1, 2. Kodi Balamu adacita ciyani kuti Ajirayeri atengeke, aciphonyera Yahova?

KHOMBWE akafuna kumedza nsomba, iye ambayenda ku mbuto komwe zimbagumanika nsombazo. Iye ambadziwa mtundu wa nsomba zomwe an’funa, ndipo ambasankhula bwino nyambo yomwe akamedzere nayo nsomba za mtundu umweyo. Akafika ku gombe, iye ambathusa medzo yace m’madzi, acidikhirira. Akawona kuti medzo ire yayamba kupfuwidwa, iye ambaipfuwirambo kunja mwakamfulumize. Ndipo ambamwetulira pakudziwa kuti wakwanisa kumedza thangwe ra kuphatisa basa nyambo yakuthemera.

² Bzimwebzi bzinkutikumbusa bzomwe bzidacitika mu gole la 1473 AEC. Munthu munango omwe dzina lace akhali Balamu, adafuna kuphatisa basa nyambo kuti akwanise kumedza nayo Ajirayeri, omwe akhali m’cigwa ca dziko la Moabe, lomwe likhacita malire na Dziko Lakupiciridwa. Balamu akhabziti mpolofeta wa Yahova, tsono cadidi n’cakuti iye akhali munthu wadyera omwe akhafuna kutemberera Ajirayeri. Pakuti Yahova adapitira, m’mbuto mwa kuwatemberera, Balamu adasimba Ajirayeriwo. Tsono, pakufuna kubairidwa basi, Balamu adakumbuka kuti Mulungu angadatemberera yekha Ajirayeriwo penu iwo angadacita pikado ikulu. Ndipo Balamuyo adagumana nyambo yakuthemera kuti akwanise bzimwebzo. Nyamboyo ikhali akazi wa m’dziko la Moabe omwe akhadziwa kunyengerera amuna.—Mirewengo 22:1-7; 31:15, 16; Cibvumbulutso 2:14.

3. N’ciyani cidacitika na Ajirayeri thangwe ra nyambo yomwe Balamu adaphatisa basa?

³ Kodi nyambo ya Balamu idaphata basa? Inde. Amuna azinji wa mtundu wa Jirayeri adatengeka na nyamboyo, acigonana na  akazi wa m’dziko la Moabe. Ndipo iwo adafika mpaka kunamata mirungu ya wanthu wa ku Moabeko, kuphatanidza Baala wa ku Peori, omwe akhali mulungu wakuberekesa na wakugonana. Thangwe ra bzimwebzo, amuna 24.000 wa mtundu wa Jirayeri adaphedwa, pomwe Dziko Lakupiciridwa likhali patsogolo pawo. Imweyo idakhala ngozi ikulu kwene-kwene!—Mirewengo 25:1-9.

4. Thangwe ranyi Ajirayeri azijnji adacita bza unzazi?

⁴ Kodi n’ciyani cidanyosa ngozi yenseneyo? Wanthu azinji adakhala na mtima wakuipa mwa kutalikirana na Yahova, Mulungu wawo omwe adawalombola ku Edjipito, ndipo akhawadyesa m’dambo na kuwatsogolera mpaka ku dziko lakupiciridwa. (Wahebereu 3:12) Pakukumbukira cakucitika cimweci, mpostolo Paulo adanemba kuti: ‘Ndipo tirekembo kucita unzazi, ninga momwe winango adacitira bza unzazibzo, acifa wanthu 23.000 pa nsiku ibodzi yokha.’ *—1 Wakolinto 10:8.

5, 6. Thangwe ranyi nkhani yakulewa bza pikado ya Ajirayeri m’cigwa ca Moabe njakufunika kwene-kwene kwa ifepano?

⁵ Nkhani yakufotokozedwa m’bukhu la Mirewengoyi, imbapfunzisa bzinthu bzizinji wanthu wa Mulungu omwe asala pang’ono kupitambo m’dziko lakupiciridwa. (1 Wakolinto 10:11) Mwa ciratizo, m’dzikomu wanthu ambafuna kwene-kwene kugonana ninga momwe akhacitira wanthu wa ku dziko la Moabe, kundosiyana kuti tsapano bzalemweratu. Ndipo, gole liri-lense,  Akristau azinjisa ambatengeka na bza unzazi ninga momwe bzidacitika na Ajirayeri wale. (2 Wakolinto 2:11) Ndipo, mwakutewezera Zimiri, omwe adakhwimika, acipitisa m’tendi mwace mkazi wa ku Midiyani, pakati pa tsasa la Ajirayeri, abale winango m’gwere ambadzongambo anzawo thangwe ra kucita bza unzazi.—Mirewengo 25:6, 14; Juda 4.

