakhala pansi ku boko la madidi la mpando wa umambo wa Mulungu.’ Tenepo, nthawe zense Jezu akhakumbukira ‘cikondweso comwe [Mulungu ] adamuikhira patsogolo pace.’

¹⁹ Kodi Mulungu adaikha patsogolo pa Jezu cikondweso ciponi? Jezu akhadziwa kuti mwa kupirira bzinesobzo, angadathandiza kucenesa dzina la Yahova, na kupereka umboni bwakusaya kugazika bwakuti Sathani ni nyamagunkha. Palibe cinthu comwe cingadapasa Jezu cikondweso cikulu kwene-kwene kuposa bzimwebzo. Iye akhadziwa kuti Yahova angadamupasa mphaso ikulu thangwe ra  kukhulupirika kwace, ndipo akhadziwambo kuti akhadasala pang’ono kubwerera kudzulu kuti akakhale pomwe pabodzi na Baba wace. Pa nthawe yomwe Jezu akhazunzidwa, iye akhakumbukira kwene-kwene bzinthu bzabwino bzomwe akhadikhirirabzi. Tenepo, ifepano tin’funikambo kucita bzibodzi-bodzibzi, thangwe tinkudikhirira kudzakhala na moyo wacikondweso kutsogoloku. Yahova ambatilemekeza kwene-kwene mwa kutipasa mwayi wakuthandiza kucenesa dzina lace likulu. Nafembo tingalatize kuti Sathani ni nyamagunkha tikasankhula kutongedwa na Yahova na kupitirizambo kucita bzinthu bzomwe bzingacitise kuti iye atifune, napo tigumane na bzineso bzizinji.

20. N’ciyani cingakuthandizeni kupitiriza kukhala na makumbukidwe yabwino pabodzi na cidikhiro camphanvu?

²⁰ Yahova ambafunisisa kubaira atumiki wace wakukhulupirika. (Zaiya 30:18; werengani Malakiya 3:10.) Iye ambakomedwa kupasa atumiki wace bzinthu bzabwino bzomwe iwo ambakhumba. (Psalymo 37:4) Tenepo, nthawe zense mumbakumbukire kwene-kwene bza cidikhiro cakudzawona kukwanisika kwa mapiciro ya Mulungu. Lekani kumbakumbukira kwene-kwene bzinthu bzomwe bzingakutepeseni, ndipo lekani kutengeka na makumbukidwe yakuipa ya m’dziko la Sathaniri. Mukawona kuti mzimu wa dzikoli unkuyamba kufuna kudzonga makumbukidwe na mtima wanu, pembani kwene-kwene kwa Yahova kuti akupaseni mtendere wace ‘omwe umbaposa makumbukidwe yense.’ Mtendere omwe Mulungu an’dzakupasani un’dzakhotcerera mtima wanu pabodzi na makumbukidwe yanu.—Wafiripo 4:6, 7.

21, 22. (a) Mpsiponi bzinthu bzabwino kwene-kwene bzomwe ankudikhirira wanthu wa ‘thimu likulu’? (b) Kodi pa bzinthu bzomwe Akristau ankudikhirira, imwepo munkufunisisa kudzawona ciyani maka-maka, ndipo mwatsimikiza kucita ciyani kuti mudzabziwone?

 ²¹ Imwepo munkudikhirira bzinthu bzabwino kwene-kwene mwakuti mungacite bwino kumbabzikumbukira. Penu ndimwe wa mu ‘thimu likulu,’ la wanthu omwe an’dzapulumuka pa ‘citsautso cikulu’, mbakumbukirani moyo omwe mun’khala nawo tsapanopapa. (Cibvumbulutso 7:9, 14) Sathani akadzasaya kuwoneka pomwe pabodzi na madimonyo yace, imwepo mun’dzakhala na mtendere muzinjisa omwe mukanati kukhala nawo. Ndipo, mbani omwe adakhala kale na moyo wakusaya mabvuto pabodzi na mayezo ya Sathani? Mabvuto yense yan’dzamala, ndipo tin’dzakondwa kwene-kwene pakuphata basa lakukonza dzikoli kuti likhale paraizo. Tin’dzaphata basa mwakutsogoleredwa na Jezu pabodzi na anzace wakukwana 144.000. Kulewa cadidi, timbakomedwa kwene-kwene tikambadikhirira kudzawona kumala kwa matenda yense, kudzawonana pomwe na adzinza wathu omwe adafa, na kudzakhala na moyo wabwino kwene-kwene ninga momwe Mulungu akhafunira. Tin’dzakhala wanthu wakulungamiratu, ticitambira mabaibai yakulewedwa pa Aroma 8:21. Mabaibai yamweyo ni kudzakhala na ‘ufulu bwa mbiri ya wana wa Mulungu.’

²² Yahova an’funa kuti imwepo mudzakhale na ufulu kwene-kwene mwakuti mungakwanise lini kubukumbukira. Tsono, kuti mudzakhale na ufulu bumwebo, mun’funika kumubvera, nsiku zense. Tenepo, citani ciri-cense comwe mungakwanise kuti mulimbise cikhulupiro canu cakucena kuti Mulungu apitirize kumbakufunani.