KUYAMBISA MACEZA
PFUNZIRO 6
Khalani Wakukhwimika
Vesi: “Tidakhwimika mwakuthandizidwa na Mulungu, ndipo tidakuuzani mafala yabwino.” — 1 Ates. 2:2.
Kodi n’Ciyani Comwe Jezu Adacita?
1. Onani VIDIYO, ayai werengani Luka 19:1-7. Patsogolo pace kumbukirani mibvunzo iyi:
Kodi Tikupfunza Ciyani na Bzomwe Jezu Adacita?
2. Ifepano tin’funika kukhala wakukhwimika kuti tikwanise kupalizira mafala ya Umambo mwakusaya tsankhulo.
Tewezerani Jezu
3. Mbathembani Yahova. Mzimu wa Mulungu udathandiza Jezu kuti akwanise kupalizira ndipo un’dzakuthandizanimbo imwepo. (Mat. 10:19, 20; Luk. 4:18) Mbakumbirani Yahova kuti akuthandizeni kukhala wakukhwimika kuti mukwanise kupalizira wanthu omwe mungawagope. — Mab. 4:29.
4. Mbatcenkhani kuyeruza munthu thangwe ra mawonekedwe yace. Nthawe zinango, ifepano tingazeze kuceza na munthu thangwe ra mawonekedwe yace, bzomwe iye anabzo ayai thangwe ra bzomwe ambakhulupira. Koma kumbukirani ibzi:
-
Yahova na Jezu ambadziwa bzomwe bziri mumtima mwa munthu; koma ifepano timbadziwa lini.
-
Tin’funika lini kukumbuka kuti munthuyo an’themera lini kukhala mtumiki wa Yahova.
5. Mbakhalani wakukhwimika na waulemu. (Mat. 10:16) Tcenkhani kunesana na wanthu. Malisani maceza mwaulemu penu munthuyo akufuna lini kutetekera mafala yabwino ayai penu mukuwona kuti muli pangozi. — Mim. 17:14.