⁶ Nsiku zinombo, ifepano tiri ninga m’cigwa ca Moabe. Kodi munkukwanisa kuwona kuti liri pafupi dziko lipsa lomwe munkulidikhirira kwa magole mazinji? Penu munkuliwona, pitirizani kucita bzinthu bzomwe bzingacitise kuti Mulungu akufuneni mwa kubvera malango yakuti: ‘Thawani unzazi!’—1 Wakolinto 6:18.

7, 8. Kodi ‘unzazi’ n’ciyani? Kodi wale omwe ambacita bza unzazi ambagumana mabvuto yaponi?

⁷ Ninga momwe limbaphatisidwira basa m’Bibliya, fala lakuti ‘unzazi’ (m’Cigerego, por·neiʹa) limbalewa bza kugonana kwa wanthu omwe alibe kulowolana ninga momwe Bibliya limbalewera. Kucita bza unzazi kumbaphatanidza kucita upombo, uputa, kugonana kwa wanthu wakusaya kulowolana, kunyangutana cidzo, kugonana ku matako pabodzi na kusenzekesa cidzo ca munthu wakusaya kulowolana naye kuti kamale kalanga kace. Ndipo bzimbaphatanidzambo kugonana kwa amuna ayai akazi wokha-wokha pabodzi na kugonana kwa wanthu na bzirombo. *

⁸ Bibliya limbaleweratu padeca kuti: Wale omwe ambacita bza unzazi angapitirize lini m’gwere Lacikristau, ndipo an’dzatambirambo lini moyo wakusaya kumala. (1 Wakolinto 6:9; Cibvumbulutso 22:15) Ndipo cinango n’cakuti, wanthu omwe ambacita bza unzazi, ambabzibweresera mabvuto mazinji. Iwo ambaleka kukhulupiridwa na anzawo, ambaluza ulemu bwawo, ambabvesesana lini na mwanzawo wa m’banja, ambakhala na cikumbu-mtima cakuipa, ambakhala na mimba yomwe akhaifuna lini, ambapasidwa matenda, ndipo winango ambafika pa kufa. (Werengani  Wagalata 6:7, 8.) Tenepo, ni upsiru kucita cinthu comwe cingadzatibweresere ngozi patsogolo pace! Tsono, bzakupasa nsisi mpsakuti wanthu azinji ambakumbukira lini bzakutsogolo akambawona bzinthu bza maika, bzomwe ni bvuto lakuyambirira.

9. Kodi kuwona bza maika kumbadzongadi lini ninga momwe wanthu azinji ambalewera? Fotokozani.

⁹ M’madziko mazinji, bzinthu bza maika bzimbagumanika kwense-kwense, ninga m’bzikwangwali, m’nyimbo, pa TV na pa interneti. * Kodi kuwona bza maika kumbadzongadi lini ninga momwe wanthu winango ambalewera? Nee, kumbadzonga! Wanthu omwe ambawona bzinthu bza maika ambadzakhala na cizolowezi cakumbasenzekesa cidzo cawo kuti amalise kalanga kawo, acikhalambo na ‘kalanga kakusaya kuphatika,’ bzomwe bzingacitise kuti ambandokhale acikumbukira bza kufuna kugonana na wanthu, kucita makhalidwe yakugonana yakunyansa, kugonana na bzinthu bzakusaya kuthemera, acimalizira kulambana na mwanzawo wa m’banja. * (Waroma 1:24-27; Wayefezo 4:19) Munthu munango omwe ambafufudza bzinthu adalewa kuti bvuto lakumbafuna bzakugonana liri ninga matenda ya khansa. Iye adati: “Matendayo yambayenda yacikula mpaka kumwazika m’thupi. Yambamala lini yokha, ndipo yambanesa kwene-kwene kulapa.”

10. Kodi tingaphatise tani basa mafala ya pa Tiyago 1:14, 15? (Onanimbo kwadru ya msolo wakuti “ Bzomwe Bzidandithandiza Kusiya Makhalidwe Yakuipa.”)

