KUYAMBISA MACEZA
PFUNZIRO 4
Khalani Wakubzicepesa
Vesi: “Khalani wakubzicepesa, mucimbawona winango kukhala wakukuposani.” — Afil. 2:3.
Kodi n’Ciyani Comwe Paulo Adacita?
1. Onani VIDIYO, ayai werengani Mabasa 26:2, 3. Patsogolo pace kumbukirani mibvunzo iyi:
-
Kodi Paulo adalatiza tani kubzicepesa pomwe akhalewalewa na Mambo Agripa?
-
Kodi Paulo adalatiza tani kuti akhalemekeza Yahova na Fala lace, Bibliya, m’mbuto mwa kubzilemekeza? — Onani Mabasa 26:22.
Kodi Tikupfunza Ciyani na Bzomwe Paulo Adacita?
2. Tikambakhala wakubzicepesa na kumbalewalewa mwaulemu bzin’dzacitisa kuti wanthu atetekere mafala yathu.
Tewezerani Paulo
3. Mbalewalewani mwaulemu. Pomwe mukuceza na wanthu, mbatcenkhani kubziwonesa kuti mumbadziwa bzinthu bzizinji kuposa iwo. Ndipo mbalewalewani nawo mwaulemu.
4. Mbalatizani kuti bzomwe mukupfunzisa bzikucokera m’Bibliya. Bibliya lina malango yomwe yangathandize wanthu pa bzomwe akukumbuka na momwe akubvera. Ndipo tikambaliphatisa basa pomwe tikuceza na wanthu, bzin’dzacitisa kuti cikhulupiro cawo cikhale cakulimba.
5. Mbakhalani wakugwa mpfuwa. Mun’funika lini kungingimiza munthu kukhulupira bzomwe mukulewa. Tikufuna lini kunesana na wanthu. Koma mbakhalani wakubzicepesa mwa kukhala wakugwa mpfuwa na kuzindikirambo nthawe yomwe mungacoke pamuipo. (Mim. 17:14; Tito 3:2) Ifepano tikambakhala wakugwa mpfuwa pomwe tikuceza na munthu, pinango bzingadzacitise kuti kutsogolo munthuyo adzafune kutetekera mafala yathu.
