Khalani na cakulinga. Onani penu cakulinga ca nkhani yanuyo ni kundodziwisa cinthu, kulimbisa ayai kuwathandiza kucinja makumbukidwe yawo. Patsogolo pace, fotokozani nkhaniyo mwakubverana na cakulingaco. Tsimikizirani kuti nfundo ikulu iri-yense inkuthandiza kuti mukwanise cakulingaco.

Tsindikani msolo wa nkhani yanu. Mbabwerezerani msolo wa nkhani yanuyo mwa kumbalewa mafala ya msoloyo ayai mafala manango yakundendemerana nayo.

Bvekesani nfundo zikulu-zikulu mu njira yakusaya kunesa. Sankhulani nfundo zokha zomwe zinkubverana na msolo wa nkhaniyo, zomwe mungakazifotokozembo mkati mwa nthawe yomwe mwapasidwayo. Lekani kukhala na nfundo zikulu-zikulu zizinji, ndipo fotokozani nfundo ikulu iri-yense mwakubveka bwino, mucimbaima pang’ono pomwe mukanati kuyamba kufotokoza nfundo inango.