¹⁰ Onani mafala yakugumanika pa Tiyago 1:14, 15, yomwe yambati: ‘Munthu ali-wense ambayezedwa thangwe ra kupumpsidwa na cikhumbo cace. Ndipo cikhumboco cikakula, cimbabala pikado. Ndipo pikadoyo ikacitika, imbabweresa infa.’ Tenepo, cikhumbo  cakuipa cikayamba mu mtima mwanu, nthawe imweyoletu citani cinthu kuti mucimalise! Mwa ciratizo, penu mwadzidzidzi mwawona cithunzi-thunzi ca maika mwakusaya kufuna, nyang’anisani ku mbali mwakamfulumize ayai thimisani mtcini wanu wanzeru ayai cinjani kanale ya TV yomwe munkuwonayo. Citani cinthu ciri-cense comwe cingafunike kuti mutcenkhe kukuza cikhumbo cakuipa comwe cingafike pakumbakutongani!—Werengani Mateu 5:29, 30.

11. Kodi tingalatize tani kuti timbakhulupira Yahova pomwe tinkulimbana na bzikhumbo bzakuipa?

¹¹ Ndipopa, Mulungu omwe ambatidziwa bwino kuposa momwe ifepano timbabzidziwira tekha, ambaticenjeza kuti: ‘Citisani bziwalo bza thupi lanu bzomwe bziri pansi pano kukhala bzakufa pa bza unzazi, bzinthu bzakupswipiza, bzikhumbo bza kugonana, bzikhumbo bzakuipa, na kusirira kwa njiru, komwe  n’kunamata bzifanikiso.’ (Wakoloso 3:5) N’cadidi kuti kucita bzimwebzi kungakhale kwakunesa. Tsono kumbukirani kuti tina Baba wakudzulu omwe ngwalufoyi na wakupirira, ndipo angatithandize. (Psalymo 68:19) Tenepo, mbamupembani mwakamfulumize pomwe yakubwererani makumbukidwe yakuipa. Mukumbireni kuti akupaseni ‘mphanvu yakuposa yacibadwa,’ ndipo yambani kukumbukira bzinthu bzinango.—2 Wakolinto 4:7; 1 Wakolinto 9:27; onani kwadru yakuti “ Bzomwe Bzidandithandiza Kusiya Makhalidwe Yakuipa.”

12. Kodi “mtima” wathu n’ciyani, ndipo thangwe ranyi tin’funika kumbaukhotcerera?

¹² Salomau, omwe akhali munthu wanzeru, adanemba kuti: ‘Kuposa bzinthu bzense bzomwe bzimbafuna kukhotcereredwa, khotcerera mtima wako, pakuti mu mtimamo ndimo muna nsansa ya moyo.’ (Mimwani 4:23) “Mtima” umweyu umbathandauza unthu bwathu bwa mkati ninga momwe Mulungu ambatiwonera. Ndipo, kuti tidzakhale na moyo wakusaya kumala, bzimbathemba momwe Mulungu ambauwonera “mtima” wathuyo, sikuti momwe wanthu ambawonera. Nfundo imweyi njakunesa lini kubvesesa, koma ni nkhani yakufunika. Djobi, omwe akhali munthu wakukhulupirika, adacita mpangano na maso yace kuti aleke kumbanyang’anisa mkazi mwa kumusirira. (Djobi 31:1) Cimweci n’ciratizo cabwino kwa ifepano! Mnembi wa Psalymo adalatizambo makumbukidwe mabodzi-bodziya, pomwe adapemba kuti: ‘Citisani kuti maso yangu yaleke kuwona bzinthu bzapezi-pezi.’—Psalymo 119:37.

13. Kodi Dina akhali yani, ndipo thangwe ranyi alibe kusankhula mwanzeru axamwali wace?

¹³ Ninga momwe tawonera mu Msolo 3, mpsakunesa lini kutewezera makhalidwe yabwino ayai yakuipa ya axamwali wathu. (Mimwani 13:20; werengani 1 Wakolinto 15:33.) Onani bzomwe bzidacitikira Dina, mwana wacikazi wa Djakobi. Iye akhadapfunzisidwa bwino, tsono mwakusaya nzeru, Dinayo adakacita uxamwali na atsikana wa ku Kanani. Wanthu wa ku Kanani akhambacita bza unzazi ninga momwe akhacitira wanthu wa ku Moabe. (Mwambo 18:6-25) Sikemu, omwe akhali mulumbwana  wakulemekezeka kwene-kwene pa mui pa baba wace,’ pabodzi na amuna winango wa ku Kananiko, akhawona kuti Dina akhadapusa kumunyengerera.—Ciyambo 34:18, 19.

