Davide ankufambisa karo ku mbuto yomwe ankuizindikira lini. Bzizindikiro bza mu mseu, bzinkulatiza kuti iye wasocera. Bzinkuwoneka kuti iye wapita mu mseu wakuphonyeka.

Bzingadakhala kuti imwepo ndimwe Davideyo, mungadacita tani?

Pana bzinthu bzomwe mungacite, ninga ibzi:

1. Mungakumbire wanthu kuti akulatizeni njira.

2. Mungawone pa mapa ayai mungaphatise basa mtcini wakudziwika ninga GPS.

3. Mungapitirize kundoyenda kutsogolo, mucidikhirira kugumana njira yakulongosoka.

Bzinkuwonekeratu kuti Njira yakumalizirayi in’thandiza lini na pang’onopo.

Njira yaciwiriyi, ingathandize kwene-kwene kuposa yakuyambayi. Ndipo kuphatisa basa mapa ayai GPS, bzingakuthandizeni kugumana mseu omwe ungakufikiseni komwe mun’funa kuyendako.

Bibliya lingakuthandizenimbo mwa njira ibodzi-bodziyi.

Bukhu limweri lingakuthandizeni:

• kulimbana na mabvuto yanu

• kudziwa momwe muliri na momwe mungakhalire munthu wabwino

• kudziwa momwe mungakhalire na moyo wabwino kwene-kwene

Tikandodziwa kulewa-lewa, ifepano timbacita mibvunzo.

• Mbani adalenga kudzulu?

• Thangwe ranyi nyenyezi zimbayetima?

Tsono tikakula, timbayamba kucita mibvunzo yakubverana na bzomwe bzimbaticitikira.

• Thangwe ranyi bzinthu bzakuipa bzimbacitika?

• Thangwe ranyi wanthu ambafa?

Apa tani penu mitawiroyo ikhalipo kale mu Bibliya nthawe zensenezi?

Wanthu azinji ambalewa kuti Bibliya ndakudzala na bzidapi na bzinzano, ndakusalira m’mbuyo ayai ndakunesa kwene-kwene kubvesesa. Tsono, kodi Bibliya lidanesadi kulibvesesa ayai ndibzo bzomwe wanthu ambandokumbuka?

Wanthu ambayesa kuti Bibliya limbapfunzisa kuti Mulungu ndiye omwe ankutonga dziko la pansi. Tsono, n’cadidi bzimwebzo? Dzikoli ladzongeka! Ladzala na kuwawa na kubonera. Matenda na infa, kusauka na malengwa ya pansi. Bzingakwanisike tani kuti Mulungu wa lufoyi acitise bzinthu bzensenebzi?

Kodi mun’funa kudziwa mtawiro wace? Bzomwe Bibliya limbalewa bzingakudabwiseni.

Pinango mwazindikira kuti malango yense ya mu broxurali yacokera m’Bibliya. Mboni za Yahova zimbakhulupira na mtima wense kuti Bibliya lina malango yakuthandiza. Ifepano tingalikhulupire Bibliya thangwe ‘lidafuliziridwa na Mulungu, ndipo lina phindu pakupfunzisa, pakutsimula, pakulungamiza bzinthu.’ (2 Timotio 3:16, 17) Mungacite bwino kulifufudza mwekha Bibliyalo, muciwona kuti napo lidanembedwa kale-kale, iro lina malango yakuthandiza kwene-kwene nsiku zino.