KUCITISA MAPFUNZIRO
PFUNZIRO 10
Khalani Wakubzipereka pa Basa la Kupfunzisa
Vesi: “Timbakomedwa kugawana namwe mafala yabwino ya Mulungu na kukupasani moyo wathu na cakulinga cakuti tikuthandizeni.” — 1 Ates. 2:8.
Kodi n’Ciyani Comwe Jezu Adacita?
1. Onani VIDIYO, ayai werengani Juwau 3:1, 2. Patsogolo pace kumbukirani mibvunzo iyi:
-
Thangwe ranyi Nikodemo adayenda usiku kukaceza na Jezu? — Onani Juwau 12:42, 43.
-
Jezu pakubvuma kuceza na Nikodemo usiku, kodi iye adalatiza tani kuti akhali wakukonzeka kuthandiza wanthu kukhala anyakupfunza?
Kodi Tikupfunza Ciyani na Bzomwe Jezu Adacita?
2. Ifepano timbalatiza kuti timbafuna wanthu mwa kuwathandiza kukhala anyakupfunza wa Jezu.
Tewezerani Jezu
3. Mbapfunzani pa nthawe na mbuto yomwe njakuthemera kwa nyakupfunza wanu. Nyakupfunza wanu wa Bibliya, angasankhule ntsiku na nthawe yomwe angafune kupfunza pa sumana. Kodi iye angakhale wakutsudzuka kupfunza Bibliya kubasa, kumui kwace ayai mbuto zapadeca? Ndipo bzikakwanisika, imwepo mungacinje ndondomeko yanu kuti mumbapfunze pa nthawe na mbuto yomwe njakuthemera kwa nyakupfunza wanuyo.
4. Mbapfunzani nthawe zentse. Penu imwepo mulibe mpata mun’funika lini kuimisa pfunziro lanu, m’mbuto mwace mungakumbukire mibvunzo iyi:
-
Kodi imwepo mungacitise pfunzirolo ntsiku inango pa sumana imweyo?
-
Kodi imwepo mungacitise pfunzirolo pa telefoni ayai pa videoconferência?
5. Mbapembani kwa Yahova kuti mukhale na makumbukidwe yabwino. Mbakumbirani Yahova kuti akuthandizeni kupitiriza kupfunza Bibliya na nyakupfunza wanu, napo kuti iye ambapfunza lini namwe nthawe zentse ayai akuphatisa lini basa mwakamfulumize bzomwe akupfunza. (Afil. 2:13) Mwakusaya kupenukira nyakupfunza wanu ana makhalidwe mazinji yabwino, ndipopa mbakumbirani Yahova kuti akuthandizeni kuzindikira makhalidweyo.
ONANI POMWE IBZI
Mim. 3:27; Mab. 20:35; 2 Ako. 12:15