14. Kodi ndiponi bvuto lomwe lidabwera thangwe ra Dina kusankhula kuipa axamwali wace?

¹⁴ Bzingacitike kuti pomwe Dina adawona Sikemu, iye alibe kukhala na makumbukidwe yakufuna kugonana naye. Tsono, Sikemuyo adacita bzinthu bzomwe Akanani azinji akhabziwona kukhala bzinthu bzacibadwa akabva kalanga. Ciri-cense comwe Dina adayezera kucita kuti alambe, ciribe kuphata basa, pakuti Sikemuyo adamuphata, acimupswitha. Bzinkuwoneka kuti Sikemu adadzamufuna Dinayo, tsono kumufunako kulibe kucinja bzomwe akhadamucita kalebzo. (Werengani Ciyambo 34:1-4.) Ndipo, Dina ndiye lini yekha omwe akhadacitiridwa bzimwebzo. Thangwe ra kusankhula kuipa axamwali wace, Dina adabweresera manyazi banja lawo lense.—Ciyambo 34:7, 25-31; Wagalata 6:7, 8.

15, 16. Kodi tingazigumane tani nzeru za Mulungu? (Onanimbo kwadru pa msolo wakuti “ Bzinembo Kuti Mumbabzikumbukire.”)

¹⁵ Penu Dina adapfunza cinthu na bzomwe bzidamucitikirabzo, ndiye kuti adapfunza makutu yali m’cikalango. Wale omwe  ambafuna Yahova, acimubvera ambafunikira lini kupfunza bzinthu atagumana kale na mabvuto. Iwo ambabvera Mulungu, ndipo ambasankhula ‘kufamba na wanthu wanzeru.’ (Mimwani 13:20a) Mwa kucita bzimwebzo, iwo ambafika pa kubvesesa ‘bzomwe mpsakulungama na njira yense yabwino,’ acitcenkha mabvuto yakucita kunyosa wokha.—Mimwani 2:6-9; Psalymo 1:1-3.

¹⁶ Nzeru za Mulungu zimbagumanika kwa wanthu wense  omwe ambazifuna, akambalimbikira kupemba na kupfunza nthawe zense Fala la Mulungu pabodzi na mabukhu yakukonzedwa na kapolo wakukhulupirika na wanzeru. (Mateu 24:45; Tiyago 1:5) Mpsakufunikambo kukhala wakubzicepswa, komwe munthu angalatize mwa kumbabvera malango ya m’Bibliya. (2 Wamambo 22:18, 19) Mwa ciratizo, Mkristau angabvume kubvera mtemo omwe umbalewa kuti mtima umbanyenga ndipo umbafuna kucita cinthu ciri-cense cakuipa. (Jeremiya 17:9) Tsono, kodi iye akaphonya, ambabzicepswa, acibvuma kutambira malango pabodzi na thandizo la lufoyi lomwe angapasidwe?

17. Fotokozani nkhani yomwe ingawoneke m’banja la Mkristau, ndipo fotokozanimbo momwe pai angacezere na mwana wace bza nkhaniyo.

¹⁷ Kumbukirani cakucitika ici. Tiyezezere kuti Pai an’funa lini kuti mwana wace wacikazi acoke yekha pabodzi na mulumbwana omwe ni Mkristau mwakusaya kuperekezedwa. Tsono mwanayo ankubvunza pai waceyo kuti: “Papa, imwepo mumbatikhulupira lini kani? Tin’cita lini cinthu ciri-cense cakuipa!” Mtsikanayo angakhale munthu omwe ambafuna Yahova, ndipo alibe bzakulinga bzakuipa. Tsono, kodi iye ankufambadi mwa nzeru? Kodi iye ankuthawa unzazi? Ayai iye ni psiru pakufuna kukhulupira ‘mtima wace’? (Mimwani 28:26) Pinango imwepo mungakumbukirembo nfundo zinango zomwe zingathandize paiyu kucezerana na mwana waceyo bza nkhaniyo.—Onani Mimwani 22:3; Mateu 6:13; 26:41.

18, 19. Kodi Zuze adagumana na mayezo yaponi, ndipo adalimbana nayo tani?

¹⁸ Zuze, m’bale wa Dina, akhali mulumbwaba wabwino omwe akhafuna Mulungu, ndipo iye adathawa kucita upombo. (Ciyambo 30:20-24) Pomwe akhali mwana, Zuze adacita kuwona yekha bzomwe bzidacitika pomwe Dina alibe kucita bzinthu mwanzeru. Kukumbukira bzimwebzi pabodzi na kufuna kupitiriza kufunidwa na Mulungu, bzidathandiza Zuze magole yense yale ku Edjipito pomwe mkazi wa mbuya wace akhambamunyengerera ‘nsiku na nsiku’ kuti agone naye. N’cadidi kuti Zuze akhali kapolo, ndipo bzingadamunesa kuti iye akumbire kucoka basa kuti atcenkhe bzimwebzo! Tsono iye  adafunika kulimbana nabzo mwa nzeru na mwakulimba mtima. Ndipo iye adacita bzimwebzo mwa kumbauza mwakubwerezebwereza mkazi wa Potifari kuti angadagona lini naye, ndipo pakumalizira iye adadzacita kumuthawa.—Werengani Ciyambo 39:7-12.

¹⁹ Kumbukirani ibzi: Bzingadakhala kuti Zuze akhambandokhala acikumbukira bza kugonana na mkazi, kodi iye angadakwanisa kukhala wakukhulupirika kwa Yahova? Nee. Ndipopa, m’mbuto mwa kumbakumbukira bzinthu bzakuipa, Zuze adalemekeza uxamwali bzace na Yahova, ndipo bzimwebzi bzimbawonekera pa mafala yomwe iye adatawira kwa mkazi wa Potifari. Iye adati: ‘Mbuya wangu, waikha bzinthu bzense m’manja mwangu kupambula imwepo thangwe ndimwe mkazi wace. Tenepo, ndingacitirenyi cinthu cakuipa kwene-kweneci, ndiciphonyera Mulungu?’—Ciyambo 39:8, 9.

20. Kodi n’ciyani comwe Yahova adacita thangwe ra kukhulupirika kwa Zuze?

²⁰ Kumbukirani bza cikondweso comwe Yahova adakhala naco pomwe adawona Zuze ankukhala wakukhulupirika kwa iye, napo kuti akhali kutali na adzinza wace! (Mimwani 27:11) Na kupita kwa nthawe, Yahova adadzacita cinthu, ndipo Zuze adadzacosedwa m’kawoko, acikhalambo nduna yakuyamba mu dziko la Edjipito yomwe ikhanyang’anira cakudya! (Ciyambo 41:39-49) Bzinkuwonekeratu kuti ngacadidi mafala ya pa Psalymo 97:10, yakuti: ‘Imwe omwe mumbafuna Yahova, wengani cakuipa. Iye ambasunga moyo wa wanthu wace wakukhulupirika; an’dzawapulumusa m’manja mwa nyakuipa.’

21. Kodi m’bale munango wa ku África adalimba tani mtima kuti aleke kucita bzakuipa?

 ²¹ Lerombo, atumiki azinji wa Mulungu ambalatiza kuti iwo ‘ambawenga comwe n’cakuipa, acifuna comwe n’cabwino.’ (Amosi 5:15) M’bale munango wa ku África, omwe ni tswaka, ambakumbukira kuti pa nthawe inango, mtsikana munango omwe akhapfunza naye adamuuza kuti amuthandize polova ya matemática, ndipo pambuyo pace angadagonana naye. M’baleyo adati: ‘Inepano ndidalambiratu pa nthawe imweyo. Ndipo, mwa kupitiriza kukhala wakukhulupirika kwa Mulungu, ndidabzisungira ulemu bwangu, bomwe ni cinthu cakufunika kwene-kwene kuposa oro na siriva.’ N’cadidi kuti pikado ingabwerese ‘cikondweso ca kanthawe,’ tsono cikondwesoco cimbabweresa mabvuto mazinji. (Wehebereu 11:25) Ndipo, cingandendemezedwe lini na cikondweso comwe timbakhala naco thangwe ra kubvera Yahova.—Mimwani 10:22.

22, 23. (a) Mkristau akacita pikado ikulu, thangwe ranyi iye an’funika lini kuwona ninga kuti nkhani yaceyo ingakonzeke lini? (b) Kodi munthu omwe waphonya, angagumane kuponi thandizo?

²² Pakuti ndife wakuperewera, tensenefe timbacita nyongo kuti timalise bzikhumbo bzakuipa na kuti ticite bzinthu bzabwino pamaso pa Mulungu. (Waroma 7:21-25) Yahova ambadziwa bzimwebzo, thangwe ambakumbukira kuti ‘ndife pfumbi.’ (Psalymo 103:14) Tsono, nthawe zinango, Mkristau angacite pikado ikulu. Kodi bzimwebzi bzikacitika, tingalewe kuti ni madzi yomwe yataika mwakuti yangawoleke lini pomwe? Nee, bziri lini tenepoyo! N’cadidi, kuti munthu omwe wacita pikado angagumane mabvuto mazinji ninga momwe bzidacitikira na mambo Davide. Tsono, nthawe zense Mulungu ambakhala wakukonzeka kulekerera wale omwe ambakungula na ‘kuzimbula’ pikado zawo.—Psalymo 86:5; Tiyago 5:16; werengani Mimwani 28:13.

²³ Kuthumizira bzimwebzi, mwa kudeka mtima kwace, Mulungu adapereka ‘mphaso za amuna’ m’gwere Lacikristau, omwe ni abusa wakukhwima mwauzimu omwe adathemera, ndipo ambafunisisa kutithandiza. (Wayefezo 4:8, 12; Tiyago 5:14, 15) Cakulinga cawo ni kuthandiza anyakuphonya kulungamiza  uxamwali bwawo na Mulungu, na kuti akhalembo na mtima wanzeru kuti aleke kudzabwerezera pomwe pikadoyo.—Mimwani 15:32.

24, 25. (a) Kodi mulumbwana wakufotokozedwa pa Mimwani 7:6-23 adalatiza tani kuti iye akhali munthu ‘wakusaya nzeru’? (b) Kodi tingacite tani kuti tigumane nzeru?

²⁴ Bibliya limbalewa bza ‘wanthu wakusaya nzeru’ na bza wanthu omwe ambagumana nzeru. (Mimwani 7:7) Thangwe ra kusaya kukhwima mwauzimu na thangwe ra kusaya kutumikira Mulungu kwa nthawe itali, wanthu ‘wakusaya nzeru’ angacite bzinthu mwakusaya kukumbuka bwino. Ninga mulumbwana wakufotokozedwa pa Mimwani 7:6-23, iye angafike pakucita pikado ikulu. Tsono, ‘munthu omwe ambagumana nzeru’ ambabvera cikumbu-mtima cace mwa kupfunza Fala la Mulungu na kupemba kawiri-kawiri kwa Yahova. Ndipo, pakuti iye ni munthu wakuperewera, ambacita nyongo kuti makumukidwe yace, bzikhumbo bzace, pabodzi na bzakulinga bzace bzibverane na bzomwe Mulungu ambafuna. Tenepo, iye ambalatiza kuti ambabzifuna iye yekha, ndipo ‘bzinthu bzimbamufambira bwino.’—Mimwani 19:8.

²⁵ Bzibvunzeni kuti: ‘Kodi ndimbakhulupiradi kuti mitemo ya Mulungu njabwino? Kodi ndimbakhulupiradi kuti kuiteweza kungandibweresere cikondweso cacadidi?’ (Psalymo 19:7-10; Zaiya 48:17, 18) Mukawona kuti munkupenukira bzimwebzi, napo pang’ono pokha, malisaniletu kupenukirako. Mbakumbukirani bzomwe bzingacitike thangwe ra kusaya kubvera mitemo ya Mulungu. Kuthumizira bzimwebzi, ‘lawidzani, muciwona kuti Yahova ngwabwino.’ Mungacite bzimwebzi mwa kumbateweza mitemo ya m’Bibiya pa moyo wanu, mucidzazambo makumbukidwe yanu na bzinthu bzacadidi, bzakulungama, bzakucena, bzakutumbizika na bzabwino. (Psalymo 34:8; Wafiripo 4:8, 9) Mukambalimbikira kucita bzimwebzi, mun’dzamufuna kwene-kwene Mulungu, ndipo mun’dzafunambo bzinthu bzomwe iye ambafuna na kuwenga bzomwe iye ambawenga. Zuze akhali lini munthu wakulungamiratu. Koma adakwanisa ‘kuthawa unzazi’ thangwe adabvuma kuumbidwa na Yahova kwa magole mazinji,  acikhala na mtima wabwino. Imwepo bvumanimbo kuti Yahova akuumbeni.—Zaiya 64:8.

26. Kodi tin’dzapfunza ciyani m’misolo miwiri yomwe inkutewerayi?

²⁶ Mulungu adakonza bziwalo bzathu bzakuberekera kuti bzitithandize kubereka wana na kulatizana lufoyi na mwanzathu omwe tidalowolana naye, sikuti timbabzisenzekese. (Mimwani 5:18) Misolo miwiri yomwe inkutewerayi in’dzafotokoza momwe Mulungu ambaiwonera nkhani ya malowozi.